Лобась Ке, яке Дырез азьпалтон

Лобась Ке,

яке Дырез азьпалтон

1

Университетэ пырон понна экзаменъёс сётыку ик мон сое синйылтћ. Љужыт мугоро, тќдьы йырсиё, зћбыт сямо, одћг мултэс кылзэ но уз вера. Мукет пиослэсь со висъяськылћз ас понназгес улыны турттэменыз. Нокинэн эшъяськыса ќз вутты, дыр. Нош нылъёс шоры ќз ик учкылы кадь. Солэсь нимзэ тодэммы бере, ми воксё абдрамы. Буй, пе. Нырысь ќм оске вал. Паспортсэ воьматыны куриськом.

– У-у, кыџе визьмо тон!

– Нош малы тыныд Буй ним сётћллям?

– Фамилиед но туж тунсыко – Ошмесов. Кытысь со?

– Малы бон со тћледлы кулэ? – нош ик пальпотыса учке Буй ми шоры. –Дунне вылын котькыџе нимъёс вань.

– Милям районтћмы Буй шур бызе. Тынад нимыд со шурен герњаськемын ќвќл-а? – юано кариськиз Надя, Камбарка ёросысь лыктэм нылаш.

– Во, во! – шумпотћз, лэся, Буй. – Тћ визьмоесь, валэктытэк но ваньзэ валалоды.

– Иське, Буй – со шур ним? – егит пилэн синъёсаз ик учкисько.

– Мынам но нимы Буй, – серемзэ со кутыны ќз быгаты ни, лэся. Нош серектэмез туж вакчи вал. Чилектэм выллем.

– Тон, Буй, милемыз кабзэ серем кариськод кадь, – мынам воже ик потыны кутске ни. – Ми умоен гинэ юаськом, нош тон… Милям тодэммы потэ ук…

– Мон но умоен гинэ вералом-а? – Буйлэн синъёсыз мон шоры мертчиськизы кадь. Мукет нылъёсыз со уг адњы ни, кожалод. Шќдћсько: ымныры мынам намер выллем џыжектћз. Озьы ке но синъёсме Буй шорысь палэнтыны уг быгатћськы. Кыџе ке но магнитэн кыско, лэся, солэн синъёсыз. Кќня озьы сылћ, ачим но уг тодћськы ни.

– Вера ни! – шуак вазиз Надя егит пилы. Солэн бозырес куараез монэ зуркак кариз. Нош Буй ќз куалекты, со витиз, вылды, мынэсьтым ваземме.

– Буй нимылэсь кызьы но малы кылдэмзэ тодћсь нылаш мыным кышно луоз.

– Yes! – кеськиз Надя, оло шумпотыса, оло паймыса. – Верад ке верад, котькытчы пыр!

– Лќпшаса мон уг вераськиськы. Анае озьы шуиз, – милемыз оскытыны выре Буй.

– Нош нимыдлэсь кылдэмзэ тодћсь ќз луы ке? – юри юасько.

– Со «ке» мынэсьтым быдэс улонме воштыны быгатоз…

* * *

– Мар, мар? – паймизы нылъёс.

– Что и требовалось доказать, пќй. Гуд бай, университет! Мынам одћг баллэ ќз тырмы.

– Кытысь тон сое тодћськод?! – мынам воже ик потћз озьы вераськемысьтыз.

– Мыным со кемалась тодмо вал ни, – нокыџе ќз кариськы Буй.

Выжыятыса-мар улыны милемлы Буй ќз сёты, сумказэ кияз кутыса, со вамыштћз огъяулоннилэн пыран-потан ќсэз пала.

– Дорам бертћсько мон, нылъёс! Њеч луэ!

– Дугды ай, Буй! – мон малы ке вамыштћ егит пи сьќры, эшъёсы интыысьтызы ќз вырње, куспазы вераськыны кутскизы. – Тон документъёстэ басьтћд ни шат?

– Басьтћ, Света.

Буй дыртэ. Солэн одћг вамышез мынам кык пол вамыштэме кузьда, дыр. Љужыт каблуко кутчанэным туж шуг мыныны, солы дышыса ќй вуы на угось.

– Тон автовокзалэ-а? – юасько Буйлэсь.

– О-о, – вазиз Буй, йырзэ мон пала берыктытэк. «Малы мон со сьќры кучапи сямен мынћсько?» – таџе юан сюлэмме ик шуак кариз. Калленгес вамышъяны ќдъяй – сюлэмы озьы косћз, вылды. Буй шќдћз мынэсьтым берегес кылемме, берытскиз но мон вќзы матэктћз.

– Сыл татын, – сумказэ со мынам пыд азям понћз. – Мон али ик!

Егит пи ульчалэн мукет палаз потћз. Кытчы, малы кошкиз – уг валаськы. Кема ќз љегатскы, берен вуиз. Кияз – пион сяськаос.

