Бағдарламаның мақсаты, міндеттері, нысаналы индикаторлары және оны іске асыру нәтижелерінің көрсеткіштері

Нысаналы индикаторлар:

Дене шынықтырумен және спортпен шұғылданатын азаматтарды қамтуды 2010 жылғы 17,4%-дан 2015 жылы 25 %-ға дейін ұлғайту.

Балалар мен жеткіншектердің жалпы саны ішінде дене шынықтырумен және спортпен шұғылданатын балалар мен жеткіншіктерді қамтуды 2010 жылғы 9,5%-дан 2015 жылы 12%-ға дейін ұлғайту.

2012 жылғы жазғы Олимпиада ойындарының қорытындысы бойынша, Халықаралық Олимпиада Комитетінің жалпы командалық ресми емес есебінің рейтингінде Қазақстан 28 орынды алады (2008 жылы – 29 орын).

2014 жылғы қысқы Олимпиада ойындарының қорытындысы бойынша, Халықаралық Олимпиада Комитетінің жалпы командалық ресми емес есебінің рейтингінде Қазақстан 23 орынды алады (2010 жылы – 24 орын).

Міндеттері:

бұқаралық спортты дамыту;

жоғары жетістіктер спортын дамыту;

саланың кадрлық әлеуетін даярлау жүйесін жетілдіру.

Бірінші міндетті іске асырудың қорытындысы бойынша мына көрсеткіштерге қол жеткізіледі:

спорттық секциялармен қамтылған мектеп оқушыларының үлесі 2011 жылы – 22,0%, 2012 жылы – 22,5%, 2013 жылы – 23,0%, 2014 жылы – 24,0%, 2015 жылы – 25,0%;

соның ішінде ауылдық жерде 2011 жылы – 31,7%, 2012 жылы – 32,0%, 2013 жылы – 32,5%, 2014 жылы – 33,0 %, 2015 жылы – 33,5%-ды құрайды;

студенттердің жалпы саны ішінде дене шынықтырумен және спортпен жүйелі түрде шұғылданатын студенттердің үлесі 2011 жылы – 24,0%, 2012 жылы – 25,5%, 2013 жылы – 26,5%, 2014 жылы – 27,5%, 2015 жылы – 28,5 %-ды құрайды;

мүгедектердің жалпы саны ішінде дене шынықтырумен және спортпен жүйелі түрде шұғылданатын мүгедектердің үлесі 2011 жылы – 7,0%, 2012 жылы – 7,5%, 2013 жылы – 8,0%, 2014 жылы – 8,5%, 2015 жылы – 9,0%-ды құрайды;

жұмыс орындары бойынша (жұмыс беруші) дене шынықтырумен және спортпен шұғылданатын азаматтардың үлесі 2013 жылы – 6,2 % (1 млн. адам), 2015 жылы – 9,0 %-ға (1,5 млн. адам) артады;

спорттық-бұқаралық іс-шараларға қатысқан азаматтар саны 2011 жылы – 3,0 млн. адам, 2012 жылы – 3,7 млн. адам, 2013 жылы – 3,9 млн. адам, 2014 жылы – 4,2 млн. адам, 2015 жылы – 4,5 млн. адам.

Екінші міндетті іске асырудың қорытындысы бойынша мына көрсеткіштерге қол жеткізіледі:

білікті спортшылардың (спорт шеберлері) жалпы саны ішінде халықаралық деңгейдегі спорт шеберлері санының үлесі 2011 жылы – 20,0%, 2012 жылы – 25,0%, 2013 жылы – 28,0%, 2014 жылы – 30,0%, 2015 жылы – 34,0%;

кешенді спорттық іс-шараларда, әлем чемпионаттарында, әлем кубоктарында, Азия чемпионаттарында және халықаралық турнирлерде иеленген медалдардың саны 2011 жылы – 671, 2012 жылы – 665, 2013 жылы – 697, 2014 жылы – 712, 2015 жылы – 717.

