69 ар ортчиз ке яке Кызьы Лёва, Марьёк но мукетъёс Йыр-визь дуннее вуылӥзы повесть-фэнтези

Нылаш нокызьы валаны уг быгаты: кызьы, малы со та дуннее шедиз? Малы лагерьысь пиналъёсын ӵош шудон, бызьылон, гимн малпам интые олокытӥ калтыртэ? Ачиз но шӧдытэк, нылашлэн бам кузяз синкылиос питразы…

Party for everybody! Dance! *
Пель сьӧраз туж тодмо крезьгур шуккиськиз. Песянайёс? Кытысь татын Брангурт песянайёс?! Нылаш сак кариськиз.

- Ма, со асьме пӧлысь ик, лэся, - воксё матын кылӥськиз ӟазырес куара.

- О-о, - бӧз-бӧз вазиз мукетыз, - дӥсез кельше, ачиз – уггес…

Нылаш синъёссэ усьтӥз но – А-а-а! Шораз дол-дол учко олокин дэймонъёс!

- А-а! О-о! У-о-у! - ӵашетыса, дэймонъёс но Манилэсь палэнэ тэтчазы.

Собере одӥгез, выжыкылысь Кукри бабалы кельшисез, лек юаз:

- Тон мар сыӵе кесяськиськод?

Мани, мар вазьыны паймыса, шоразы кӧшкемам синъёсын долказ. Но огшап улыса, буйгатскиз, угось синвуосыз пыр малпаз: азяз - вожояськон дыръя пӧртмаськыса ветлӥсьёс. Но укыр кӧшкемытэсь ук! Одӥгезлэн мугорыз ик - пало. Бур синмыз ӧвӧл, бурпалась мугорыз но копак пыртӥз адӟиське – ыль сӥль, ты-мус, кӧт пуштӥрлык… Шораз учкыса, Марьёк вукекъяськыны ӧдъяз. Нош дэймонъёс нош ик котыраз няняськизы.

- Ой, кыӵе мусо, - конгро чиньыеныз Манилэсь йырсизэ маялтӥз чиньыез кадь ик конгро песянай.

- Штаниез нош кесиськем, - воксё пель пушказ пырыса кадь сипыртӥз куинетӥез - шача кадь кузь дэймон. Утыр нылашлэн туала модая кесям джинсыез доры гоно киыныз кыстӥськиз.

- Кошке, кошке татысь! – юрдэменыз Манилэн ымнырыз ик кузялэс луиз.

- Хе, кошке, пе. Ачиз дорамы вуиз но, кошке, пе, - голькыт вазиз одӥгез олокин.

- Т-тӥ кытысь? Кинъёс? – йӧспӧртэм ымныръёсты чаклаз нылаш.

Дэймонъёс сое гинэ витиллям, кожалод, ог-огзэс азьпалтыса, кесяськыны ӧдъязы:

- Палэсмурт, Кукри баба, Обыда, Нюлэсмурт, ведӥн…

- Но тӥ… зэмосэсь ӧвӧл, озьы ук? – оскытэкгес вазиз Мани.

- Кызьы ӧвӧл, - азьлань сётӥськиз Палэсмурт.

- А-а, сылэ, сылэ, - кызьпу борды юнгес ӝиптӥськиз нылаш, - Мон валай, татын вожояськон. Тӥ – вожоос - спектакль пуктӥськоды? Яке, сылэ ай, кызьы ай со, а-а, тӥлляд – хелло-уин, хеллоуин! - Америкаысь кышкыт праздникез тодаз вайиз нылаш.

- Шонер, уйин, ми ӵемысь ветлӥськом уйин, - сьӧд ты выллем кыскись синъёсыныз шудыса, азьысьтыз Палэсмуртэз палэнтӥз Обыда.

Марьёклэн кышканэз ӧз тӧлӟы ке но, со ассэ кияз кутыны быгатӥз ни.

- Костюмъёсты туж золэсь, нош маскаосты! Милям лавкаосысь сыӵезэ уд шедьты. Кыӵе ке спецзаказ, дыр…

Олокинъёс ог-огзы шоры учкизы. Нош Марьёклэн ымыз уг ворсаськы ни: та дуннеын коть кыӵе ке адями нергеосын пумиськиз ук!

- Кылзэ ай, юрттэ мыным эшъёсме шедьтыны, - соку ик куриз нылаш, - Кык пиос – Геня но Ондӥ. Ӧд адӟылэ-а?

- Кызьы ӧм адӟылэ, - Обыдалэн кеж-мыж куараез кылӥськиз. – Арганзэс кузьмазы но кошкизы.

- Кыӵе арганзэс?

- Ма тани, - Обыда айшет кисыысьтыз пичи компьютер поттӥз, - Туж усто маке: пати фо эврибади…

- Планшет! Со пиослэн планшетсы! – синъёсыз ӝуалскизы Марьёклэн.

- О-о, ӟечокъёс, кузьмазы. Весь эктӥськом таре, - пало ымдуръёсыныз пальыштыны выриз Палэсмурт.

- Кытчы, кытчы соос кошкизы? – лӧптэменыз интыысьтыз ик тэтчиз Марьёк.

- Малы тыныд? – портӥсь синъёсыныз Маниез сӥсъяз Обыда.

- Соослы доразы бертоно. Ваньзы сюлмасько ни, монэ но ыштӥзы ни, дыр, - лулӟиз нылаш.

- Уть, таизлэн но бертэмез потэ, - вожез потӥз, лэся, Обыдалэн. Мукет дэймонъёс но гуж вазизы.

- Тон бен, мусоке, кытчы шедемдэ валаськод-а? – выжыятӥз Обыда.

- Валасько. Йыр-визь дуннее. Удмуртъёслэн Йыр-визь дуннеязы, - котыр чакласькиз Марьёк. – Но азьвыл мон ӧй тодылы, со вань шуыса.

- То-то, угось, - лек вазиз Обыда, - Ӧд тоды, тодэмед но ӧз пот. Ваньды тӥ отын сыӵеесь. Адями ассэ укыр вылӥе пуктыны кутскиз, выжызэ, осконъёссэ вунэтэ. Вот, мон, пе, укыр визьмо ни. Кӧня Йыр-визь дуннеос тӥни озьы огшоры быризы, соос сярысь нокин уг но вӧта ни, э-эк! – Обыда пал киыныз шонтӥз но планшетсэ золгес ӟыгыртӥз.

- Вот азьвыл адямиос ке адямиос вал, - йырберзэ кормаз ӝуйы ымныро Нюлэсмурт, - чебересь, визьмоесь, вашкалазэ дунъясесь, анай-атайзэс, осконъёссэс, инкуазез гажасесь, солэсь кышкасесь…

- Ми но озьы ик быром, - шӧдтэк-шорысь бӧзак викыштӥз Палэсмурт.

- Малы быроды? – уг вала Мани.

- Адямиос ми сярысь вунэтозы но, быром, - Палэсмуртлэн пало ымдурыз дыректӥз.

Ӝожомем дэймонъёс Марьёклы сокем шимес ӧз потэ ни. Нылаш пумен валаны кутскиз: со азьын зэмос… олокинъёс: Обыда, Палэсмурт, Нюлэсмурт… Бен, бен! Марьёк соос сярысь кылылӥз, ма лагерьын ик удмурт мифология сярысь лекциос лыдӟиз университетысь тодосчи. Туж тунсыко вал. Но ваньмыз со адямиен малпам кужымъёс ук! Зэмос улонын соос - ӧ-вӧл!

- Адями марлы ке туж-туж оске ке, со – вань, - нылашлэсь малпанъёссэ лыдӟиз, лэся, Обыда. – Тон ачид но тодӥськод: малпанъёс зэмало, - ымзэ кырыжтыса, ватсаз на со.

- Э-эх, вал ук ӟеч вакытъёс ! Адямиос оскизы милемлы, - ялан йырберзэ кормаз на Нюлэсмурт, - Ми вал кужмоесь, шудоесь!

- Озьы, - планшетэз кисыяз мургес донгиз Обыда. – Нош али… Тани тон но ми вань шуыса уд оскиськы, - нылашез нош ик портӥз со.

- Оскисько, - дыртыса вазиз Марьёк.

- Ӝыныё, - меӵкытӥз Обыда. – Тӥни озьы ик быром. Макем ӧжытгес адями милемлы оскоз, сокем вакчигес гумырмы.

- Нош ми интые лыктозы олокыӵе но валантэм муртъёс – Волан-дэ-Морт**, Дэйви Джонс*** кыӵе ке гоблинъёс, ы-ы-ы, - бӧз-бӧз вузыны ӧдъяз Палэсмурт.

- Но адямиос тӥледлы мед оскозы шуыса, асьтэлы доразы ӵемгес вуылоно, дыр, - дэмлаз но ачиз ик кышкатскиз Марьёк. (Кӧлон азяд валес дорысьтыд сыӵе шимес ымныръёсты адӟыны, ой-ёй-ёй…)

- Озьы уг луы, - ӧпкелиз Обыда, - Адями ке уг оскы, ми со азе потыны ум быгатӥське, оске ке – вуылӥськом, одӥг-ог…

- Э-эк, ойдолэ эктыса лэзёмы, а? – Палэсмурт вузэмысь шуак дугдӥз но пало пыдъёсыныз удмурт сямен тапыр кариз. – Обыда, лэзь ай аргандэ!

Конгро пересь утыр ик планшетэз поттӥз, кнопказэ зӥбиз:

- Ӧтисько тӥледыз эктыны, - ошиськем сюлъёсыныз сэзъяса, Палэсмурт Марьёк доры матэктӥз.

- Мон марым... Мон уг быгатӥськы, - ыштӥськиз нылаш.

- Пӧяське, - шулдырмем синъёсыныз кырмыштӥз Обыда, - Палэсмуртлы коть пар шедиз ай.

Вань дэймонъёс парен-парен султыса, берганы ӧдъязы. Марьёк валаса но ӧз вутты, Палэсмуртэн кунулскыса лопыръяз ни: Party for everybody!

Ӝоген нылашлэн йырыз воксё поромиз.

- Уг ни быгатӥськы, - кужмысь мозмытскыса, со италмасъёс пӧлы лэзиськиз.

Обыда мазэ-созэ валаз, лэся, Палэсмуртлэн пеляз маке шипыртӥз. Оп шуытозь соиз нылаш азе тӧдьы дэра вӧлдӥз, собере горд сюй посудаын – каляга ӝук, одӥг вандэс шунянь но турын чай.

Аслаз шудэзлы оскытэк, Марьёк сиён вылэ омырскиз. Ноку, нокыӵе мудрон пицца, лазанья, оливье но мар но Марьёклы сыӵе ческыт ӧз потылэ. Та валантэм но осконтэм дуннеын со нырысьсэ сиськиз, туж ческыт, туж кӧттыро, туж зэмос...

Пересьёс Манилы ӧз люкетэ, палэнын шыпыр карыса пукизы. Кӧтсэ тырмез бере Марьёк тау кариз.

- Табере, туж курисько, келялэ монэ эшъёсы доры, - пересьёслы вазиськиз нылаш.

- Малы тыныд соос? - Мани доры матэктӥз Обыда. - Соослэн асьсэлэн сюрессы, тынад — аслад. Оло, дорамы ик кылёд?

- Тау бадӟым, но мыным мыноно, - султӥз Марьёк.

- Мар азьланяз вите — тон уд тодӥськы. Нош татын милям ваньмыз валамон. Ми котьку котырад бергалом, ческыт сюдом, чебер дӥсялом, эктом, шудом, - синъёссэ кескич кырмыштӥз Обыда, - Кыль, а?

- Тау тӥдлы вань сюлмысьтым, - векчи чиньыоссэ гадь бордаз ик ӝиптиз нылаш, - но мыным эшъёсме шедьтоно.

- Нош ми ум лэзе, - шӧдтэк-шорысь бозгетӥз Палэсмурт.

- Ум лэзе, ум лэзе, - шиетӥзы пӧртэм куараос.

- Мыным зэмзэ но мыноно, - пушкыз тыриз нылашлэн, - Монэ анае, атае витёзы, валаськоды-а? Доре ӧй ке берты, соос туж куректозы. Мон — одӥг нылзы... - Марьёклэн кыкез ик киосыз гадь бордаз ӝиптӥськизы ни. - Татын умой. Тӥ но туж умоесь, но мынам аслам доре вань ук...

- Шуи ук, уз кыльы, - куатаськем пыр боз кариз Палэсмурт.

- Ну тӥ... асьтэос куке куное вуылэ, - пальыштыны выриз нылаш, - дорам.

Дэймонъёс лулӟизы, понназы маке шыпыр каризы, собере лапырскем Обыда азьлань потӥз:

- Мардэ ке милемлы кузьмаса кельты, соку сюрес возьматом.

Нош маиз вань Марьёклэн? Нылашлэн йыраз соку ик лыктӥз Шунды Мумылэн кузьымез. Ӧвӧл, сое Манилы аслыз кузьмазы. Соин ик... Соин ик... Нылаш йырси пунэтъёссэ ӝогак сэрттӥз, италмас кадь кык ӵуж лентазэ пертчылӥз, жаль, ваньдылы уз тырмы шуыса, Обыдалы мычиз. Соиз соку ик лентаез йырсияз керттӥз. Мукетсэ кузьымез Палэсмурт кокчалтӥз, чыртыяз инъяз.

Кыӵе серемесэсь, пичи пиналъёс кадь, ас понназ малпаз Марьёк.

- Нош мон сюрес возьмато, - Обыдаен Палэсмурт вискы, палэнэ кылемезлы ӝожомыса сямен донгиськиз Нюлэсмурт.

Италмас возь кузя соос азьлань вамыштӥзы. Кема ик ӧз мынэ, мырӟиськизы шоро-куспо вырйылэ. Выжыяз — адями тэрымон пась.

- Тани, вуим, - кытӥ ке ӧй вал Мани вӧзы нош ик Обыда кылдӥз. - Но тод, мусое, Йыр-визь дунне — со шахмат выллем. Кыӵе тубатэ шедёд, сьӧд-а, тӧдьы-а, нокин уг тоды. Ваньмыз ачид бордысь потоз. Соин ик марысь мар ке, милемлы вождэ эн вай, тросгес малпа ӟечез сярысь...

Тазьы шуыса, Обыда конгро чиньыеныз гырк пала возьматӥз:

- Тӥни отӥ мыноно. Ӟеч лу!

Марьёк мышсэ учкиз. Ог дасо пала дэймонъёс сое келяса шып сылӥзы.

- Ӟеч луэ! - нылаш пеймыт гырке вамыштӥз.

- Э-э-у, сыл али, сыл! - бӧрсяз бӧзгетӥз тодмо куара. Синвузэ мырдэм возись Палэсмурт Манилы италмас сяська мычиз:

- Со тынэсьтыд сюрестэ югдытоз.

Марьёк италмассэ йыр вадьсаз ӝутӥз, музъем пушкысь гыркын югыт луиз, адӟиськиз кыдёке азьлань нуись сюрес. Нылаш эшшо огпол тау кариз но гурезь усьтое вамыштӥз.

Мани али гинэ валаз, макем юн жадиз. Но пеймыт коридор шоры уд дугды ук. Тани-тани потон вис шедёз ни. Нылаш вамышъя гылыт изъёс вылтӥ, пыдъёсыз юмекъяло, нярӟем интыосыз сутско. Киысьтыз италмаслэн югытэз пумен бездыны ӧдъя. Шоканы секыт луиз. Шуак нылаш из борддор борды мырӟиськиз. Азьлань сюрес быриз?! Ӧз. Италмаслэн мырдэм векась югытэзъя, бур палась Марьёк пичи пасез синйылтӥз. Кык полэс куасалскыса сяна отчы уд пыры. Нош паллян палан... Татын но потон вань! Таиз паськытгес но ӝужытгес. Нылаш пичи но малпаськытэк сопала кожиз. Дыртытэк гинэ, из бордоръёс борды киосыныз кутӥськыса вамыштӥз. Шӧдтэк-шорысь канжаськиз но туж вӧсь усиз, киысьтыз италмасэз пыньырӟиз, тыл кысӥз. Ой-йы! Марьёклэн синвуосыз быльыразы. Пеймытын султыны выронъяз пыдыз нош ик кытчы ке шедиз, но изъёс вылэ усён интые нылаш кыӵе ке гуэ лобиз. Кышкаменыз Марьёк бамзэ киосыныз тач-тач ворсаз: всё, тани тазьы со кулоз. Нокин та сярысь уз но тоды. Мусо анай-атаез ноку уз адӟе ни нылзэс. Нош Геня ноку уз тоды яратонэз сярысь. Ноку!

