Ад быдлаын (< роч); ад гуран скр., шс.; вакрамеш

Н. Конаков

ЕНЭЖ зыряналöн, быдлаын; еныж лет.; енвевт п.-к.; ен вейт уд.; ен велт (вевт, вейт, велт).

Тайö сюжетыслöн эм уна параллель. Сiйö артмöма кристос эскöмса апокрифъясысь (комияслöн – войвыв рочьяслöн апокрифъясысь). Саваоф вöчö сизимöд енэж да тшöктö Михаил Архангеллы шыбитны сöтанаöс да сылысь ожъяссö му вылö. Идöгъяс, кодъясöс Ен вöтлö енэжысь, усьöны разнöй местаö: кодi усис керка вылö – лоис олысяöн, кодi вöрö – вöрсаöн, кодi ваö – васаöн...

Перым-комияслöн енэж вöчöм йылысь да демиургъяслöн сы вылын ыджыдалöм вöсна вермасьöм йылысь мифъяс абу кольöмаöсь.

“Вылi-улi” оппозиция артмигöн медбöрын енэж ылыстчö мусянь. Водзынджык та йылысь вöлi нин висьталöма: Ен сотö квайт улысса енэжсö. Тайö вариант кындзиыс эм нöшта мöд, кодi тшöтш жö артмöма апокрифысь. Сэнi енэжыс ачыс ылыстчö йöзлöн кедзовтöм понда. Перым-коми мифын висьтавсьö, мый коркö енэжыс вöлöма зэв ляпкыд, киöн позьöма судзны. Öтчыд öти нывбаба пöжалöма блин да öшлöма блинсö енэжö кöдзöдны. Орччöн вöлöма кагаыс. Кагасö видзö вöлöм пон. Кагаыс кокньöдчöма, мамыс чышкöма сiтансö блинöн да бöр öшйöдöма блинсö енэжö. Кедзовтöм енэж качöма вылö, а туся быдмöгъяслöн идз вылас кольöма дженьыдик шеп – понлы. Öдзыс шептыс вöлöма муöдз. Зыряналысь гижöма миф “шемöса му вöдитöм” йылысь. Сэнi эмöсь кутшöмсюрö содтöд детальяс: “зарни нэмö” не сöмын шепъяс вöлöмаöсь муöдз, но и челядь кужöмаöсь ветлыны да сëрнитны чужöмсяньыс. Öтчыд мамыс чышкöма кагаыслысь сiтансö блинöн. Ен аддзöма тайöс, лэччöма муö да пондöма нетшкыны няньяссö. Пон матыстчöма сы дiнö, курччöма пинь костас идз йывсö да корöма, мед Ен сiйöс оз нетшышт. Ен абу нетшыштöма. Сэксянь йöз пондiсны сëйны пон пай, а челядь пондiсны чужны эбöстöмöн, эз кужны сëрнитны ни ветлыны. Тайö мифас енэж дзескöдöм йылысь оз висьтавсьы.

Перым-комияслöн енэж кедзовтöм йылысь вöлöма нöшта öти миф. Водзтi енэжыс вöлöма зэв улын. Öтчыд нывбаба мунöма ю дорö песласьны да крукыштöма енэжсö карнаннас. Енэжыс качöма вылö, сы вöсна мый сiйöс пежалiсны (няйт кöлуйöн), кыдзи и мифлöн воддза вариантас. Тайö сюжетыслöн эмöсь асыввыв европаса параллельяс, öтл., шуам, удмурт аналогияяс: нывбаба шыбитiс енэжö косьтыны ва рузумъяс да тадзи кедзовтiс сiйöс. Та бöрын вылi енмыс лэптiс енэжсö вылö. Уна войтырлöн мифологияын енэж ылыстчö мусянь йöзлöн пежалöм-кедзовтöм понда. Шуам, африкаса мифъясын йöзыс кедзовтöны енэжсö, кор чышкöны енэжас няйт чуньяссö.

Комияслöн чайтöм-гöгöрвоöмъяс серти, енэжлöн ылыстчöм бöрын Ен оз нин сэсся пырöдчы му выв олöмö, а тöждысьö сöмын кодзувъяссайса муюгыд вöсна. Енлысь вылi муюгыдсö чайтлiсны шöр да улi муюгыд кодьöн жö, но сэнi вöлi унджык пемöс да быдмöг. Сэнi олiсны сэтшöм жö йöз либö, мöд версия серти, найö торъялiсны му выв йöзысь сiйöн, мый эз тöдны гаж петöм ни вирби. Перым-коми мойдын ай-мамтöм чоя-вока джуджыдсьыс-джуджыд коз пуысь аддзöны быдсяма дöбрасö: сëян да паськöм. Найö кавшасьöны коз пу вылас, но лясöны пу бердас да бöрсö оз нин вермыны лэччыны. Сэк найö кайöны коз пу кузяыс енэжö, аддзöны сэтысь сэтшöм жö керкаяс, кöнi олöны сэтшöм жö йöз, да кольччöны сэнi овны. Мöд коми мойдын челядь кайöны енэжö джуджыд анькытш кузя да аддзöны сэтысь мувывса кодь жö муюгыд. Енэжас мича сад шöрын зэв пельк керкаын олö Ен. Мукöддырйиыс Ен “восьтлö енэжсö” да петкöдлö оланiнсö йöзлы. Сэки енэжын öзйöны уна рöма бияс (вой кыа). Тайö здукас позьö кöсйыны быдторсö – ставыс збыльмас. Татшöм сяма чайтöм-гöгöрвоöмъяс “енэж воссьылöм” йылысь, кор позис корны Енлысь мый кöсъян, вöлiны удмуртъяслöн, чувашъяслöн, войвыв рочьяслöн. Зыряналöн вöлi и паныда версия: “енэж воссьылöм” туналiс мыйкö лëктор, неминуча. Тадз, висьталöны, мый ожман водзын “енэжыс воссьылöма”.

Рочьяслöн моз жö коми Ёгорей лун вöлi сиöма подалы. Сiйöс чайтлiсны вöвъяслöн нимлунöн. Ёгорей лунсянь подаöс позис лэдзны видз вылö. Войвыв крестьяналöн олöмын подаöс видз вылö лэдзöмыс вöлi зэв тöдчанаторйöн, сы вöсна мый сы бöрын оз нин ков вöлi майшасьны кöрым понда. Тшöкыда кöрымыс эз тырмыв, тулысыс кö вöлi сëр да кузь.

Емва вылын Ёгорей лунö став подасö вайöдлiсны вичко дорö. Кык визьö öзтылiсны бипуръяс да шыблалiсны сэтчö тусяпу росъяс. Дука тусяпу тшыныс комияслöн медбура сöстöммöдлiс да видзлiс быд пежсьыс да тшыкöдöмсьыс. Молибен лыддьöм бöрын подаöс вöтлiсны кык бипур визь косттiыс. Тусяпу рос колясъяссö нуисны гортаныс да сатшкисны гид öдзöс бердö. Изьваын нывбабаяс асывнас вайöдлiсны вöвъяссö да мöсъяссö водзвыв дасьтöм йöрö да корлiсны попöс. Молибен бöрын подасö вöтлiсны векни дзиръяöд, а поп резiс найöс вежа ваöн. Вежа ва коляссö нулiсны гортаныс да резлiсны сiйöн посни подаöс.

Тулысыс кö волiс водз да вöлi шоныд, то Ёгорей лунö жö и лэдзлiсны подасö видз вылö. Сëр тулысын вермисны лэдзны сöмын Микол лунö (важ стиля ода-кора 9. лун). Комияслöн подаöс луд вылö лэдзöмыс вöлi кыпыд да гажа, сэк кежлö вöлiны торъя öбрадъяс. Гидысь лэдзигöн месаньяс шлачкалiсны подасö Берба лунсянь (Ыджыд видзса квайтöд вöскресенньö, Ыджыд лун водзын медбöръя вöскресенньö) видзöм бербаöн. Сiдзжö подасö тшынöдлiсны тусяпу тшынöн, сетлiсны четвергса солöн (Ыджыд видзса медбöръя вежонö, Страстнöй вежонся четвергö сотöм сов) солалöм нянь шöрöм, веськыд бокас сирöн серпасавлiсны крестъяс-вуджöръяс да с.в. Удораса Чупрово сиктын мöс видзысь вöтлалiс мöсъяссö öтилаö, медбöръяыслöн чальпас улысь босьтiс пас (лыа китыр) да “Кристос ловзис” шуöмкöд тшöтш коялiс лыасö мöсъяслы мыш вылас. Чайтлiсны, мый таысь мöсъясыс оз мöдны разöдчыны. Сиктысь петöм бöрын пастукыс гöгöртлiс мöсъяссö вежа Георгий енпöвйöн да кевмысис. Эжваса Гамын подасö видз вылö медводдзаысь лэдзтöдз месаньяс вундылiсны мöсъяслысь кымöссьыс гöнтор, гаровтлiсны сiйöс няня гöгыльясö да вежласьлiсны гöгыльяснаныс. Сэсся вердлiсны гöгыльяссö мöсъясыслы. Чайтлiсны, мый таысь мöсъясыс пондасны йирсьыны лöня. Ыжъяслы кымöсас луд вылö лэдзтöдз коявлiсны четвергса сов. Перым-комияс колльöдлiсны подасö медводдзаысь лэдзигас сикт помöдзыс, кианыс нулiсны öзйысь сисьяс. Сикт помас копыртчылiсны подаыслы, медым мöсъясыс унджык лысьтiсны, а ыжъясыс сетiсны унджык вурун.

