Ямашкина с. А



Дата12.06.2016
өлшемі64.72 Kb.
#129141



АНОКЛАЗЕ: дополнительнай

образованиянь педагогсь

ЯМАШКИНА С.А

Сире Теризморга велесь.

(Няфтеви велень кудботма. Ащи шра и кафта скомнят. Лангсонза ацаф мокшень скатерть. Нинге ащихть пачат и боза. Лиси тев мархта стирь. Озай скомнять лангс и ушеды азондома мелодиять коряс.)

Маря щакась: Эрясь-ащесь масторлангса стирь: валда шама, акша шяярь, виде ронга. Сондедонза мазы ашельхть лият. Лемоцка сонь эсь лацонза мазыель – Масторава. Куване афоль яка-шяя стирсь, тоса марнек мазопнезе перьфпяльть. Сонь мархтонза марнек сонць шись пеетькшнель, моронь вайгяленц нармоттне салселезь мянь менельти.

Кельговсь стирсь вии и мазы богатырьти Тюштянди. Ашезе солафне ламос стирсь богатырть сединянц. Рьвяясть синь и аф лама пингта меле шачсть синь кафтась цёрасна. Лепт тейст путсть кафцеконди мазыхть - Мокша и Эрзя.

Кизоста-кизос кассь Масторавать семьяц. Появакшесть итть и идень итть. Тесна арась тейст фкя вастса. Кочкавсь семьясь марса и тусть синь эряма вастонь вешендема.

И музь синь сембода цебярь модать, сембода сянгяря лугатнень, ару ляйхнень и сенем валда менельть. Тя пингс эряйхть синь фкя-фкянь мархта ладязь, тевонь кельгозь. Лисихть синь стака тевда меле ляйть трвас, ушедыхть мора и синь вайгяльсна лии нармоннякс кеподихть менельти и кулевихть мянь шинь мадомати. Пяк ни кельголезь синь морамаснон.

Пара Масторавать мяльс, мес ладязь и тевонь кельгозь эряйхть иденза и уноконза. Иттнеге, оцюфнень лангс ваномок, тонафнихть тевти. Цёранятне – алянь тевти: сокама-видема, плотничендама, а стирнятне – авань тевти: кштирдема-сёрмадома, да пидема-панема. Идьста идьс синь максселезь эсь содамошиснон, тонафтолезь синь цебярь тевс.

Ялгат, кда тинь шарьхкодеде, мон азондонь тейнть ёфкс. Но ёфксозе монь шарфтф мяль мархта. А мяльсь сянь эса, што сембось тя тяниень пингонь. Масторавать семьяц – тя Сире Теризморга велесь, сонь иденза – тя школаса тонафни цёранятне и стирнятне. (Кенкшти чакайхть)А вов и синь!


( Сувайхть стирнят и цёранят. Стирнятнень кядьса сёрмадомат, кодамат, а цёранятнень кядьса- лаксемат, апак аделак карьхть.)
Маря щакась: Ётада! Озада! Сембе тяльктяда! Кунара ни эсонт учень. Пятнагодозеге явась. Варжасть пачанень.

Мялезе ськамон моли, сяс учан эсонт пяк. Сядонголе минь велесонк од ломаттне най кочксевсь сире ломанень пяли, кинь ашель сонцень семьяц и эрясь ськамонза.


Стирсь: Миньге, Маря щакай, ста учтама илятть эса! Пяк ни лажаттама тонь азксненди.
Цёрась: Пяк ни, Маря щакай, лац азондат, бта седистот моли азксце.

Маря щакась: Тейнть старандан. Штоба тинь лац содалесть эсь масторонттень, веленттень, сонь ломанензон – предканттень, да и лиятненди пачфтолесть монь азксонень. Ломанть аш мезьге питнец, кда аф содасы эсь историянц. Тинь содасасть, коста сявовсь Теризморга велесь?
Цёранясь: Марьсевсь, бта Атерь велеста минь лисеме.
Стирнясь: Аф, минь лисеме татар велеста.
Маря щакась: Лоткада жалнамда и мон тейнть азондса.

