Ад быдлаын (< роч); ад гуран скр., шс.; вакрамеш

Н. Конаков

Йöзкостса эскöмъяс серти, гуны да вежны кагаöс вермис пöшти быд пеж лолыс (дзидзи, омöль, олыся, вöрса, пывсян айка, шувгей), кыдз рушкуын сöвмигöн на, сiдз и чужöм бöрас нин. Чужтылiсны пырджык пывсянын. Та бöрын мамыс пырттöм на кагаыскöд куим-сизим лун олiс пывсянас, а бöрыннас кагасö колiс тшöкыда пывсьöдны корöсьöн. Та понда торъя öпаснöйöн вöлi пывсян айка. Вöлi кö кагаыс вуджöртöм, кольлiс кö сiйöс мамыс дöзьöртöг борйын, вöрын либö видöмöн ыстылiс вöрса дiнö, сiйöс вермис вежны и мукöд пеж лолыс. Дзоньвидза морткага пыдди найö пуктылiсны ассьыныс кагасö либö морт мыгöра чурка. Збыль кагаыс водзö олiс да быдмис мöдар югыдын кутшöмкö лов котырын. Абу тыр-бур, вир-яй боксянь ясыд тырмытöмлунъяса кага чужöм, а тшöтш и челядьлысь вир-яй да вежöр сöвмöмын бöрö кольöм гöгöрвоöдлiсны кага вежöмöн. Вежöм кага вöлi мисьтöм, уна сёйис да юис, но быдмис ньöжйö, вояс чöж вöлi потанын, дыр эз куж ни ветлыны, ни сёрнитны, вежöр боксянь сöвмис омöля. Быдлунъя олöмын вежöмаöн шулiсны и нинöмöн торъявтöм, дзоньвидза, но кывзысьтöм да этшлун кесйöгъяс öтдортысь челядьöс.

Вежöмысь видзчысьöм могысь рöдильничаöс да пузчужöм кагасö, торйöн нин пинь петтöдзыс, эз кольлыны дöзьöртöг. Пывсянын колiс öтарö инмöдчавны кага дiнö, а то позис и не казявны вежöмсö. Пывсян кöджö петiгöн эз позь воськовтны тагöс вомöныс кыкнан кокнад – öти кокнад колiс кольны пытшкас. Сiдзжö кагасö оз позь вöлi сетны тагöс вомöн. Весиг вичкоö пыртöм бöрын кагалы потанас пуктылiсны быдсяма вуджöр (пурт, шыран, нянь тор, пыстöм ем), а быдмыштöм нин кагалы юр пыдöсас киськыштавлiсны сов.

Вежöмсö казявны да бырöдны позис “пачын пöжалöм”, “вор улын кералöм” магияа öбрадъяс отсöгöн. Чайтлiсны, мый бöрыннас татшöм ногöн мездöм кага вермас лоны вына тунöн, сы вöсна мый “сiйöс бура тöдö омöль”. Уна быличкаын серпасавсьö вежöмалöн ортсыыс да этшлуныс, петкöдлысьö вежöмыс. Торъя популярнöй ичöтдырйиыс пывсянын дöзьöртöг кольöм ныв йылысь сюжет. Нывбаба эз казяв вежöмсö да уна во чöж быдтiс вежöмаöс, кодi сёйис да юис, но ни ветлыны, ни сёрнитны эз велавлы. Öтчыд öти сиктса зон ассьыс повтöмлунсö петкöдлöм могысь вой шöрын кöсйис вайны пывсянысь гор выв из, но сiйöс кутiс пывсян айка, и зонлы ковмис кöсйысьны гöтрасьны пывсян айка ныв вылын. Мöд войнас зонмыд вöнясис мамыслöн вöньöн-вуджöрöн, изшом торйöн пасйис пывсянас ас гöгöрыс кытш да кутiс виччысьны пывсян айка котырлысь мыччысьöмсö. На пиысь торъялiс мича, еджыд чужöма ныв. Зонмыд кыскис нывсö ас дорас кытш пытшкö, а кор пондiсны сьывны петукъяс да вежа войяыс вошины, нылыс вайöдiс зонсö сiйö керка дорас, кöнi олiс вежöма. Нывлöн тшöктöм серти зонмыс перйис кагасö потансьыс, пуктiс тагöс вылö да керыштiс черöн. Ставöн аддзисны, мый кага пыддиыс куйлö песпом да сöмын чагторъяс лэбзьöны. Сэсся нылыс висьталiс мамыслы, мый сiйö быдмис пывсян айка ордын, а потанас вöлi чурка, кодöс гусьöн пуктылöма пывсянса.