– Та тыныд, Света, – букетсэ мычиз Буй. – Асьмеос татысен люкиськом…

– Њеч берты, иське, Буй… Тау пионъёсыд понна. Та мынам яратоно сяськаосы.

– Куке но асьмеос одно ик пумиськом на, – пальпотыса шуиз Буй. – Со пумиськонлы нокыџе «ке» уз люкеты.

Егит пи дыртыса кошкиз автовокзал пала. Мон кыли ас интыям ик, Буйлэсь вамышъямзэ учкыса. Со ышиз ни калык пќлы, нош мон интыысьтым вырњыны уг дћсьтћськы. Буй мынэсьтым вань кужымме басьтыса кошкиз кадь.

Витёнтэм шорысь ќжыт гинэ пыд йылысьтым ќй погра – шорам кыџе ке тодмотэм пиосмурт донгиськиз. Со кудњемын, пыд йылаз мырдэм возиське на. Тышкаськыса вќзам матэктыны кутскиз вал, мон љоггес палэнски, огъяулоннимы пала вамыштћ.

2

Йырысьтым Буй уг кошкы. Син азям – солэн тусбуез. Куараез но пель сьќрам куддыръя чузъяськылэ. Куараез пала берытскисько но – нокин ќвќл. «Оло, визьтэммисько ни?» – малпаськисько ас поннам.

Пыд куара ќвќл. Но тани ќспалмес но мынэсьтым комнатаме висъясь катанчи каллен вырњиз, со сьќрысь адямилэн йырыз адњиськиз.

– Буй!? – кеськемме ик ќй шќды, ачим ымнырме шобрет улэ донги. Витисько, мар меда луоз. Ќй чида, йырме шобрет улысь кыштырак поттћ. Учкисько – комната шорын Буй сылэ, ымныраз – небыт пальпотон. Мынам пальпотэме уг луы, пушкам кыџе ке кышкан возиське.

– Буй…–- каллен вази мон.

– Мон Буй ќвќл. Мынам нимы – Ке.

– К-ке? – гуньдэм кадь луи, ньылоны соку ик кќсаз.

– Эн кышка, Света, – каньылак вераны выре пырем мурт. – Мон тонэ уг иса… Тыныд но, Буйлы но юрттэме гинэ потэ…

– Малы тынад тусбуед Буйлы кельше? Кызьы мынэсьтым нимме тодћськод? – оскытэкгес учкисько Ке шоры. Тћни џапак соку тодам лыктћз Буйлэн верам кылъёсыз: «Со пумиськонлы нокыџе «ке» уз люкеты». Иське, Ке – со улэп адями? Номырзэ но уг валаськы…

– Мон котькинлы кельшыны быгатћсько, адямиосты но ваньзэс тодмасько,– вераз Ке, собере вќзам матэктыны кутскиз.

– Эн лыкты вќзам! – ќй шќды куараелэсь бадњымамзэ .

– Я, я, мон татын сыло… Света, тонэ Буй возьма…

Мон мар шуыны уг тодћськы. Малы Буй ачиз дорам уг лыкты? Нылмурт шат егит пи доры мыныны кулэ?

– Мон солэсь кытын улэмзэ но уг тодћськы, – шуисько Келы.

– Тынад сюлмыд ачиз шедьтоз со доры нуись сюресэз…

Ке шуак, фантастик фильмын выллем, ышиз азьысьтым. Синъёсме чушылћсько. Азям нокин ќвќл ни. Интыысьтым султћ но ќс вќзы матэктћ. Со џогамын. «Оло, мон вќтай?» – уг оскиськы ни аслым ачим.

– Тон ќд вќта, Света, – Келэсь куаразэ кылыса куалектћ. Со куара вылћысь кылћськиз. «Осто, инмаре, – сипыртћ ас поннам. – Оло, монэ курадњытыны малпаськод? Кыџе сьќлыке понна?» Валесам выдћ. Кыллисько, синъёсме кынеме уг луы. Кышканэ уг буйгатскы на, сюлэмме азьло сямен ик зол ужатэ. Ке комнатаысьтым ќз кошкы на, дыр. Кытысен ке шорам учкыса уг улы меда?

– Ке, малы тон татын сылћськод на?! – кеськи комнатае тыр. Шыпыт. Пумитам нокин уг вазьы. Изем потэме тќлњиз. Ма карыны уг валаськы. Будильниклэн тиккетэмез пеле ик пыре. Али кќня час меда? Тылэз љуатыны уг дћсьтћськы. Валесам кыллеме уг поты ни.

Интыысьтым султћ но, коџыш сямен небыт вамышъяса, укно вќзы матэктћ. Педлон югектэ ни вылэм. Гудырикошкон толэзе но уйёс вакчиесь на угось. Ульчаын нокин уг адњиськы. «Ваньмыз изё на, дыр», – озьы малпаса гинэ вуттћ, ульчаосты герњась кусыптћ ми пала лыктћсь адямиез адњи. Пиосмурт, лэся. Тани со милям коркамы вадьсы дугдћз но ымнырыныз мон пала берыктћськиз.