Үшінші міндетті іске асырудың қорытындысы бойынша мына көрсеткіштерге қол жеткізіледі:

біліктілігін арттырудан өткен жаттықтырушы-оқытушылардың үлесі 2011 жылы – 5%, 2012 жылы – 6%, 2013 жылы – 7%, 2014 жылы – 8%, 2015 жылы – 10%-ды құрайды;

спорт ұйымдарындағы кадр тапшылығы 2013 жылы 15%-ға дейін, 2015 жылдың қорытындысы бойынша 10%-ға дейін төмендейді.

Мақсатқа, нысаналы индикаторларға, міндеттерге, нәтиже көрсеткіштеріне қол жеткізуге жауапты мемлекеттік органдар және ұйымдар:

Қазақстан Республикасы Туризм және спорт министрлігі – үйлестіруші, Бағдарламаны әзірлеуші;

Білім және ғылым, Ақпарат және байланыс, Ауыл шаруашылығы, Денсаулық сақтау, Қаржы министрліктері, облыстардың, Астана және Алматы қалаларының әкімдіктері.

Ақпарат көзі: Қазақстан Республикасының Ұлттық Олимпиада комитетінің ресми деректері, әкімшілік есеп, ведомстволық статистикалық деректер.

5.1 Бағдарламаны іске асыру кезеңдері: 2011 – 2015 жылдар.

5.2 Бағдарламаны іске асыру жөніндегі шаралар.

1. Бұқаралық спортты дамыту:

1) балаларды, жеткіншектерді, жастар мен ересек тұрғындарды дене шынықтырумен және спортпен айналысуға тартуды мына жолдармен іске асыру ұсынылады:

балаларға, жеткіншектерге және жастарға арналған спорт түрлерінен қол жетімді спорттық секциялар мен клубтар желісін, соның ішінде ауылдық жерде кеңейту;

өңірлерде балалар мен жасөспірімдер спорт мектептерін (БЖСМ) және спорт клубтарын ашу;

мектепке дейінгі мекемелерді, жалпы білім беру мектептерін, лицейлер мен колледждерді қазіргі заманғы спорттық жабдықтармен және инвентармен, соның ішінде ауылдық жерде жарақтандыру;

өңірлік спорттық-бұқаралық жұмыс орталықтарын (клубтарын) ашу;

өңірлерде балаларға (жеткіншектерге) арналған аула клубтарын құру;

қысқы спорт түрлері бойынша бөлімшелер және клубтар ашу;

білім беру ұйымдарында шаңғы базаларын қайта қалпына келтіру;

техникалық және кәсіптік білім беру орындарында оқитындар үшін - «Жас сұңқар» (клубы), жоғары оқу орындарының студенттері үшін - «Сұңқар», ауыл тұрғындары үшін - «Ел Қайраты» спорттық қоғамдарының жұмысын жалғастыру;

саламатты өмiр салты және бұқаралық спорт бойынша дене шынықтыру-бұқаралық және сауықтыру іс-шараларын өткізу;

оқу орындарының спорттық объектілерін сабақтан тыс және кешкі уақытта тұрғындар арасында спорттық іс-шаралар (секциялар, денсаулық топтары және басқалары) өткізу мақсатында пайдалану жөнінде шаралар қабылдау;

мүмкіндігі шектеулі адамдар арналған дене шынықтыру-бұқаралық және сауықтыру іс-шараларының санын ұлғайту;

мүмкіндігі шектеулі адамдар арналған спорттық іс-шараларды өткізуге үкіметтік емес ұйымдарды тарту;

«Мүгедектер спорты бойынша республикалық орталық» РМҚК құру;

жазғы және қысқы спорт түрлерінен салалық спартакиадалар өткізу.