Ёгорей лунö том йöз чукöртчылiсны ва дорö, биасьлiсны да сотлiсны ковтöм пу да сюмöд кöлуй. Соттöдзыс кöлуйсö чукöртлiсны, пысавлiсны кузь майöгъясö да сувтöдлiсны биö. Комикöд орчча Пинега ю вывса рочьяс (коркö сэнi овлiсны и комияс) татшöм бипуръяссö öзтавлiсны нöрысъяс йылын ода-кора медводдза лунö, соталiсны важ пу бöчкаяс да мукöд пу кöлуй, кодi чукöрмылiс во чöж.

Лудан висьöмöн да мукöд кучик висьöмöн висьысьяс Ёгорей лунö мыссисны ичöтик гöпъясын. Чайтлiсны, мый гöп косьмöмыскöд тшöтш и висьöмыс бырас. Ёгорей лунся поводдя серти тунавлiсны няньпиян: празникöдзса войö кö гöпъяс кынмасны – омöль няньпиян. Та могысь жö вой кежлö ывлаö öшöдлiсны ва дöра: йизьылiс кö, вöчлiсны колана кывкöртöд. Ёгорей лунö кö кöдзыд да пöльтö вой тöв, то сiйö пöльтас нöшта 40 лун. Ёгорей лун серти жö урчитлiсны турун петан кад: “Ëгорей ваа (либö зэра), Микол туруна”.

Ёма пырö коми мифологияса да фольклорса медпопулярнöй образъяс лыдö. Сiйöс позьö öткодявны роч Баба-Ягакöд. Ёмалöн этимологияыс абу ясыд, параллельяс вермасны лоны татшöм кывъяскöд: финн jumala, карел jomal ‘ен’, балт. Jumis ‘му вын енсикас’, арийскöй Yama ‘кулöмлöн ен’. Сëрджыкся коми чайтöм-гöгöрвоöмъясын Ёмаöс тшöкыда öткодялöны Сю Паладькöд да пöлöзничакöд. Та вöсна вермас лоны, мый медводзсö Ёма вöлi нывбаба-енсикас, няня быдмöгъяслöн месань.

