С. Ф. Коротковонь «тунда. Кизоть пингонза» картинанц коряс сочинения анокламанди упражненият



Дата18.07.2016
өлшемі87.94 Kb.
МОРДОВИЯ РЕСПУБЛИКАНЬ ОБРАЗОВАНИЯНЬ МИНИСТЕРСТВАСЬ

МОРДОВИЯ РЕСПУБЛИКАНЬ ОБРАЗОВАНИЯНЬ ИНСТИТУТСЬ


С.Ф. КОРОТКОВОНЬ «ТУНДА. КИЗОТЬ ПИНГОНЗА» КАРТИНАНЦ КОРЯС СОЧИНЕНИЯНДИ МЕТОДИЧЕСКЯЙ РАЗРАБОТКАТЬ АНОКЛАЗЕ МРИО-нь ФИЛОЛОГИЯНЬ КАФЕДРАНЬ ДОЦЕНТСЬ РОГОЖИНА В.Ф.

С.Ф. КОРОТКОВОНЬ «ТУНДА. КИЗОТЬ ПИНГОНЗА» КАРТИНАНЦ КОРЯС СОЧИНЕНИЯ
АНОКЛАМАНДИ УПРАЖНЕНИЯТ

1. Лувость стихотворениятнень. Мусть существительнайхнень, азость падежснон.

Ломатть!


Мяляфтость и содасть:

Марстонь кудоньке минь –



Модась,

Марстонь валдоньке минь –



Шись.

Кудсонк коцай васттнень матсаськ.

Шитьке валдоц, лямбоц саты,

штоба касоль сёрось –



Кшись

Мезень кальдяв ульсь – юкстасаськ.

Кие лезды?

Аньцек минць.

Марстонь вийса ванфтсаськ

Эряфть!

Срафтсаськ ёткстонк кяжень перяфксть –

Тянь минь эздонк веши Пингсь.

(Н. Циликин)


2. Тексттнень лемдесть. Азость, кодама стильса синь сёрматф.

Тя шиня шкайхне аделасазь ваймамаснон; Ванды и синь, и масторлангса эряйхне – ломаттне – ушедыхть тевонь од лувкс, шинь од кярькс. Сяс тячи штайхть-нардайхть, аруяфтыхть пря, комлявть эзда пъчкафтыхть пря: симихть сомада – шкаень симомбяльда.

(ж. Мокша)

Космогониянь (миронь-масторонь тиемань) тевса ваймама ши, тевонь лоткафтома пинге. Тяфтама мяльёжесь ванфтовсь аньцек мокшетнень и еврейхнень кяльса. Кодамовок лия кяльса ёткшить лемоц апак сотнек космогониять мархта. Тя шиня Тонашинь мирса эряйхне ваймяйхть. Ваймяйхть Мокшаизмань оцю киге моли шкайхне, Джайнизмань, Буддизмань, Санкхьянь идеологиять ваныенза-ванфтыенза. Васедихть фкя-фкянь мархта и ваймосихть…

(ж. Мокша)

3. Сёрмадость. Мусть и азость сказуемайхнень.

Тя мяльть мон поладолине тяфта: тундась – потмонь надияма, цебярень учема. Кизотьке учсазь, но аф сяшкава. Сонць малады, афи фатят. Аш пяк лажадыхть сёксетивок. А вов тундати…

Эйзюронь ковсь – шобдавать сельмонь панжемац.

Коза аф варжакстат – лов. Лисендярят паксяв, тоса тундань шине нинге афи маряви. Перьфпяльсь нинге акша. А сяка тя ковсь тунданне. Инь васенцекс сашенды шивалдонь тундась.

(Нуянь Видяз)
ХУДОЖНИКТЬ И СОНЬ КАРТИНАНЗОН КОЛГА АЗОНДОМАСЬ

Степан Федорович Коротков мокшень художник. Сон шачсь 1956 – це кизоня Ковылкинскяй районца Альтя (Алькино) велеса. Ня васттне ёфси серцект Пензань областень модатнень мархта. Шуди тяса сетьме, ару ляйня, лемоцка, нать, мокшень – Ситьма. Тядянза-алянза Степанонь учительхтольхть: тядяц, Валентина Даниловна, вятсь начальнай класст, аляц, Фёдор Иванович, тонафнезень шабатнень историять содама.

Стёпа кассь, кода и сембе ялганза: тонафнесь, лездсь кудъётконь тевса, налхксесь-колендсь. Рисавакшнеманц кельгозе, сидеста сашендовсь урокта меле мазопнемс стенгазетать, тяшнемс плакат. И сембе сяка сельмодсь ялганзонды, конат тя ёткть налхкондсть ульцяса футболса. Класснай руководителец Пётр Иванович Давыдкин ляснезе: «Кенерят нинге, Федя, топть мельге ласькондемс. Няйсак, кядце моли рисавамати, архнек ламоня, ярашты эряфса».

