Әскери қызметшілерді гауптвахтада ұстау

Әскери қызметшілерді гауптвахтада ұстау

      Тұтқынға алуға сотталған адамдар жазасын жабылатын ортақ камераларда қатаң оқшаулау жағдайларында өтейді. Ерлер мен әйелдер бөлек орналастырылады.

      Сотталған әскери қызметшілерді жазалау Қазақстан Республикасының Қылмыстық атқару кодексіне, Қазақстан Республикасының өзге де заңдарына және нормативтік құқықтық актілеріне сәйкес орындалады.

      218. Гауптвахтада ұсталатын әрбір әскери қызметшіге түнгі уақытта сегіз сағаттық ұйқы беріледі. Ұйықтайтын уақытта төсек керек-жарақтары беріледі.

      219. Гауптвахтада ұсталатын әскери қызметшілер гауптвахтада белгіленген қағидаларды нақты сақтауға, гауптвахта бастығының және қарауыл жеке құрамының заңды талаптарын орындауға міндетті.

      220. Гауптвахтада күн тәртібін әскери полиция органының бастығы белгілейді.

      221. Жұмысты орындау мен серуендеу уақытын қоспағанда, тәулік ішінде уақытша ұсталған адамдарға арналған үй-жайларда болатын уақытша ұсталған адамдардан басқа, әскери қызметшілер құлыпқа жабылған камераларда болады.

      Барлық камералар үшін құлыптар бірдей болуға және бірдей кілттермен жабылуға тиіс. Осындай екі кілт қарауыл бастығының бөлмесінде және біреуі – гауптвахта бастығының бөлмесінде сақталуға тиіс.

      222. Әскери қызметшілерде камераларда болғанда іш киім, жұмыс киім нысаны мен аяқкиім болуға тиіс. Қалған заттар гауптвахтада белгіленген тәртіпке сәйкес камералардан тыс сақталады.

      223. Ортақ камераларда әскери қызметшілерден камералардағы тазалыққа және тәртіпке жауап беретін үлкендері тағайындалады. Олар әскери қызметшілерді таңертеңгілік тексеру үшін, қарауыл ауысқан уақытта атын атап түгендеу үшін, әскери қызметшілердің бар болуын кешкілік тексеру үшін сапқа тұрғызуға, сондай-ақ олардың белгіленген ұстау режімін сақтауын бақылауға міндетті.

      224. Гауптвахтада ұсталатын әскери қызметшілер күн сайын ұзақтығы қылмыстық атқару заңнамасында және қоғамнан уақытша оқшаулауды қамтамасыз ететін арнаулы мекемелерде адамдарды ұстау тәртібі мен шарттары туралы заңнамада белгіленген серуендеуге шығады. Серуендеу күндізгі уақытта камералар бойынша гауптвахтаның арнайы жабдықталған аумағында жүргізіледі. Сотталғанның серуендеуі ол белгіленген ішкі тәртіп қағидаларын бұзған жағдайда мерзімінен бұрын тоқтатылуы мүмкін.

      Әскери қызметшілердің таңертең және кешке жуынуы үшін шығарушылардың ілесіп жүруімен камералардан: ортақ камераларда ұсталатын әскери қызметшілер – камералар бойынша; жеке камераларда ұсталатын әскери қызметшілер – кезектілік тәртібімен бір-бірден шығарылады.

      Әскери қызметші әйелдер үшін жеке гигиена қағидаларын сақтау үшін қосымша уақыт бөлінеді.

      Қарауыл бастығын шақырту шығарушы немесе сақшы арқылы жүргізіледі.

      225. Гауптвахтадан тыс жерлерге (прокуратураға, сотқа, тергеу әрекеттерін жүргізу үшін және басқа да себептер бойынша) бару үшін гауптвахтада ұсталатын әскери қызметшілер маусым бойынша әскери киім нысанында болуға тиіс.

      226. Гауптвахтада ұсталатын әскери қызметшілер жұмысты орындаған кезде шығарушы:

      1) егер оның салдарынан гауптвахтада ұсталатын әскери қызметшілерді күзету және қадағалау қиындық тудырса, бірнеше орында бір уақытта жұмыс жүргізуге жол бермеуге;

      2) жұмыс уақытында немесе үзіліс уақытында гауптвахтада ұсталатын әскери қызметшілердің бөгде адамдармен сөйлеспеуін, шылым шекпеуін және жұмыс орнынан кетпеуін бақылауға міндетті.