Зуп! Марьёк мар ке вылэ небытак усиз. Вӧсь но ӧз луы кадь. Синъёссэ дӥсьтытэк усьтӥз. Турын зурод, лэся. Кин ке юромо валем кадь. Котыр ӝомо-югдо.

Нылаш кыштыр гинэ турын пӧлысь потыны вырӟиз. Со вискын кытысь ке кыдёкысь кылӥськиз шурдыт серекъям. Быдэс мугорыз юзырак карыса, нылаш берен турын пушкы ватӥськиз. Сак кылзэ. Зэм но, кытысь ке ӝуштэм куараос кылӥсько, дырын-дырын шуккиське шимес горем. Кинъёс ке нюръясько, - малпаз нылаш. Турын пӧлысь потыса, со котырзэ чаклаз. Сьӧд-сӧд нюлэс. Азьпалан писпуос вискытӥ тыл югекъя. Нылаш сопала вамыштӥз. Тани горем куара золгес шуккиське ни, куалекъяменыз Марьёклэн пыдъёсыз мырдэм вамышто. Шӧдтэк-шорысь писпуос сьӧры ватскыса мынӥсь нылаш азе яркыт суред пуксиз: пичигес кыралын сизьым юбо вылын тыл ӝуа. Кырал шорын ик сьӧд пурты выллем ты. Отын кинъёс ке туж юн жомбыллясько, лэся. Ты котыртӥ сьӧд-сьӧд йырсио, пурысь кузь дукесэн адями ветлэ. Киосаз – зарниен кисьтаськись боды. Тыын жомбылляськисьёсты сьӧд адями узатэ:

- Давай, давай, вот озьы солы, ха-ха-ха...

Мар соос даурто? Уг вала Мани. Но... нылашез витёнтэм шорысь венен бышкалтӥзы кадь: со вань лул-сюлмыныз тодмаз Генялэсь шимес луэм куаразэ! Ӝоген ты вадьсысь ассэ но Геняез адӟиз! Бен, бен, ӵапак Генялэн йырыз али ву пушкысь ӝутскылӥз но берен уллань кошкиз. Со интые ӝутӥськиз... Ондӥ!

- Шедьтӥ !!! - шумпотэменыз Марьёк черектэмзэ но ӧз вала. Ваньзэ вунэтыса, ву доры лобатӥз. Но азяз шӧдтэк-шорысь сьӧд адями султӥз. Марьёк шоры сьӧсь синъёсын учкиз гинэ, нылашлэн пыдъёсыз лябӟизы, ачиз но валатэк со пыдесъяськиз.

- Тон кин сыӵе? - гудыртӥз сьӧд адями.

- Марьёк, - мырдэм кылӥськымон вазиз нылаш.

- Малы мыным шулдыръяськыны люкетӥськод? - Мани шоры вылӥысен учкиз сьӧсь.

- Но соос выёзы ук, юрттоно! - ты шоры сюлэмшуго возьматӥз Марьёк.

- Мед выёзы, тынад мар ужед?

- Соос – мынам эшъёсы! Мон соосты сокема утчай!

- Ха-ха-ха, эшъёс, пе! Эшшо ке зэмос эшъёс шу...

- Бен, ми одӥг лагере ветлӥм.

- Со номыр сярысь уг вера на. Адями – ляб лул. Туннэ – эш, ӵуказе тонэ вузалоз.

- Со озьы ӧвӧл! - султыны дыртӥз нылаш. - Соослы юрттоно! Поттоно!

- Сыл! - нылашлэсь азьзэ зарни бодыеныз ворсаз адями. - Соослы быръён сётэмын ини: тыысь потоз одӥгез гинэ! Одӥгез гинэ – валад-а?!

Но Мани номыре уг вала. Адӟе ук: жомбылляськисьёс ву вылын мырдэм возисько на, я одӥгзы, я мукетсы ву вадьсы ӝутӥсько, ог-огзэс юромо ву пыдсы кыско, улӥе донго кадь. - Сылэ, малы тӥ озьы! - кеськиз нылаш. - Ойдолэ, потэ! Асьтэос потэ, тӥ – эшъёс! - ог-огзэс выйтыны турттӥсь пияшъёсты синву пыр чаклаз Мани.

Та суред сьӧд адямилы тунсыко потыны ӧдъяз, лэся. Со эшшо золгес горыны кутскиз.

Шайтан, - шӧдтэк-шорысь малпаз Марьёк. Зэм, зэм, со – Шайтан! Шуак нылашлы ваньмыз валамон луиз. Валамон но туж вӧсь. Уз, уз быдтэ пиос ог-огзэс! Соос визьмаськозы! Соос туж визьмоесь, соос – эшъёс!

Кытысь-марысь кужым шедиз Манилэн пичи мугораз: дуркак тэтчыса, сьӧд адямилэн киысьтыз бодызэ ишкалтӥз но ты доры бызиз.

- Ойдолэ, чале! Кутӥське татчы, - кӧйын зырам выллем гылыт ярдуре выдыса, нылаш бодызэ пиослы мычиз.

Но шузимем пиос сое воксё ӧз адӟе, котькудӥзлэн вылӥе ӝутскемез потыса, соос нырысь ик ог-огзэс уллань кыскизы.

- Ну, дугдэ ук! Визьмаське! – сьӧд вуэ усьылӥсь синкылиосыз пыр сюлвориз Мани. - Ойдолэ, потэ!

Бодыез пиос пала матэгес карыны выронъяз нылаш ачиз но валаса ӧз вутты: вӧй вылтӥ сямен гылӟыса сьӧд вуэ месӥськиз. Кезьыт сьӧд ву нылашлэсь мугорзэ тэкит выллем ӝип-ӝип ӟыгыртӥз, кезьытэз сюлэм дорозяз ик вуиз кадь.

- Хо-хо-хо! - шимес шуккиськиз пель сьӧраз. Собере кинлэн ке ыгы кадь киосыз Марьёкез уллань кыскизы, мукет киос йырзэ вуэ месӥзы.

- Мар та таӵе! Мар та таӵе! Юрттэ! – ымзэ, нырзэ тач-тач ворсаса, ас понназ кесяськиз нылаш. Пыдъёсыныз ӵыжаськыса, со кужмысь ӝутскыны выриз, но пиос сое берен вуэ месӥзы.

- Малы тӥ озьы! - сюлмыз пилиськымон ас понназ кесяське кадь нылаш. – Векчи пыдъёсыныз ӵыжаськыса, со нош ик выллань тубыны тырше, но мурт киос-пыдъёс вӧсь каро, пиосын ӵошатскыны Манилэн кужымез уг тырмы. Тани табере со зэмзэ но кулоз, - нылашлэсь лулсюлэмзэ шимес кышкан бинялтӥз. Ӧвӧл, ымзэ гинэ усьтыны, нырыныз гинэ шокыштыны уг яра, ву выллань ӝутсконо! Мани вань кужмыныз донгиськиз но ву вылэ лӧптӥз, уралтэм мурт сямен пушказ омырез кыскиз.

- Хо-хо-хо, - шимес шуккиськиз пель сьӧраз.

- Шунды Мумые, юртты ук! – кеськиз нылаш но ву улэ ышиз, дэрем бордаз лякиськем шунды сизэ поттӥз. Шӧдтэк-шорысь, капчи пукы сямен, Марьёк выллань ӝутӥськиз. Киысьтыз си пӧрмиз ву вылын возиськон зарни кульчолы. Утыр ик та котыртэт борды пиос но кырмиськизы. Мазэ созэ валатэк ик соос шимес синъёсын котыр утчаськизы на, ог-огзэс ӧз тодмалэ, шӧдске.

- Геня, Ондӥ! Тӥ улэпесь! Мон тӥледыз шедьтӥ! – шумпотэменыз Мани сьӧд тыын кыллемзэс но вунэтӥз, лэся. – Ура!!!

Соку гинэ пиослэн тусысьтызы лекомон бус усьыны ӧдъяз. Шоканзэс мырдэм шедьтыса, соос Мани шоры тодмаса но тодматэк учкизы.

- Марьёк мон, тодмады-а табере? – пальыштӥз нылаш.

Пиос вуэн ӟизась йыръёссэс сэзъязы, ӧмгес, пе. Но Манилэн мылкыдыз лопыръяз ни, кот йырсиосыныз шоналтыса, со лулӟиз:

- Нош мон тиледыз сыӵе кема утчай, сыӵе утчай - мырдэм шедьтӥ!

- Аха-ха! Аслыд бырон утчаса ветлӥд! - пиналъёс вадьсын кӧшкемыт горем кылӥськиз. Ваньзы куаляк луизы, кульчо борды вань кужмынызы кырмиськизы: вылӥысен шоразы шимес сьӧд синъёс учко.

- Мар-о, тютюосы, шедиды-а? – гырдалтӥз сьӧсь, - Верай вал, одӥгды гинэ потоды. Ма бен, пуке табере ваньды. Час ортчыса, тыысь ву кынмоз, цементлы пӧрмоз. Тӥ пыраклы отчы синпелет луыса кылёды. Аха-ха! Кызьы сое нималом, а?

Куалектэм пиналъёс номыр ӧз вазе.

- Оло, эшъёськонлы синпелет, а? – лек пышкылӥз Шайтан. – Ха-ха-ха… Я, пуке, тужгес тунсыкоез кутскоз час ортчыса. Соку ик вуо, эн мӧзме…

Сьӧд адями зарниям бодыеныз шоналтӥз – ты шуак ог 2,5-3 метрлы уллань, му пыдсы, кошкиз, озьы ярдуръёс воксё потыны луонтэм ӝужыт луизы. Сьӧсь эшшо кӧня ке гырдалтӥз на, зарни бодыеныз шонаса, кытчы ке вылӥе лобиз.

* * *

- Кызьы ке потыны тыршоно, - меӵ но гылыт ярдуръёс шоры учкыса, вазиз нылаш.

- Тон малпаськод, ми ӧм тырше? – очкизэ ыштэм Ондӥ сюбег синъёссэ маялэсь киыныз посӥз.

- Уз пӧрмы, ярдур укыр ӝужыт, - Генялэн но куараез потӥз. – Азьвылэз лазег вал, озьы но ӧм быгатэ, нош табере…

Геня лекомем синъёсын Маниез сӥсъяз:

- Тон люкетӥд! Кудмы ке одӥгмы ми одно потысалмы, озьы шуиз сьӧд адями. Нош табере ум потэ одӥгмы но!..

Марьёк воксё ыштӥськиз:

- Мар тон вераськод?! Тон Шайтанлы оскид? Ог-огдэс быдтысалды но тӥни, нош со шумпотысал гинэ.

- Озьы, дыр, - зомби выллем вазиз Геня, - Но мукет сюресмы милям ӧй вал. Сьӧд адями оскытӥз: кин юлтошсэ лёгалоз-вормоз, солы ик улыны эрик сёто…

- Тӥледлы кулэ вал сыӵе эрик?! – Манилэн сюлэмаз кин ке юрӟым сялӟиськиз кадь. Пиослэн кылъёссылы оскытэк, со шоразы мыр-мыр учкиз. Ондӥ но Геня синъёссэс палэнтӥзы. Соослы, шӧдске, возьыт вал, ог-огзы азьын, та чиед гинэ нылаш азьын. Зэм но, кызьы озьы пӧрмиз? Малы эшъёс ог-огзэс быдтыны дась вал? Озьыен, зэмос эшъяськон, Шайтанлэн верамезъя, ӧвӧл?

- Ойдолэ ог-огмы вылэ тубыса, потыны выром, - урод малпанъёсты улляны выриз Марьёк.

- Ойдолэ, - синзэ кырсь киосыныз ялан зыраз Ондӥ. – Тон Геня вылэ тубод, нош мон тон вылэ. Озьы ярдурозь сузьтӥськыса, потом…

- Малы ваньзы мон вылэ? – шӧдтэк-шорысь пыкиськиз Геня, - Мон вуын, нош тӥ вылӥын-а?

- Тон – тужгес секытэз, - пумит вазиз Ондӥ, - соин ик нырысь тон, собере мукетъёсыз.

- Чаклано ай, кин секытгес, - ӧз сётскы Гена, - Тон лапег ке но, зӧк, нош мон ӝужыт ке но, векчи…

Пиос ог-огзы шоры вожомыса учкизы.

- Дугдэлэ! Тазьы пуким ке, куиньмамы ик татчы кылём, уд шӧдиське-а, ву напче ни, - керӟегъяськыны ӧдъяз Марьёк.

Зэм но, ву кизер йӧлвыллы укшаны кутскиз.

- Асьмелы умой-умой малпаськоно: кинэ зэмзэ но вылӥе ӝутэммы луоз. Нош собере со адями мукетъёсызлы юрттоз. Яке тубат, яке гозы, яке эшшо маке шедьтоз.

- Сьӧд адями юнме шуымтэ, дыр, татысь одӥгез гинэ потоз, - вуӵыртӥз Геня.

- Но номыр ӧм ке каре, уз поты нокин но! – яратоно адямиезлэн сокем шузи-мази но кышкась луэмез Мани понна воксё витёнтэм вал.

- Озьы, - югдурез рос-прос валаз, лэся, Ондӥ. – Мон улӥын сыло, собере Геня, собере – тон, - Марьёк шоры учкиз со. – Озьы умойгес луоз. Угось мон, зэмзэ но, секытгес. Очкие кытчы ке палдӥз, сотэк урод адӟисько, ӝог утчаськыны уг быгаты. Нош тӥ ӝоггес потэ, мыным юрттэ.

Пиналъёс ог-огзы шоры учкизы. Ваньмызлы валамон вал: та тужгес тупамон амал. Ву вылын ӟечгес возиськон понна Ондӥ шунды силэсь котыртэт пушкы пыриз сое кык киосыныз ик юн ӟыгыртӥз. Ондӥлэн пельпумъёсаз ӝабырскыса тубиз Геня. Аккробатъёс выллем сылыны ӧз быгатэ, соин ик Геня гылыт ярдуръёс борды пыкъяськиз. Табере Манилы тубоно. Каллен гинэ, пиосты вӧсь каронтэм вылысь, со нюжтӥськиз Генялэн пельпумъёсыз дорозь. Вӧйын зырам выллем ярдуръёсты маялляса, дыртытэк ӝутӥськиз. Киосыз ты пуртылэн дуръёсаз вуизы. Я, табере кызьы ке потоно. Но Марьёклэн кужымез уг тырмы.

- Ойдо ӝоггес, усисько ни, - ӟазырес кылӥськиз пыд улысьтыз. Нылаш ымдуръёссэ куртчиз но Генялэн йыр вылаз лёгиськыса, вань кужмыныз выллань сэрпалскиз, изо сюй борды ӝабырскиз, кыстӥськиз но… потӥз! Жумбль-жамбль кариз тыбыр сьӧраз. Нылаш берзэ чаклаз. Ондӥ вылысь пограм Геня котыртэт борды кырмиськыны дыртӥз. Пиос выллань, Марьёк шоры учкизы, ымныразы – пальпотон. Пӧрмиз!

- Ойдо, утча табере мар ке, потты милемыз, - бурдъяськиз Геня.