Сон изь сърхксе арамс художникокс. Школада меле тяряфнесь поступамс университету, физико-математическяй факультету. Изь ёта. Мрдась куду аф весяласта.

А велесост вчёк практикасольхть Зубунь педучилищаста стирнят. Няезь Федянь рисунканзон, тусть мялезост, кошардозь цёрать няфтемс синь Ковылкинаса художественнай школань директорти Н.М. Трушкинонди. Мярьгат, сонць Шкайсь путозень эста ся валхнень стирнятнень кяльс. Кафта кизот тонафнесь Степан Трушкинонь видеса. Николай Михайлович и валса, и тевса лездсь од ялганцты тонадомс художниконь смуснень.

Меле Степан служась армияса. А 1977-це кизоня Саранскяйса панчфоль художественнай училища, Коротков сявфоль тоза тонафнема. Курссост аф кржаль машты кядь цёрада – Е. Балакшин, В. Карасёв, Е. Проничкин. Тонафтысноль Суриковскяй институтонь аделайсь С.С. Солдатов.

Аф тёждяль велень цёратненди эрямс ошса 36 цалковай лангс ковти. Пря трямс, да альбопт, краскат-месть рамсемс. Сяс исть атказакшне, къда повондсь оформительскяй тев, лия кодама «калымня». Степан Коротков лездсь тиемс мазы экспозиция Темникавань краеведческяй музейти. Педагогоц Сергей Семенович Солдатов кулезе, што ули художниконь-оформителень васта С.Д. Эрьзянь лемса изобразительнай искусствань музейса. Корхтась тостонь руководительхнень мархта, азозе Коротковонь лемонц. Музеень директорсь М.Н. Барановась и произведениянь ванфтысь Н.А. Косинец Степанонь васьфтезь пара мяльса, сявозь работама. Пингонь ётазь кучезь мокшень цёрать стажировкас академикть Грабарень лемса научно-реставрационнай центрав. И тясовок павазу васедема. Тонафтыкс Коротковонди арась марнек Россияса содаф реставраторсь Н.А. Маренниковась. Пингсь, няк, киньге и мезтьке аф ужяльдьсы. Коськихть, лазондовихть кунара рисаваф картинатне. Минь музееньконди тя пичефкссь содаф пяк лац. Картинань ванфтома васттне, запасникне, Советскяй ульцяса ащи колмогемонь колмоце номер кудть васенце этажсонзот. Вяре эряйхне аф весть начфнезь алуцеть. Картинатне нъльне куштакшнесть. Тяфтама палас повондсть Ф.В. Сычковонь произведениянзовок. Эста и тернезь Саранскяи Маренниковать. А тяни, няк, кучсть ширезонза тонафнема мокшень цёра. И мастерсь ашезе ужяльне пингонц, азондозь и няфнезь пачфнезень реставраторонь смуснень. Саранскяйса ни С.Коротков кармась тиендемонза сянь, мезти тонадсь Москуса.

1981-це кизоня С. Коротков шумордазе тонафнеманц Саранскяень художественнай училищаса. Покодема васта вешендемс изь сав – музейса реставраторонь тевда сатомшкаль.

Но художниконь асусь кошярясь аф аньцек «петнемс», «пъчкафнемс» лиянь картинат, рисавамс эстеензовок. Музеень оцюнятне кирдезь сонь ширенц тясовок. Од художникть шназе главнай хранительсь Н.А. Косинец, лездсь Степанонди касомс-кеподемс. 1989-це кизоста сявомок Степан Коротковонь картинанза кармасть няфневома республикаса, а меле зональнай и марнек Россиянь выставкатнень эса. Искусстваньконь менельса кърьвязсь нинге фкя валда тяште.

Мяляфтовсь Владимир ошстонь выставкась. Россиянь 55 художник аноклакшнезь тоза эсь картинаснон. Степан Коротков кочкайхненди няфтезень колма работанзон. Кафта картинатнень выставкань пуропты комитетсь шназень, сявозень няфтемс. Нятольхть «Шивалдсь комнатаса» и «Шивалдсь музейса». Тяконьшовор азсаськ, ся выставкада меле Коротковонь картинанзон рамазь Суздалень и Волгоградонь музейхне.

