Анна Семёнова

– Гожъяськыны дас кык-дас куинь арескысен кутски. Сокугес ик монэ Владимир Романов синйылтӥз. Соку со «Дась лу!» газетын ужа вал. Мыным трос гожтэтьёс лэзьяз. Иж каре семинаръёсы ӧтчалляз. Отысен ик сюлмам кылбуран улӟиз. Студент дыръям Владимир Романов ик бурдъяз тодос удысэ сюрес утчаны.

Нош Дарали Лели (Алёна Петрова) гожъяськыны ньыль аресысен кутскем. Солы паймонэз ӧвӧл: анаез, Татьяна Чернова, ӵужанаез, Лидия Чернова, – кылбурчиос.

– Пичи дыръям йырам лыктэм тунсыко чуръёсме мамае аслаз тетрадяз люказ, – тодаз вае Дарали Лели. – Кык чуръем кылбуре али но йырам на: «Мамалэн нимыз Таня, Нош эшез солэн Граня».

– Нош мон пичи дыръям ас поннам кырӟаса ветлӥ, – шуэ Елена Миннигараева (Панфилова). – Сомында кырӟанъёс тодэмелы эшъёсы паймо вал. Соосты ачим малпаса кырӟасько шуыса вераны мыным умой ӧз потылы. Отысен ик кылбуранэ сюресэ кутскиз, дыр.

Куд-огъёсыз быдэ вуыса ини гожъяськыны кутско. Кылсярысь, Римма Игнатьева, Ижысь университетын дышетскыкуз, литературая кружоке ветлыны ӧдъям но, та «висён» бордаз лякиськем, нош Лия Малыхлы – «Советской Удмуртия» газетэ ужаны лыктэм бераз гинэ. Анатолий Григорьев но литературае сюрес бергес шедьтэм.

Тунсыко соиз: куд-ог гожъяськисьёс пичи дырысенызы удмурт кылын умой-умой ӧз вераське яке воксё ӧз вераське, нош быдэ вуыса ини, удмурт кылэ выжылӥзы. Со сярысь Владимир Владыкин тазьы вера:

– Мынам сямы вань: ваньзэ кык кылын гожтыны тыршон. Соос монэ, кык бурдъёс сямен, кыдёкегес нуо кадь потэ. Удмурт кылын гожъяськыны мыным шуггес вал. Малы ке шуоно мон ӟуч школаын, педучилищеын но университетын ӟуч ёзэтъёсын дышетски. Англи кылын анекдотъёс вераны быгатӥсько вал, нош удмурт кылъёсты «вань ӟепъёсысьтым утчай». Кылбуръёс гожъяны шӧдтэк шорысьгес кутски.

Нош Алексей Арзамазов удмурт кылын гожъяськемзэ авантюра шуэ:

– Удмурт кылэн дас сизьым аресам гинэ пумиськи. Удмуртиын ар улыса, удмурт кылын кылбураны кутски. Сое ӟеч тодытэк, кылбур борды басьтӥськыны туж шурдыт вал. Кылбуран – мон понна со удмурт кылэз мургес тодон. Асме эскерыны кельшиз. Удмурт кыллэн зарезезлэсь мурдалазэ мон али но уг валаськы. Аслым ачим удмурт кылын умой вераськисько кадь потылӥ, нош берло дыре сыӵе осконэ быре. Школаын дышетскыкум, француз, итальян, ӟуч кылын кылбуръёс гожъяны выри. Но со ваньмыз кылэз волятон гинэ вал, нош удмурт кылэн кыӵе ке пуш кусып кылдӥз.

Василий Ванюшевлы гожъяськыны мылкыд сётэм Кизнер ёросысь Вылӥ Кусо-Какся гуртысь Д. Н. Тимофеев дышетӥсь.

– Ньылетӥ классын дышетскыкум, школае выль дышетӥсь вуиз, – тодаз вае Василий Михайлович. – Со Быдӟым тылож пыр потэм воргорон вал. Ӝӧк вылэ пичи гинэ книга понӥз но учкыны косӥз. Отын нылпиослэн кылбуръёссы поттэмын вал. Сое лыдӟи но малпай: «Мон кадь пиналъёс кылбур гожъяло но, соосты книгаен потто. Мон но уг быгаты меда?» Бертӥ но кылбур гожъяны кутски. Но со, конешно, кылбур ӧй вал. Нош кызьы гожъян сярысь валэктӥсь ӧй вал. Шӧдӥсько, сое кырӟаны мед луоз. Ӵукна вазь ик султыса, школае мынӥ но дышетӥселы возьматӥ. «Умой пӧрмем ведь!» – шуиз. Умой пӧрмем бере, гожъяськисько ни, дугдыны уг быгатӥськы, пальпотэ тодосчи но кылбурчи. Можга педучилищеын но удалтӥз. Литературая кружокен отын Е. А. Коновалова туж кема кивалтӥз. Кӧня тодмо адямиосыз со будэтӥз! Отысен ик печатласькыны кутски. Кылбуръёсы Можгалась «Ленинья» ёрос газетын потӥзы, собере – «Советской Удмуртия» газетын. Отын соку Михаил Петров ужаз. Солы асьме агаймылы кадь вазиськыса гожъяськомы вал. Кызьы гожъяськон сярысь со туж яркыт образъёсын валэктылӥз. «Зорон дыръя пукись ву вылын пульыос кылдо, со пульыысь котырысь дунне адӟиське» – тӥни сыӵе ик, пе, кылбур луыны кулэ. Озьы ик Трофим Архипов бадӟым юрттэт сётӥз. Солэн куремезья, «Советской Удмуртия» газетэ С. Широбоковлэн выль потэм книгаезлы рецензия гожтӥ. Нырысетӥез пыр-поч дасям статьяе со луиз. Со мыным берло Москвае журналистика факультетэ дышетскыны пырыны юрттӥз.

