«Ох! Макем умой!» мур-мур шокчиз Петыр, сике пырыса. Тулысэн пыӵам омыр лулэз ик тыре. Быдэс улос дунне сайка кема иземез бере. Кызьпуос, пипуос котькуд пучыенызы, ваенызы шумпотыса шонало тулыс шундылы

«Ох! Макем умой!» - мур-мур шокчиз Петыр, сике пырыса. Тулысэн пыӵам омыр лулэз ик тыре. Быдэс улос дунне сайка кема иземез бере. Кызьпуос, пипуос котькуд пучыенызы, ваенызы шумпотыса шонало тулыс шундылы. Ӵогыр-ӵогыр вене, лек тусо кызъёс гинэ но вайёссэс нёрто вылӥе, шуныт доры. Котыр пеле пырымон чалмыт. Куд-ог интыосын гинэ, дӥсьтытэк пислэг яке мукет тылобурдо куаразэс сёто но, берен чус луэ. Ас куаразылэсь кышкало кадь. Вань сик тылобурдоос но пӧйшуръёс кузь но кезьыт тол куспын лымы улэ кынмыса кылиллям, оло. Городын улэм вылаз, гуртэ бертыса, кызьы бен ӵыдод сике ветлытэк.

Петыр та сикез вить чиньызэ кадь умой тодэ. Пеймыт уйин но, синзэ керттылыса но, гуртэ бертыны сюрес шедьтыны быгатоз. Со будэмын та сикын. Бен-бен, паймонэз ӧвӧл. Вить арес тырысен со атаеныз, Бадӟым Мишаен, усто пӧйшурасен но лесникен, трос дырзэс ортчытылӥзы та сикын. Вазь тулыс ик соос кызьпу пучы, пужым пучы, кыз ӵыжин октылӥзы. Гужем ке вуэ эмезь, эмъюм турын-куар октылӥзы. Сӥзьыл вуэмъя палэзь но легэзь куасьтылӥзы. Нош кӧня пӧртэм губиосты тодэ Петыр. Кытын соос будо, кудӥз сиыны яра, кудӥз - уг, кызьы шонер октоно, куасьтоно, сылалтоно. Атайзэ тодаз вайыса, ымнырыз пальышаз. Туж учкымон вал атаез. Юнме ӧвӧл шуиллям сое «Бадӟым Миша». Гуртазы со кадь воргорон ик ӧй вал, дыр. Ӝужыт мугоро, паськыт пельпумо, бабылес йырсиё, чагыр синмо. Одӥг пельпум вылаз пукон вылын кадь пукылӥз Петыр. Полатьын кыллись пыжкрезьзэс ке кияз кутэ, котыр дунне выжыкыллы пӧрме. Туж ӝог бызьыло золтэм сиос вылтӥ бадӟым киосысьтыз кузь чиньыос. Корка тыр йырез поромытӥсь гур вӧлске: отын шумпотон но, данъяськон но, яратон но, кайгырон но кылӥське. Таӵе дыръёсы пичи пилэн сюлэмыз мур яратонэн тырылӥз, анаез но атаез шоры учкыса. Со вакытэ выжыкыл дуннее вуылӥз кадь Петыр. Тужгес но шудоез дунне вылын таӵе дыре вал со. Пӧшураны но яратылӥз атаез. «Кӧттырмостэм луыны уг яра. Ятырез кулэ ӧвӧл», - шуэ вал со. – Али кадь Петырлэн пель сьӧраз кылӥсько атаезлэн индылэм кылъёсыз. Пӧйшуръёсты но тылобурдоосты тросэн уг изъянты вал со. Одӥг-ог луд кеч яке кырпарсь вае вал. Соин тырмытэ…

Ӧвӧл ни солэн атаез. Анаезлэн небыт но шуныт кылъёсыз, бордаз ӝип-ӝип ӟыгыртыса лӥятэмез солы улоназ зэмос юрттэт луизы. Дыр ортчемъя Петыр но атаез кадь ик ӝужыт мугоро, паськыт пельпумо луиз. Шораз учкыса, син шумпотылӥз таӵе «юн тыпылы». Атаезлэн кырӟаны яратонэз Петырлы но пыӵаз. Школазэ йылпумъяса, со музыкальной училищее дышетскыны пыриз. Пӧртэм музыкальной инструментъёсын шудыны дышиз отын. Ачиз инкуазь егит пилы гурез кылон но валан сётэм, кожалод. Кыӵе гинэ инструментэз кияз уг куты, дун ошмес ву жильыртӥсь гур кылӥське ни котыре.

