Лайпанов б. А

БИЯГЪЫ КЪОРКЪУУЛА

Дженгиб гюнахыбыз, терслигибиз,

Аны ючюн азаб чеге болурбуз биз.

Алай а, зулмудан къутулсакъ да кесибиз,

Бизни ёлтюреди эсибиз.
Хоу, не кече, не кюн тынгы-тынчлыкъ бермей,

Джюрекни ашай, джюрекден бошай,

Къыйнай, эсден кетерге унамай,

Терслик ёлтюреди бизни.

Башы эзилгенден сора да,

Бизни уруб, ачытханлай турады къуйругъу.
Джаханимни кёрмеген, джандетге салмайды кёл.

Алай а,

Джандетде да, джюрексине, къырыла болур.

14-джыллыкъ тутмакъдан, сюргюнден ётген халкъыма къараб.

Адамла, тюзлюклери хорлаб, Джуртларына къайытсала да,

Джюреклери тутуб ёледиле, болмагъанлай къарт.

Ачыудан, джюрексине, ёлелле адамла.

Сюргюннге дери Къарачай бла, сюргюнден сора Къарачай –

Эки башха халкъдыла дерге боллукъду.

Дуния намысдан, ахрат азабдан да къоркъмайдыла энди.

Тюрленнгенди халкъ – не этгенин билмейди энди,

Харамдан, гюнахдан джийиргенмейди энди,

Билмейди не болгъанын Хакъ.
Аллахын унутса уа халкъ,

Дуния малны Хакъдан кёрсе баш –

Зулмугъа-зорлукъгъа болады аш,

Узакъ, джууукъ да (мыжыкъ, чыгыр да) бий болуб тебрейле анга.

Бюгюле билгенле къалгъандыла сау.

Ала уа – амантишлеге салалла махтау:

Сууаб-гюнах, халал-харам, тюз-терс, бёрю-ит –

Бары къатышханды.
Чамландырырча Аллахны-Хакъны

Тюрленнгенди къылыгъы халкъны.

Джаргъа тебере эсек кесибизни,

Чынгылдан тыярыкъ кимди бизни?

Эсгермесек, эслемесек кесибизни,

Тамблабыз боллукъ тюлдю бизни.

Дженгиб гюнахыбыз, терслигибиз,

Джардан, чынгылдан кетерикбиз биз.

Энтда сынау базманнга миннгенди Къарачай:

Не къайытырыкъды джолуна Аллахны,

Не да сынарыкъды джангыдан палахны.

ДЖАЗЫУЛА ДЖАЗЫЛЫБЛА СЁЗДЕ

Дин ахлусуна джарагъанча дуа,

Меннге да назму джарайды алай.

Къарайды Кёкден да, Кёкден эннген Сёзден да

Джулдуз бла Ай.
Ийнаннганланы къутхаргъанча дуа,

Мени да назму къутхарады алай.

Кёкден тюшген Сёз, джюрекден чыкъгъан Сёз

Джашаргъа, ёлюрге, тиритирге да береди кюч.

Кёкден тюшген Сёз, джюрекден чыкъгъан Сёз –

Джан къалдыргъан Сёз, джан къутхаргъан Сёз…

Джюз аты аны, джюз магъанасы –

Иги, ариу, тюз, керти, эркин, акъ, халал, сабыр, къанатлы…

Кёкден тюшген Сёз, кёлден чыкъгъан Сёз –

Джан къалдыргъан Сёз, джан къутхаргъан Сёз

Табдырады эс, тутдурады ёз.

Бизни джаратхан, джашатхан да Сёз.

Адамны тарихи, джашауу, къадары джашыныбды Сёзде,

Ауалы, ахыры да, дуниясы, ахраты да джазылыбды Сёзде.

Сёз бла адам джараталла бир-бирин,

Тюрлендирелле, джашаталла бир-бирин.

Огъай, бизни къарыуубуз джетерик тюлдю

Джаратыргъа, джашатыргъа, тюрлендирирге да Сёзню.

Сёздю джаратхан, джашатхан, тюрлендирген да бизни.
Мен назму джазама. Алай а,

Аны джаздыргъан кюч ташадады – Кёкдеди, джюрекдеди.

Аны узакълыгъы, джууукълугъу да чексизди.

Анга бойсунама, ауазын эшитеме, айтханын этеме.

Мен джазама Сёзню. Сёз джазады мени.
Кетгенни, келликни, болгъанны, боллукъну,

Тюненегизни, тамблагъызны да, кесигизни, мени да

Излегиз Сёзде.

Джазыула джазылыбла Сёзде.

Аны тюз окъурча, тюз хайырландырырча,

Керамат кюч Аллах берсин бизге.

КЕРЕКМИДИ АДАМ?

Не барды меннге бу тенгизден –

Аны кенглигинден, теренлигинден.

Ариулугъундан, тазалыгъындан да

Не барды меннге?
Тузлуду – ичерча тюлдю,

Сууукъду – джууунурча тюлдю.

Джангыз, къараб джагъадан

Къууаныргъа боллукъду.

Алай а, тенгизни толу багъасын,

Тенгизде джашагъанла билелле джангыз.

Аны тузлулугъуна, сууукълугъуна да

Махтау салыб, джырлайла ала.

Тенгиз – джуртларыды, джашауларыды, къадарларыды аланы.
Мен а, кёз ача айланнган биреулен,

Тенгизни тюрлендирирге излейме –

Кириб джууунур ючюн,

Тузсуз этиб, сууундан ичер ючюн –

Несин да кесиме джараулу этер ючюн.
Тенгиздегилеге уа этмейме сагъыш:

Меннге – оюн, алагъа – ёлюм.

Балыкъла аны ючюн ата болурла башларын джагъагъа.
Джагъада джашау зор кёрюнсе,

Адамла да атыучанла башларын суугъа.

Адамдан чыгъады къыйынлыкъ. Бютеу дунияны

Кесине джараулу этерге излеген олду.

Дуниягъа керекмиди адам

Бютеу табигъатха къоркъуу тюше эсе андан?!

жүктеу/скачать 2.02 Mb.

Достарыңызбен бөлісу: