Удмуртлыкез азинтон: тросэз асьмеосын герӟаськемын



Дата11.07.2016
өлшемі169.1 Kb.
#191349
УДМУРТЛЫКЕЗ АЗИНТОН: ТРОСЭЗ АСЬМЕОСЫН ГЕРӞАСЬКЕМЫН
Азьвыл ивортэмъя, февраль толэзе районамы удмурт литературалы но культуралы сӥзем нунал ортчиз. Та ужрадэ Удмурт Элькунысь лыктэмъёс, районысьтымы удмурт гуртьёсысь удмурт культураез азинтон, удмурт кылэз дышетон понна кылкутӥсь культура удысын ужасьёс но дышетӥсьёс, «Кенеш» НКА-лэн правлениезлэн членъёсыз, гурт поселениосын кивалтӥсьёс пыриськизы. Та ик нуналэ Ижкарысь Элькун мунё театрысь артистьёс пиналъёсты спектаклен шумпоттӥзы. Ӟаны шор ёзо школаын удмуртлыкез азинтонэн герӟаськем ужпумъёсты эскеронъя котырес жӧк сьӧрын бадӟым вераськон луиз, «Кенеш» НКА-лэн правлениезлэн люкаськонэз ортчиз. Газетмес лыдӟисьёсты та ужрадлы сӥзем гожтэмъёсын тодматӥськомы.

«УМОРТОМЕС» УЗЫРМЫТОМЕ ШАПЫКЕН-ШАПЫКЕН
Та пумиськонын туж кулэ ужпумъёс ӝутӥськизы. Начальной классъёсын дышетскисьёслы удмурт кылъя учебникъёс, методической пособиос уг тырмо. Та сярысь но вераськон луиз.

Туж пайми, районысьтымы удмурт нылпиос нылпи садын вордскем кылзэс уг дышетско вылэм. Бигер но ӟуч государственной кылъёсты дышето, нош анай кылзы вужере кыле. Удмурт кылзэс мед вунэтозы таос шуэм кыл ӧвӧл-а ини та? Сюлэмме вӧсь кариз таӵе ивор.

Школаосын, нылпи садъёсын, озьы ик гуртъёсысь клубъёсын пӧртэм праздникъёслы сӥзем внеклассной ужрадъёсты удмурт сямен но ортчытъяны кулэ шуыса, вераськимы, кельшимы. Мон соин соглаш. Но таиз ласянь шугъяськонъёс кылдыло ик. Котькыӵе югдурлы тупась ӟуч сценарийёсты интернетысь капчиен шедьтыны луэ. Удмуртсэ утчаса-утчаса визь быдме. Малы бен отын (интернетын) ӟучез уно, нош удмуртэз ӧвӧл? Пумиськон та юанлы но валэктон сётӥз. Асьмеос – дышетӥсьёс, воспитательёс та уже ӧм ке пыриське, кин бен сое асьмелы кушаса сётоз? Йӧскалык политикая министерствоын ужась Флюра Ахметовна озьы ик шуиз: «Малы уд пыриськиське удмуртлыктэс ӝутӥсь-азинтӥсь проектъёс дасянэ? Вань ке сыӵе проектъёсты, малы со понна грантъёсъя конкурсъёсы уд пыриськылӥське? Малы ялан бабыса пукиськоды?» Возьыт ке но вал кылзыны, шонер ук пыкылэмзы.

Югдурмес тупатон вылысен, вазиськисько коллегаосылы: ойдолэ, узырмытоме интернет бусыез удмурт сценарийёсын! Котькудмы «умортоямы» быдэс арлы одӥг гинэ материал пыртӥмы ке но, районъя 20–30 сценарий луоз ук! Тӥни кытын асьмелэн кужыммы!

Мукетыз ужпум: со ик внеклассной ужрадъёслы шедьтыны уг луы туала удмурт кырӟанъёс. Туж витиськом вал, Удмуртиысь куноосмы удмурт кырӟанъёсын караоке-дискъёс ваёзы шуыса. Жаль, сыӵе вузъёссы ӧй вал. Та пумиськон бере ужпум таиз ласянь но умой пала воштӥськоз шуыса витисько.

Трокова Ольга.

Сизнер начальной школаысь дышетӥсь



ЭН ВОШТЭ ВЕСЬКРЕС КЫЗЬПУМЕС «БЕРЁЗАЕН»!
Удмурт культурамес азинтонлы сӥзем пумиськонэ пыриськизы Удмуртиысь вуэм куноос, асьме паласен – дышетӥсьёс, воспитательёс, завклубъёс, интыысь кивалтӥсьёс. Туж кулэ ужпумъёс ӝутӥськизы та котырес жӧк сьӧрын. Ваньмы валамы кадь – асьме дорын но нылпиос ӟучомыса мыно шуыса. Map кароно нылпиосмы анай кылзэс медаз вунэтэ шуыса? Та юанлы котькудӥз ужась ас вырйылысеныз валэктон сётыны кулэ, дыр. Нырысь ик, та понна ас выжыоссы азьын, калыкмы азьын кыл куто анай-атайёс. Гажало ке соос ас выжызэс, асьсэсыз асьсэос, сыӵе анай-атайёс ноку но вордскем кылзылэсь уз куштӥське. Вераськыны дышетскись экезэс но «таиз носик», «таиз ушки», «ручкиед-ножкиед» шуыса медаз дышетысалзы! Эн воштэ веськрес кызьпумес «берёзаен», ӵушъялмес – «ёжикен»! Эн возьдаське анай кылдылэсь! Удмурт кыл но туж чебер кыл ук со! Куд-огьёс понна солэн «тустэм» луэмез трос аръёс-дауръёс ӵоже зӥбетын улэмысьтымы, соин сэрен возьдаськемысьтымы, ик потэ ук!

Районамы ньыль гинэ удмурт библиотека кылемын. Удмурт кылмес куд ласянь азинтыны быгатӥськомы ми – удмурт библиотекарьёс? Ми доры школаосы, клубъёсы мында калык уг ке но ветлы, луонлыкъёсмы вань. Со – гуртысь но районысь калыкез удмурт культуралы, солэн историезлы сӥзем книгаосын тодматон, удмуртлыкмес азинтӥсь пӧртэм ужрадъёс ортчытъян но мукет. Та котырес ӝӧк сьӧрын вераськонъя усьтӥськизы на выль инвисъёс. Удмуртиысь В. И. Ленин нимо Элькун Йӧскалык (национальной) библиотекаын ужасьёс милемлы юрттэт кизэс мычизы – соос дорын луэм книгаосты ми табере асьме лыдӟисьёсмылы ӵектыны быгатӥськомы, туж вашкалазэ но, ӵыж-выльзэ но. Удмуртлыкен «висисьёслы», калыкмылэн историеныз тунсыкъяськисьёслы та туж бадӟым луонлыкъёс сётэ. Ижевске мынытэк но отысь ӝажыосысьтызы книгаосын тодматскыны-лыдӟыны, кулэ ке, ксерокопизэ но басьтыны луэ.

Куноос синъёсмес усьтӥзы на тани ма ласянь. «Котькудӥз ужась, библиотекаын гинэ ӧвӧл, дышетӥсь но, воспитатель но, завклуб но удмуртлыкез азинтонъя проектъёс лэсьтыса, грантъёсъя конкурсъёсы пыриськыны быгатэ» – шуыса, ӵектӥзы куноос. Кыӵе ке бадӟым ужрадэз кисыысь коньдонэн ӧвӧл, кун чотын но ужаны луоно вылэм шуыса валай мон тае.

Куноосмы буш киын лыктымтэзы, библиотекаосмылы быдэ «Туала удмурт писательёс» библиографической справочникен дискъёс кузьмазы. Таӵе тунсыко но пайдаё пумиськонлы ми туж шумпотӥм. Со понна удмуртлык «тылскемез» кенӝытӥсьёсмылы, куноосмылы пумтэм тау кылмес вераськом.