Видеце, цёраняй, атянь-атяньке ульсть Атерень. Севонь ляйнясь эста аф пяк оцюволь, марнек аф ляй ульсь, а оцю шудерькскя. Ульсь эста Теризморга велеть вастса кафта-колма кудня. Эряенза ашезь сода рузонь кяльть. Сяс, мзярда рузонь алясь кизефтезе муськи мокшавать, кода ётама ляйть туркс, ся ашезе шарьхкоде, мезе эздонза веши рузкс корхтай алясь. Эста сон кармась няфнема кядьса ляйть омба шири и мокшавась шарьхкодсь, што алясь ёрай ётамс ляйть омба шири. Авась пшкядсь: «А нява, через морга», и няфтсь моргу шуфтть лангс, кона путфоль ляйть туркс ётаманди. Эста и тусь Черезморга, а сяда тов ни – Теризморга.


Цёранясь: Кодама интереснай азкссь. Маря щакай, а мезе тиенкшнельхть минь предканьке?
Стирнясь: Мон марьсине, бта минь атяньке-бабаньке ламос кярсть вирь, урятцесть тише, кирнесть ламонь жувата.
Маря щакась: Видеце, стирняй. Пяк кунара, Сивинь ляйть омбоксонза, кассть туста вирьхть. Эсост пяк ламоль иможда, панкта. Атянь-атяньке керсть вирь, плотничендасть, а аватне – кочксесть панкт и салыяфнесть парьс. Оцюфне тонафтозь тевонь тиема ёмлатнень: цёранятнень мастярлама, а стирнятнень тевонь тиема: кштирдема-сёрмадома. А ваймама пингть синь лисельхть Сивинь ляй беряку и ушедольхть мокшень стариннай мора. Моротненге синць народсь латцелезень. Кати-коза, мянь лия вели марявсть синь вайгяльсна: кайгихне и мазыхне.

(Кулхцондови мокшень мора)
Стирнясь: Моротне пачкодсть мянь тяниень пингти. Поколенияда поколенияс кандовсть синь вайгяльсна. (Ушеды мора. Цёранятне и стирнятне колендихть элень кайсезня)
Маря щакась: Лац моратада. Тевонь тиемога ванан машттада. А вдь тянди тонафттядязь тинь тядянтте, синь тонафтозь щавантте.

(Няфтеви аф оцю выставка)


Цёранясь: Мзяроль вийда-эрьгада минь атяньконь-бабаньконь эса. Маштсть синь сембе цебярть ванфтома. Кизоста-кизос синь пачфтозь тянь сембонь тейнек.
Стирнясь: Эрьда морасаськ эсь веленьконь и касьтяма тейнза питни, седи вакстонь валхт.
(Иттне лувихть стихт)
1. Тядянь-авань шачем крайняй,

Сетьме зарянь уженяй,

Вельхкссот сенем менельсь гайняй

Кизонь мани эрь шиня.


2. Ётай-потаень кибряса

Варьхмодема пингова

Ноляй медяруня расась

Панжи лаймова - кува.


3. Анцяй путерьксть эса палы

Атямъёнгонь тюсса шись.

Сельмованфцень салазь – салай

Горизонту моли кись.


4. Шачем мастор, мокша-эрзянь крайняй!

Седистот сай мора ладянь тейть,

Пайгонякс тонь лемце мяштьсон гайняй,

Кельгсайне лугатнень, сетьме ляйть.

Сяськомаса эстейть слава сатоть,

Кие вешендсь – мусь, и нльне вельф!

Мон аф содан тевонь кельгихть лацот,

Мазышице аф ли ёфксста сявф?


5. Тядянь-алянь келькфтонга келькф мастор,

Шнаян эсот моросон аф стак:

Кенярдян, мес шачемазе тястонь,

Зарятне пильгалон ёряйхть макт.


6. Кеняртькшнян и ваймонь апак тарксек

Паксятненди ванан сюконязь:

Седи вийсон няйса, кода арси

Менелезень вельхксса зарясь стязь.


7. Вельхкссон акша коволсь серьгядсь эсон,

Эста оцю арьсемане шачсть.