- Али ик! – нылаш пыд йылаз тэтчиз но котырзэ чаклаз. Пыд улын луо но изъёс, котыраз – сьӧд нюлэс. Но тӥни отын пичи гинэ из юрт сылэ. Со котырын одно ик мар ке луоз. Мани корка доры бызиз, пырон ӧс утчаз. Юрт котыртӥ котырскиз – номыр ӧвӧл. Эшшо котырскиз… Паймоно кадь, коркалэн ӧсэз - ӧвӧл. Но нылашлэн но тунаса сылыны дырыз ӧвӧл. Марьёк укноетӥ пыроно кариськиз. Одӥгаз кечырскиз, корка пушкы учкиз - нокин улэпез уг адӟиськы. Уӵогын мар ке пӧзе, сэргын - ӝӧк, со вӧзын - пуконъёс, выж шорын ик мурӝол ӧс, вӧзаз - кый кадь бинняллям гозы. Кема малпаськытэк, нылаш корка пушкы питырскиз. Секыт гозыез озьы ик котыртэтъёсын суй вылаз понӥз, укно пала кыскиз. Гозы ӧз сётскы, пумыз кытчы ке чукамын, лэся. Марьёк золгес кыскиз но, кытын ке улӥын жи-ич! вазиз. Нылашлэн пыд улысьтыз выж усьтӥськиз, гозыеныз валче Марьёк уллань лобиз…

Зол ӧз шуккиськы, но кынем синъёссэ дӥсьтытэк усьтӥз. Вадьсаз – чагыр инбамын – сэзъяське гозылэн пумыз. Нылаш соку ик тэтчиз, гозы доры сузьтӥськыны выриз. Ӧз быгаты. Эшшо кӧня ке пол тэтчиз на – пичи гинэ ӧз сузьы - гозылэн пумыз скал быж сямен сэзъялскиз но вылӥе ӝутӥськиз, ышиз.

- Э-эй, нош мон?! Э-эй! – шугадӟонэ шедемзэ валаса, Марьёклэн вань пушкыз кесиськиз кадь, - Э-э-эй!!!

Секыт ӧпкелёнэн тырмыса, нылаш зар-зар бӧрдыны ӧдъяз: тӥни кызьы юрттӥз со пиослы! Кызьы табере берен берытсконо? Мар синазькыль дунне та! Кӧня отчы-татчы тэтчаса ветлонэз на?! Бам кузяз васькись синвуоссэ нылаш сюен наштаськем киосыныз маялляз. Али со ассэ неномыртэм зол ньӧраны дась вал. Я малы озьы луиз, малы?! Нылаш турын пӧлы пуксиз, син азяз йӧтӥзы нярӟем, наштаськем пыдъёсыз. Марьёк ачиз аслыз сокем жаль потӥз, эшшо золгес бӧрдыны ӧдъяз. Кӧтӝожез кошкемъя, нылаш утыр ик ассэ пыкылыны кутскиз: ачид янгыш, чакласьконо вал, эшшо ке бӧрдыса пукиськод, - понназ куаретӥз со, - тырмоз! Отын пиос возьмало, соос Марьёклы сыӵе оскизы! Нош со пӧяз? Ӧз! Со одно ик юрттоз! Вань ук та Йыр-визь дуннеын но кыӵе ке визьмо амалъёс! Вань ук татын зэмлык! Нылаш устыр-табыр пыд йылаз султӥз.
* * *

- Песятай, ойдо пуксьылом кӧнялы ке, - из борддоръёс борды дырын-дырын кутскылыса мынӥсь Онтипагайлы дэмлаз Лёва.

- Огшап мыном на, пие, - песятайлэн куараез пыдлось гуысь кадь кылӥськиз. Ма, гу ик вань, пыд улысьтыз изъёсты чакласа, лёгаське Лёва. Кӧня соос та гыркетӥ мыно ни, кытчы меда потозы? Лёвалы одӥгез валантэм: малы сокем дыртэ песятай? Та Йыр-визь дуннеын сокем тунсыко ук! Ваньзэ рос-прос учкем, чаклам потэ: Шунды Мумы, зорен кырӟась крезь, ачиз уясь пыж... Нош со пересьёс-дэймонъёс! Огезлэсь пӧртэм мукетыз шимесэсь но тунсыкоесь. Жаль, Лёва соосын матэгес тодматскыса ӧз вутты, песятай ганяк кариськыны маза ӧз сёты, эшшо ке ку куртказэ кузьмаса кельтӥз... Ну кытчы со сокем дыртэ? - кымес вылысьтыз фонариксэ тупатыса, песятаезлэн паськыт тыбырыз шоры уӵертӥз пияш.

Зэмзэ вераса, пияш шӧдэ: песятай Йыр-визь дуннеез умой тодэ. Кытысь? Оло, со куке соку татчы вуылӥз ни? Та малпан Лёвалэн йырысьтыз нокызьы уг кошкы. Тани та пеймыт гудӟиськем кузя но песятаез тодмо интыостӥз сямен вамышъя. Мӧйы мурт, но сыӵе ӝог. Лёва сьӧраз мырдэм вутске. Ма, собере песятаез кытысь ке тодэ вал ук кыӵе кылъёсты верано Йыр-визь дунее шедён понна. Кытысь? Мае ватэ солэн йӧспӧртэм дедушез? Малы ваньзэ пыр-поч уг валэкты?

Онтипагай шуак дугдӥз:

- Я, табере пуксём.

Соос пичигес изъёс вылэ интыяськизы. Песятай туж малпаськись тусын пукиз. Шугъяськытӥсь юанзэ шараятэк Лёва ӧз чида ни:

- Песятай, нош кытысь тон лушкем кылъёсты тодӥд?

Онтипагай ас дуннеяз усем мурт сямен шып улӥз. Лёва куаразэ золгес карыса выжыятӥз:

- Песятай, нош тон та дуннеын вал ни-а?

Сюлэмшуген гожмам ымныро воргорон дыртытэк гинэ нунокез шоры учкиз. Укыр малпаськись, укыр мукет луэм синъёсты адӟыса, Лёвалэн сюлэмыз ик шымырскиз. Песятаез пыдлось куараен вазиз:

- Вал...

- Шыпыт, - векчи кисырскиз Онтипагай, - Йыр-визь дунне уг яраты кесяськемез.

- Но, песятай, малы тон мыным азьвыл ик та сярысь ӧд вера?! Отысен, со скамья вылысен ик та дунее шедид вал-а? Нош кин тыныд лушкем кылъёсты вераз? - Лёвалэн юанъёсыз кӧжы сямен питыраса, из борддоръёс борды йыгаськизы кадь.

Песятай валэктыны ӧз дырты. Солэн тусыз нош ик мур малпаськись луиз. Но огшап улыса, со кутскиз:

- Мыным соку 16 арес тырме ни вал. Но мугоры пичи, ӟызы: война вылтӥ секыт ужаса но умой-умой сиён тырмымтэен тросэз нылпиос сыӵеесь вал. Война бере но секыт вал на: атай фронтын быриз, нюлэс кораса ужам анаелэн пыдъёсыз туж висизы. Пичи сузэръёсы - одӥгезлы 9, мукетызылы — 8 арес — котьку сютэм вал. Мон ӵукна 5 часысен ик колхозэ ужаны потай. Ӧйтӧд, валалоды-а сое тӥ — туала пиналъёс. Анаймы туж жаль потэ вал — сыӵе пыдъёсыз висизы. Бер ӝыт доре бертоз, дас полэс кышъям сапегъёссэ куштоз, бинялтонъёссэ сэрттоз но пыдъёссэ пичи пукон вылэ поныса, посыса-посыса бӧрдоз... Бер уйин кылылӥ вӧсяськем кадь шыпыртэмзэ: Инмаре-Куазе, Кылдысинэ, шуоз вал, сёт тазалык аслым но пиналъёсылы но, сёт чидан вормыны вӧсь луонэз. Школаын милемыз Инмар ӧвӧл шуыса дышетӥзы, но анаелэсь озьы курадӟемзэ адӟыса, малпалляй: мед юрттозы анаелы солэн Инмарез, Куазез, Кылдысинэз.

Огпол кылӥ: пыд висьыку туж, пе, юрттэ инӟысяськаен парос. Сое, пе, зыраса возёно. Бер ӝыт анаелэсь курадӟемзэ адӟыса, со турынлы ветлоно кариськи, нюлэс вӧзысь возь вылэ мынӥ. Отысь сюрес дурын угось та турын будэ вал. Туж пеймыт, синмад коть спичка донгы. Кылӥсько: кытын ке туж матын кион вузэ. Шокамзэ но, оло, шӧдӥсько. Малпай: югыт дуннеен люкиськон вакыт вуиз, сузэръёсме, анайме син азям пуктӥ. Малы ке анаелэн кылъёсыныз ик черетски:

- Инмар, Куазь, Кылдысин, вань ке тӥ — юрттэ!

Берпуметӥ кылъёсме мон кыӵе ке вуберганэ шедьыса кеськи ни. Тӥни озьы воксё малпамтэ вылысь шеди Йыр-визь дунее. Зэм, соку со мукетгес вал на...

- Кыӵе, песятай? - дедушез шоры данъяськон мылкыдын учкиз Лёва.

- Уг валаськы, пие, паськытгес-а мар-а...

- Озьыен, тон тодӥськод, мар милемыз азьланяз возьма? Тон тодӥськод, кытын Мани? - лопырскиз Лёва.

Песятай шуак интыысьтыз тэтчиз:

- Асьмеос бер кылёмы! Ойдо ӝоггес!

Тыбыр сьӧрысьтыз котомказэ тупатыса, Онтипагай азьлань дыртӥз, Лёва – сьӧраз. Нокӧня но мыныса ӧз вуттэ, азязы борддор кылдӥз, нош сюрессы кыклы вайяськиз: одӥгез пичи гинэ, мырдэм тэрымон гырке кошке, мукетыз – бадӟымгес. Песятай дугдӥз, Лёвалэсь дыртӥд юаз:

- Тон, пие, кудзэ сюресэз бырйысалыд?

- Тӥни созэ, - соку ик вераз пияш, - отӥ капчиенгес потом, дыр.

- Озьы угось, - оло, пыкылыса, оло, ӟечен пусйыса, йырыныз сэзъяз Онтипагай, - Чорыг утча мургес интыез, адями - ӟечсэгес. Но, шуд доры сюрес, пие, ӵемысь сюбег но секыт луэ, трос тыршемез, пӧсямез кулэ каре.

- Иське сюбег интыетӥ мыномы-а, - ӝожомиз Лёва.

- Ум, паськыт азьтӥ ик. Асьмелы ышем эшъёстэ шедьтоно, озьы ук?

- Озьы, - ӟоскыт азе донгиськоно уз луы шуыса, шумпотӥз Лёва.

Но песятайлэн мылкыдыз лӧптоно кадь ӧй вал. Вань мугорыныз пияш пала берытскыса, со мур куараен индылыны ӧдъяз:

- Нош табере сак кылзы монэ: мон уг тодӥськы, мар со пичи гырклэн пумаз. Тунсыко ке, чакланы быгатод. Но мон тодӥсько, мар вите милемыз паськыт гырк пумын. Эшъёсыд бырйизы тазэ сюресэз. Сыӵе ни адямилэн сямыз: арлыдо-а, егит-а, туж ик уг висъяськы, капчизэгес утча. Но отын, - Онтипагай пеймытэ ышись вӧл-вӧл сюрес шоры возьматӥз, - капчи уз луы.

Песятай нунокез вӧзы эшшо матэгес кариськиз, пельпумъёстӥз тач-тач кутӥз но синъёсаз ик учкыса, лякытак ватсаз:

- Одӥгзэ курисько, пие, ноку эн вунэты: тон – адями! Котькыӵе секыт учыре тод та сярысь. Нош маин адями изьверлэсь висъяське? Визьмыныз? Быгатэменыз? Ӧвӧл. Адями изьверлэсь висъяське адямилыко луэменыз, яратыны, эшъяськыны быгатэменыз. Валад-а? Эн вунэты тае!

Песятай нуноксэ бордаз сокем юн ӝиптӥз, кожалод, берпуметӥзэ ӟыгыртэ. Лёвалэн ньылоназ маке кугӟаз, оло. Ноку, нокин соин тазьы лулысь-сюлмысь ӧз вераськы на вал. Пияш вань мугорыныз шӧдӥз: отын, азьпалан, маке сыӵеез вите…

- Я, мынӥм, - Онтипагай малпаськыны маза ӧз сёты ни, - Эн кышка, каньылак кариськы.

Песятай паськыт гырке вамыштӥз, Лёва - сьӧраз.

- Табере йырысьтыд фонариктэ кыс, трос ӧз кыльы ни, - куриз Онтипагай но аслэсьтыз тылзэ кысӥз. Лёва но кымесаз юнматэм тыл вӧзысь кнопказэ зӥбиз, тём-тём пеймытын куинь-ньыль вамыш лэсьтыса вуттӥз но - пыд улысьтыз музъем шуак кытчы ке кошкиз, пияш уллань лобиз.

ЗУП! Зуп! Ю мешокъёс сямен усьылӥзы соос турын зурод вылэ. Лёва мазэ-созэ валатэк кыллёнъяз, Онтипагай турын пӧлысь потӥз ни.

- Ойдо, асьмелы дыртоно, - пияшлы потыны юрттӥз со. Кык вужеръёслэн лагере кыштыр мынэмзы сямен табере соос нюлэс шорысь кырал пала чакласькыса вамышъязы. Зэм, мугоръёссы бордысь пӧлы пум быдӟа но вужер ӧз кыстӥськы.

Тылъёсын югдытэм кырал доры матэгес вуэмзыя, кылӥськизы валантэм куараос: оло, нискетэм, оло, бӧрдэм.

Шуак Онтипагай интыысьтыз ишкалскиз но вань кужмыныз бызиз куараос пала. Лёвалэн син азяз песятаезлэн тыбыр вылаз тэтчась котомка гинэ адӟиськиз на. Пияш дедушсэ сутыны дыртӥз.

Котькыӵе секыт югдурысь потыны луэ, шуо. Но Марьёклэн кошкемез бӧрсьы Ондӥ но Геня вань сюлмынызы шӧдӥзы: луо вормонтэм шугадӟонъёс но. Ӧвӧл, соос ог-огзэс ӧз пыкылэ, ӧз куаретэ. Нырысь вакытаз туж оскизы на: нылаш вуоз, юрттыны амал гинэ кема утча. Но бӧрысь, напчись вуэз чакламзыя, та оскон пумен кысӥз. Одӥг пичи котыртэт борды кырмиськыса улӥзы ке но, пиос ог-огзэс ӧз адӟе ни: котькудӥз ас дуннеяз улӥз.

- Нош мон али самолётэн лобасал, - витёнтэм шорысь вазиз Ондӥ, - сыӵе потэ вал лётчик луэме, - пияшлэн куараез шуак чигиськиз, Ондӥ пушказ тымиськем синкылиосыныз гуньдӥз. Огдырлы шыпыт луиз.

- Нош мынам чагыр малпанэ вал: пилемъёс пушкы ватскись ӝужыт гурезьёсы тубано, асьме дуннемы шоры отысен учконо, - синъёссэ тач-тач ворсаз Геня. – Кыӵе чебер, дыр, со – гурезь вылысен адӟиськись улос…

- Чебер, - куара шуккиськем кадь вазиз Ондӥ но. Солэн син шораз малы ке пуксизы гурезь ӝужда адямиос – алангасаръёс, нош одӥгезлэн пельпумаз пичи нымы-кибы быдӟа Геня эшез сылэ, котыр дуннеез чакла. Я мар лэсьтыны быгатоз сыӵе кибы та бадӟым дунне вылын?

Шуак Ондӥлэн пеймытэн поромись йыраз яркыт лампочка ӝуатскиз кадь: со секыт югдурысь потон амал шедьтӥз! Зэм но, тыысь ву пумен-пумен цементлы пӧрмиз ке, со вылтӥ ветлыны луоз ук! Озьыен, кызьы ке ву выллань ӝутскыны тыршоно. Валамон ини, нош ик аккробат выллем ог-огзы вылэ тубоно. Кудзы ке озьы ик цемент пушкы кынмыса кылёзы, но одӥгез ке но потоз ук! Бӧрысь одно ик кыӵе ке юрттэт вуоз, ма, со Марьёк ик! Киыд-пыдыд эрикын ке, мар ке малпаны луоз ни. Цементэ кылем адямилы но юрттэт шедёз!

Ондӥ, ляб синъёссэ золъяса, чаклаз азьысьтыз эшсэ. Вань улонэз ӵоже нырысьсэ сокем дунъяса, валаны тыршыса.