Анисимова Римма.

Ӟаны библиотекалэн кивалтӥсез



«ГЫРОН БЫДТОН» ЮРТТОЗ КУЛЬТУРАМЕС АЗИНТЫНЫ
18-тӥ феврале удмуртлык ӧрысь азьветлӥсьёс Ӟаны школаын Удмуртиысь куноосын пумиськизы. Трос тунсыко но кулэ ужпумъёс ӝутӥськизы татын. Удмурт Элькунысь Йӧскалык (национальной) политикая министерствоын ужась Флюра Ахметовна Чибышева Татарстанысь удмуртьёсты огазеясь НКА-лэн ужезлы огъя дунъет сётӥз. Мукет калыкъёсын ӵошатыса, удмуртъёс туж бездыт адско, я воксё но уг адско шуиз, со. Веранзэ азьланьтыса, вань люкаськемъёслы вазиськиз сэзьгес кариськыны, ужам уждэс но возьматыны быгатыны кулэ шуыса, визьмаз. Грантъёсъя конкурсъёсы пыриськыны ӧтиз.

Татын ик «Кенеш» НКА-лэн правлениезлэн заседаниез луиз. Леонид Дмитриевич Сапожников НКА-лэн нимыныз вылӥ кивалтӥсьёслы вазиськем гожтэтъёсын тодматӥз. Одӥгез – Ӟаныысь культурая юртлэн кивалтӥсезлы Ольга Кунаевалы «Татарстанысь культура удысысь дано ужась» ним сётон сярысь куриськон. Люкаськем калык талы дурбасьтэмзэ вераз. Зэмзэ но, Ольга Николаевна ас удысаз адӟем карымон ужа. Солэн сюлэм шунытэз покчиосты но, егитъёсты но, мӧйыосты но огазея. «Шулдыр ӝыт» ансамбле мылысь-кыдысь ӟаныос гинэ ӧвӧл, кисальёс но, кутешъёс но ветло. Солэн аркаяз асьме гуртоосмы вуылӥзы ни Ижкаре, Казане но мукет интыосы.

Мукетыз гожтэт – «Гырон быдтон» праздникез район куспын ортчытъян сярысь куриськон. Таиз но туж кулэ маке. Ваньмы адӟимы ини, макем юрттэ со асьме удмурт культурамес азинтыны, калыкмес дӥсьтӥсьгес, ӧткынгес карыны. Люкаськем калык но талы дурбасьтыса кизэ ӝутӥз. Кенешеммыя, та праздник арлы быдэ черодэн Лӧзя, Ӟаны, Ципья гуртьёсын ортчыны кулэ. Пӧрмиз ке, та списоке пыртоно Карлыган, Лельвиж гуртъёсты но. Куриськон гожтэмын районмылэн тӧроезлы. Но лыдӟисьёсмес шумпоттыны вазьгес на, дыр, шуыса малпасько. Кызьы учкозы-дунъялозы тае районэн кивалтӥсьёс, туннэ ик вераны шуг. Черодэн ортчытъянлэн эшшо одӥг бадӟым могӟетэз вань. Ӟаны но Лӧзя котырын та праздникез ортчытъямон интыос ӧвӧл на. Бигер гуртлы быдэ Сабантуй ортчытон интыос вань. Гырон быдтонлы но сыӵе ик инты куроно. Тае гурт калык ачиз мед бырйысал вылэм.

Йылпумъяса, гурт калыкмылэн нимыныз куноосмылы тау карисько. Ӝутэм ужпумъёсмес валче пужалляськыса быдэсъянэз гинэ кыле на.



Перфилов Юрий.