      227. Гауптвахтада ұсталатын әскери қызметшілер әскери полиция органының бастығы белгілеген күні және сағатта аптасына бір рет моншада жуынуға тиіс. Осы күндері іш киім мен төсек ақжаймаларын ауыстыру, сондай-ақ әскери қызметшілерді медициналық тексеру жүргізіледі. Әскери қызметшілердің денесін тексеру күнделікті жүргізіледі.

      Гауптвахтада ұсталатын әскери қызметшілердің шаштары үнемі ұқыпты қысқартылған және қырынған болуға тиіс. Әскери қызметшілердің шаштарын қысқарту және қырыну тәртібін гауптвахта бастығы белгілейді.

      228. Гауптвахтада ұсталатын әскери қызметшілер негізгі жалпыәскери үлес нормасы бойынша тамақпен қамтамасыз етіледі, оларды тамақтандыруға тіркеу азық-түлік аттестаттары бойынша жүргізіледі. Егер гауптвахта жанында тамақ дайындалмаса, онда оны гауптвахтаға әскери қызметшілерге жеткізу тәртібін гарнизон бастығы белгілейді.

      Азық-түлік аттестаттары жоқ ұсталғандар, гауптвахтаға немесе уақытша ұсталғандарға арналған үй-жайға қамауға алынғандар әскери полиция органы бастығының (әскери бөлім командирінің) бұйрығынан үзінді-көшірме бойынша жабдықталымға алынады.

      Гауптвахтада ұсталатын әскери қызметшілер камераларда немесе гауптвахта жанындағы асханада тамақтанады. Жеке камераларда ұсталатын әскери қызметшілер камераларда тамақтанады.

      229. Камераларды, дәретханаларды күнделікті және жалпы (аптасына бір рет) жинау, сондай-ақ гауптвахтада едендерді жуу (сүрту) шығарушының немесе қарауыл бастығы көмекшісінің қадағалауымен онда ұсталатын әскери қызметшілер жүргізеді. Камераларда және дәліздерде бейнебақылау жүйесі орнатылады.

      Камералар күн сайын әскери қызметшілер серуендеуде немесе жұмыста болған уақытта тексеріледі.

      Гауптвахта үй-жайларын және дәретханаларын залалсыздандыру аптасына бір рет жүргізіледі. Қараңғы түскенде камераларда, дәліздер мен дәретханаларда жарық түсірілген болуға тиіс. Ұйықтау уақытында камераларда жарық түсірілген болуға тиіс.

      Камераларда Цельсий бойынша температура +18 градустан төмен болмауға тиіс.

      Гауптвахтада ұсталатын әскери қызметшілерге хат жазысуға және жазу керек-жарақтарын пайдалануға, газеттер, жалпыәскери жарғыларды, әскери және оқу әдебиеттерін оқуға және радиохабарларды тыңдауға рұқсат етіледі.

      Шылым шегуге, ол үшін бөлінген орындарда рұқсат етіледі.

      Әрбір гауптвахта жанында жалпыәскери жарғылардың, әскери және оқу әдебиеттерінің жеткілікті саны болуға тиіс. Гауптвахта күнделікті жаңа газеттермен қамтамасыз етілуге тиіс. Гауптвахтада ұсталатын әскери қызметшілерге әдебиеттер мен газеттер беруді қарауыл бастығы жүргізеді.

      230. Гауптвахтада әскери қызметшілерді ұстау және күзету тәртібін, сондай-ақ олар гауптвахтадан тыс жүрген кезде әскери полиция органының бастығы тергеушімен, алдын ала тергеу органымен, прокурормен немесе сотпен келісу бойынша белгілейді.

      231. Заңдардың сақталуын қадағалауды жүзеге асыру кезінде прокурорлар, олардың орынбасарлары мен көмекшілері, қылмыстық істерді тергеу кезінде тергеушілер, алдын ала тергеу органдары, сондай-ақ қорғаушылар, ұлттық алдын алу тетікке қатысушылар және қоғамдық-қадағалау комиссияларының мүшелері жеке басының куәлігін және тиісті құжаттарды ұсынғаннан кейін кез келген уақытта гауптвахтаға, уақытша ұсталатындарға арналған үй-жайға гауптвахта бастығы (әскери полиция органы бойынша кезекші, әскери бөлім бойынша кезекші) әскери полиция органының бастығын (әскери бөлімнің командирін) және осы гауптвахтада немесе уақытша ұсталғандарға арналған үй-жайда заңдылықтың сақталуына қадағалауды жүзеге асыратын прокурорды хабардар ете отырып жібереді.