2) саламатты өмір салтын қалыптастыруды мына жолдармен іске асыру ұсынылады:

спортты насихаттау бойынша республикалық және аумақтық (облыстық, қалалық) медиа-жоспарлар әзірлеу;

Астана және Алматы қалаларында 2011 жылғы 7-Азия ойындарын өткiзу үшiн салынған спорт объектілерiнің әлеуетін бұқаралық спортты дамыту үшін пайдалану;

спорт клубтарының қызметін регламенттеу;

балалар мен жасөспірімдердің спорттық мекемелерінің жұмыс істеуін қамтамасыз ету.

2. Жоғары жетістіктер спортын дамыту.

Осы міндетті іске асыру мынадай жолдармен жүзеге асырылатын болады:

спортшыларды даярлайтын спорт мектептерін, спортта дарынды балаларға арналған мектеп-интернаттарды материалдық-техникалық базамен қамтамасыз ету;

республикалық жоғары спорт шеберлігі мектептерінің және олимпиадалық даярлық орталықтарының жұмыс істеуін қамтамасыз ету;

Ақтөбе және Маңғыстау облыстарында спортта дарынды балаларға арналған мектеп-интернаттары желісін дамыту;

жоғары спорттық нәтижелерге қол жеткізу үшiн ұлттық құрама командалардың спортшы-мүшелерiнiң және спорт резервінің дайындығын қамтамасыз ету;

еңбек сіңірген спортшылар мен жаттықтырушыларға мемлекеттік әлеуметтік көмек көрсетуді қамтамасыз ету;

қысқы және жазғы спорт түрлерінен халықаралық жарыстар өткізу, соның ішінде Азиада спорт объектілерiнде өткізу;

өңірлерде спорт объектілерiн салу және қайта жаңарту;

спорттық инфрақұрылым саласында мемлекеттік-жеке серіктестік қағидаттарын енгізу;

жазғы және қысқы Олимпиада, Азия ойындарына, спорт түрлерінен халықаралық жарыстарға дайындалу және қатысу.

3. Саланың кадрлық әлеуетін даярлау.

Осы міндетті іске асыру мынадай жолдармен жүзеге асырылатын болады:

кәсіби жаттықтырушы-оқытушы кадрлардың біліктілігін арттыруды және қайта даярлауды ұйымдастыру;

кәсіптік техникалық және жоғарғы білім беру деңгейінде спорттық кадрларды даярлау үшін кәсіптік стандарттарды әзірлеу;

жасөспірімдерді, футбол жаттықтырушыларын шет елдерде оқыту;

дарынды балаларға арналған мектеп-интернаттарды кәсіби-техникалық колледждер ретінде қайта құру.

6. Қажетті ресурстар
Салалық бағдарламаны қаржыландыру республикалық және жергілікті бюджет қаражатының есебінен және көлемі шегінде, сондай-ақ Қазақстан Республикасының заңнамасында тыйым салынбаған өзге де көздермен жүзеге асырылатын болады.

Бағдарламаны 2011 – 2015 жылдары іске асыруға барлығы 108111849,1 мың теңге:

республикалық бюджеттен 97 459911,1 мың теңге: соның ішінде 2011 ж. – 13246100,0 мың теңге; 2012 ж. – 22444594,0 мың теңге; 2013 ж. – 32650219,0 мың теңге; 2014 ж. – 29118998,1 мың теңге.

жергілікті бюджеттен 10 651938 мың теңге; соның ішінде 2011 ж. – 2854744 мың теңге; 2012 ж – 2505941 мың теңге; 2013 ж. – 2683789 мың теңге; 2014 ж. – 2 607 464 мың теңге талап етіледі.

____________________________________

Қазақстан Республикасында

дене шынықтыру мен спортты дамытудың

2011 – 2015 жылдарға арналған бағдарламасына

1-қосымша


7. Қазақстан Республикасында дене шынықтыру мен спортты дамытудың 2011 – 2015 жылдарға арналған салалық бағдарламасын iске асыру жөніндегі іс-шаралар жоспары