Дэбес калыклэн сямъёсыз но йылолъёсыз,
фольколъя но этнография ужез нуись коллективъёс
Котькуд сям, йылол - со адямилэн улон сюресэз. Мертаны сое укыр секыт. Малы ке шуоно со мертэтэ пыре быдэс калыклэн дауръёс чоже улэм-вылэмез. Оз шат вордиське сямъёсмы калыклэн кылдэменыз чош? Оз вералэ шат пересьёс соосты гажано но чырты весьысь кожыосты кадь огинэ люкано шуыса?
Та чектэмъёсты санэ басьтыса, туала дыръёсы ми, дэбесъёс, сямъёсмес, йылолъёсмес бичаса тыримы фольклорлэн паймымон ныпьетаз. Соос ныпьет сайын туннэ милемыз визьмало, сюлэм котжожез палэнто, мылкыдмес бурдъяло... «Чупчигуръёс» фольклоръя фестивальмес радъян азьын, ми кенешим, усьтом-ай со ныпъетмес.
Та веранамы пыртэмын фольклор коллективъёс, кудъёсыз пыриськизы фестивальлэн ужаз.
«Тюрагай» фольклор коллектив Кылдиз: 1968 аре Такагуртысь культура юртын.  Коллективен ужа Бессонова Римма Аркадьевна – культура юртэн кивалтись. Татын Такагуртын улисьёслэсь сямъёссэс, йылолъёссэс бичало, вуж кырзанъёсты люкало. 80-ти аръёсы коллектив вуылиз Москвае. Нош 2012 аре ветлиз Ижкаре, ученойёслэн юртазы гуртъёслы сизем фестивале. Таяз учыре «Тюрагайёс» возьматизы «Жаг вылэкуштон» йылолэз. Пуштросэз солэн таче. Куке нылпи висиь яке чиед будэ, яке малпало солы син усем шуыса, соку та йылолэз лэсьто. Азьпал гуртазы улись «капчи киё» адямиез куное отьыны кенешо, лэсьтон ужзы сярысь солы уг иворто. Куно лыктон азьын выжзэс пужым вайёсысь керттэм чужонэн чужо, нылпизылы тазалык курыса. Собере чужонзэс кенер сьоры кушто, со чужон вылэ пичизэс поно, асьсэос корказы пыро. Отем кунозы лыктыкуз пиналэз шедьтэ но корка пыртэ, тиляд овол-а та нуныды шуыса юа яке семьяазы кутыны шедьтэм нылпиез куре. Кузёос нылпизы соослэн шуо, яке нуныез басьтыны соглаш луо. Нылпиез шедьтись солы выль ним сётэ, шудо- буро улон кузёослы сизе. Кунолы кузёос шедьтэм нылпи понна чушкон кузьмало. Пичиез семьяе кутэм бере, пужым чужонэз суто яке шур ву кузя келяло. Верало, чужонэн чош пиналзылэн висёнъёсыз мед кошкозы шуыса. Берло корка тыр куно отчало, выльысь «пинал пыртон» лэсьто. Лыдъяло вылэм, «Жаг вылэ куштон» йылол бере, нылпи выльысь вордиське шуыса.
«Ошмес» фольклор коллектив
Кылдиз: 1990 аре Тыловайысь культура юртын. Коллективен ужа Миронова Людмила Ильинична, Тыловай культура юртэн кивалтись. «Ошмесын» кырзасьёс асьсэос частушкаос, кырзанъёс гожъяло.1992 аре Ижкарын радъям финн-угор калыкъёслэн праздниказы пыриськиз, 1994 аре Пичи Пургае сизьыл йылолъёслы сизем фестивале вуылиз. 1999 аре коллектив Г.М. Корепанов-Камскийлэн юбилеяз ветлиз. 2001 аре Глаз еросын «Гырон быдтон» Элькун праздникын ёросмы понна кыл кутиз.
Та коллектив «Жыт пуконысь» кырзанъёсын тодматиз. Тросэз гуръёс али вунэмынэсь ни, «Ошмесъёслэн» репертуаразы гинэ кылисько. Озьы ик « Ошмесъёс» асьсэос кырзанъёс , частушкаос, мадёнъяс гожъяло. Дэбес ёросын улисьёслы тодмо Зоя Леонтьевалэн кырзанъёсыз.
« Льомпу сяськаос» фольклор коллектив
Кылдиз: 1982 аре Уд- Лем культура юртын. 2003 арысен коллективен кивалтэ Гаврилова Людмила Львовна, клубысь художественной руководитель. Коллектив сюлмысь пыриське ёросамы дасям ужрадъёсы. Калык сямъёсты, семья пушкысь йылолъёсты эскере, ужаз кутэ.