Городын улон умой ке но, сюлмыз кыске гуртэ, анаез доры, сике. Тани туннэ но, городысь бертыса, анайзэ урдлыосыз чигымон юн ӟыгыртыса чупамез бере, шонтӥз бакча берысьтызы сике.

Тулыс…Кыӵе сюлэм шумпотэ, пирсэкъя котькуд шунды силы, тулыс гурлы, усьтӥськись ненег кечсинлы. Петырлы соку ик йыраз лыктӥзы кылбур чуръёс:

Чик дыртытэк, каллен вамышъёсын

Тулыс лыктэ асьме доры.

Котыр улос тырме куараосын,

Шунды пальпотыса учке асьме шоры.

Матысь лӥял вылэ пуксьыса, кема пукиз на Петыр тулыс сиклэсь куараоссэ кылзыса. Шӧдыса но ӧз вуы, кызьы шундылэн берпуметӥ сиосыз, кыз йылъёсты ненег маялтыса, пумен кысӥзы. «Гурт пала вамыштоно ини. Беромиськем. Анай сюлмаськоз», - чилектӥзы малпанъёс Петырлэн йыраз. Со ӝогак интыысьтыз султӥз но, котырак эскериськиз, секыт умлэсь сазьтӥськем мурт сямен. Али гинэ куара сётӥсь, тулыслы но шундылы шумпотӥсь сик син азьын воштӥськиз. Ӝужыт кызъёс, ваче ки кутскыса, борддор кадь сыло. Секыт йылъёссы, Петыр пала някырскыса, «мадэ татчы ыштӥд» шуо кадь. Сикын чал-чал. Шуак пеймыт луэмысь егит мугор юзыр-кезьыр луиз. Петыр дыртӥз гурт палаз. Коть синмад донгы. Сомында та сикетӥ ветлэм мурт мырдэм шедьтэ на сюрессэ. «Марлы таӵе бероми. Тазьы йыромыны но кема ик ӧвӧл», - йыраз бергало малпанъёс. Ассэ юн-юн карыса, ӝог вамышъя пияш. Пыдъёсыз жадьымон кема мынӥз ни кадь Петыр, нош бакча беразы нокызьы но уг поты. Сикысь потэм интые, пумен пыдло но пыдло пыре, кожалод. Сокем сик пеймытгес луэ. Огшап дугдыса сылӥз пияш, оло, пуны куараосты ке но кылоз шуыса. Котыр чал-чал. «Бен, йыроми, лэся, ук, шайтан басьтон!? Анай но сюлмаськоз. Улытозям но сике ӧй вал йыромеме», - азьлань мынонъяз шара вераськемзэ ик ӧз шӧды егит пи. – «Одно татысь потоно». Пумен пыдло мынэмезъя валаз - йыромиз. «Мар кароно?» - чилектӥз йыраз.

Шуак азьпалысьтыз югытэз адӟиз. «Оло, бусы доры вуи», - шара верамзэ ик ӧз шӧды Петыр. Пеймыт чус сикын кӧшкемыт кылӥськиз куараез. Котыр эскериз но азьлань вамыштӥз, югыт пала. Малпамтэ шорысь потӥз нюлэ куше. Со куш питыр-питыр. Кин ке нимысьтыз озьы инты бушатэм, сузям, кожалод. Шораз ик сылэ ӝужыт кыз. «Ма инты-о та меда? «Кобла сиён ӧр» ӧвӧл-тэ?» - шуак валатскиз Петыр. Куке но пичи дыръяз, песятаез луло дыръяз, Петырлы мадьылӥз та инты сярысь. Пересь песятаез, тӧдьы дӥсьсэ дӥсяса но ӝук пӧзьтыны кеньыр кутыса, кошкылэ вал гуртысьтызы мӧйы муртъёсын сике. «Кобла сиён ӧре» вӧсяськыны, умой куазь курыны ветлылӥзы. Пичи пилы со тунсыко потылэ ке но вал, пыр-поч ӧз юаськылы. Пинал визьлы соин но тырмылӥз, вылды. Кыӵе жаляз али Петыр, песятаезлэсь юаськылымтэысьтыз. Кӧшкемамзэ вормыса но ассэ юн карыса, котырак эскериськиз. Кушлэн шораз ик йӧн-йӧн сылэ дауръем кыз. Ваче ки кутскыса гинэ быгатод ӟыгыртыны солэсь зӧк мугорзэ. Арлыдэзлы но инкуазьлы сётиськыса, лэся, вань сулэз куалмаськемын, ӵогиськем кадь луэмын. Зол но кужмо выжыосыз куд-ог интыосын музъемысь потэмын но быдэс ӝуйы басьтэмын. Шӧдӥське кӧня кужымез та мугорын! Паськыт улвайёсыз, кушын пезьдэм кечсинъёсты урод куазьлэсь утьыса сямен, вӧл-вӧл сыло. Нош кыз йылын ачиз толэзь небыт пилемъёсын изе, кожалод. Сокем со ӝужыт! Астэ пичи кузьылиен адӟиськод таӵе писпу бордын. Кӧня арес, меда, тыныд?! Каллен, дӥсьтыса но дӥсьтытэк, егит пияш вамыштӥз кыз доры. Песятайзэ тодаз вайыса-а мар-а, кышканэз но, кӧшкеманэз но быриз. Син азяз пуктӥз кузь тӧдьы тушо пересез, тӧдьы дӥсен, сьӧд ын шляпаен, кыз азе йыбыртыса но Быдзым Крезьзэ кияз кутыса, Инкуазьлэсь «Вӧсь гурен» умой куазь куремзэ.