Морасть жаворонкатне пряпесон

И лугаса панчфне тейне панчсть.

8. Мяляфтса, мон ласьконь раса ланга,

Кяпе ласьконь, а перьфпяле – гайф.

Маряйне – од эрьгя ласьки санган,

Мокшень цёран – морамазе сай.

.

(Моравии мора)



Маря щакась: Шабат, кодама кепотьф мяльса тинь корхтаде шачем-касом масторть колга. Пяк пара мяльти сянь эзда, што тинь аф юкснесасть эсь масторонттень. Вдь эрь ломантть ули сонцень ёмла Родинац, коса сон шачсь и кассь, тиезе васенце аськолксонц, азозе васенце валонц. Минь тяфтама ёмла Родинаньке – Тя Сире Теризморга велесь. Пяк лац эсь веленц колга азсь тинь сире велень атянте, минь земляконьке, содаф поэтсь - Илья Максимович Девин.

И ули веле мокшэрзянь крайса

Теризморга сонь тейнза лем максф.

И содасы тя велеть мянь Россиясь

Пяк лама содаф ломань тяса шачсь.
Маря щакась: А содасасть, кода мярьгсь Девин эсь веленцты? Мон тейнть азса – Лайме порань уженя.

Цёранясь: Нинге фкя цебярь стих сон лемдсь эсь веленцты. Кие нинге аф содасы, мон тячи тейнть азондса.

Севонь ляйнясь аф крхка, аф кели

Малаванза паксят и лугат.

Ули тоса мокшень сире веле

Эряйнза, марнек, сазорхт-братт.

Цёранза тя велеть пяк удалафт

Кинь тят сяве – таза и шумбра

Лисихть паксяв – мельгаст аф судардат.

Кельгихть, мярьгат, мяштьсост най тунда.

Стиренза Теризморгать, ой, мазыхть,

Стама мазыхть вешентть, аф муят.

Тевса докат, валснон ста каф азыхть

Масторть келес мороснон кулят.
Маря щакась: Минь велесонк пяк лама Мордовияти содаф ломаньда, конатне цебярь ширде няфтезь пряснон эсь народснон ингольде. Кинге содатада?
Иттне азондыхть:

1.Татьяна Петровна Девяткинась

2.Василий Григорьевич Шеянов

3.Семён Александрович Ямашкин

4.Юрий Иванович Шеянов и лама лият.

Маря щакась: Сембе синь шачсть Теризморга велеса, аделазь тястонь школать. Надиян, што минь велестонк нинге аф фкя Девин лиси. А тинь, шабат, аф тяшнетяда стихт? Пади киге луви?
Стирнясь: Мон пчкяль луволине эсь тяштьфозень, конань лемдине эсь велезти.
Цёранясь: А тяни кулхцондомасть монь.
Маря щакась: Монь пяк пара мялезон, што тинь кастада шачем ширень кельги ломанькс. Содатада лама мора, лама стих, марнек, сембе шачем-касом велеть историянц. А тяни эрьда моратама нинге фкя мора. Вдь велеряйхнень фалу сотцелезь эсь вайгяльснон инкса. Морасть синь най: кунардакиге сявомок и тячиень шити. Авань хорть содасазь аф аньцек Мордовияса и Россияса, но и сонь омба ширесонза: Венгрияса, Финляндияса, Эстонияса.
(Морайхть мора)
Стирнясь: Минь велесонк морайхть иттнеге. И мокшекс, и рузкс.

Эрьда кулхцондсаськ.


(Иттне морайхть фонограмма коряс)
Стирнясь: Кштиме-мораме, тевсога тиеме, пачатненге варжаськ, а пингсь ни лама. Эрьдова срадонттама.
Маря щакась: Сашендода, иденене, тямасть юксне. Сувседа!
(Иттне срадыхть. Маря щакась матсы штатолонц, озонды и мады)
Кда сембе ломаттне мастор лангса тяфта арьсельхть эсь шачема вастснон колга, эста ни можналь аф пелемс минь вандыеньконь инкса.

Достарыңызбен бөлісу:




©dereksiz.org 2024
әкімшілігінің қараңыз

    Басты бет