Средний Кушкет гурт поселенилэн тӧроез



ВЕРАСЬКИСЬ МУНЁОС НОШ МЕД ЛЫКТОЗЫ!
18-тӥ февралез, ми – Сырья гуртысь нылпи садэ ветлӥсьёс но дышетскисьёс – чидатэк витимы. Дышетӥсьёсмы азьвыл веразы вал мунё театр лыктэ шуыса. Ми солы туж шумпотӥм. Тани вуиз ук со нунал. Гань-гань автобусэ пуксьыса, васькимы Ципьяысь культурая юртэ. Милемлы спектакль туж кельшиз. Мунёос но удмурт сямен вераськыны быгато вылэм, кылэм-адӟеммы но ӧй вал. Песяен Бабайёс азьтэм вылӥллям, Тӧл (ветер) соослы визь понӥз, шонер сюресэ поттӥз. Озьы ог-огдэ валаса улӥд ке, ваньмыз но умой луоз шуыса валай мон. Нош ик мед лыктысалзы куное вераськись удмурт мунёос!

Зубарев Андрей.

Сырья школа нылпи садысь 4-тӥ классын дышетскись



БАДӞЫМ ДУННЕЕ СЮРЕС УСЬТӤСЬКЕ
18-тӥ феврале Покчи Лӧзя шор ёзо школаын Удмурт Кун университетысь удмурт кылтодосъя факультетлэн деканэныз Н. В. Кондратьеваен пумиськон ортчиз. Наталья Владимировна тодматӥз университетэн, пыр-поч валэктонъёс сётӥз удмурт филология факультет сярысь. Милемыз отчы дышетскыны пырыны но чортӥз. Валамы, отчы пыримы ке, милемлы бадӟым дуннее вамыштыны сюрес усьтӥськоз шуыса. Отын дышетскись студентъёс вуыло, пе, Венгрие, Финляндие, Эстоние. Асьмелы ӵыжы-выжы луись фин-угор калыкъёс сярысь но мадиз. Тодӥмы, студентьёс отын ас «гутёосазы» гинэ мӧзмыса уг пуко, шулдыръяськыны но вутскыло вылэм. Кин «Чипчирганэ», пе, ветлэ, кин пӧртэм экспедициосы пота, кин ке выль проектъёс бордын ужа, огъя вераса, улонзы но дышетсконзы пӧзе. Мыным та пумиськон туж кельшиз, трос выльзэ но кулэзэ аслым басьтӥ. Соин но вуоно деканэлы тау шуисько.

Кушаев Родион.

Покчи Лӧзя школаысь 11-тӥ классын дышетскись



ТАӴЕ ПУМИСЬКОНЪЁС ӴЕМГЕС МЕД ЛУЫСАЛЗЫ
Туж чебер но узыр асьмелэн удмурт культурамы. Паймыто выжыосмылэн кырӟанъёссы, эктонъёссы, шудонъёссы. Тӥни со узырлыкез вуоно поколениослы вуттон – воспитательёс, дышетӥсьёс понна нырысетӥ ужпум луэ шуыса валасько. Но кызьы пусйиз «Кенеш» НКА-лэн правлениезлэн членэз Пётр Григорьевич Чернов – ялан вужез вылын гинэ ужаса, азьланьлыкез уз лу. Соин но выльзэ утчан бордын но ужано. Выль кырӟанъёс, выль крезьгуръёс, выль эктонъёс пыртоно. Жаль, крезьгур гожъяны быгатонлыке ӧвӧл. Нош интернетысь утчаса-утчаса шедьтыны уг луы сыӵе макеосты. Мед луозы вал покчи нылпиослы караокеос (плюсовкаез но, минусовкаез но). Кудӥз чальгес шеде, созэ ик бырйыны тупа. Часэн-часэн интернетын бугыръяськыса пукымон дырмы чик но ӧвӧл. Соин но внеклассной ужрадъёсмы ӟуч сямен ортчыло. Ӟуч кылысь удмуртэ берыктыны быгатонлык но Инмар котькинлы сётымтэ.

Туж бадӟым но узыр кузьымен лыктӥллям куноосмы – нылпи садлы быдэ чеберлэсь но чебересь коробкаосын тямыс пӧртэм шудонъёс – нылпиослы, анай-атайёслы но воспитательёслы шумпотон ваиллям! Табере нылпиосмес кузьым-шудонъёсын шудытыса, удмурт кыллы капчиен дышетыны быгатомы.