Тыр толэзь ӝужамъя кушын югытгес луиз. Петыр адӟиз: кечсинлэсь куэм ковер пыд улаз валемын. Татын со кечсин сомында, вамыштыны интыез ик ӧвӧл. Кин ке сое нимысьтыз кизем малпалод.

Кытын ке но уйез ортчытоно шуыса, со кызлэн выжыяз интыяськиз, тыбырыныз кыз борды пыкиськиз. Оло тулыс уйлэн юзмытэныз, оло нош кӧбераны кутскеменыз мугорзэ тичыр-тичыр! быӵкыны кутскиз. Ассэ буйгатон понна, малпанъёссэ сазьтон понна синъёссэ кыниз но гур мытӥз. Тодӥсь ӧвӧл кӧня со озьы пукиз. Шуак инмын чилектэм кадь югак! луӥз. «Мар та?» - нёркак луиз егит пилэн сюлмыз. «Инмысь ин ӧс усьтӥськыку, куроно, пе, Инмарлэсь шудзэ», - тодаз лыктӥз песятаезлэн кылъёсыз. «Тазьы, шат, ин ӧс усьтӥське? Яке пӧртмаське?” – бергало Петырлэн йыраз юанъёс. Песятаез вералля вал, одӥг адями, пе, ин ӧс усьтӥськыку куалектонназ шуд курем интые «Туштэ сёт» шуэм. Со тырысь та адями кузь тушезлы ёрмыса улэм. Оло зэм вера вал песятаез, оло уг. Петыр «шуд» но, «туш» но курыны ӧз дӥсьты. Йыркуосыз пештырскыса, писпу борды золгес пыкиськиз на тыбырыныз. Син азяз инмысь куинь валъёс васькизы. Асьсэос тазаесь, чебересь, мугоръёссы сыръяло, нырысьтызы «ӵын» потэ. Горд, тӧдьы но сьӧд буёло валъёс кыз котыртӥ куинь пол котырскизы, музъемез пыдынызы ӵабкизы но чиптэм-чаптэм ышизы. «Осто, Инмаре, эн кушты вал», - ас понназ сипыртыны гинэ быгатӥз на Петыр. Йырсиосыз пежырак! султӥзы, лэся. Мугорыз пӧсьвуськиз, пиньёсыз лангыр карыны кутскизы. Кытысь ке ӧвӧл тылобурдо бурд шонам куара кылӥськиз. Ыркыт тӧл пельтэмъя, инмысь луд ӟазег уллё васькиз. Соос шыпытак пуксизы кечсинэн шобыртэм музъем вылэ. Валъёс сямен ик, огзы бӧрсьы огзы кызэз куинь пол котыртӥзы но, инме ӝутӥськизы. Кема учкиз Петыр ӟазегъёслэсь вылӥе тубемзэс. Оло пырак кизилиё инлэн пыдэсаз ик тубизы. Син куспын ӟазег уллё «Луд ӟазег лобӟон сюреслы» пӧрмиз. Паймымон дуннее вуэм кадь потӥз Петырлы. Егит сюлэм гадьысь потымон юн жугиське. Уйлэн пумыз ик ӧвӧл, кожалод. Сокем кузь потэ ини со пияшлы. Тыр толэзь но интыяз сылэ, оло кызлэн йылаз-а кугӟам?