- Геня, мон тодӥсько, мар кароно, - дыртытэк вазиз со.

Геня соку ик синъёссэ усьтӥз:

- Мон но тодӥсько, - шуиз эшез. Пиос ог-огзы шоры ваньзэ валась синъёсын учкизы. Ондӥ азинтӥз:

- Тон мон вулэ туб, собере адӟом ни…

Но Геня ӧз дырты:

- Оло, мукет сямен каром: тон вылам тубыны тыршод.

- Ачид валаськод ук: мон секытгес но лапеггес но, тыныд тубоно… – лад-лад вазиз Ондӥ.

Геня пумем киоссэ интыысьтызы мырдэм вырӟытӥз. Выллань кыстӥськыны тыршиз: уг пӧрмы. Кынмем мугорыз кор кадь – уг кылзӥськы, нап кисаль уллань кыске.

- Ойдо, эшшо, - пал киыныз эшезлы юрттыны выриз Ондӥ.

Геня тыршиз, макем со тыршиз! Но тэкитлэн сое лэземез ӧз поты. Пичи гинэ утись кульчо сопала но тапала лэйказ, кӧтыз ӝожен но йырыз курен Геня куштэм кучапи выллем нискетыны, ыргетыны ӧдъяз.

- Э-эй! Мелэ, кырмиське татчы! – кытысь ке вылӥысь, оло, Инмарлэн куараез кылӥськиз. Пиослэн ныр улазы гозы лэзиськиз. Нырысь кырмиськиз Геня. Ондӥ вань кужмысьтыз сое выллань донгыны выриз. Генялэн пыдъёсысьтыз сальк-сальк тэкит усьылыны кутскем бере гинэ Ондӥ валаз: эшез утемын! Табере вылӥысь тодмотэм адями сое но поттоз. Зэм но, тани пияшлэн азяз гозы шонаське ни. Со борды Ондӥ ыгы сямен кырмиськиз.

- Эшшо! Эшшо! – вылӥысен комнада сётъя кин ке. Но Ондӥ ог кык-куинь сантиметрлы сяна уг ӝутскы.

- Эшшо, пиосы, эшшо кыске! – ялан куре мур куара.

Ондӥлэсь быдэс сӥльвирзэ кыкналасянь таркало кадь, чидантэм вӧсь. Шӧдтэк-шорысь чиньыосыз гозы бордысь мостӥськизы, пияш вань ымнырыныз няняськиз ӝыныё кынмем тэкит вылэ, мырдэм кырмиськыса вуттӥз пичи котыртэт борды. Вылӥын дым-йыг вазиз. Гозы борды кырмиськем Онтипагай, Лёва но бордазы итӥськем Геня музъем вылэ питыразы.

- Всё! – чилектӥз Ондӥлэн йыраз. – Мон татчы кылисько.

- Всё, - чилектӥз Онтипагайлэн но йыраз, - пияшез тазьы поттыны уз луы ни. Озьы ке но, Ондӥлэн ныр улаз гозы куштыса, соос эшшо выризы на. Таяз рад Ондӥ юромо киоссэ лэзиз ни. Кульчо борды но кутӥськыны ӧз дырты, мугорыз сотэк но ӧз выйы ни.

- Тӥледлы ӝоггес кошконо! – шулӟектэм Лёва но Геня шоры учкиз песятай. – Али ик! Тӥни со коркан выж шорын муӝол луоз. Со муӝол пасе тэтчалэ, валады-а? Али ик! – лек кеськиз Онтипагай.

- Нош тон, песятай, нош Ондӥ? – пыкиськиз Лёва.

- Ондӥтэк мон нокытчы уг мыны! – ватсаз Геня но.

- Мынэ, шуисько, кошке али ик! – Песятаезлэсь сыӵе лек учкемзэ Лёва нырысьсэ адӟиз, – Мынэ ни! Кылдысинэз утчалэ! Кылӥськоды-а? Кылдысинэз! Ми асьме понна, – чигиськыса сямен ватсаз на Онтипагай.

Пиос дыртӥзы из корка пала. Нош Онтипагай котомкаысьтыз пичи тӥрзэ поттӥз, гозы пуме думылыса, Ондӥлы лэзиз.

- Эн ӝожомы: киосыд – эрикын, йырыд – эрикын. Та тӥрен котырдэ кораса, потыны тыршы, валад-а? Дырты. Тон – потод!

- Валай, - куара шуккиськем кадь вазиз Ондӥ, пуэктэм киосыныз гозы бордысь тӥрез мозмытонъяз.

- Ужа, пие, ужа, номыр шоры учкытэк ужа, - Ондӥез бурдъяны тыршыса, ватсаз на песятай но ты дорысь палэнскыны дыртӥз. Со вискын йыр вадьсаз гудыртӥз:

- Кин тон сыӵе?!

Онтипагай синъёссэ выллань ӝутӥз. Зарни бодыен пырак шораз мертаса, инмысь ваське пурысь дукесэн сьӧд адями.

- Мар кариськод мынам азбарам?! – эшшо шимесгес кеськиз Шайтан. Онтипагай бодылэсь палэнскыса, сьӧд адями шоры мыр-мыр учкиз:

- Ӟечбур, уром.

Шайтан шуак луиз, Онтип агай шоры тодманы вырыса учкиз:

- Тон?! – сьӧсьлэн ымнырыз ик огдырлы югак кариз.

- Мон, – юн вазиз песятай.

- Кызьы озьы? - паймемзэ ӧз ваты Шайтан.

- Озьы тӥни. Мӧзми, вуи…

- Таӵеез ӧй вал на, - синъёсыз ик паськытазы Шайтанлэн. - Одӥг муртлэн кык пол шедемез… Осконтэм.

- Ваньмыз куке нырысьсэ луэ, - ӧз ыштӥськы Онтипагай.

- Озьы, – сьӧд гырк кадь синъёссэ кыньыртӥз Шайтан. – Нош мон тон сярысь кема тодам вайылӥ на, ог 50 ар, дыр. Эк, юнме мон тонэ соку лэзи, аслэсьтым данме гинэ быдтӥ.

- Ӧд быдты, ӝутӥд.

- Ӝутӥ?! – сьӧд адямилэн тусыз нош ик сьӧд йыркурен тырмиз, - Ӟеч уж лэсьтэменым-а? Тьфу! Шайтан лулме пичи гинэ ӧй вуза! Шайтанлэн улонэз – сьӧд ужъёс! Соослэсь мон кужмогес луисько, нош тонэ лэземе бере сокема виси, сокема виси… Тьфу, озьы дауртыны мон шузи ӧвӧл ни, – зарни бодыеныз музъем борды дым-дом йыганы ӧдъяз сьӧсь.

- Тынад зэмос лулыд сайказ, соин висид, - валэктыны выриз Онтипагай, но пыдъёсыз лябӟизы, пересь музъем вылэ ланьырскиз.

- Тыш-таш, тыш-таш, - кылӥськиз кытысь ке музъем улысь. Шайтан сак кариськиз: тыш-таш, тыш-таш…

- Ужа, пие, ужа, - ас понназ шыпыртӥз песятай, вань кужмыныз пыд йылаз султыны вырыса.

- Мар? – лек вазиз Шайтан но ты доры дыртӥз. – Кытын одӥгез пияш? Тон солы юрттӥд?!

Шайтан вожомыса бодыеныз музъем вылэ шуккиз, бурсйиз:

- Быдто ваньдэс!!!

Онтипагай огдырлы йырсазьзэ ик ыштӥз, оло. Кыл йылаз нош бергаз: ужа, пие, ужа, номыр шоры учкытэк… Пересь мырдэм усьтӥз синъёссэ. Шораз ӵуштась сьӧд гыркъёсыныз Шайтан учке. Но пересь ӧз ӵуштаськы. Ачиз но со вань лул-сюлмыныз тыршиз Шайтанлэн синъёсаз учкыны. Быдэс мугорзэ шимес кышкан бинялтӥз ке но, Онтипагай синъёссэ ӧз вошты: азяз малы ке пуктӥз мусо анайзэ (солы соку турын-куаръёс ӧз юрттэ ни, туж курадӟыса кулӥз), Йыр-визь дунее шедем нылпиосты, Лёва нуноксэ… Инмаре, Куазе, Кылдысинэ…

Шайтан макем ӝог ӝуалскиз, сокем ӝог ик басылскиз.

- Кылзы ай, оло, тон татчы юнме ӧд шедьы, а ? – Малпаськись тусо луиз со. – Оло, тон татчы кылён понна вуид? - Онтипагаез чаклаз сьӧсь.

- Мон кыльысал, - вазиз пересь. – Но кинлы мон татын кулэ? Тыныд шудон интые-а?

- Малы шудон, - гуртысь огшоры пересь музэн лулӟиз Шайтан, - ӵош вераськыса пукылом коть. Татын зульыны но, керетыны но нокинэн ни. Кылдысин кемалась ворсаськыса пуке, дэймонъёсты аслам адӟем уг пот, ӝожтӥськыса гинэ уло. Нош тон… Тон мукет, тон - луло. Хе, ярам ай 69 ар талэсь азьло сьӧд тыам ӧй выйыты, о-о, - серектӥз Шайтан, - Нош тодӥськод-а кӧня визьмо адямиосты мон отын пӧзьтӥ, ха-ха-ха…

- Малы? – сюлмыз вӧсь луыса, кисырскиз Онтипагай, - Малы тыныд адямиосты быдтыны кулэ вал?

- Кызьы малы: мон – Шайтан. Сьӧд ужъёс лэсьтытэк, кызьы…

- Но, луэ ук маке мукетсэ, лякытсэгес малпаны.

- Тон нош ик ас кырӟандэ нёръяськод? – лекъяськыны кутскиз Шайтан, - еж дыръяд ляб луэмме возьматӥ, табере эн витьы! Эк, жаль одӥгез гинэ пияш кылиз. Адӟы вал, кызьы соос улон понна нюръяськизы, ха-ха-ха! Кызьы ог-огзэс быдтыны выризы!

- Лэзь тазэ но, - тусыз пеймытаз Онтипагайлэн. – Нош мон кылё.

- Огкутскемен кыксэ ик лэзьыны?!

- Кылзы ай, малы тыныд нылпиос? – выжыятӥз Онтипагай, - Соос улонэз но ӧз адӟе на.

- Хе, со бордын ик зумытэз.

- Уг валаськы, малы тон сыӵе лек?

- Вунэтӥд-а мар-а, мон – Шайтан!

- Я мар, Шайтан ке?

- Мон лек луыны кулэ, сотэк адямиос ӟечсэ уз валалэ!

- Мон озьы уг малпаськы. Одӥг лек уж бордысь мукет лек уж потэ…

- Нош мон кужмогес луисько, - мыняк каризы сьӧд гыркъёс.

- Ма тыныд аслыд ноку но жаль ӧз потылэ шат адямиос? - ӧз чида ни Онтипагай.

- Огпол. Ӵапак тонэ ик жаляй, 69 ар талэсь азьло. Но тынад пичи но шекъёсыд ӧй вал. Укыр чылкыт. Сыӵеосыз мынам ӧй вал на. Нош мукетъёсыз… Тани тон со пиосты жаляськод. Нош час талэсь азьло гинэ соос ог-огзэс вийылыны дась вал. Кулэ ке, луло кылён понна тонэ но быдтысалзы…

Онтипагай лулӟиз:

- Котькин янгыша. Но со янгышъёссэ валаны, тупатыны тырше ке…

Тыш-таш, тыш-таш, - ялан юнгес вазиз кытысь ке музъем улысь. Ужа, пие, ужа…
* * *

Синвуосыз пыр Мани котырзэ чаклаз: номыр паймытӥсез ӧвӧл. Сылэ кадь со огшоры нюлэс кушын. Пыд улаз бичиятӥсь турын, кытын ке кырӟало бурдоос. Огдырлы нылаш малпаз: ваньмыз мар вал – со уйвӧт гинэ. Йыр-визь дунне но - уйвӧт. Нош али со зэмос улонын, лагерьзы вӧзысь нюлэскын. Но ог секунд ортчыса нылаш куалаяк луиз: нош пиос соку кытын? Отчы, Йыр-визь дунее ик, кылизы? Яке со дунне воксё ӧй вал-а? Марьёк киоссэ ымдур котыраз тыриз но кесяськыны ӧдъяз:

- Эге-гей! Вань-а татын кин ке?!

- Ин-ке, Ин-ке, ке-э-э, шуккиськиз куара.

Нылаш эшшо золгес кеськиз. Куакъёс пӧлысь тылобурдоос ик кырӟамысь дугдӥзы.

- Юрттэ! Ээ-эй! – нош ик кеськиз нылаш.

- Эй, эй! – исаз сое куара шуккем.

- Эн кесяськы, - шӧдтэк-шорысь вазиз Марьёклэн пыд улаз.

Куалектэменыз Мани палэнэ тэтчиз. Шораз, гоно бамъёсыныз шудыса, учке… ӵушъял! Огшоры пичи ӵушъял, ӵогыр-ӵогыр венё, муспотон вырись ныро.

- Эн кесяськы сокем, - нылашез воксё паймытыса, эшшо огпол вазиз ӵушъял, - Куазез кышкатод. Нош солэн лекез потэ ке, Тӧлперизэ, Йӧзорзэ келя. Тыныд сыӵе шуд кулэ-а?

- Ӧвӧл, - ма вазьыны ик ӟудӥз Марьёк, - Но мыным юрттэт кулэ.

- Кыӵе?

- Нош тон татын, нюлэскын улӥськод-а?

- Уг. Мон татчы тынад дуннеысьтыд ик вуи, учкисько ке, ӵапак тонэ утчыны, - нырыныз пыфак кариз венё.

- Тон – монэ?! – Марьёк номырлы но уг паймы ни кожа вал, но вераськись ӵушъял… Эшшо ке сое утчаны лыктэм…

Пурысь комок нылашлэсь мылкыдзэ валаса, лэся, пыфкетӥз:

- Тон Мани ук?

- Ы-хы.

- Ну вот, тонэ Лёва утча. Нош мон солэн эшез. Зэмзэ ке, песятаезлэн эшез.

- Зэмзэ ке, мон тонэ ӧвӧл, песятаез утчаны лыктӥ, - аслэсьтыз нуйтэ венё, - Нош Лёва – песятаелэн яратоно нунокез. Вот со Лёва тонэ утча. Нош песятай со сьӧры мынӥз. Нош мон – песятай сьӧры, - валэктыны выронъяз веньёсыз эшшо но ӵогыр-ӵогыр луизы ӵушъялпилэн. – Ну, вообще-то мынам аслам но нимы вань. Педя мон. Педор, иське. Песятай озьы шуэ.

- Валай, - вазиз Марьёк, ачиз номыре тыро-пыдо ӧз вала ке но.

- Тон татын огнад бере, озьыен, соос тонэ ӧз на шедьтэ, - визьмо тусын пыфкетӥз ӵушъял, - Озьыен, мон вакчигес сюресъя потӥськем, пыф-пыф…

Марьёк нош ик котырзэ чаклаз:

- Кылзы ай, Педя, тон уд тодӥськы-а, кызьы Шайтан доры шедёно? Мон татчы гозы кузя уси, кытысь ке вылӥысь. Кызьы ке берен тубоно вал.

- Уг тодӥськы, - пыфкетӥз ӵушъял. – Писпу вылэ тубыса утча, тӥни соос татын кӧня.

Нылаш инме учкиз, собере кыдёкысь ӝужыт пужымлэн йылыз шоры, нокыӵе ин-тубатэз, гозы пумыз отын уг адӟиськы.

Нош ӵушъял номыр луымтэ кадь ватсаз:

- Яке татын ик пук, асьсэос вуозы.

- Уз, - пушкыз тырыны кутскиз Марьёклэн, - Соос отысь потыны уз быгатэ. Тыысь ву пӧрмоз цементлы. Соку Шайтан соосты одно ик быдтоз. Нош мон юрттыны уг быгаты! – Манилэн бӧрдонэз пӧсьтӥз, - Быгатӥсько вал ке но!