Нош Алексей Ельцов Георгий Архиповлы луыса гожъяськыны кутскем. Витетӥ классын дышетскыкуз, тодмо писатель Яр ёросысь Байран школае вуэм но, пияшлэсь бур кизэ кутыса, соку гинэ потэм «Вай бур кидэ» книгазэ кузьмам. Ӝутскем мылкыдын Алексей ёрос но «Дась лу!» газетьёсы гожъяны кутскем. Собере гожъяськон ӧрез пумен паськытам.

Кылбурчилэн гожъяськон ӧрыз куддыръя малпамтэ шорысь но усьтӥське вылэм. Сергей Матвеев нырысетӥ кылбурзэ анаезлы фермае скал кыскыны юрттыны ветлыкуз гожтэм.

– Одӥг пол милемыз машинаен возь вылэ нуизы, – тодаз вае кылбурчи. – Кырын гужем куазь, ыркыт тӧл пельтэ, шунды пиштэ... Шӧдтэк шорысь йырам таӵе кылъёс лыктӥзы:
Тыр тысё шепъёсты учкыса,

Сюлэмам йыгаське шумпотон.

Вордӥськем гурт шорам

учкыса,

Мукетыз кылбурчи, Зинаида Рябинина, гожъяськыны кутскемез сярысь тазьы вера:

– Мон пичи гуртын вордӥськемын. Нюлэс пӧлын, лудъёс котырын улыса ик, гожъяськон мылкыды улӟиз, дыр. Нырысетӥ кылбуре ӟазег возьмакум кылдӥз. Чеберлыко литератураез, тужгес но удмуртсэ, туж синмаськыса лыдӟисько вал ке но, гожъяськись луон сярысь малпанъёсы ӧй вал. Нош нырысетӥ кылбуре ӧч карыса потӥз, шуыны луоз. Одӥг эшмылы гожтэм ужъёссэ дышетӥсьмы «Дась лу!» газетэ келяны косӥз. Мон пайми, вожъяськи: малы сое косэ, нош монэ уг? Кутӥ но кылбурме ачим газетэ лэзи. «Вунонтэм гужем» ӵошатсконазы вормисе потӥ. Со вакытлы туж ӟеч кузьым, фотоаппарат, келязы.

Нош Милитина Гаврилова-Решитьколы кылбур гожъямез понна тыш сюрем. Куатетӥ классын дышетскыкуз, школаысь бертыкузы, эшъёсызлы кылбурзэ лыдӟем но, одӥгез нылаш бадьпу ньӧр тӥялтыса шуэм: «Со кылбур гожъялоз, нош ми кадьёс дышетоно луомы!» Тыбыраз ньӧрен шуккем.

Тыш йӧтэм бере Милитина вань ужъёссэ чуланысьтызы пичи шыкысэ ватэм. Соос озьы ик ышиллям. Выльысь кылбураны но азьвылгес гожтэмъёссэ калык азе поттыны тодмо журналист укмыстонэтӥ аръёсы гинэ дӥсьтэм.

Пусйыны кулэ, удмурт газет-журналъёс но гожъяны кутскисьёслы визь-кенешен юрттыны тыршизы.

– Школаын дышетскыкум, ӟуч литературая учебникысь одӥг выжыкылэз берыктӥ но «Дась лу!» газетэ лэзи, – тодаз вае Ульфат Бадретдинов. – Отысь гожтэт вуиз: «Выжыкылдылэн пуштросэз выль ӧвӧл ни. Выльзэ гожтыса утчалэ». «Пуштрос» кылэз мон уг валаськы вал ай. Собере ачим малпаса гожъяны кутски. 1969-тӥ арын «Ӟичы но Лудкеч» выжыкылме поттӥзы. Сое мон нырысетӥ чеберлыко гожтосэным лыдъясько.

Пётр Куликов ӟеч кылъёсын тодаз вае «Советской Удмуртия» газетэз:

– Гуртысьтымы одӥг пияш «Советской Удмуртия» газетысь «Пинал куараос» сэрегын кылбуръёссэ поттӥз. Нош мон малы палэнэ кылисько? Гожтӥ. Герман Ходырев мыным гожтэт ыстӥз: Петя: давай гожъяськы, пе. Соин ӟеч кусып тупатӥм. Малпасько, гожъяськон удысэ ӝутскыны со бурдъяз. Герман Ходыревлэсь гожтэтъёс трос гинэ люкаськизы, утьыса возисько.

Владимир Михайловлэн верамезъя, Можга ёросысь Юбера школаын куинетӥ классын дышетскыкуз, соос доры Герман Ходырев кылбурчи, Владимир Голубев писатель но Антон Шнайдер туспуктӥсь вуиллям.

– Мылкыдмес сыӵе ӝутыса кельтӥзы, – шуэ Владимир Михайлов, – быдэс классмы гожъяськыны кутскиз. Но мон гинэ тани журналист, писатель луи. Нырысетӥ кылбуре «Советской Удмуртия» газетын ньылетӥ классын дышетскыкум потӥз.

Пумиськонъёсын трос ӟеч кылъёс верамын вал Можга педучилищеысь, Удмурт кун университетысь литературая кружокъёс сярысь, озьы ик – егит гожъяськисьёслэн Иж карын ортчылэм семинаръёссы, будӥсь пушъетъёслы котьку юрттыны дась луись мукет тодмо кылбурчиос, писательёс сярысь.