Аналогияа эскöмъяс да быличкаяс ёна паськалöмны Роч Войвылын, карелъяс, удмуртъяс, мари да башкиръяс костын.

Литература: Ильина 1997, Рочев 1984, Янович 1903, Fokos-Fucks 1951.

И. Ильина

Некымын варианта коми фольклор сюжетын висьтавсьö вöралысь йылысь, кодöс муртса эз сёй виж паськöма морт. Öти версия серти, рытъя сëйтöдзыс кыйсьысь вунöдас Енлы кевмыны. Узьны водiгас сiйö кылас öшинь сайысь идöгöс, кодi висьталас, мый регыд воас виж паськöма морт. Он кö сiйöс пöттöдзыс верд, сiйö вермас и вöркерка месайсö асьсö сёйны. И збыль, регыд воас ыджыдсьыс-ыджыд виж паськöма морт, сёяс вöралысьлысь ставсö, мый вöлi, весиг понсö, но оз пöт да мунас юыштны, мед сэсся водзö сёйны. Идöглöн тшöктöм серти вöралысь уськöдчас пышйыны да сöлас кытыськö лоöм вöла-доддьö, а сэсся кутчысяс вожа пу увйö и... веськалас гортас. Татшöм ногöн вöралысь муртса эз веськав тужа-нужаö мыжторйысь, кодi кыйсьысьяслöн (а сiдзкö, тшöтш и вöрса ловъяслöн-месайяслöн) мораль серти эз вöв сэтшöм нин тöдчанаöн.

Тайö фольклорса сюжетлöн мöд вариантын мыжыс дзик эз вöв, а вöлi сöмын помка пöтлытöм морт сёйысь воöмлы (комиöн гижöм текстын сiйöс нимтöма рочöн “лешийöн”). Пöтка, чукчи-дозмöр, ур да весиг тулан ёна кыйöм бöрын вöралысь дась нин вöлi гортас мöдöдчыны да вöчис аслыс сёян колясъяссьыс озыр рытъя нур. Сiйö видзöдлiс пызан вылö да мöвпыштiс: “Вот эськö локтiс кодкö ёрт вылö!” Воссис öдзöс, пырис зэв джуджыд морт да шуис: “Казьтыштiн кö нин менö, вай верд!” Сёйис став кыйдöссö, сэсся понсö, пищальсö, шуис, мый аскинас бара воас, да мунiс. Вöралысь асывнас чеччис да уськöдчис гортас пышйыны. Вой улас сiйöс пöшти суöдiс нин вир юысь этш тöдтöг сёйысь лов, но дас кык часын петук горöдöмкöд садьтöг уси муö. Тадзи жö лои и мöд луннас. Коймöд луннас вöралысьлы воча воис дзор пöль да висьталiс, мый сiйö морт, но ичöтдырйиыс сiйöс ёрöмаöсь ай-мамыс да сiйö быдмöма вöрсаяс дiнын. Сылöн велöдöм серти вöралысь виччис куим куима вöла-доддялысь воöм, сöлiс бöръяас да куим пожöм увтi мунiгöн кутчысис коймöд пожöмыслöн увйö. Асывнас вöралысь аддзис, мый сiйö гортас öшалö сёрйö (пач весьтын пес, кöм да мукöдтор косьтан потш) кутчысьöмöн. Кыйдöсыс, пищальыс да понйыс вöрзьöдтöмöсь вöлiны чуланас.

Литература: Цембер 1914, Fucks 1951.

Н. Конаков
ВИР быдлаын; гырд быдлаын.

Коми вир | удм. вир ‘вир’ < öтувперым *vir ‘тж’ || мари вер | эрзя верь | финн veri | венгр vér да мукöд ‘вир’ < прафинн-йöгра *were. Лыткин да Гуляев серти, зырян, п.-к., зюзд. гырд, язь. gōrd ‘вир; едмöм вир’ кывъяслöн стöч воча кывйыс рöдвужкывъясын абу. Вермас лоны, мый найö йитчöмны мари “вира виськöд”. Коми гöрд да удмурт горд ‘гöрд’, буракö, асьныс артмöмны гырд кывйысь.