Шыпыт луэм бере зубектэм мугорыз пумен нясь-нясь луиз. Ымнырысьтыз кезьыт нюлам вузэ ӵушиз но мур-мур шокчиз. «Олома дунне та», - ас понназ малпаз Петыр. – « Гуртэ бертыса мади ке, нокин уз оскы. Таид шузимем, оло, шуозы». Малпанъёсыз пумозяз ӧз вуэ… Пель сьӧраз каллен гинэ кырӟам гур кылӥськиз. Кырӟан гур пумен матэктэ. Ачиз но валатэк Петыр пыд вылаз тэтчиз но кыз сьӧрысь кылӥськись гур пала вамыштӥз. Со ас синмызлы ӧз оскы: толэзен югдытэм кушын егит ныл сылэ. Ас понназ кырӟа но кечсинъёсты киыныз маялля. «Мар адӟон та?!» - кӧбераз. Синъёссэ юн-юн кыниз но кык киыныз ик ӵушылӥз. Озьы ке но, адӟонэз ӧз ышы. Дӥсьтыса но дӥсьтытэк со вамыштӥз ныл пала. «Кин тон?» - каллен гинэ юаз пияш. Шуак луиз егит ныл. Кышкатскем тылобурдо выллем лопырскиз, лобӟыны дасяськиз, кожалод. Азьысьтыз егит пиез адӟыса, огдыре кышкатскиз но, абдраз но, кепыраз но.

«Инву-ныл» – шыпыртизы ымдуръёс. «Нош тон кин? Мар татын кариськод таӵе дыре? Кызьы татчы сюрес шедьтӥд?» - дӥсьтысагес юаз ини Инву-ныл. Ныллэн куараез жильыртӥсь ошмеслы укша, пеймыт уй кадь кузь йырси пунэтэз кускозяз, ненег, егит мугорыз бадярлы укша. Такем палёмытӥсь чеберез адӟыса, пумыса, синзэ вошъятэк сылэ Петыр. Воксё бакомиз. Оло одӥг юанзэ но ӧз кылы. Йыраз пумтэм малпанъёс бергало. «Та мыным адӟиське гинэ-а меда? Та зэмос нылаш-а? Нош мар каре со татын, огназ таӵе дыре? Нимыз но туж тунсыко». Огшап озьы сылэмез бере, Петыр, кӧлэмысь шуак сайкам адями кадь, сазьтӥськиз но, кепыраса, нылашлы мадиз сике лыктэм мугзэ но, йыромемзэ но. Нылаш, зэмен но, вылэм Инву-ныл – Инму-мумылэн нылыз. Котькуд уй кушысь кечсинъёсты лысвуэн пылатылэ. Оскыса но оскытэк, кылзӥз сое Петыр. Кыл бере кыл, вамыш бере вамыш. Нылашен пи ӧз но шӧдэ одӥг кыл шедьтэмзэс. Егит сюлэмъёссы оло лопыръяськыса кадь поръязы таослэн. Сыӵе умой вал ӵошен. Петырлэн вань кышканэз, кӧшкеманэз, сике лыктэм мугез но вунӥз. Ӧз но шӧдэ егитъёс кызьы инмын кизилиос ӟаректыны кутскизы. «Ой, мынам дыры вуиз кошкыны», - шуак вераз Инву-ныл. Со дыртыса мынӥз кыз доры. Улӥ вайёсыз ӝутӥськизы но, Петыр адӟиз марӟан ӧсэз. Егит ныл, ӧс пала вуэмез бере , ӝогак егит пи пала берытскиз но шуиз: « Монэн пумиськемед потӥз ке, тани та зундэсме чиньыяд пон но, берен татчы вуод. Нокинлы эн вера та учыр сярысь». Бызьыса сямен лыктӥз Петыр доры, но кияз понӥз ворпоё зундэс. Ӧсэз усьтӥськиз. Ӧтысь пиштэм югыт тыл палёмытӥз Петырез. Дыр ортчыса синъёссэ усьтӥз, азяз – нокин ӧвӧл. Олокӧня пол кызэз котыртыса но, нокыӵе ӧсэз ӧз шедьты. Адскиз гинэ, дыр, малпаз вал но, кияз кылем пичи зундэс сое сазёмытӥз…