- Пыф-пыф, соосты песятай но Лёва шедьтозы, поттозы, - аслаз визьмо луэменыз данъяськыса, нылашез буйгатӥз пурысь комок, - Тодӥськод-а песятай кыӵе кужмо!

- Кыӵе песятай? Кыӵе Лёва? – киыныз шонтыса, викыштӥз на нылаш.

Со вискын вӧзысь турын вылэ кытысь ке вылӥысь клоп-клоп питырскизы кык мугоръёс. Синвуосыз пыр нылаш оскыса но оскытэк тодмаз наштаськем ымныро Геняез но ӧйтӧд кытысь татчы шедем Лёваез.

- Вуизы! – шумпотэм Педя вакчи кукъёсыныз ас котыртӥз берганы ӧдъяз.

- Тынад песятаед – Геня? – нылаш воксё ыштӥськиз. – Нош… Лёва кытысь?

Ӵушъял шып кариськиз. Пиослэн пыд котыразы питырскыса, пурысь комок лек юаз:

- Песятаез кытчы кариды?

Мазэ созэ валаса вуттымтэ пиос ог-огзы шоры учкизы, собере пештырскем ӵушъял шоры долказы. Со вискын шумпотонэн пачылмем Марьёк кыкназэс но ӟыгыръяны ӧдъяз:

- Улэпесь! Шедизы!

Нялтас вераса, Лёвалэсь шудо мурт та вакытэ ӧй вал, дыр. Со но Манизэ шедьтӥз ук! Но… ваньмыз сыӵе валантэм…

- Нош Ондӥ? Кытын Ондӥ? – котыр утчаськиз Марьёк но малы ке инме учкиз на.

- Шайтан доры кылиз, - вазиз Геня, - Сое поттыны ӧз луы. Соин ӵош ик песятай…

- Кызьы ӧз луы, нош тӥ малы кошкиды? Ойдолэ берен мыномы, - тачыртӥз нылаш.

- Ну и кытчы тон мынод? – турын пӧлысь пыфкетӥз вунэтэм ӵушъял.

- Кытчы ке отчы, - вылӥе шонтӥз Марьёк.

Нош пиос нош ик ӵушъял шоры долказы.

- А, тодматске, Педя, - пурысь комок шоры уӵертӥз Марьёк но, - Ачим но туж пайми вал, вераське эшшо.

- Педя? – Лёвалэн сюлмыз шуныт тулкымен погыльскиз. – Тон песятайлэн Педяез, оло?

- Солэн, - ӵушъялпи данъяськыса нырзэ урдӥз.

- Кызьы тон татчы шедид? - Паймем вылаз пайме Лёва.

- Пыф! - нырпелесъёссэ пелляз Педя. - Возьмаськисьёс отчы-татчы ветлон висказы ӧсэз ӝубис кельтӥзы. Мон потӥ. Ныры вань ук, зынъяськыса кытчы кошкемдэс валай. Я, эн паймы сокем: пельы вань - лушкем кылъёс пумысен песятаен сомында вераськиды, сак кылзӥ. Собере, синъёсы но вань – адӟем потӥз…

Пиналъёс визь люк комокез ымзэс куакапи тэрымон усьтыса кылзӥзы.

- Пыф, лёлёзы нош ческыт вал, - ымдурзэ ик нюлыштӥз Педя ӵушъял. Собере шуак Лёвалэсь кылзэ юаны ӧдъяз, тани-тани пичи мыжыкъёсыныз урдӥськоз кадь:

- Тон малы песятаез кельтӥд?

- Со милемыз кошкыны косӥз, туж куриз, - сюлэмшуго вазиз Лёва.

- А-а, - буйгаз ӵушъял, - Песятай кужмо, со юрттоз. Возьмалом.

Ваньзы вылӥе учкизы.

- Мон малпасько вал, Шайтан музъем пыдсын улэ, - малпаськись тусо луиз Марьёк. – Выжыкылъёсын озьы ӧвӧл шат?

- Логикая, озьы луыны кулэ, - йырберзэ кормаз Лёва но. – Логикая, выжыкыл но со - малпам маке, зэмос ӧвӧл. Нош татын…

- Малы ке оскиськод ке, со – вань. Озьы мыным дэймонъёс шуизы, - азинтӥз Марьёк.

- Нош мон татчы шедьытозям дэймонъёслы но, Шайтанлы но ӧй оскы. Нош соос пичи гинэ монэ ӧз быдтэ, - вазиз Геня, – Малы тодосчиос татчыозь та дуннеез ӧз шараялэ, со сярысь ӧз вераллялэ? Татчы шедемъёслы нокыӵе инструкция ӧз дасялэ…

- Мон но паймисько, - нош ик йырберзэ кормаз Лёва, - Кылзэ ай, кылэмды вань-а параллельные миры шуэмез? Та Йыр-визь дунне - со параллельные миры ик вань. Озьы бере, оло, усим но асьмеос кытысь ке урдэсысь? Та дунее шедеммы бере огпол но вылӥе ӧм тубе на, ялан васькиськом яке кытчы ке кожиськом…

- Ачид коть валад-а мар верад? – синъёссэ кыньыртӥз Марьёк.

- Мон валай: ойдолэ асьмеос вылӥе тубом. Мар татын тэк пуконэз? – дыртытӥз Геня.

- Тӥни отын ӝужыт пужым адӟиське, йылыз кытчы ке пилем борды чука кадь, адӟиды-а? Ойдолэ отчы мыном, - ӝогак азинтӥз Лёва.

Мукет дэмланъёс ӧй вал бере пиналъёс пужым пала дыртӥзы.

- Монэ вунэтӥды! Монэ-э! – кесяськиз бӧрсязы ӵушъял.

Лёва берытскиз, кема малпаськытэк, вылысьтыз футболказэ куштӥз, солэсь огпал пумзэ герӟалтӥз, пӧрмем мешоказ лякытак гинэ Педяез пуктӥз.

- Тон умой пук, веньёстэ нялтас кар, - куриз пияш но эшъёсыз сьӧры, мешоксэ сэзъятэкгес бызиз.

Ӝужыт пужым туж матын адӟиське кадь вал, но со доры вуыны капчи вылымтэ. Ӵем-ӵем куакъёс пӧлтӥ пиналъёс ог-огзылы юрттыса, дыртытэк вамышъяно луизы. Огшап мынэмзы бӧрсьы Марьёклэн чиданэз быриз, пурысьтам лӥял вылэ пуксьыса, викыштӥз:

- Всё, уг ни быгатӥськы...

Пиос соку гинэ синйылтӥзы Марьёклэсь куасьмем тэкитэн наштаськем гольык пыдъёссэ. Лёвалэн вань пушкыз шымырскиз кадь:

- Малы со вазьгес тае ӧз адӟы? Кызьы таӵе ненег нылаш нюлэскытӥ пыдкуктэк вамышъяз?

- Вай учко, - Манилэсь вӧсь луэм пыдъёссэ чаклаз пияш. – Та яраосты нырысь маин ке миськоно, собере бинялтоно…

- Мон ву утчало! – дыртӥз Геня.

- Сыл ай, ог-огмес гинэ медам ыштэ вал, - ӵем ӵашша котыртэмын пукемзэс чаклаз Лёва.

Со вискын вӧзысьтыз футболка-мешок тур-пар вырыны ӧдъяз.

- Поттэ монэ! – керӟег куриз Педя.

Лёва футболказэ пертчылӥз гинэ, ӵушъял уф! карыса Марьёклэн пыд дораз питырскиз.

- Пыф, шырбыж турын татчы кулэ вал, но адями ветлымтэ интыын шат со будоз? – визьмо кариськыса, Марьёклэсь пыдпыдэссэ чаклаз Педя, собере пичи нырыныз котыр омырез дунъяса, ватсаз:

- Тон, Геня, юнме эн ветлы, матысь интыын ву ӧвӧл. Гудӟиськемлэн но толыкез уз луы. Дэмлан одӥг: вож турын-куарез бичалэ но бадӟым куарлэсь лэсьтэм ӵашае пызьыръялэ. Со турын-куар вуэн ик ӵушылэ.

Ӵушъяллэн сокем визьмо луэмезлы паймыны, ма, та сярысь рос-прос малпаськыны ик дыр ӧй вал: озьы ик кулэ кадь. Пиос усьтыр-табыр басьтӥськизы уж борды. Пичиен-пичиен, шапыкен-шапыкен пызьыръязы соос вож турынэз. Нош Марьёк со вуэн яраоссэ ӵушылыны ӧдъяз. Ӵушъял ассэ зэмос командир интыын возиз: отысь ишке на, тани таиз ӵапак умой луоз, созэ эн ик исалэ, киды азоз, - пичи пыдъёсыныз тапыр бызьылыса, пиосты визьмаз со.

- Всё, тырмиз, - ӵушалтэм пыдъёсыз шоры учкыса, вӧсез пыр пальыштӥз Марьёк, - Тау тӥледлы...

Пиос пӧсям вузэс ӵушалтӥзы.

- Табере маин ке бинялтоно вал, - вожектэм киосыныз йырберзэ кормаз Лёва.

- Ойдолэ, табере мынэсьтым дӥсьме кутом, - юрттыны быгатэмезлы шумпотӥз Геня.

Пиос англи кылын «I am cool»**** гожтэм футболкаез бадӟым юдэсъёслы кесязы. (Эк, кык нунал талэсь азьвыл гинэ тодысал ке Геня: фирменной лавкаысь сыӵе дуноен басьтэм та футболказэ ас киосыныз таркалоз шуыса!) Нош Педя? Педя со вискын векчи кылыныз Манилэсь яраоссэ нюлӥз на: озьы, пе, соос сокем уз висе, уз но азэ ни. Бичиятэмлы чидатэк, Марьёк гор-гор серекъяны ӧдъяз. Но ӵушъяллэн эмъямез бере яраос зэмзэ но кужекъямысь дугдӥзы.

Пыдъёсты тась-тась биням бере пиос огкылэ вуизы: Маниез тыбыр вылазы гинэ нуллозы на, черодэн-черодэн чидалозы ойдо, нылаш секыт ӧвӧл. Озьы жадьыса но со дыре ик ӟеч уж лэсьтэмысьтызы бурдъяськыса, вамыштӥзы соос азьлань.

Ӝоген куакъёс быризы. Азязы вӧл-вӧл кыралын адӟиськиз туж паськыт но туж ӝужыт пужым. Малпалод, солы кӧня ке сюрс ар ни. Матазгес вуыса, пиналъёс эшшо золгес паймизы: пужымлэн сулэз изъёслы пӧрмем тубатъёс выллем. Со кӧм вылэ ӝуйы гинэ ӧвӧл, пӧртэм турын-куаръёс, губиос будӥллям ини. Нош пужым выжыын тӧдь-тӧдь кузь тушо, тӧдь-тӧдь дэра дэремен песятай… носки кышъяса пуке, ас понназ кыӵе ке удмурт гур нёръя.

- Ӟечбуресь! – огымысь кадь вазизы пиналъёс.

Тӧдь тушо песятай шуак луиз, лэся.

- Ой-ёй-ёй! – кеськиз со, вененыз чиньызэ бышкалтыны шедьтыса, - Умоесь-а, мар-а…

Таиз воксё Инмарлы кельше, песятаез чакласа, ас понназ малпаз Лёва. Оло, ӵапак со ик вань Кылдысин? Но малы меда пась носкиен? Нош песятай берпум герӟетсэ лэсьтӥз но сӥньыссэ пиньыныз тӥялтыса, тупатэм пыдвылзэ кутчаз:

- Кышъяськон туж буйгатэ лулсэрез, - нылпиослэсь малпанъёссэс лыдӟиз, оло, песятай, - Чебер-а?

- Чебер, - нош ик огымысь вазизы пиналъёс.

Собере Лёва, тыбыр сьӧрысьтыз Марьёкез васькытӥз но азьветлӥсь кариськыса юаз:

- Тӥ кин?

- Кылдысин, - пыдысьтыз носкизэ тупатӥз на пересь.

- Кылдысин?! - ӟеч дышетэм урокез сямен нош ик ӵош юазы пиналъёс.

- Кылдысин. Мар тӥледыз сокем паймытэ? – сайкыт синъёсын шоразы учкиз пересь.

- Но тон… Тон сыӵе огшоры, - ыштӥськиз Лёва.

- Нош кыӵе мон луыны кулэ? – кышъям пыдвылзэ синпумыныз чаклаз на пересь, - Эксэй кадь зарни дӥсяськемын? Пыдъёсам горд сапегъёсын?

- Ӧвӧл. Но…- Лёва воксё ӟудӥз. – Нош зэм-а тон удмуртъёслэн бадӟым инмарзы вал, яке соиз мукет Кылдысин?

- Мон, мон. Только вот – вал, - чиньызэ вылӥе ӝутӥз Кылдысин, - Вал, куке но, нош табере… Э-ке-ке…

- Тон ачид удмуртъёс дорысь кошкид, шуо, - выжыятӥз на Лёва, лагерьын удмурт мифологиез дышетэмзэс тодаз вайыса.

- Кошки. Нош тӥ чидасалды-а ныр улады пиналлэсь миськымтэ кутэтъёссэ ошылысалзы ке, - куатаськем тусо луиз песятай.

- Чидасал, - нокыӵе ик ӧз кариськы Лёва. Соослэн пичи гинэ патеразы покчи сузэрезлэн кутэтъёсыз котыр батареяос вылын но, валес пумъёсын но ошылэмын. Мар отын сыӵеез?

- Тон монэ асэныд эн ӵошаты, - нош ик чиньызэ вылӥе урдӥз песятай, - Тон огшоры адями, нош мон валтӥсь инмаръёс пӧлысь. Валтӥсь, валаськод-а? Нош кыӵе ке кышномурт, ныр улам, эшшо ке миськымтэ кутэт! Воксё кышкамысь но дунъямысь но дугдӥзы! Соин куатаськи но кошки. Улӥсько табере ас поннам, шып гинэ. Туж ӧтизы ке но, доразы уг ни лыкты.

- Нош ӧтизы-а? – тунсыкъяськиз Лёва.

- Кӧня ке. Нырысь вакытаз. Собере вунэтӥзы, лэся.

Та вераськонэз кылзыны Марьёк ӧз ни чида:

- Нош тӥ асьтэос со кышномуртэ визьманы уд быгатӥське вал шат? Оло, со валатэк озьы ужаз?

- Бен, бен, - споръяськонэ итӥськиз Геня но.

- Ма, кышномурт со так, берпуметӥ шапык вал, - лулӟиз Кылдысин, - Зэмзэ ке, шуисько ук: удмуртъёс монэ вунэтыны кутскизы, ӧз дунъялэ ни.

- Соин ик тӥ туж капчи амал шедьтӥды: куатаськыса кошкиды? – выжыятӥз Марьёк, - Яке йыбыртъямез витиды?

- Нош кулэ вал нюръяськыны! – куспетӥ кариз Лёва.

- Бен! – куараез будӥз Генялэн но.

- Тӥ мар? – Кылдысинлэн тӧдьы синкаӵъёсыз лобыны дасяськись ӧрӟи кадь луизы. – Монэ дышетыны выриськоды?! Кинъёс тӥ сыӵе, монэ визьман понна?!

- Адямиос! Тонэн куштэм адямиос! – бинем пыдыныз пичи гинэ тап ӧз кары Марьёк.

Кылдысин сак учкиз пиналъёс шоры: штани коже гинэ сылӥсь кык курмем, пештырскем пиос, одӥгезлэн кияз кыӵе ке тӧдьы тулкымъяськись мешок, пурӟем йырсио, ӟустариен биням пыдо нылаш. Хе, та ыльык-сальык макеос шораз учко, эшшо ке кылзэ юало на. Соос – куштэм адямиослэн нылпиоссы?

Кылдысинлэн серемез потӥз.

- Ойдолэ, чай юом, - капчияк вазьыса, интыысьтыз вырӟиз со, - Вераськом.

