Универ студент 2009 №4

С.Сейфуллин атындағы Қазақ агротехникалық университетінде «Жігіттің сұлтаны - 2009» байқауы өтті. Жігіттің сұлтаны атануға университеттің 9 студенті үміткер болды. Алғашқы аталымда ұлттық киім үлгілері мен сахнаға шығу мәнері бағаланды. Екіншісінде өзін-өзі таныстыру сайысы болды. «Өнерпаз болсаң, арқалан» додасында қатысушылар бойларындағы шығармашылық таланттарын ортаға салды, яғни ән айтып, би билеп, мәнерлеп өлеңдер оқыды. «Таң қалдырам, ғажайып өнеріммен» байқауында жігіттер сиқыр көрсету, аузынан от шашу, кеудесіне кірпіш сындырту, шыны сынықтары мен шегенің үстіне жату, кір тасын тіспен көтеру секілді өнерлерін де паш етті. «Талаптың мініп тұлпарын» аталымында ұлттық салт-дәстүрге қатысты жасырын сұрақтарға жауап берсе, «Салауатты өмір - салтымыз» сайысында 16 киләлік екі кір тасын қарсыластарынан неғұрлым көп көтеру қажет болды. Сондай-ақ жігіттер қол күресінен де күш сынасты.