Ватаным Татарстан Ә сез "Ашыгыч ярдәм" өчен түләргә ризамы?

Ә сез “Ашыгыч ярдәм” өчен түләргә ризамы?

– Бүген “Ашыгыч ярдәм”гә шаяртып шалтыратучылар да җитәрлек бит. Әнә шундыйларга түләтсеннәр. Ә авырулар болай да бик күп акча түгә. Хәзер дарулар бик кыйммәт. Авырып китсәң, медицина препаратларына фә­лән кадәр акча “түгәргә” туры килә. Авыру кеше каян шул кадәр акча алсын? Бигрәк тә пенсионерларны табиб чакырган өчен акча түләттерү дөрес түгел. Әгәр бездә “Ашыгыч ярдәм” дә түләүлегә әйләнәчәк икән, ярдәмне кемнән өмет итәсе?

– Аңлагыз, сүз безнең эшне киметү турында түгел, ә ярдәм күрсәтүнең сыйфатын яхшырту турында бара. Әгәр “Ашыгыч ярдәм”гә килгән чакыруларны шул рәвешле аера башласалар, авыруга барып җитү вакыты кыскарачак. “Ашыгыч ярдәм” машинасы кан басымы күтә­релгән әби-бабайларга йөрергә тиеш түгел. Безнең эштә исә мондый очраклар гадәти хәл. Кан басымым бик нык күтә­релде, дип шалтыраталар. Ә килгәч ялгыз пенсионерның авырткан җирен күрсәтүдән бигрәк, сөйләшеп утырасы килүе ачыклана. Заманында бер әби без килгән төшкә чәй кайнатып куйган иде хәтта. Өлкәннәрне аңлап була, әлбәттә. Әмма “Ашыгыч ярдәм”­гә шалтыраткан каты авыручы­ларның гомере безнең ни дәрәҗәдә тизрәк килеп җитүебездән тора.

– Халык моңа каршы булачак. Акча түлисе килмәгәнгә түгел, моның сәбәбе – бүген медицина ярдәме күрсәтүнең сыйфаты түбән. Россиядә дә Көнбатыш ил­ләрендәге кебек тәртип кертергә телиләр икән, тиешле ярдәм күрсәтү мәсьә­ләсен дә кайгыртсыннар. Эшкә югары квалификацияле табиблар алып, аларны авыруга кешечә мө­нәсәбәт күрсәтергә өйрә­тергә ки­рәк. Бүген исә еш кына “Ашыгыч ярдәм” килгәнне өйдә сә­гать­ләр буе көтеп утырганнан соң, хастаханәгә үз юлың белән барырга туры килә. Гади халыкка болай да барысы өчен түләргә туры килә.

– Түләтсеннәр, мин риза. Чөнки бушлай медицинага ышанмыйм. Без болай да түләүле медицинадан файдаланабыз. Дүрт ай элек улым туды. Тормыш иптә­шемне һәм сабыемны поликлиникада чират тору, бала авырып киткән очракта, өйгә чакырган табибны көне буе көтеп утыру кебек мә­шәкатьләрдән азат итү өчен шәхси клиника белән ки­лешү төзедем. Биредә һәр балага медицина картасы ачалар, терапевт билге­ли­ләр. Участок табибына түгел, ә шул белгечкә йөрисең. Бала авырып китсә, тәүлекнең теләсә кайсы сәгатендә өйгә киләләр. Мондый хезмәт елына 84 мең сум тора. Аның каравы баламның сә­ла­мәтлеге өчен борчылмыйм.

– “Ашыгыч ярдәм” табибларына хәле ул дәрәҗәдә үк авыр булмаган пациентларга йөрергә туры килгәне өчен халык гаепле түгел. Шалтыратуларны кабул итүче диспетчерлар кая карый? Авыруның кем икәнен, хәлен алар бе­лешергә тиеш бит.