Кылдысин бадӟым пужымлэн кӧмысьтыз изъёс кузя выллань тубиз. Пиналъёс – сьӧраз. Ог 10-15 из выллань тубемзы бере Кылдысин ас мугорыз ӝужда гырке пыриз:

- Ойдолэ, ойдолэ, тани мынам пичи сэреге…

Пичи сэрег вӧл-вӧл бадӟым квартира выллем вылэм. Борддоръёсыз гинэ – пу. Пыд улын – куэм выжлёгетъёс, валес вылын удмурт пужыосын чебермам шобрет, ӝӧк вылын – дэра ӝӧккышет.

- Пукселэ, - ӝӧк котырысь пу пуконъёс шоры возьматӥз песятай но патерез шорын ик сылӥсь гур доры дыртӥз. Пиналъёслы со бутникен парем чай лэсьтӥз, азязы узы варення пуктӥз.

- Тани тазьы ик улӥсько, - пальыштӥз Кылдысин чай сультыртонъяз, - Нокинлы акылляськытэк.

- Тӥ бен зэмзэ но Кылдысин-а? – оскыса но оскытэк выжыятӥзы на пиналъёс.

- Зэмзэ, - быдэс пуньы варення ымаз донгиз песятай, - Но гумыре ортче ни, шӧдске, ӝоген удмуртъёс мон сярысь воксё вунэтозы. Соин кабен ӧвӧлтэме кошко.

- Тӥледлы сыӵе малпан шонер кадь потэ?

- Кызьы шуод… Улон сыӵе. Нуналлы быдэ кылдо пӧртэм выль дуннеос. Нуналлы быдэ быро пӧртэм дуннеос. Удмуртъёслэн Йыр-визь дуннезы уно сюрс-миллион дунееос пӧлысь одӥгез гинэ. Со но пӧртэм пумо луэ ай: кин кызьы адӟе, кин кызьы оске. Но, таиз быроз, мукетыз кылдоз. Тӥ тани та дунее шедиды – туж умой. Мон коть тӥледыз адӟыны, вераськыны быгатӥсько на. Сотэк, тодӥськоды-а, мӧзмытгес ик. Но… Оло, тӥ берпуметӥосыз ни. Оло, эшшо 69 ар ортчыса удмуртъёслэсь Йыр-визь дуннезэс адями дуннеен герӟась ӧсъёс уз но усьтӥське, вашкала дуннеез быдэсак воштоз мукетыз.

- Нош озьы медаз луы шуыса, маке карыны луэ ук! – сюлмыз пирсэктэ Лёвалэн. – Тӥ – Кылдысин – улонэз утись ӧвӧл шат?!

- Мон тӥледлы одӥг мадёс верало, - нылпиослы чай ватсаз на песятай, - Куке но вашкала-вашкала вакытъёсы адямиос туж визьмоесь вал. Соос ог-огзэс кылзыны, кылыны быгатӥзы, ог-огзылэсь но Инкуазьлэсь но ӟечезлы дышетскизы. Инмаръёссылы вӧсяськыса, нокинэ вӧсь карытэк, ултӥятэк улӥзы. Ялан тросгес но тросгес луыса, соос выль бадӟым каръёс кылдытъязы. Но ог-огзы доры ветлыны пумен секыт луиз, укыр пасьтана пазьгиськизы угось. Соку кӧня ке удмуртъёс огинэ люкаськизы, калыклэсь тужгес визьмо веранъёссэ, катъёссэ, вӧсь кылъёссэ но сямъёссэ одӥг книгае гожъязы. Со книгалэсь вылзэ чильпам туйлэсь лэсьтӥзы. Туж чебер но туж дуно уж пӧрмиз. Та книгаез сётӥзы Ватка палась удмурт музъем вылэ. Отысь вӧсясь сое утьыса возьыны кулэ вал. Книга пичигес гинэ чумын тӧдьы из вылын кыллиз. Котькуд мылкыд карись сое учкыны, визькылъёссэ лыдӟыны быгатэ вал. Удмурт пусъёсын, кылбурен гожтэм чуръёс туж чебер чузъяськизы, лыдӟисьлэн йырвизяз лачмытак пыӵаллязы…

Арлы быдэ тулыс вуэм бере Гуждор шулдыръяськон дыръя вань удмуртъёс люкасько вал со чум доры. Эк, макем яркыт но чебер ужрад вал со! – Кылдысин синъёссэ ик кыниз, шып кариськиз… Огдыре пиналъёс малпазы: оло, таид умме усиз? Но тани песятай кисыриосын котыртэм чагыр ин кадь синъёссэ нош ик усьтӥз.

- Нош собере? Мар вал собере? – ёртӥз Лёва.

- Собере кутскизы секыт вакытъёс, - лулӟиз песятай, - музъем понна ожмаськонъёс. Тушмонъёс вашкала вӧсяськон интыез но книгаез быдтыны малпазы. Тае тодыса, вӧсясь удмурт пиос пӧлысь 12 тужгес визьмооссэ, тужгес кышкасьтэмъёссэ бырйиз, соосты дуно чуме пыртыса, вашкала книгаез уй но нунал 12 сутка ӵоже кырӟаса лыдӟиз. Та пиос но сьӧраз кырӟазы…

Пересь нош ик шып луиз, ас тодэ ваёнъёсаз усиз.

- Собере книгаез тылпу яке Ош ньылӥз, озьы-а? – Аслэсьтыз тодэмзэ шараяны дыртӥз Лёва.

- Озьы, - вазиз пересь. – Вӧсясь со книгаез йыр вадьсаз ӝутӥз, удмуртъёс эшшо огпол сое мед адӟозы, пыраклы сюлмазы мед кельтозы шуыса… Адӟе вал, кыӵе секыт вал вӧсясьлы сыӵе вамыш лэсьтыны! Ожгар дӥсен пӧрмытскем удмурт батыръёслэн но синвузэс воземзы ӧз луы. Но… Муртъёс сантэмамлэсь азьло книгаез быдтоно вал. Озьы уно сю аръёс ӵоже нылпиоссэс, егитъёссэс визьмаса, калыкез шудо карыса будэтэм книгаез тылпуэ куштӥзы. Ас киосынызы!.. – Кылдысинлэн синвуосыз шапыр вияны ӧдъязы, кузь тушаз пыӵазы…

- Тӥ ваньзэ тае ас синмыныды адӟиды? – дӥсьтытэкгес юаз Марьёк.

Кылдысин йырыныз сэзъяз.

- Соку малы ӧд дугдытэ?! - ӧз чида пушкыз бугыръяськись Лёва. – Малы сыӵе дуно книгаез нокин шедьтонтэм интые ватыны уг луы вал?

- Сыӵе книга вань шуыса, ваньзы тодӥзы, соин сое ялан утчасалзы. Вазь-а, бер-а, шедьтысалзы но сантэмасалзы. Соин ваньмызлы возьматоно вал – книга ӧвӧл! Мон туж оски: удмурт батыръёс лыдӟемзэс-кылэмзэс уз вунэтэ. Шуг-секытъёс пыр потыса, эшшо юнгес луозы, выль книга гожтозы. Нош соос… Соос тодэмзэс калык пӧлы вӧлмытыны ӧз дыртэ, асьсэ сярысь гинэ сюлмаськизы. Озьы удмуртъёс дун-чылкыт осконъёсты, вӧськылъёсты вунэтыны ӧдъязы, пумен-пумен асьсэ инмаръёссы шоры но вылӥысен улӥе учкыны кутскизы. Мон туж куректӥ. Нош одӥг ӵукна султӥсько но - ныр улам - миськымтэ кутэт! Йыры курен удмуртъёслэсь вань тодэмзэс берен басьтӥ, гожъяськон пусъёссэс но вунэтытӥ. Малпай: ноку медаз ни кылдытэ выль книга!

Кылдысинлэн висъетаз неномыртэм шыпыт луиз. Нылпиос гуньдэм кадь пукизы, ӵашаосын чай сӥяса улӥз...

- Ноку но ӧд жалялэ-а озьы каремды понна? – нырысь куаразэ поттӥз синвуосын тырмем Мани.

- Жаляй. Но озьы пӧрмиз… Пумен-пумен ачим но лябӟыны кутски. Озьыен, монэ но адямиос вунэто ни, малпай. Я бен, мар луоз – лу.

- Нош мыным песятае шуиз: зэмзэ ке, удмуртъёслэн книгазы ӧз ӝуа, со – вань! – Кылдысин шоры оскытэкгес учкиз Лёва.

- Тынад песятаез озьы шуиз?! - ӝож уйвӧтысь сайказ кадь Кылдысин. – ... Со тонэ буйгатӥз гинэ. Укыр, дыр, яратэ.

- Буйгатӥз? – шуак Лёвалэсь сюлэмзэ кышкан шымыртӥз. – Буйгатӥз? Бен, бен! Кызьы Лёва та сярысь азьвыл ик ӧз малпа! Песятаез отчы, Шайтан доры но юромо кылиз, соосты мозмытон понна! Нош Лёвалы песятайзэ ноку адӟыны кылдымтэ ни ке?!

- Со монэ туж яратэ, мон но сое, дыртӥз Лёва, - Со милемын ӵош та дунее вуиз вал, но Шайтан доры кылиз. Сое кызьы ке утёно, берен Шайтан доры шедёно!

- Берен Шайтан доры?! – синкаӵъёсыз выллань тэтчизы Кылдысинлэн. – Эн но малпалэ! Нош песятайдэ мозмытыны юртто, вить ай кӧня ке.

- Эшшо – Ондӥез! – ӧс пала дыртӥсь Кылдысинлэн бӧрсяз кеськиз Геня.

Тӧдь тушо пересь корказяз потӥз, киоссэ Инмарлы куриськыса кадь вылӥе ӝутӥз. Огшап озьы сылӥз. Тани пилемъёс палэнскизы но инмысь пичи ӧс усьтӥськиз, отысь Шунды мумылэн сайкыт тусыз адӟиськиз. Кылдысинлэн киосыз вылэ кык кузь шунды сиос выдӥзы. Ин ӧс нош ик ворсаськиз. Кылдысин шунды сиосты, киысьтыз дыдыкъёсты сямен, лопырскытӥз. Соос син куспын кытчы ке ышизы, но ӝоген выльысь берытскизы. Таяз рад паймем нылпиослэн азязы кылдӥзы сиос кузя васькись Онтипагай но Ондӥ!

- Ура! – шумпотонзэс вормыны ӧз быгатэ пиналъёс. – Ура!!!

Лёва вань кужмысьтыз ӟыгырскиз яратоно песятаез борды:

- Ноку, ноку тонэ огнадэ уг кельты ни!

- Туж умой, пие. Ваньзэ кызьы кулэ лэсьтӥды, - пальпотӥз Онтипагай, - Мо оски: тӥляд ваньмыз пӧрмоз. Адӟисько, Кылдысинлэсь но сюлэмзэ вырӟытӥды.

Кытӥ ке ӧй вал Онтипагайлэн пыд дораз пыфкетӥсь Педя но вуиз. Мон но, пе, татын!

Онтипагай пизэ тыбыр кузяз топ-топ вешаз, собере муспотон Педязэ гольык киосаз ик пуктыса, лэйкатӥз. Куанэм Педя э нюлэ ук песятайлэсь киоссэ!

- Я, я, тырмоз, - серектӥз соиз, - уськыто тани.

Нош Лёва Кылдысин пала берытскиз:

- Тау тӥледлы! Шуиськоды, кужымды ляб ини, нош учке ай, Шайтан киысь сыӵе ӝог мозмытӥды!

Кылдысинлэн кисыриосыз шунды сиос кадь пиштӥзы:

- Соос асьсэос лыктыны дась ни вал, мон выж гинэ лэзи.

- Дась ни вал? – Лёва песятаез шоры учкиз. Пиналъёс но югдурез валаны тыршизы, лэся, пересьёсты кыкналасянь котыртӥзы.

- Кхек, кхек – вераськон ӧрез палэнэ кыскыны малпаса, ньылонзэ сузяз Кылдысин, – ойдолэ ай чай юыны, воксё сӥяз ни, дыр.

- Песятай? – интыысьтыз вырӟытэк Онтипагай шоры мыр-мыр учкиз Лёва, – Мон мае ке уг тодӥськы на?

- Я, я, эн учкы сокем, - серектӥз Онтипагай. – Шайтанлэн но сюлэмыз вань ук. Соин но вераськыны, валаны луоно. Уродэзлэсь со эшшо лекоме, нош ӟечезлэсь пумен небӟе. Зэмос эшъяськонэз, зэмос чылкытлыкез, адямилэсь котькуд учыре адями кыльыны быгатэмзэ уг чида со. Уродэз эшшо мургес уродэ вуттэ, нош ӟечез, вазь-а, бер-а, вылӥе ӝутэ. Шайтан зэмзэ но милемыз лэзьыны дась ни вал. Тӥ гинэ – ваньды ӵош – Кылдысин доры вуыны кулэ вал, огъя командаен, мыжыкысь вань чиньыос кадь. Тӥ быгатӥды.

Пиналъёс оскытэкгес учкизы Кылдысин шоры.

- Тӥ та сярысь тодӥськоды вал?

Танӥськонлэн толыкез ӧй вал ни, Кылдысин йырыныз сэзъяз.

- Та пияш, - Онтипагай шоры шуныт учкиз со, - 69 ар талэсь азьло Йыр-визь дуннеысь мырдэм потӥз. Но потӥз. Туж шерез быгатэ. Шумпотӥсько, таяз рад, солы луыса, лэся, Йыр-визь дуннеысь потыны быгатоды ваньды. Сыӵе ик тазаесь, чебересь.

- Сылэ ай, сылэ, - куспетӥ кариз Онтипагай, - Тӥ милемыз келяськоды ни?

- Ма, быдэс лянэс варенняез сиыса быдтӥськоды ни кадь, - синъёссэ кыньыртӥз пальышась Кылдысин, - дыр но пумен йылпумъяське.

- Кӧня кылиз на?

- Ӝыны час пала.

- Озьыен, ӝыны час ортчыса, та дуннеысь потыны ми ум ни быгатэ?

- Уд. Кык дуннеосты герӟась ӧс ворсаськоз пыраклы, яке, шудмы вань ке, эшшо 69 арлы.

Онтипагай шып луэм пиналъёс шоры учкиз: соос, шӧдске, асьсэлэсь матэктӥсь эриксэс валаса но ӧз вуттэ на. Собере берен Кылдысинлы вазиськиз:

- Возьматы на книгаез. Малпасько, вуттом…

- Кыӵе книгаез?

- Быдӟым книгаез.

- Ӧвӧл со.

- Кызьы ӧвӧл? – Онтипагай юн жадем мурт выллем лулӟиз, - Я, эн танӥськы, учком но кошком.

Кылдысин кырыжак учкиз Лёва шоры. Пияшлэн пушказ маиз ке вырӟиз кадь: кыӵе книга сярысь вераськон? Но Онтипагай соку ик валэктоно кариськиз:

- Удмуртъёслэсь Быдӟым книгазэс Ош ньылӥз, тылпу сутӥз, шуо. Эн оске талы. Книга ӧз быры. Кылдысин берпум секундъёсаз сое утьыны но ватыны быгатӥз. Юнме уг шуо: гожтэм кыл уг быры…

Пӧяськем вылын кырмем Кылдысин вӧсь луэм мурт сямен кисырскиз но вуӵыртӥз:

- Озьы шуо. Но улон возьматӥз: кыл – быре, гожтэмез но, пельысь-пеле, ымысь-ыме верамез но. Мар толыкез на со книгаез учкемдылэн? Отысь номыре лыдӟыны но адӟыны но уг луы ни.

- Озьы ке но… - каллен гинэ вазиз Онтипагай. Пиналъёс но Кылдысин шоры туж витьыса учкизы. Нош тӧдьы песятайлэн тусаз куректон вужер пуксиз, оло. Огшап малпаськыса, со интыысьтыз султӥз:

- Ойдолэ…
* * *

Быдӟым пужымлэн из мугорыз кузя соос выллань тубизы. Макем вылэгес – сокем секытгес сётӥськиз сюрес. Марьёкез но Педя ӵушъялэз Лёваен Геня вошъяськыса черодэн нуизы, нош Ондӥ Онтипагай борды пыкъяськыса вамышъяз. Азязы югыт тылпо выллем лэйказ Кылдысинлэн мугорыз. Кыдёке улӥе кылизы ни тӧдь-мамык пилемъёс, но пужымлэн йылыз ӧз адӟиськы на. Тани Кылдысин дугдӥз, писпулэн гыркысьтыз пичигес сандык поттӥз.