2012-тӥ арысен бигер кылэз дышетонэз нылпи садъёсы но пыртӥзы. Куинь ар куспын та ужез азинтон понна воспитательёслы юрттӥсь кыӵе гинэ пособиос ӧз лэзьялэ ини. Кык метр ӝужда шкафмылэн ӝажыосаз уг тэро. Пумтэм-йылтэм дискъёс, Бигер Элькун символикаос, нылпилы быдэ сётъяськись лыдъян-чотан, лыдӟиськон материалъёс, кагаз бигер мунёос, плакатъёс, мукет пӧртэм шудонъёс, бигер мультфильмъёс...

Мынам валамея, котькыӵе кылэз дышетыны огкадь луонлыкъёс кылдытэмын луыны кулэ, дыр. Югдур ӧз ке воштӥськы, нылпиосмы ӝоген бигеромыны кутскозы, ӟучсэ дышетыны но со мында материалъёсмы ӧвӧл. Ваем кузьымзэс но дышетон ужамы кутомы меда? Удмурт кылэз дышетонлы одӥг гинэ час но висъямын ӧвӧл программаямы. Математикаез но мукет предметьёсты нылпиосмылы удмурт кылын валэктӥськомы. Но куд шораз бен пыртоно удмурт кылбуръёсты, удмурт выжыкылъёсты, удмурт сценкаосты, удмурт кырӟанъёсты, удмурт шудонъёсты? Азьветлӥсь бигер калык кӧньысал меда нылпиоссэс дышетон удысазы таӵе югдуре кельтысалзы ке?! «Кенеш» НКА-лэн та пумысен дышетонъя но наукая министрлы вазиськем гожтэтэз югдурез воштоз шуыса оскеме потэ.



Денисова Светлана.

Сырья нылпи садысь воспитатель



ВНУКЪЁСМЫ АЗЬЫН ВОЗЬЫТ МЕДАЗ ЛУЫ
Удмурт «Кенешлэн» люкаськонэз Ӟаны школаын ортчоз шуыса кылэммы бере, ми, покчи классъёсын дышетӥсьёс, туж шумпотӥмы солэн ужаз милемлы но пыриськыны кылдоз шуыса. (Та дырозь «Кенеш» НКА-лэсь люкаськемзэ «Азьлане» газетысь гинэ лыдӟиськомы вал). Юанъёс но трос кылдэмын: кытысь удмурт кылын методической литература шедьтоно, нырысетӥ классэ пырись дышетскисьёслы кытысь меда шедьтоно чебересь, выль государственной стандартлэн куронъёсызъя прописьёс, туала авторъёслэн внеклассной лыдӟонъя книгаоссы потэмын-а? Та юанъёслы рос-прос валэктон сётӥз «Удмуртия» издательстволэн директорез Ю. В. Кузнецов.

Ижкарысь лыктэм куноос пыкыло асьмесыз, улонмес, быгатонлыкмес, ӟеч ужъёсмес возьматыны ум быгатӥське шуыса. Соос туж шонер верало. Кулэ, туж кулэ удмуртлыкез ӝутыны. Мед луозы удмурт фольклор ансамбльёс покчиослэн но, арлыдоослэн но. Мед возьматозы соос сцена вылын удмурт калыклэсь ужамзэ, улэмзэ, шулдыръяськемзэ. Мед шӧдӥськоз отын вашкалазэ утёнэн ӵош выльёсыз бордын ужамзы но. Кылдытоно удмурт калыклэсь улэмзэ возьматӥсь музейёс. Соосты тузон люкан понна гинэ кылдытоно ӧвӧл, нылпиос понна ужась карон сярысь маппаськоно. Улӟизы ук тӥни Удмуртиын куиськон станокъёс, вашкала крезьёс!