1991-це кизоня С.Ф. Коротковонь примазь СССР-нь Художниконь союзу (пяк курок тяда меле срадсь СССР-сь и сембе сонь «Союзонза»). Но искусствась изь кула, содась эряманц. Мокшень художниконьке няфтезень од картинанзон Москуса, а меле Россиянь лия живописецнень мархта Францияса, Реймс ошса. Степанонди максфоль казне «Зърнянь кисть – 92» Москувонь выставкаса.

Зърнянь кисть, архтоманя, зърнянь тюс… Ня валхе пяк лядяйхть Степан Коротковонь творчестванцты. И вона мес. Сембе сонь картинанзон эса инь оцю мяльсь, инь оцю вастсь максф шивалдти.

Степан Коротковонди музейсь кода омбоце кудоц… Мялень петиец… И рисавама кошардыец. Музейсь, бъта эрек вайме, сонь сонцень ваймопожфоц. Кемгафтува киза ни лийсь, кода С.Д. Эрьзянь лемса изобразительнай искусствань музейса ётась С.Ф. Коротковонь сонцень, персональнай выставкац. С.Ф. Коротков аф сёпондсы, таколдсь эста. Таколдсть лезды ялганзовок, музеень сотрудникне. Фкя тевсь – няфтемс ширде саф художникть картинанзон, и ёфси лия – кочкамс содаф, мала ломанть творчестваста инь цебярть, эрявиксть.

Выставкать панжемста ламотне азозь фкя и сяка мяльть: эзрай, эряфкшу художникненди кассть цебярь полафтыхть. Ся кизотнень С. Коротковонь, сонь ялганзон Е. Балакшинонь и В. Карасёвонь аф кяжиямга лемнезь «банщикокс». Аф, аф, синь исть шлёборьфне фкя-фкянь келувонь тяльмоса, исть копоря парнойста лисемда меле кельме пиваняда. «Банщикокс» синь лемдезь сяс, мес рисавасть, архнесть пиле варяшка мастерскойняса, кона Ф.В. Сычковонь банясоль.

Кой-кие Коротковонь картинанзон ванондомста, шять, мярьги: кядец тёждя, рисавай, бъта мор морай. А, бльшай, сембода стака тя «тёждяшить» сатомац. Шарьхкодеви, шава вайме архнити мазышись аф няфтеви, афкуксонь художникть ваймоса фалу кайги мора. Сон аф кулеви лиятненди, но соньфтомонза аф муви эрявикс тюссь. Тя потмовайгяльсь мърдафнесы мялямть шачема вели, корхтай тядянь-алянь вайгяльса. Али сире щавань… Мяляфтсы Стёпа, кода ёмланяста стяфнезе сонь бабац Очижинь шобдаваня: «Аде ванцаськ, кода шинясь эжди-валдопты». И ашезь арьсекшне сиренясь, уноконц ваймос сембе пингс илядыхть ня эжди сюролдатне, и сон муй вий няфтемс синь лиятнендивок. Мярьгат, сонць Шкабавазсь эста мъзолдозь варжакснесь вярде мокшень цёрокшть лангс и бъславась эсонза.

Менелень азороньконь мархта сотксонь кирдемать колга лама савсь арьсекшнемс мокшень художникти. Тя шарьхкодеви. Степан Фёдоровиченди савсь «петнемс-пъчкафнемс» кунардонь лама картина, синь ётксост Шкаень ликтольхть. Тя тевсь эжнезе седиенц, макссесь од темат эсь творчестванцтывок. Тяфта появась Шкаень ликнень одкстоптомаснон колга триптихсь.

Колма картинат. Вов реставраторть инголе синдереф шобдаза седяфкя. Тя кунардонь обраскя. Шкаень тядять кядьса ёмла Христоссь. Кинь-бъди аф ужяльди кядец лазонкшнезе ни ликонять. Омбоце картинаса няйсаськ, кода художниксь ужяльдезь «пъчкафты» синдереф ликть эса. А колмоцеса ни няйхтяма кенярдема и паваз – Богородицать ванфса аш сюцема и сюдома, Шкаень тядясь машты простяма.

Степан Фёдорович Шкайть колга арьсекшнемати лемдсь аф фкя картина. Синь ётксост «Михаил Архангелсь», «Андрей Рублевонь лятфнемс», «Спасительсь» и лиятне.

Христианствать 2000 кизонцты лемтьф выставкаса Москуса няфневсь минь художниконьконь С.Ф. Коротковонь «Казанская Богоматерь» картинац. Няфневсть сонь работанза Саровса, ичкоздень Сеулса (Лямбе ширдень Кореясь), Магдебургса (Германиясь), Хельсинкаса (Финляндиясь).

С.Ф. Коротков эсь картинанзон алу путнесы атянь-атянь тяштть – Ψ (вяри канни шинь сюролданди тяштть).