- Татын, - вазиз со Онтипагайлы.

Пиналъёс но песятай сандык котыре кариськизы, шоканы дӥсьтытэк сыло: али маке сыӵеез луыны кулэ кадь. Кылдысин мур лулӟиз, ас понназ маке шыпыртӥз, сандыкез ӟукрак карыса усьтӥз но… Адями синъёсты, ныръёсты оло бус, оло тузон бичиятӥз, сутскем зын вӧлскиз. Ваньмыз тӧлӟем бере сандык пыдэсысь Быдӟым книга адӟиськиз. Сурыкмем тусызъя но шӧдӥське, куке но солэн вылбамыз туж чебер чильпаса лэсьтэмын вал. Онтипагай «Осто, Инмаре-Куазе» шуыса, книгаез усьтӥз. Син азе пуксизы валантэм пусъёс. Песятай эшшо одӥг бамзэ берыктӥз – таяз одӥг-кык пус гинэ адӟиське, куинетӥзэ – воксё буш, эшшо одӥгзэ – буш... Книгаын номыр гожтэмын ӧй вал ни…

- Нош мон тае нырысьсэ адӟыку, татын но кыӵе ке пусъёсыз вал на, - ас понназ лабыртӥз Онтипагай, - нош но нош бамъёсты берыкъяса.

- Вал, - куара шуккиськем кадь вазиз Кылдысин, - но тон ӧд вала соослэсь пуштроссэс. Йырад но ӧд кельты. Собере… Тон мар, малпад, сомында дыр ортчыса, югдур умойгес луоз? Вунэтэмзэ кызьы ке шуак тодазы ваёзы? Сомында дыр ӵоже тон валаны кулэ вал: аръёс ортчемъя, калыклэн йырсазьыз кысэ гинэ.

- Но мон сыӵе тырши, тырши, - лабыртӥз на Онтипагай. - Зэм, мынам но ваньмыз укыр ӝог вунӥз, но нырысетӥ бамысь гожтэмез кылиз ик, - Онтипагай нош ик книгалэн нырысетӥ бамаз берытскиз. Отысь валантэм пусъёс шоры учкиз. – Сомында аръёс ӵоже малпаса улӥ мон, ма сярысь верало та суредъёс - ӧй тоды. Тодосчиос но ӧз юрттэ.

Пиналъёс книгалэн нырысетӥ бамысьтыз пусъёс шоры сак учкизы. Ма гожтэмын отын – валантэм. Удмуртъёслэн кыӵе ке букваоссы, тамгаоссы, лэся.

- Нош яра-а ми та книгаез сьӧрамы нуом, дорамы эскером, а? – Кылдысин шоры туж курись синъёсын учкиз Лёва. Тӧдьы песятай мӧзмыт пальыштӥз гинэ:

- Тӥ вунэтӥды, шӧдске, кытчы вуэмдэс. Татысь номыре нуыны уг луы. Нуиды ке но, асьтэ дуннеяды со ваньмыз сылмоз. Адӟемдэс йырады гинэ гожтыны луоз. Дорады тодады ваёды, малпаськоды.

Шуак Кылдысин палэнскиз, яке быльырась синвузэ ватыса, яке эшшо маке. Собере кытчы ке палэнэ вераз:

- Уг валаськы, малы тӥледлы та книгаез адӟыны кулэ вал. Огшоры ӧпкелён, буш осконъёсын улон понна? Ваньмыз быроз. Ваньмыз быре ни. Оло, 69 ар ортчыса...

Кылдысин шып луиз.

- Нош малы одно ик 69? - витёнтэм вылысь выжыятӥз буйгасьтэм Лёва.

Кылдысин берытскытэк ик, пельпумъёссэ ӝутъяз:

- Озьы тупатэмын... Та пумтэм-йылтэм улонын озьы тупатэмын... - Со эшшо маке вераны турттэ вал кадь, но тыпак луиз. Мултэссэ шараямысьтыз кышказ, лэся. Собере шуак берытскиз но чагыр синъёссэ нылпиос шоры ӝутыса, куаретӥз:

- Дыртэ, ӝоген сюресты ворсаськоз...

Онтипагай сандыкез пытсаз но гуньдэм пиналъёс шоры сюлэмшуго учкиз:

- Ойдолэ. Кылиз на кӧня ке гинэ. Кыскись интые дыртоно. Отысен, дорамы бертон вылысь, лушкемкылъёсты мыддоринь верано луоз: «Кылдысин, Куазь, Инмар!» Валады-а?

Нылпиос йыръёссэс шоназы. Таяз рад ваньзы валазы: доразы вуытозь кӧня ке гинэ кылиз на.

Палэнскем Кылдысин шоры учкыса, Онтипагай ватсаз:

- Тау тыныд, ӟеч лу!

- Тод, ми тон доры одно ик лыктом на! – шӧдтэк-шорысь кеськиз Лёва. – Зэмос улонын но мар ке малпалом, оскы!

Тазьы шуыса, Лёва Кылдысин доры дыртӥз, солэсь шагрес шуныт киоссэ кырмиз. Тӧдьы песятайлэн бам кузяз синвуосыз питыразы, вань пиналъёсты гадь бордаз ӝиптылыса, со шузимем мурт сямен шипыртӥз гинэ: «Ваньмыз умой, ваньмыз умой! Тӥ ӧвӧлтэмзэ шедьтоды. Музъемысь но уд, вуысь но уд, омырысь но уд, но – шедьтоды! Дыртэ!»

Пужым мугор кузя адямиос вылӥе нюжтӥськизы. Вистэм-вожтэм тӧласькыны ӧдъяз. Ог-огзы борды кырмиськыса, пиналъёс мырдэм возиськизы улӥе питырамлэсь. Тани соос пужымлэн йылозяз ик вуизы. Татын одӥг маке пасьта модос бордысь писпулэн берпуметӥ вайёсыз пото, бадӟым бурдъёс выллем тӧл шорын шонасько. Онтипагай пал киыныз юн кырмиськиз пужымлэн валтӥсь модосэз борды, мукет киыныз вӧзаз пыкъяськыса сылӥсь Ондӥез ӟыгыртӥз но кеськиз:

- Ваньды ог-огды борды юн кырмиське: номырин люконтэм кульчо мед луом!

Солэсь кеськемзэ тӧл соку ик палэнэ нуиз, но кышкытлыклэсь утиськонэз шӧдыса, пиналъёс сотэк но ог-огзы борды юн кырмиськыса сылӥзы ни: огзы бӧрсьы огзы, пиньёссэс юн куртчыса, тубат кадь изъёс вылын, асьсэос но изъёс выллем. Ондӥлэн киыз юн кырмыса возиз Лёвалэсь кизэ, Лёвалэн -Марьёклэсь, Марьёк кутӥськиз Геня борды, нош Генялэн чиньыосыз лызэктытозяз возизы Педяен мешокез.

- Ваньды дась? – нош ик кеськиз Онтипагай. – Озьыен, Кылдысин, Куазь, Инмар!

- Кылдысин, Куазь, Инмар! – кӧня ке полэс, тулкымен-тулкымен погыльскизы пиналъёслэн юн куараоссы. Ог секунд куспын ваньзэс нап бус бинялтӥз, пушказ сылмытӥз.
* * *

- Бертӥм, - небыт тӧл шорын шильыртӥсь писпу куаръёсты чаклаз Марьёк.

- О-о, - вазиз Лёва.

Ондӥ но Геня малпанъёсазы Йыр-визь дуннеын вал на, лэся. Востэммем Педя песятайлэн кӧтурдэсыз вӧзы ӝиптӥськыса пукиз, оскытэкгес зынъяз скамьялэсь лондылэм буёлзэ. Нош Онтипагай? Со кияз вож улмо бергатӥз ни. Собере нунокезлы мычиз:

- Си, пие, витамин…

Лёва куаӵ-куаӵ куртчиз, чырссэ ӧз но шӧды кадь, мылкыдыз син куспын лопыръяны ӧдъяз: бертӥзы! Соос ваньзы бертӥзы!

- Мелэ, сиелэ, - пиналъёслы улмо ишкаса сётъяз песятай, - Тау Инмарлы, ваньды лулоесь, тазаесь!

Огшап омырын куаӵыр карем гинэ кылӥськиз. Вож чырс улмо пиналъёслы ческытлэсь но ческыт потӥз, кема витем яратоно емыш кадь. Шӧдтэк-шорысь Ондӥез пӧсь утюген лякизы, оло. Ӝыныё йыръем улмозэ палэнтыса, со интыысьтыз ик тэтчиз:

- Табере мон тодӥсько, кыӵе валтӥсь малпанэз луоз мынам интернет-программаелэн! «Кылдысин дауре» шудон – со огшоры шудон уз луы! Отчы мон быдэс Йыр-визь дуннеез пыртыны тыршо! Адями йыръёсысь вошкалаез вунэ бере, мед коть со компьютер визьмын улоз. Котькудӥз та шудонэн шудӥсь вуылоз Йыр-визь дуннее! Озьы вашкала дунне уз быры! Эк, планшетме дэймонъёслы кузьмано ӧй луысал ке, возьматысал мон тӥледлы…

Ондӥ шоры ваньзы шузимем мурт шоры сямен учкизы. Ӵушъял гинэ но чоркак кариськиз. Но тани омырез сэзъяз пиналъёслэн сюлмысь серекъямзы. Нырысь каллен гинэ, собере золгес но золгес.

- Нош мон тыныд юртто, - эшсэ пельпумаз чабкиз Геня.

- Ми но, ми но! – векчи киосыныз чабиз шудо Марьёк.

- О-о, - ӝутскем мылкыдзэ вормытэк Лёва но тэтчиз, - табере ми ваньмы ӵош – одӥг семья кадь!

- Кхек, нош монэ шудыны басьтоды-а, - мазэ-созэ валатэк, пунэм тушсэ маялляз Онтипагай.

- Басьтом!

Бурдъяськем пиналъёс лагерьысь потон пала читыр-чутыр сюрес кузя вырӟизы, но азязы витёнтэм-вылысь кык лек тусо адямиос кылдӥзы.

- Сылэ!!! Ыбо! – питырскем синъёсыныз шоразы учкыса, кеськиз одӥгез, омырын пистолетэныз сэзъяса. – Тӥ мар татын ужаськоды?

- Дорамы бертӥськом, - нокыӵе ик ӧз кариськы возьмаськисьлэсь куаразэ тодмам Лёва.

- Кызьы татчы шедиды? – куаразэ эшшо золгес кариз возьмаськись.

Ӟудэм пиналъёс ог-огзы шоры учкизы.

- Ми шутэтским татын, лагерьын, - вазиз Марьёк.

- Бен, соос та лагерьын шутэтскизы, - азьпала потӥз Онтипагай, - лэзе пистолеттэс, адӟиськоды, милям номырмы ӧвӧл, собере, пиналъёс шоры, ожгар тӥрлыкен, ай-яй-яй... - йырыныз сэзъяз песятай.

- Нош тӥ кин сыӵе? – йӧспӧртэм байкер тусо муртэ сӥсъяз возьмаськись, - Эшшо дышетыны выриськоды!

- Со мынам песятае! – Онтипагай вӧзы кариськиз Лёва.

- Сылэ интыяды, шуи! – вандэм кадь кеськиз возьмаськись, собере эшез пала кырыӝак уӵертӥз, - Васи, тон жингыртӥд-а?

- О-о, - вазиз сюрес урдсын кияз лопатаен сылӥсь воргорон, - ӝоген вуозы.

- Ярам. Вуозы но тодозы: кин кинлэн песятаез но мар ужаськоды тӥ ворсам лагерьын, - куалектэм Иллёк пичияк буйгатскиз, лэся, пистолетсэ лэзиз, но… Возьмаськисьлэн йырсиосыз син куспын пежыр ӝутӥськизы: ӝегатэм пиналъёс пӧлысь со тодмаз «Внимание, розыск!» бумагаысь нылашлэсь туссэ! Сылэ ай, ма пиос но со туспуктэмъёсысь нылпиослы укшало ук! Иське... Та тушо воргорон соосты лушкам!

- Сылэ вырӟылытэк! – пистолетсэ ури-бери ӝутӥз но, куалектэмзэ ватыны тыршыса, кеськиз Иллёк.

Нылпиослы но, Онтипагайлы но серем ӧй вал ни. Ма бен, тани ваньмыз интыяз пуксёз. Песятай югдурез валэктон вылысь ымзэ усьтэм ик вал, кытысь-мырысь автоматъёсын адямиос вуизы, Онтипагаез кыкналасянь кырмизы но капка пала кыскизы.

- Лэзе сое! Лэзе-е-е! - вань кужмысьтыз кесяськыса, Лёва песятаез доры ишкалскиз. Но полицейскойёс сое но вань нылпиосты юн кульчое ӝиптӥзы. Юр-яр карись пиналъёсты нокин ӧз кылзы. Онтипагаез полицилэн машинаяз донгизы. Корт кенерен юнматъям бадӟым машина жи-ич кариз но тузонэз бугыртыса азьлань лобатӥз. Шулӟектэм пиналъёсты мукетаз машинае, буханкае, интыязы.

- Кытчы песятаез нуиды? - ялан лекъяськиз Лёва.

- Со милемыз быронлэсь утиз, со — туж ӟеч адями! - ӟырдаз Геня но.

- Тӥ со понна кыл кутоды! - Тӧдьы футболкае интыям ӵушъялэн пичи гинэ ӧз шоналскы Ондӥ.

Но полициын ужасьёс номыре ӧз кылэ кадь. Куалектэм Марьёкез машинае кужмысь донгыкузы, нылаш одӥгезлэн кияз куртчиськиз. Но, яке курткаез укыр зӧкен, яке вӧсез сокем чидась луэмен-а, полицейской ик но ак но ӧз кары.

Ворсам машинаын, укноетӥ бугыр-бугыр карись тузон шоры учконъязы, пиналъёс пичияк буйгазы. Лёвалэн гинэ сюлмыз неномыртэм пирсэкъяны ӧдъяз: со валаз - песятаез янгыш карыны быгатозы нылпиосты лушкамез понна – та сярысь вераськизы возьмаськисьёс. Но пиналъёс ваньзэ валэктозы ук: песятай нокинэ ӧз лушка, ваньзы ӵош соос Йыр-визь дуннее вуылӥзы. Ярам ай отысь потыны быгатӥзы...

Лёва эшъёсыз шоры учкиз. Ог дас минут талэсь азьло гинэ шудо пальышась пиналъёслэн тусазы сюлмаськон: кытчы нуо соосты? Малы песятаез кыӵе ке бадӟым йыртэмасез сямен кульчоязы?

Пиналъёсты шедьтэмзы пумысен гожъязы Удмуртиысь иворъёсъя вань агентствоос, газетъёс. Возьматъязы телевизор пыр но. Нырысь ивортӥзы: нылпиосты, пе, лушкамез понна янгыше уськыто кыӵе ке Корепанов Онтип Гаяновичез. Зэм, бӧрысь мукет сямен вераллязы ни: нылпиос асьсэос Онтип Гаяновичен кошкиллям. Малы? Тодмо ӧвӧл. Кытын вал соос кык-куинь нунал ӵоже – валантэм. Пиналъёс, дышетэм кадь, кыӵе ке Йыр-визь дунне сярысь мадё, туж оскымон верало. Малпан кылдэ: ваньзылэн йырзы сураськемын. Но специалистъёс нылпиосты эскеризы: йырсазьзы, пе, ӟеч, нокыӵе воштӥськонъёс ӧвӧл. Озьыен, пиналъёс асьсэос со дуннеез малпазы, яке…

- … яке со дунне зэмзэ но вань, - ас понназ малпаз Лёвалэн атаез. Солэн туннэ нокызьы умме усемез уг луы. Нош ӵукна туж вазь султоно, город сьӧрысь одӥг коттеджын евроремонт лэсьтоно. Ужез туж трос, зэм, уждун но трос сӥзизы. Городысь патерзы понна кредитсэс ворсаны ӵапак тырмоз.

