Ботагөз Тасеменова, Манаш Қозыбаев атындағы СҚму студенті дидар және оның достары

Өнер өлкесінде өз қырларымен танылып, талай додаларда бақтарын сынап, жеңіс тұғырынан көрініп, өңіріміздің абыройын асқақтатып жүрген талантты жастар баршылық. Солардың бірі – қаламыздағы өнер десе ішер асын жерге қоятын “Музыкалық эстетикалық бейіндегі дарынды балаларға арналып, мамандандырылған мектеп-интернат-өнер колледжінің” биылғы түлектерінен құралған “MixArt” әншілер тобы. Құрамында төрт жігіт бар топ 2012 жылдың он бесінші қыркүйегінде өмірге келген. Содан бері түрлі сахналарда ән шырқап, тыңдармандарын әдемі дауыстарымен, ән айту мәнерлерімен, өзгеге ұқсай бермейтін дара қасиеттерімен тәнті қылуда. Квартеттің көркемдік жетекшісі Дидар Темірболатов:

argaiv1529

– “МixArt” ағылшын тілінен аударғанда “әртүрлі өнер, аралас өнер” деген мағынаны білдіреді. Бұл – біздің репертуарымызға қатысты айтылған сөз. Яғни, біз әртүрлі жанр мен тақырыптардағы әндерді орындаймыз. Ең бастысы, төртеуміздің дауысымыз үйлесіп, бір-бірімен жарасым тауып, кемшіліктерімізді толықтырып отырса болғаны, – дейді.  

Екі жыл ішінде аталмыш өнер ұжымы түрлі байқауларға қатысып, айтулы жетістіктерге жетіп жүр. “Таңшолпан”, “Роза ветров” атты республикалық ән сайыстарында лауреат атанса, талай өнерлі өрендердің бағын жандырып, талабына қанат байлап, үлкен сахналарға алып шыққан “Жас қанат” конкурсында жүлделі бірінші орын алған. Ал, “Майские звезды” әскери-патриоттық әндер сайысында бас бәйгені еншіледі.