I. 2015-2019 жылдарға арналған Қызылорда қаласының әлеуметтік-экономикалық дамуының негізгі көрсеткіштері

Аймақтың экономикалық саясатының негізгі бағыты инфрақұрылымды дамыту және индустрияландыру арқылы экономиканың тұрақты өсуін қамтамасыз ету болып табылады.

Экономикалық өсудің мақсатты параметрлеріне инвестициялық белсенділік есебінен қол жеткізіледі. Бұл өз кезегінде технологиялық модернизациялауды белсенді жүргізуге мүмкіндік беретін негізгі капиталдың шоғырлануының артуы есебінен қамтамасыз етіледі.

Көрсеткіштер	2014 ж. бағалау	Болжам
		2015 ж.	2016 ж.	2017 ж.	2018 ж.	2019 ж.
Өнеркәсіп өнімдерінің көлемі, өткен жылғы тиісті кезеңге %	99,2	100,0	100,0	100,1	100,1	100,2
Кен өндіру өнеркәсібі және карьерлер қазу көлемі, өткен жылғы тиісті кезеңге %	99,0	100,1	99,6	99,9	99,8	96,4
Өңдеуші өнеркәсібінің көлемі, өткен жылғы тиісті кезеңге %	102,3	102,3	112,3	128,3	129,0	122,9

2014 жылғы бағалау

Индустрияландыру картасы аясында 2015-2017 жылдар аралығында 5 жоба жүзеге асырылады, жобалардың жалпы құны 57 млрд. 646 млн. теңгені құрайды:

«Жан Арай» ЖШС-нің «Құрама жем зауытының құрылысы» жобасы. Жобаның құны 375,9 млн. теңге. Жаңадан 60 жұмыс орны ашылады, «KAZPAMP» ЖШС-нің электронасостарды жинақтау өндірісін ұйымдастыру жобасы. Жоба құны 374 млн. теңге, жаңадан 47 жұмыс орны ашылады, «Қазақстанның Инвестициялық қоры» АҚ-ның «Шыны шығару зауытының құрылысы» жобасы. Жобаның құны 52097,0 млн. теңге, жаңадан 362 жұмыс орны ашылады, «Қызылорда аз тонналық мұнай өңдеу зауыты» ЖШС-нің «Мұнай өңдеу зауытын кеңейту» жобасы. Жобаның құны 4500,0 млн теңге. Жаңадан 386 жұмыс орны ашылады, «МаксимаЛогистикс Казахстан» ЖШС-нің «Керамикалық кірпіш өндіретін зауыт құрылысы» жобасы. Жобаның құны 300,0 млн теңге, жаңадан 50 жұмыс орны ашылады.

«2015-2017 жылдарға арналған республикалық бюджет туралы» Қазақстан Республикасының 2014 жылғы 28 қарашадағы № 259-V Заңында 2015 жылғы 1 қаңтардан бастап белгіленді:

1) жалақының ең төменгi мөлшерi – 21 364 теңге;

2) мемлекеттiк базалық зейнетақы төлемiнiң мөлшерi – 11 182 теңге;

3) зейнетақының ең төменгi мөлшерi – 23 692 теңге;

4) Қазақстан Республикасының заңнамасына сәйкес жәрдемақыларды және өзге де әлеуметтiк төлемдердi есептеу үшiн, сондай-ақ айыппұл санкцияларын, салықтар мен басқа да төлемдердi қолдану үшiн айлық есептiк көрсеткiш – 1 982 теңге;

5) базалық әлеуметтiк төлемдердiң мөлшерiн есептеу үшiн ең төменгi күнкөрiс деңгейiнiң шамасы 21 364 теңге.

Қазақстан Республикасының бюджет заңнамасының Қазақстан Республикасының бүкіл аумағында күші болады және барлық жеке және заңды тұлғаларға қолданылады.

2015-2017 жылдарға арналған қала бюджеті Қазақстан Республикасы Бюджет кодексіне сәйкес, Қызылорда қаласының 2015-2019 жылдарға арналған әлеуметтік-экономикалық даму болжамы және бюджет параметрлерінің және Қазақстан Республикасы Елбасының жыл сайынғы Қазақстан халқына жолдауы негізінде әзірленді.

Экономикалық саясатты, сондай-ақ қаланың бәсекеге қабілеттілігін сапалы жаңа деңгейге және тұрақты экономикалық дамуға жетуге ықпал ететін жоспарлау және басқару жүйелерді дамыту мақсатында 2015-2017 жылдарға арналған қалалық бюджетті қалыптастыру Елбасының бюджет қаражатын қатаң түрде үнемдеу және оларды тиімді пайдалану туралы берген тапсырмасына сәйкес іске асырылды.

«2015-2017 жылдарға арналған қалалық бюджет туралы» Қызылорда қалалық мәслихатының 2014 жылғы 18 желтоқсандағы № 37/1 шешімімен қала бюджеті бекітілді, 2015 жылғы 25 ақпандағы қалалық мәслихаттың 40/1 шешімімен, 2015 жылғы 31 наурыздағы №41/2 шешімімен, 2015 жылғы 16 сәуірдегі №42/1 шешімімен, 2015 жылғы 1 шілдедегі №44/2 шешімімен, 2015 жылғы 15 шілдедегі №45/1 шешімімен, 2015 жылғы 3 қыркүйектегі №46/1 шешімімен, 2015 жылғы 18 қыркүйектегі №47/1 шешімімен, 2015 жылғы 30 қазандағы №49/1 шешімімен, 2015 жылғы 26 қарашадағы №50/1 шешімімен нақтыланды.