«Вуюись» фольклор коллектив
Кылдиз: 1985 аре, кивалтэ коллективен Тольен клубысь художественной руководитель Галина Каракулова. Коллективе ветлисьес семья пушкысь сямъёсты но праздникъёсты возьмато
Таос возьматизы «Жаг вылэ куштон» йылолэз. Сцена вылын тае пуктон понна, Тольён клубын ужасьес но шаертодисьёс пырыен- пырыен та сямез пертчизы. Тольён палъёс висись, будисьтэм пиналэз нуо вылэм силё куян интые яке кенер сьоры пукто. Кин нырысетиез адзе, со ик нылпиез гуртаз вае. Берыктэ дораз, шедьти, шуыса вазиське. Нылпилы выль ним сето, вазисько нм пумитаз мукет нимыныз. Озьы, пе, шайтанлэсь, син усемлэсь вато со нылпиез. Со нуналэ порало, куно отчало, юон лэсьто.
«Ялыке» фольклор коллектив
Кылдиз: 1999 аре Уйвай клубын, кылдытиз сое Серафима Леониидовна Иванова. 2012 арысен коллектив выльдиськиз, али соин кивалтэ Людмила Ложкина. Коллективлэн ужаз пырисько 8-9 класссъёсын дышетскисьёс.
«Ялыке» ансамбль пыр Уйвай гуртын трос ужрадъёс ортчо. Егитъёс тодматско вашкала йылоъёсын но сямъёсын. Озьы ик эскерто колхозъёс ужам вакытэ ортчылэм праздникъёсты.
Уйвайёс фестивальын «Возь вылын шудонэз» возьматизы.
Тодазы вайытизы, кызьы вазен дыре егитъёс шутэтскылизы, возь вылын шудон лэсьтылизы.
« Медло гур» этнография но фольклорпъя коллектив
К
ылдиз: 1980 арын Зар- Медла культура юртын. Кивалтэ соин Зар-Медла культура юртысь художественной руководитель Анна Чернова. Ансамбль пыриськиз ни Элькун но финн-угор калыкъёслэн « Воршуд» фестивалязы, Элькунысь «Гербер» праздникъёсы. Удмурт культуралы сизем Ижкарын ортчем гала -концертэ но вуылизы ни, отын ик Лауреат луизы. «Нумыр сюан», «Куака кышкатон» но мукет вунэтэм сямъёсты пыр-поч дасяса, туристъёсты но пумитаз ни та коллектив. Вераны кулэ, ас ужазы медлоос куто выль произведениосты но. Репертуаразы вань калык кырзанъёс, кудъёсыз берыктэмын зуч кылысь.
Таяз учыре соос Медло сямен «Куно пумитан» возьматизы. Пось перепечен, юмал шаньгиен, виятэмен вань куноосты утялтизы. Жок сьорын пукыкузы, кунооссэс шулдыртизы.
«Шулдыр мылкыд» фольклор коллектив
Кылдиз: 1985 аре, кивалтэ соин Сюрногурт клубысь художественной руководителез Нина Куклина. Сюлмысь пырисько портэм ужрадъёсы, усто возьмато гурт ужъёслы сизем йылолъёсты.
«Турнаны потон»
Гуртоос люкасько корка котыре, кытын выль кен вань. Егитъёслы сёто лентаосын чеберъям мажес но литовка. Собере ваньзы чошен луд вылэ турнан кошко. Уж кутскон азьын тужгес ик гажано пересь кышно восяське, турын мед нап, тырмымон луоз, мед инкуазь сое утялтын юрттоз шуыса. Ужзэс быдтыса, ваньзы ял карыны, сиськыны пуксё. Соку ик егитъёслы чектонъёссэс верало. Кышнояськем пилэн анаез кумышкаен утялтэ. Собере шулдыръськон кутске ни. Егитъёслы шуд сизё. Гуртэ бертон азьын нош ик пересь вазиське Инмарлы куронъёссэ выльысь вераса, турнасьёс кырзаса гуртэ берто.
« Купанча» фольклор коллектив
Кылдиз 1986 аре. Кивалтэ соин Антонида Хохрякова, Данегуртысь (Старый Кыч) библиотекаен кивалтись. Вуж кырзанъёсты, куно пумитан йылолъёсты ужазы куто.
«Веник кертон»
Веник тиян ветло «Гербер» бере но «Выль жук сиён» азьын. Со дыре дасям веник эмъя но висёнъёсты бурмытэ шуо вылэм. Нырысь ик вось лэсьто. Нюлэсмуртлэсь куро, кызьпуосты тиян мед лэзёз шуыса, оскыто, ненег писпуосты исатэк кельтыны, сикысь мукет будосъёсты жаляны тыршозы шуыса. Тиям вайёсты гуртазы вайыса, нылкышноос веник керттын пуксё. Кертто кырзаса, ог-огзылы юртто. Воргоронъёс веник пумъёсты тирен чогыло. Вашкала дыре веникъёсты Москвае базаре келялляло вылэм. Веник керртыкузы соин ик кырзан но кылдэм, кудаз верало, веник керттом но Москвае нуом шуыса.
Достарыңызбен бөлісу: |