Выль вордӥськись нунал ассэ шӧдытэ ни. Инбам ӟаректэмъя, кизилиос быризы. Шуак Петырлэн тодаз лыктӥз атаезлэн верамез, «сике йыромид ке, вань дӥсьтэ мыддорин берыктыса дӥсяно. Озьы гинэ берен сикысь потыны сюрес шедьтод». Со туж ӝог дӥсьсэ берыктӥз но, сюрес утчаны потӥз. Дас вамыш но лэсьтыса ӧз вутты, бакча беразы вуиз. «Паймод но бырод, ява. Ма, дол-дол, гурт бордын гинэ вылӥськем, лэся, ук!» верамзэ ик ӧз шӧды егит пияш. Дыртӥз гуртаз, сюлмаськись анаез доры. Номырзэ но йылтытэк, мадиз анаезлы: йыромемзэ но, «Кобла сиён ӧре» вуылэмзэ но, валъёсты но, ӟазегъёсты но. Инву-ныл но солэн зундэсэз сярысь гинэ чалмыт улӥз. «Оломае но кылод, ява», - мур-мур лулӟыса интыысьтыз султӥз Матрона. Бадӟым Мишаезлэн атаез, Петырлэн песятаез, гуртысьтызы вӧсясьсы вал. Со сяна кӧня ке мӧйы муртъёс гинэ тодылӥзы вӧсяськон интызэс. Отын соос Быдӟым Крезьзэс шудыса, вӧсям ӝук сиизы, Инкуазьлы вӧсяськылӥзы, умой куазь курылӥзы. Но пиез вазь кулэмен, нунокез пичи кылемен, песятайзы вань тодон-валанзэ сьӧраз нуиз. Нокинэ ӧз дышеты вӧсяськыны, ӧз возьматы сюрес «Кобла сиён ӧре». «Выжыысьтыз выжыяз мыныны кулэ вӧсясьлэн быгатонлыкез», - шуылӥз со. Гуртысьтызы воргоронъёс трос пол ветлӥзы сюрес утчаны но ӧз шедьтэ.

Петырлэн сюлэм поръя. Тулыс шундыен ӵош пачыла мылкыдыз. Нуналлэсь быремзэ витьыса чиданэз ик быриз ни вал. Я, тани шунды но пуксиз. «Мон эшъёсыным юмшаны мынӥсько» шуыса педло потӥз. Нош ачиз каллен гинэ бакча беразы васькиз но, кышкаса кадь чиньыяз зундэссэ понӥз. Шуак тӧл ӝутӥськиз, егит пи синъёссэ гинэ кыньыса вуиз. Тӧлпери сое кутӥз но ӝутыса нуиз… Котырын нош ик чус луиз. Петыр каллен гинэ синъёссэ усьтӥз но, со азьын нош ик бадӟым кыз. Уйбыт Инву-нылэн юмшазы кушетӥ, серекъязы, вераськизы. Чылкыт но ӟырдыт яратон каръяськиз егит сюлэмъёсы. Ӵукна вуэмъя Инву-ныл нош ик ышиз паймоно ӧс сьӧры, Петырез югытэн палёмытыса. Чиньыяз зундэссэ дӥсяны гинэ вуиз Петыр, тӧлпери сое берен бакча беразы вуттӥз.

Нунал ноку быронтэм кадь потэ Петырлы. Солэн сюлэм кырӟа, мылкыд бурдъяськемын. Быдэс дуннеез со дась вал ӟыгыртыны, чупаны. Со ЯРАТЭ!

