Microsoft Word Бошкатармокдарслик
жүктеу/скачать 3.03 Mb. Pdf көрінісі
|
|
25.3.Чакана савдо корхоналарида моддий жавобгар шахсларнинг ҳисоботларини тузиш, тақдим этиш ва уларга бухгалтерия ишловини бериш Чакана савдо корхоналарида моддий жавобгар шахслар кирим ва чиқим ҳужжатлари асосида ўзларининг жавобгарлигида бўлган товар ва таралар бўйича ҳисобот тузадилар. Ушбу ҳисобот турлича номланади, чунончи, «Товар ҳисоботи», «Товар-пул ҳисоботи» деб аталади. Ҳисоботларнинг тақдим этиш муддатлари савдо корхоналари раҳбарлари томонидан турли шароитларни эътиборга олган ҳолда (корхонанинг катта-кичиклиги ва ихтисослашганлиги, товар операцияларининг сони, савдо пулининг миқдори ва бошқа шу каби) белгиланади. Амалиётда юқоридаги шарт-шароитларга қараб ҳисоботларни савдо корхоналари ҳар куни, ҳар уч кунда, ҳар ҳафтада, ҳар ўн кунда ёки ойда бир марта тузадилар. Чакана савдо корхоналари моддий жавобгар шахсларининг ҳисоботлари титул, предмет ва расмийлаштириш қисмларидан иборат бўлади. Ҳисоботнинг титул қисмида савдо корхонасининг номи, савдо шаҳобчасининг номи ва тартиб рақами, моддий жавобгар шахснинг фамилияси, исми ва шарифи, ҳисоботнинг тартиб рақами, тузилган даврининг бош ва охирги санаси, товар заҳираларининг лимити кўрсатилади. Ҳисоботнинг предмет қисми кирим ва чиқим бўлимларга бўлиниб, ушбу бўлимлар ҳисоботнинг юза ва орқа томонларида жойлаштирилади. 398 Ҳисоботнинг юза томонидаги кирим бўлимида биринчи қаторда товар ва тараларнинг ҳисобот даври бошидаги қолдиғи, шунингдек товар ва тараларнинг кирими кўрсатилади. Товар ва тараларнинг давр бошидаги қолдиқ суммалари олдинги ҳисоботнинг охирги қолдиқ суммаларидан иборот бўлади. Агар ҳисобот инвентаризация ўтқазилгандан кейинги биринчи ҳисобот ҳисоболанса, у ҳолда товар ва тараларнинг бош қолдиқ суммалари инвентаризация варағидан олинади. Ҳисоботнинг кирим бўлимида товар ва тараларнинг кимлардан олинганлигини тасдиқловчи ҳужжатлар хронологик тарзда алоҳида қаторларда ёзилади. Барча кирим ҳужжатлари ёзилгач, алоҳида қаторда товар ва таралар киримининг жами суммалари кўрсатилади. Ҳисоботнинг чиқим бўлимида товарларнинг чиқими (сотилиши, таъминотчиларга қайтарилиши, товар нобудгарчиликлари, камомадлар ва бошқалар) ҳар бир гувоҳлик берувчи ҳужжат асосида хронологик тарзда кўрсатилади. Барча чиқим ҳужжатлари ёзилгач, алоҳида қаторда товар ва таралар чиқимининг жами суммалари кўрсатилади. Кирим ва чиқим суммалари жамлангач, алоҳида қаторда товар ва тараларнинг ҳисобот даври охиридаги санасига бўлган қолдиқ суммалари кўрсатилади. Ушбу қолдиқ суммалар бош қолдиқ суммага жами кирим суммасини қўшиш ва ундан жами чиқим суммасини айириш орқали топилади. Ҳисоботнинг орқа томонида идишларнинг ҳисобот давридаги харакати уларнинг алоҳида турлари бўйича натурал-қиймат ифодасида акс эттирилади. Ҳисоботнинг расмийлаштириш қисмида унга илова қилинган кирим ва чиқим ҳужжатларининг сони, моддий жавобгар шахснинг имзоси, ҳисоботни қабул қилиб олган ва текширган бухгалтернинг фамилияси, исми- шарифи, имзоси, шунингдек моддий жавобгар шахснинг ҳисоботга киритилган тузатишларга рози эканлиги ва уларни тўғрилигини тасдиқлаш тўғрисида имзоси кўрсатилади. Моддий жавобгар шахсларнинг ҳисоботлари икки нусхада тузилади, биринчи нусхаси барча тасдиқловчи бошланғич ҳужжатлар билан бухгалтерияга топширилади. Бухгалтер ҳисоботни қабул қилиб олганлиги ва текширганлиги тўғрисида моддий жавобгар шахсга қайтариладиган иккинчи нусхасига имзо чекади. Чакана савдо корхонаси бухгалтерияси товар ҳисоботларини топширилган куни текширишдан ўтказиши шарт. Текширишда ҳисоботнинг бош қолдиқ суммаларини олдинги ҳисоботдан тўғри кўчирилганлиги, ҳар бир кирим ва чиқим ёзувларига доир ҳужжатларни мавжудлиги, уларни тўғри расмийлаштирилганлиги, ҳисоботдаги кирим ва чиқим суммаларини, шунингдек қолдиқ суммаларни тўғри ҳисоблаб ёзилганлиги аниқланади. Аниқланган хато ва камчиликлар ҳисоботларнинг ҳар иккала нусхасида тузатилади ва имзоланади. Бухгалтерияда текширилган ҳисоботлар корхона раҳбари томонидан тасдиқланади ва шундан сўнг улар товар ва тараларнинг синтетик ҳамда аналитик ҳисобини юритишга асос бўлади. жүктеу/скачать 3.03 Mb. Достарыңызбен бөлісу:
|