Коми фольклорын Ёмалöн образыс уна вежöртаса. Ёма – няня быдмöгъяслöн да няньлöн месань, йöктö гырйын. Ёма – пемöсъяслöн да быдмöгъяслöн, вöрлöн месань: олö сьöд вöр шöрын курöг кока (йöра кока либö кольк вылын) керкаын; ыжъясыс – кöинъяс, мöсъясыс – ошъяс, сылысь кывзысьöны вöрпа-лэбач; перым-коми вöр баба – вöр дядь Митрофан Митрофановичлöн тьöт. Ёмалöн эм челядь, пырджык нывъяс (öти либö куим), гежöдджыка пиян – уна юра Гундыръяс; Ёма – Гундырлöн гöтыр; Ёма дорйö нывбаба уджъяс, дöра кыöм да печкöм: некымын мойдын сы дорö локтöны кисьла, печканла, тупыльла, чöрсла, кысян емла, шöрт тöбла; дöра кыан терминологияын аньбабаöн, баба-ягаöн, а Эжва катыдын Ёма-бабаöн нимтöны быдмасян (шöрт гартлан инструмент). Ёма видзö би, куйлö паччöрын, мойдъясын сы ордö локтöны била. Перым-комияслöн тайö сюжетас сы пыдди петкöдчö Кам. Мойдъясын Ёмаöс тшöкыда сотöны пачын, зорöдын либö идзас пиын. Ёма сëйö йöзöс, пуксьöдö челядьöс нянь зыр вылö да кöсйö найöс пöжавны. Ёма – багатыр, сувтö геройлы паныд; Ёма – паныд сувтысь тун, нывбаба-тунлöн мамыс. Ёма – валöн, вына либö ловъя валöн месань; герой юö, вежö Ёмалысь васö, морöсас сатшкöм кöрт конгыръясöн шыбитö сiйöс юö да мездö мича нылöс. Ёма видзö шемöса кöлуй: тупыль, чöрс, ем, мича яблöга тасьтi. Ёма отсасьö геройлы да козьнасьö (паныдасьлö медся тшöкыда); вердö геройöс; дзебö гундырлöн пиысь. Ёма дорйö Ёма нылöс, ылöдчана мича нылöс; Ёма иган сайын видзö мича нылöс; видзö рöзбойник керка либö клад. Ёма вöтлысьö герой бöрся. Роч Баба-Ягаысь öтдор Ёма пöшти оз петкöдчыв куим верзьöмалöн (Асыв, Лун, Вой) либö Кощей вöвъяслöн месаньöн. Буракö, та понда зэв гежöда висьталöны, мый Ёма олö енэжын. Сöмын “Енэжöдз шеп” сюжетын Ёма олö енэжын, кутö сэнi шемöса мельнича. Перым-комияслöн сы пыдди петкöдчö мужичöй (Кам либö öти синма Айкöза).

Медся тшöкыда Ёма йитчö мöдар югыдкöд, улi либö мудор муюгыдкöд: олö вöрын, вöр дорын, ва улын, ю сайын, ю дорын, ю кывтыдын, Сир биа ю сайын, войвылын, гежöда кыр йылын. Сылысь муюгыдсö йöзлöн муюгыдысь торйöдö вöр, керöс, сир биа ю, кодъяс герой бöрся вöтчан мотивъясын артмöны шуйга пельпом вомöн мыш сайö зу, зуд либö сир падъян шыбитöмысь. Татшöм сюжетъясын гежöда, но векжö паныдасьлö биа ю вомöн чышъян-пос йылысь мотив: “куимысь öвтыштан – збыль пос лоö, öтчыд öвтыштан – вöсни (абу збыль) пос артмас”.

Ёмалöн оланiныс – пырджык муö вужъясьöм керкатор, курöг кока либö (ыргöн, эзысь, зарни) курöг кольк вылын керка, öшиньтöм да öдзöстöм. Геройöс кыйигöн керкаыс пöртчö куим, кык, а сэсся öти пельöса жырйö. Гежöда Ёма олö Гундырлöн либö Кудряшлöн дворечын либö керкаын.

Ёма тöдöмысь муувса образ: кузь пиньяс, тшöкыда кöрт пиньяс; кöрт гыжъяс; кузь нырыс пыксьö йиркö, джоджö либö пельöсö, сы отсöгöн сiйö ломтö пач либö сюялö пачас нянь; Ёма гöна синма, тшöкыда оз аддзы, нырнас кылö син сертиыс бурджыка. Куим царство йылысь либö куим мича чойлöн дворечьяс йылысь мотив кодь жö “куим керка” мотивын Ёмалöн образыс вошö. Сэнi “ыргöн–эзысь–зарни” иерархия пыдди петкöдчö иерархия арлыд серти (ичöт–шöркост–ыджыд) либö Ёмалöн керка важлун сертиыс. Сэки тшöкыда пасйыссьö нöшта и Ёмалöн кызтаыс: “пукалö куим (квайт, öкмыс) улöс вылын и то сiтаныс öшöдчöма”. Роч Баба-Яга дорысь Ёма оз лэбав гырйын (мукöддырйиыс ветлöдланторнас петкöдчö “аршин ыджда кань”, кодöс Ёма сетö геройлы, каньыс вермö лэбавны, уявны ва увтi да с.в.). Ёма абу лы кока. Коми инвективъясын Ёмаöн нимтöны броткысь да скöр пöрысь нывбабаясöс.

Перым-коми мифологическöй мойдъясын Шондiлысь нывсö Зараньöс нимтöны зыряналöн рöд пуктысьöн да Пералöн гöтырöн.