Котькуд пинал нырысь ик кылэ анай кылэз, анай кыл пыр тодматске со инкуазен, ас шаереныз, калыкен. Озьыен, нырысетӥез лыдӟон книга но анай кылын луыны кулэ. Удмурт нылпиос понна одӥг гинэ «Кизили» журнал потэ. Солы гожтӥськисьёс ӧжытэн, журнал Всероссийской каталоге пыртымтэ. Со журналэз почта пыр куроно луэ. Туж тунсыко, узыр пуштросо «Ӟечбур!» газет потэ. Таиз но нылпиосмы доры уг вуы – гожтӥськисез одӥг-кык сяна ӧвӧл. Удмурт газет-журналъёслы гожтӥськон дунъёс но сокем бадӟымесь ӧвӧл. Удмурт кылмес утись-азинтӥсь изданиосты ӧм ке басьтылэ, соос ӝоген пытсаськозы ук. Вордскем кылзэ гажась анай-атай нылпиезлы таӵе кузьым лэсьтыны уксёзэ жаляны кулэ ӧвӧл шуыса, малпасько. Котькуд дышетӥсьлэн ужан ӝӧк вылаз удмурт газет-журналъёс мед луозы вылэм. Асьмелы внукъёсмы азьын возьыт медаз луы – «мар лэсьтӥды тӥ анай кылмес утён понна?» шуэм юан сётыкузы.

Оскиськом, татын ӝутэм вераськон татчы уз кыльы шуыса. Культура но дышетон удысын ужасьёс удмуртлыкез ӝутон борды ӝабырскыса басьтӥськозы. Озьы ик оскисько, таӵе люкаськонъёс ӵемгес луозы шуыса.



Игнатьева Людмила.

Ӟаны шор ёзо школаысь покчи классъёсын дышетӥсь



СЮЛЭМЕЗ ВӦСЬ КАРИСЬ ЮАНЪЁС
Удмурт Шаерысь лыктэм куноосмы котьку Балтась удмуртъёс понна пӧсь куазен сюэз юзматӥсь ошмес ву выллем луо: азьпалэзлы кужым сёто, мылкыдэз бурдъяло. Соос лыктэмен, ми шӧдӥськом кинлы ке но кулэ луэммес. Таяз ортчиз ёросамы: покчи пиналъёс понна Лӧзя, Ӟаны, Ципья гуртьёсын мунё спектакль пуктӥськиз. Вылӥ классъёсысь пиналъёс понна куинь удмурт шор ёзо школаосын ик Удмурт Кун университетысь удмурт кылтодосъя факультетлэн деканэныз Н. В. Кондратьеваен пайдаё пумиськонъёс ортчизы. Та пумиськон соослы азьпал улон сюрессэс бырйыны синзэс усьтӥз. Вакчи дыр куспын егитьёс сое шӧдӥзы: соосты витё, соос Удмурт Шаерын кулэ шуыса.

Туж трос ужпумъёс ӝутэмын вал Ӟаны школаын ортчем кенешын. Сюлэмез вӧсь карись юанъёс но чузъяськизы.

– Малы нылпи садъёсын удмурт кылэз дышетонъя занятиос ӧвӧл?

– Малы пинал нылпи садысь бертыса, анай-атаеныз ӟуч сямен вераське? Яке анай-атай, удмурт кылэз палэнтыса, нылпиезлы ӟучез гинэ пыӵатыны выре?

– Малы районысьтымы удмурт школаослэсь удмурт учебникъёслы заявкаоссэс Татарстанысь Дышетонъя но наукая министерство санэ уг басьты? Кӧня ар ӵоже ини одӥг курон но быдэстэмын ӧвӧл.

Лыктэм куноосмылэсь пыкылэмзэс но кылоно луиз: быгатэммес, ужмес возьматыны ум тыршиське, асьме «пуртыямы пӧзиськомы». Оскон кылдэ, та пумиськонлэн бервылыз луоз шуыса. Тау шуэме потэ ваньзылы, кин мыло-кыдо пыриськиз та туж кулэ ужрадэ.



Чернова Ирина.

Ципья шор ёзо школаысь удмурт кылъя но литературая дышетӥсь

Достарыңызбен бөлісу:




©dereksiz.org 2024
әкімшілігінің қараңыз

    Басты бет