Öбрада сьыланкывъясын да бöрдöдчанкывъясын гöтырпуöс, нылöс пасйысь эпитетъяс югыд вир да оз тусь югыд вир паськалöмаöсь медъёна, сы вöсна мый йöзкостса чайтöм-гöгöрвоöмъясын тыр вир-яялун лоö мичлунлöн медтöдчана тöдмöсъясысь öтиöн (видзöд мич). Кутшöмсюрö коми мойдын куимöкмыса му сайö мунтöдзыс багатыр сатшкö матичö либö пöлать сёрйö пурт. Пурт дорышас мыччысьöм да сьöдасьöм вир сертиыс рöдвужыс тöдмалö геройлöн кулöм йылысь. “Илья Муромец” былиналöн мойда вариантын кулысь Святогор шуö Ильялы: “Кокладорсянь пондас сьöд вир визувтны, тэ сiйöс эн вöрöд, а то кулан, юрладорсянь визувтас югыд вир, тэ сiйöс чукöрт дозйö да ю, лоан сэтшöм вынаöн, мый весиг муыс тэнö муртса новлыны кутас”.

Комияслöн чайтöм-гöгöрвоöмъяс серти, вир – не сöмын физиологияа, но и магияа субстанция, олöмсö да олöм вынсö кутысь, сы вöсна мый вир петöмысь позьö кувны. Сы вöсна, мый вир йитчöма мускöд (комияслöн радейтчöмлöн шöрин) да сьöлöмкöд (бурлун, повтöмлун, лов вын шöрин), лыддьыссьö, мый вирлöн состояниеыс петкöдлö вир-яйлысь урчитöм аскылöмъяс да состояниеяс: кын вира, кöдзыд вира – сьöлöмтöм, веськодь, немортногса, пöсь вира – визув, тэрыб, вир пузис – скöралöм, гырдмöм син – скöрлун, вöк петöм, чужöмыс вирсермунiс – кулöм нисьö ловъяöн вöлöм бöрын ловзьöм йылысь, эмоцияяс кыпалöм.

Комияс чайтлiсны, мый быд мортлöн эм бур вир либö югыд вир да лёк вир либö сьöд вир. Чайтлiсны, мый доймигъясöн первой петö сьöд вир. Та вöсна комияс эз тэрмасьлыны пыр жö кöртавны доймöминсö орöссьöмысь, гангренаысь да с.в. видзчысьöм могысь: мед лёк вирыс петас. Лёк вирыскöд петiсны тшöтш и негатива сьöлöмкылöмъяс: скöрлун, полöм, лёксиöм. Эжва катыдсаяс чайтлiсны, мый тшöкыда каститчö сыысь, мый вир повзьöдлö: “Ачыд кö полан, ставыс каститчö, но тайö <тшаква> – вир повзьöдлö”.

Вирлöн тöдчанлуныс комияслöн бурдöдчан да магияа практикаын ыджыд. Тадз, кутшöмсюрö висьöм бырöдiгöн да вомидзысь мынтöдчигöн вöдитчылiсны быдсяма пемöслöн да лэбачлöн вирöн. Килаысь видзчысьöм могысь пузчужöм кагалысь гöг сюрöссö мавтлiсны шыр вирöн. Шыр вирöн жö Эжва катыдсаяс мавтлiсны синнысö трахомаысь, курöг вирöн – син рытйöмысь. Медым ньöбöм либö бокысь вайöм пон тöдiс выль месайсö, вöралысь вирöдз сарпавлiс ансö да вомас нянь тор кутыштöм мысьт ки помсьыс вердлiс сiйöн понсö. Ылöсас тадзи жö “мевйöдлiсны” верöспуяссö кодсюрöяс коми нывъяс пиысь. Найö юктöдлiсны сьöлöм вылас воöм зонмöс винаöн либö сурöн, кытчö неуна войтöдлiсны тöлысся вирнысö.

Буракö, и “вир матыслункöд” йитчöм психологияа лöсялöм йылысь чайтöмъяс йитчöмны югыд да сьöд вир йылысь чайтöм-гöгöрвоöмъяскöд. Танi лöсялöм улас гöгöрвосьылiс эз вира, а ловпытшса рöдвужлун. Чайтлiсны, мый кык мортлöн оз кö лöсяв вирыс, найö оз кутны ладмыны, оз мöдны вермыны öтув уджавны. Весиг паныд вира мортлöн орччöн вылöмыс негативöн имитö öтлаын уджалöмлы. Вир серти ылi йöз зэв кокниа вермасны вомдзавны öта-мöдсö, вöчны лёктор öти мöвпышттöм кывйöн либö видзöдласöн. И мöдарö – кодъяслöн вирыс лöсялö, налöн артмас быд сикас öтув удж (весиг быттьöкö медся лачатöмыс). Морт вермö бурдöдны либö мездыны вомидзысь вир серти матысасö, кöть и ачыс абу тöдысь.

Литература: Ильина 1997, Лыткин, Гуляев 1970, Сидоров 1928, АЧМ, ИИ ЧМ.