- Улонын ваньмыз сьӧд яке тӧдьы. Ваньмыз – валамон, - Лёвалэн атаез ачиз ассэ буйгатыны выриз, - Нокыӵе Йыр-визь дуннеос ӧвӧл. Ваньзэ сое нылпиос шудыса малпазы. Малпазы но асьсэос ик со дуннезылы оскизы. Ӟучъёс верамъя – «заигрались». Нош Онтипагай? Хм… Юнме уг шуо ук: пересьлэн но пиналлэн визь огпорма луэ ни… Но сокем огшоры меда песятайлэн агаез? Мар тодо соос Онтипагай сярысь?

Пиосмуртлэн син азяз пуксиз следовательлэн юалляськемез.

- Тӥ тодӥськоды вал-а кинлэн мылкыдызъя Яр ёросысь нюлэс шорын «Шудкар» лагерь пуктэмын?

- Уг. – Лёвалэн атаез зэмзэ но номыр уг тоды вал.

- Нош ми тодӥськом, - ручказэ ӝӧк борды йыгаса, вазиз следователь, - 10 ар талэсь азьло шаерчи Онтип Корепанов сыӵе мылкыдзэ вераса, вуылӥз элькунысьтымы Правительствое. Ачиз ик спонсор кариськиз.

- Спонсор? Онтипагай?! Ма кытысь солэн сомында коньдонэз? – серемез ик потӥз воргоронлэн.

- Серем ӧвӧл, - лек тусо кариськиз следователь, - Тӥляд песятайдылэн агаез ас вакытаз трос выремын пӧртэм ватосъёсты утчанэн. Тӥ та сярысь тодӥськоды, вылды. Вот, 10 ар талэсь азьло шедьтэм одӥгез ватосэз 500 миллион манет тыр дунъямын вал. Нялтас вераса, вашкала чеберъяськонъёсын ватос ӵапак Яр ёросысь нюлэскын шедьтэмын вал. Та узырлыксэ Онтип Корепанов, ӵыжы-выжыосызлы но вератэк, государстволы сётӥз, аслаз люкетэныз «Шудкар» лагерь пуктыны куриз.

- Но… Малы? – ваньзэ тае тодымтэез понна огласянь возьыт, макет ласянь воксё валантэм вал Лёвалэн атаезлы.

- Вот-вот: ми но валаны тыршим, - шуиз следователь. – Но, тодӥськоды-а, одӥг малпанэ вуиськом: Корепанов сокем тунсыкъяськиз вашкала удмурт культураен, удмурт калыклэн выжыеныз - ваньмыз со медаз вуны шуыса, пуктоно кариськиз нимысьтыз лагерь. Туж умой малпан. Зэмзэ вераса, элькунамы нокин уг тоды та лагерьлэн оглюкетэз Корепановлэн коньдонэныз пуктэмын шуыса. Калык малпа: Правительство сюлмаськиз. Ма бен, озьы ик мед луоз. Аслаз Корепановлэн та пумысен вераськемез уг поты, дан поттыса со уг ветлы. Таиз но – умой, - следователь мыр-мыр учкиз Лёвалэн атаез шоры, - Малы мон ваньзэ тӥледлы верасько? Валаме потэ: лагерез та интые пуктэмлэн но нылпиослэн отын ышылэмзы вискын герӟетэз ӧвӧл меда?

Лёвалэн атаез пельпумъёссэ гинэ ӝутъяз. Солы аслыз но валантэм: малы нылпи лагерез тём-тём пеймыт нюлэс пушкы, гуртъёслэсь сокем кыдёке пуктонэз вал? Зэм, Онтипагай котьку но йӧспӧртэм луэменыз висъяськиз, аспонназгес улӥз, ялан кытӥ ке нюлэсъёстӥ, возьёстӥ ветлӥз, инкуазен юн кусып возиз, трос лыдӟиськиз…

- Оскисько: вераськонмы асьме куспын гинэ кылёз, - малпаськись тусо луиз следователь, - Но та учырын маке трос валантэмез…

Лёвалэн атаез сое ӧз кылы кадь, витёнтэм вылысь юаз:

- Мар луоз табере Онтипагаен?

- Номыр но, - малы ке лулӟиз следователь, - Корепановез ми лэзимы ни. Нылпиос шуо: со бертыны юрттӥз. Ачиз ялан куре лагерез утьыны, медаз, пе, быры вал. Вылӥ кивалтӥсьёс но со понна дурбасьто. Озьы ке но, валантэм… Йыр визь дунне… Тӥ солы оскиськоды-а? – следователь нош ик мыр-мыр учкиз Лёвалэн атаез шоры. Воргорон номыр ӧз вазьы. Татчыозь солэн улоназ ваньмыз валамон вал: уж, семья, коньдон поттон, сьӧд яке тӧдьы, нош табере…

…Лёвалэн атаез валес вылысьтыз султӥз, толэзь югдытэмъя борддорысь час шоры учкиз: кык тырме ни. Вить часын ӵукна со султыны чакла ни вал, умме усьыны уз кылды ини, вылды. Пиосмурт кыштыр гинэ матэктӥз пиезлэн висъетэз доры, ӧссэ пичияк усьтӥз но… ӝомо-югдоысь синйылтӥз валес вылын пукись вужерез.

- Лёва, тон-а?

- Мон, - вазиз вужер.

- Тон малы уд кӧлӥськы? – дышем сямен лек юаз атай.

- Уг быгатӥськы, - лулӟиз пияш.

- Мон но, - малы ке туж шуныт вазиз атай но пиез вӧзы интыяськиз. Огшап, катанчи вискытӥ мычиськем толэзь шоры учкыса, шыпыт пукизы.

- Атай, песятаез ку-о лэзёзы? – сюлэмшуго юаз пияш.

- Лэзизы ни, - буйгатӥз атай. – Улягуртаз бертӥз.

- Лэзизы? – лӧптэм пияш пичи гинэ ӧз черетскы.

- Тс-с-с, анаед но сузэред кӧло, эн сайкаты, - нош ик кызьы ке укыр лякыт вазиз атай.

- Ярам, - шыпыртӥз Лёва но.

Нош ик чалмыт луиз. Катанчи вискысь толэзь пилем сьӧры ышиз. Висъетын тём-тём луиз.

- Пие, вера мыным Йыр-визь дунне сярысь, - шӧдтэк-шорысь куриз атай.

- Вералом? Тыныд? – ыштӥськиз Лёва.

- Вера, - эшшо огпол куриз атай.

- Нош тон уд серекъя?

- Уг.

Лёва киосыныз шонаса ик мадьыны ӧдъяз улонзэ пыраклы бугыртэм дэймытӥсь дунне сярысь, отын луэм учыръёс сярысь, Онтипагайзы сярысь…

Атаез туж сак кылзӥз. Солэн син азяз пуксьылӥзы пичи дыръяз лыдӟем выжыкылъёс, улӟылӥзы песянаезлэн мадемъёсыз. Ӧвӧл, улон – со сьӧд но тӧдьы гинэ ӧвӧл, малпаз на атай, пиезлэн миндэр вылаз умме усьыкуз…
* * *
Ӝоген Выль ар, нош Лёвалэн мылкыд мӧзмыт. Школае со куинь нунал ӵоже уг ветлы ни – карантин. Пыэдэн укыр трос висисьёс, пе, соин пиналъёслы витёнтэм шорысь «каникул» кузьмазы. Лёва уг висьы. Но сюлмыз интыяз ӧвӧл. Пияш яратоно кинозэ учкиз ни, эшъёсыныз компьютер пыр кӧттырымон вераськиз, урокъёссэ лэсьтыны кӧня ке пол пуксьылӥз но мылкыдыз ӧз тырмы… Мӧзмыт. Малы ке сюлмыз ялан песятаез доры кыске. Мар меда али ужа со? Пичи гуртаз пырон сюрес но ӧвӧл, дыр, берло толэзьзэ сомында лымы усиз…

Лёва ӝӧк вылысь «Удмурт шаер» газетэз кутӥз. Сое анаез лыдӟыны яратэ. Кӧня ке бамзэ берыкъямез бӧрсьы пияшлэн син шораз йыръян йӧтӥз: «Шедьтэ сое, удмуртъёс». Тунсыко, малпаз Лёва но огшоры лыдӟыны кутскиз:

Шуак пияшлэн йыраз маке шалькак кариз кадь, Лёва газет борды кык киыныз ик ӝабырскиз:

Лёвалэсь быдэс мугорзэ пӧсьтурынэн зыразы, оло. Книга – вань! Вань! Вань! Кин ке со сярысь тодэм, газетэ гожтэм! Кин меда? Та сярысь одно ик тодоно, песятаезлы но эшъёсызлы верано! Со книгаез одно ик шедьтоно! Бурдъяськем пияш квартираетӥ солань-талань бызьылэ: эк, жингырты вал али песятайлы, но со Улягуртын телефон но уг куты… Со вискын пияшлэн ӧсаз жингыртӥзы.

- Кин отын? – дыртӥд юаз пияш.

- Мон та – песятаед, - кылӥськиз туж тодмо но туж дуно куара.

- Песятай!!! – Лёвалэсь кеськемзэ бускель квартираын улӥсьёс но кылыса, куалектысалзы, вылды, ярам, доразы ӧй вал.

Корка пыриз бадӟым гын сапеген, тулупен дӥсяськем кузь тушо пиосмурт. Тол бабай но тӥни. Лёва песятаез борды ӟыгырскиз. Онтипагай нуноксэ тыбыр кузяз топ-топ вешаз, ут ай, пе, макем нуйтӥськемед, ӝоген монэ сутод. Нош Лёва ӧс дорысен ик тачыртыны ӧдъяз:

- Песятай, со вань! Вань! Быдӟым книга – вань! Али гинэ газетысь адӟи. Сое одно ик шедьтоно!

Онтипагай дыртытэк куштӥз тулупсэ, гын сапегзэ но шатыр карись Лёва шоры пальыштӥз:

- Нош мон малы тон доры лыктӥ, кожаськод? Кыкнамы ик утчалом. Редакцие жингыртӥ ни, кин, шуисько, ялон сётӥз. Нош соос нимзэ-тулзэ но юаллямтэ, ялон понна уксё кутӥллям но тӥни! Асьсэос но табере паймо… Но туссэ вераны тодӥзы: тӧдьы тушо туж чылкыт песятай, пе.

- Тӧдьы тушо? – Лёва песятаез шоры туж сак учкиз.

- Бен, бен, мон но малы ке Кылдысин сярысь малпай, - вазиз Онтипагай, - Но со сыӵе осконтэм…

- Тунсыко, - йырберзэ кормаз Лёва, - Песятай, нош тон валад-а кытысь Быдӟым книгаез утчано?

- Ойдо, нырысь чай юом, сюрес пичияк жадьытӥз. Собере Ижкаре мыном, анай-атаеныд мон вераськи ни. Ижын архивъёсын бугыръяськом. Вань мынам одӥг малпанэ…

- Кыӵе? – чидатэк ёртӥз Лёва.

- Ачим но шараяны кышкасько на… - песятай котыр чакласькиз но кухня пала вамыштӥз. Отысен, ӝӧк сьӧрын пӧсь чай ӟузьылон висказ нунокезлэн пеляз гинэ маке туж шыпыт вераз.

- Тон озьы малпаськод?! – Лёвалэн синъёсыз чилясь чечы пуньы выллем ӝуалскизы.

- Т-с-с, - шыпыртӥз пересь, - Но тае сак эскероно на. Архивлэн юртэз улын зэмзэ но кыӵе ке ватос инты вань ке... – шуак песятайлэн куараез куспетӥ луиз, со мултэс вераны шедьтэмзэ валаз, лэся.

Лёва но шыпыт кариськиз. Солэн пель сьӧраз шуккиськиз Йыр-визь дуннеысь кошкыкузы Кылдысинлэн синву пыр верамез: «Тӥ ӧвӧлтэмзэ шедьтоды. Музъемысь но уд, вуысь но уд, омырысь но уд, но – шедьтоды!..»

- Песятай, асьмеос сое одно шедьтом! – ӟырдыт вазиз Лёва, - Шедьтом!
* * *
Йӧскалык архивлэн юртаз пырон азьын лымыен пурӟытэм пичи скамья сылэ. Со вылын кык пиос пуко.

- Ну, и малы сокем дыртонэз вал? - вуӵыртӥз лапег мугороез, ньыль сэрего очкизэ тупатыса.

- Мон-а мар-а дыртытӥ, - пумит вазиз кузь мугороез пияш, планшет нуллон сумкаез вылэ ангессэ пыкъяса, - Тон ук со, ӝоггес, ӝоггес…

- Ма кытысь мон тодӥсько вал архивын паспорт кулэ шуыса? – питыр-котыр бамъёссэ эшшо золгес пельтӥз пиёк.

- Тодоно вал. Мар тыныд, вашкала бумагаосты нокыӵе документъёстэк учкыны сётозы-а мар-а? – уг буйга кузез пияш.

- Аслад бон мар йырад ӧз лыкты? – эшез шоры кырыжак учкиз на лапегез.

- Ма, дыртытӥд ук, собере… Тон басьтӥд, кожай…

- Нош мон малпай, тон басьтод…

Пиос лулӟизы но пужнӥськись лымы шоры жальмазы.

- Табере рейсовой автобусэз ӝытозь тазьы возьмалом-а? – ньыль сэрего очкизэ нош ик тупатӥз Ондӥ. Но Геня номыр вазьыса ӧз вутты - азязы лынгыр-лангыр карись «уазик» дугдӥз. Отысь потӥзы – Онтипагай но Лёва!

- Ого! – огымысь кеськизы пиос. Но усьтӥськем ымзы ворсаськыса ӧз вутты, вӧзазы ик шыпытак дугдӥз эшшо одӥг машина – намер тусо ауди. Таысьтыз туж чеберак потӥз синмаськымон нылкышно, вӧзысьтыз тэтчиз тӧдьы-тӧдьы пуштрес изьыен нылаш – Марьёк!

- Салам, пиос! – киосыныз сэзъяз шудо нылок.

- Салам, Мани! Салам, Лёвик! – воксё лӧпшам пиос скамья вылысь тэтчазы.

- Кинъёс со, нылы? – синмаз пужнӥськись лымылэсь палэнскыса, юаз чебер кышномурт.

- Эшъёсы! Мон тыныд соос сярысь вералляй, - шулдырак серектӥз Марьёк, - Соос но Быдӟым книгалэсь пытьыоссэ утчаны лыктӥллям. Озьы-а?

Ваньзы йыръёссэс сэзъязы.

- Нош таиз – Онтипагай! – песятай борды ӟыгырскиз нылаш.

- Тодӥсько, тодӥсько. Телевизор пыр адӟыны кылдӥз, - Корепанов шоры бадӟым тунсыкен учкиз Манилэн анаез. Онтипагай, эсьмаса, пинал пи сямен ӵыжектӥз.

Огшап ӟыгыръяськемзы, тодэ ваёнъёссэс верамзы бӧрсьы эшъёс вамыштӥзы архивлэн юртаз.

- Одӥг йыр умой, кык – умой, нош куать – эшшо устогес! – ялан усись очкизэ вакчи чиньыеныз тупатӥз Ондӥ.

- Озьы, - эшезлэсь изьызэ каньылля донгыса, серектӥз Геня.

Зэм, архивлэн урдэсаз, сюсьтыл кадь чебер кызьпуос вискын адӟиськиз эшшо одӥг адями – сизьыметӥез. Кускозяз тӧдь тушо песятай чагыр синъёсыныз чаклаз архиве пырисьёсты. Шуныт тӧдь-тӧдь дукесэз улын, пырак сюлэм дораз, со возиз туж дуно арбериез – Быдӟым книгаез.

- Соос шедьтозы тонэ, одно шедьтозы, - куасьмем киосыныз книгаез маялляса, шунытак пальыштӥз песятай, - нош 69 ар ортчиз ке...

Пересь чагыр синъёссэ вылӥе, тӧдь мамык кадь ин шоры ӝутӥз: 69 ар туж ӝог ортчоз.