Катк шивалдонясь фалу ули мокшень художниконьконь мархта.


КАРТИНАТЬ КОРЯС КОРХТАМАСЬ

С.Ф. Коротковонь ламоц картинанзон эса няйхтяма шивалдть. Азода картинат, коса няфтеви шись. («Шивалдсь комнатаса» и «Шивалдсь музейса»). Пара улель няфтемс репродукциятнень.

С.Ф. Коротков картинанзон эса няфтезе шивалдть. Тинь инголент «Тунда. Кизоть пингонза» картинанц. Азость, мезе няйхтяда тя картинаса? (Картинаса няфтеви кизоть пингоц – тундась. Тундть маладоманц художниксь няфтезе вальмава ваномста).

Нинге весть лацкас ваность картинать. Туф ли сон мяльс? Мес? (Шабатне азсазь эсь мяльснон). Тунда. Лятфтасть, кона кофне лувовихть тунданнекс. Мъзярда ушеды солама ловсь? Кие съргозьфнесыне шудерькскятнень, уды ляйхнень? Тонафтысь азсы, што мартти лиякс мярьголеме эйзюронь ков. Тунда живолготкшни сембе перьфпяльсь. Тя пингть полафткста пяшксе: лопаяйхть шуфттне, панжихть ловалдонь панчфне.



ВАЛОНЬ И СТИЛЕНЬ КОРЯС РАБОТАСЬ


1. Кочкада эпитетт валхненди: менельсь – валда, сенем, туцяфтома; ушесь – лямбе, мани, сетьме; ловсь – начка, равчкоткшни, калгода, озаф.

2. Кочкада синонипт ушеды, венемомс валхненди.

3. Лувость валзюлмотнень. Азость, кодама корхтама пяльксса няфтеви главнай валсь и путода эздонза кизефкс зависимайти.

Тяряфни тюремс, тюремс тундать каршес, пялькстыхть фкя-фкянь мархта, ванць лямбоняста, тялоть кяжень эйзюронза, кеподсь порф мархта варма, венемомс шинять каршес, коцай ваймосон, надиямань толня.


С.Ф. КОРОТКОВОНЬ «ТУНДА. КИЗОТЬ ПИНГОНЗА»

КАРТИНАНЦ КОРЯС СОЧИНЕНИЯ

ПЛАНЦЬ

1. С.Ф. Коротков – мокшень художник.

2. «Тунда. Кизоть пингонза» картинать описанияц.

2.1. Мезе няйхтяда картинаса?

2.2. Кода няфтеви шивалдсь?

2.3. Кода няфтеви вирсь?

3. Мяльхне, конат шачендыхть картинать ваномста?
С.Ф. Коротков – мокшень художник. Минь инголенк сонь картинац «Тунда. Кизоть пингонза», кона ульсь рисовандаф 1998 кизоня. Тя картинаса няфтеви тундась. Тя мяльть мон поладолине тяфта: тундась – потмонь надияма, цебярень учема. Тунданьке азоравакс вятьсы тевонц шачема ширьгя.

Эйзюронь ковсь – шобдавать сельмонь панжемац. С.Ф. Коротковонь картинц эса няфтеви тундась вальмава ваномста. Ванан вальмава и пелян шерьхкомазень, пелян, юмай ингольден мазышись. Шивалдсь валдоптозень семботь: вальмя лангть, занавескатнень архтозень зърнянь тюсса. Вальмя лангса налхкихть шить нумолнянза. И аньцек ни уфазеви эшень канды варманя, ня нумолнятне сиянь цильфонь кандозь комотнихть фкя вастста омбоцети.

Ков аф варжакстат – лов. Перьфпяльсь нинге акша, но кой-коста минь няйхтяма модань пакшкат. Шивалдть элякоткшнемац стак аф юмси. Вага инголенк лотконясь пяшксе ведьта. Сонць шись сенчтади менельста къргасыне семботь и келес куркт рахазь ёрясыне мастору. Перьфпяльсь, конань тялоньберьф сембе ширде сейнезь аера варматне, пульхкондезь туста даволхне и заря ланга пицекшнезь цят кельмотне, тяни кеняртьф. Вирсь съргозькшни тялонь удома вастстонза.

Тундась аф кельгсы нолашить. Конашкава цебярьста мазоптозе ушеть.



С.Ф. Коротковонь картинац канды кати-мезень валдоня и сельмованфонь салси мазыши.
Каталог: files -> File -> mordva


Достарыңызбен бөлісу:


©dereksiz.org 2019
әкімшілігінің қараңыз

    Басты бет