Кытӥ ке ӧвӧл пилемъёс люкаськизы. «Зорыны, лэся, ӧдъя ук, таид», - шуыса Матрон укноысь укное ветлэ. Пумен сильтӧл ӝутскиз, азбарысьтызы палэзьпуэз оло музъемозь ик някыртэ, тани-тани чигоз. «Мар-о бен та тазьы лекъяське-ай», - ас понназ шара вераське Матрон, мудор сэрег пала берытскыса вылаз-вылаз кирос тырыса. Югак! чилектӥз но, музъем шори пилиськымон юн гудыртӥз. Быдэс корка интыысьтыз ик тэтчиз. «Осто, Инмаре, ӵашйиз ук таид кытчы ке. Осто, Инмаре, эн кушты вал» - сипыртэ Матрон. – «Лымы вылтӥ нырысетӥ гудыриез, малы ке, уг ярато пересьёс. Ар секыт луоз шуо вал. Охо-хо-хо.» Тае кылыса Петырлэн но сюлэм шымырскиз. Мае ке умойтэмзэ со но шӧдӥз кадь. Трос ик дыр ӧз ортчы, инбам сайкомиз, зорыса но ӧз вуы. Югытаз. Шунды азьло сямен ик ненегъяз небыт вож куаръёсты, кечсинъёсты. Гудыртэм бере омыр эшшо но чылкытаз. Петыр азбаре потиз но, гуждор вылэ выдыса, куинь пол погыльскиз: мугорыз таза но юн мед луоз. Озьы косо вал пересьёс.

Малы ке но сюлмыз чидатэк, со васькиз сик доры. Ӧз витьы ни шунды пуксемез но. Каллен гинэ дӥсяз чиньыяз зундэссэ. Поромем кадь тӧлпери ӝутскиз, сое музъем вылысь ишкалтӥз но, соку ик берен музъем вылэ сэрпалтӥз. Синъёссэ усьтӥз, йырыз-пыдыз интыяз-а шуыса эскериз но каллен гинэ пыд вылаз султӥз. Со нош ик тодмо кушын. Но кушсэ ӧз тодма… Кызэз гудыриен шуккыса, шори пилем. Кален ӵындэм гинэ ӝутӥське на. Таза мугорзэ гудыри сокем сӧсыртэм, вӧсьлы чидатэк ӝуштэмез ик пель сьӧраз кылӥське кадь потӥз Петырлы. Бадӟым кыз шоры учкыса курыт синвуосыз шапыкен васькизы бам кузяз. Пумем пыдъёссэ мырдэм кыскаса, вамыштӥз кыз доры. Куш тыр кеськы вал но, куара уг поты. Висись пересь мурт кадь кылле кыз. Мугорыз сьӧдэктэмын, пеньӟемын, сулъёсыз куш пасьтана пазямын, кечсинъёс нелькемын. Сюлмыз измем кадь луиз Петырлэн. Со катьтэмыса лэзиськиз но тыбырыныз пыкъяськиз кыз борды. Кӧня со озьы пукиз, тодӥсь ӧвӧл. Сикын тылобурдо тулыс гурзэ мытӥз вал но, ас куараезлэсь кышкаса кадь, берен чалмиз. Со куара сазёмытӥз Петырез. Котырак утчаськиз но валаз: кытын со, ма луиз. Ӝогак пыд вылаз султыса, эшшо эскериськиз на. Син шораз йӧтӥз кызлэсь кыдёке палдэм бадӟым пул. Сое кияз кутыса, зундэссэ чиньыяз пононъяз, «ӟеч лу, Инву-ныл! Мон тонэ ноку но уг вунэты!» - шуыса шыпыртӥз егит воргорон. Тани со бакча берын. Чиньысьтыз зундэсэз син шорын чиптэм-чаптэм ышиз.

Берло трос пол утчаз на Петыр сюрес «Кобла сиён ӧре» но ӧз шедьты.

Со пулэзлэсь Петыр лэсьтӥз Быдӟым Крезь. Нокин но дышетытэк, валэктытэк, ноку но та ужен вырылымтэ мурт пӧрмытӥз усто крезь. Ачиз Инву-ныл юрттӥз кадь солы. Сӥоссэ золтыса, шудыны кутске ке Петыр, инкуазь но кылзэ кадь: тылобурдоос чалмо, тӧл лапкоме, ошмес гинэ Инву-ныллэн куараеныз кырӟан гур жильыртэ.

Туннэ со дуннелы тодмо крезьчи. Быдӟым Крезеныз бадӟым концерт залъёсын шудылэ, пичи удмурт шаерзэ, гуртсэ, калыкссэ данъялля.

Нокин но ӧз валалля, малы синвуосыз васько бам кузяз, «Инву утчан гурзэ» шудылыкуз. Султыса но чабыса кылзылӥзы та гурез дуннеысь калыкъёс. Нокин но ӧз тоды, мар сюлэмаз та дыре егит крезьчилэн. Инву-ныл пыраклы кылиз Петырлэн сюлэмаз но кырӟан гуръёсаз…

Уйвӧт ӧй вал-а бен та?!...