– Ке? – воксё абдрай, укно вќзысь љоггес палэнски. Мар солы кулэ? Малы гурт ульчатћ ветлэ? Ишан ќвќл меда со? Выльысь матэктћ укно доры, тюль пыр учкисько ульчае. Ке озьы ик сылэ. Монэ возьма, оло? Озьы ке, малы?

Дћсяськыны ќдъяй, малызэ ачим но уг валаськы. Кыџе ке кужым монэ ульчае кыске, кожалод. Дћсяськонъям кышканэ тќлњиз. Тодмо эше доры мыныны дасяськи кадь. Йырам сыџе малпан пыриз.

Ульчае потћ. Ке ас интыяз ик сылэ. Пал кыл но вератэк, мон вамыштћ со сьќры. Гуртмылэсь ог-кык иськеме палэнскеммы бере юатэк ќй чида:

– Ке, кытчы асьмеос мынћськом?

Мынам азям вамышъясь Ке шуак дугдћз, ымнырыныз мон пала берыктћськиз:

– Света, тонэ та сюрестћ ас малпанэд нуэ.

– Малпанэ?!

– Эн паймы…

– Кызьы уд паймы, Ке, адямилэн йыраз олокыџе малпанъёс но кылдыло ук!

– Тон, Света, кесяськыса эн вераськы. Мон валасько: тынад йырад пќртэм малпанъёс вордћсько. Нош Буйен герњаськемъёсыз сокем трос ќвќл.

Мар шуод на Келы пумит? Солэн кылъёсаз – зэмлык… Валаны кутски: ми мынћськом Буйлэн вордћськем палъёсаз…

Кызьы Кам шурез выжим, сьќд нюлэс пыр потћм – уг тодћськы ни. Вакытлэсь ортчемзэ шќдонэ но быриз, лэся. Жадемме но уг валаськы.

Тани Ке дугдћз но музъем вылэ пуксиз:

– Татын Буй вордћськемын.

– Татын? Нюлэс пушкын? – синъёсы питырскизы, вылды. Котырак утчаськисько. Пель сьќрам вулэн жильыртэмез кылћськыны ќдъяз. Адњи – ошмес бызе. Кыдёкегес учки но шурез синйылтћ.

– Отћ Буй шур бызе?– Ке шоры учкисько.

– Шонер…

– Иське, Буйлэн секытэн луэм анаез татчы одћг пол пу кораны лыктэм но… татын ик нылпи ваем. Шурлэсь нимзэ пиезлы сётэм. Ошмесов фамилиез но та ошмесэн ик герњаськемын, дыр.

– Тынад одћг малпанэд, Света, быдэсмиз!

Университетэ пырыны экзаменъёс сётъян дыръя Буйлэсь верамзэ тодам вайыса, мон кышкатски. Табере Буй монэ кышнолы басьтоз? Егит пилэн нимызлэсь кылдэмзэ тодћ ук. Малпаськонме Ке куспетћ кариз:

– Тынад, Света, азьпал улондэ адњемед потэ. Тодћськод на-а со сярысь малпаськемдэ?

– Тодћсько, – Келы паймемысь дугдћсько ни, со мынэсьтым вань малпанъёсме «лыдњыны» быгатэ. – Куке но шуи вал: «Азьпал улонме адњыны быгатысал ке».

– Вот, вот… Со малпандэ Ке быдэстыны быгатоз.

– Тон, Ке, монэ кабзэ визьтэммытод ни…

– Татын. Кыдёкын ик ќвќл, вить сю аресъем тыпы будэ. Солэн пушказ пырыса, вуоно дырез адњыны луэ, – валэктћз Ке.

Пумитъяськыны кужыме ќвќл. Ке сьќры вамышъясько. Кема ик ќм мынэ, туж быдњым тыпы доры вуим. Нош мугорыз кыџе зќк! Вераны кылъёс уд шедьты , ява. Паймыса учкисько писпу шоры. Валаса но ќй вутты: котырак пеймыт луиз, вань дунне берганы кутскиз кадь. Шќдћсько: мугоры капчияз,тани мон лобисько ни. Пеймытлэн пумыз но ќвќл. Кќня озьы лоби, вераны шугъяськисько. Одћг вакытэ пеймытын кыџе ке югыт адњиськиз. Вќзаз матэктэмъя югыт бадњыма но бадњыма, собере воксё суредлы пќрмиз. Нош суред вылын – чебер нюлэс куш. Шораз ик выжыкылын выллем корка сылэ. Уть ай, отын улћсьёсыз но вань. Тћни корка котыртћ пичи пи бызьылэ, ватскыны инты утча кадь. Кќня ке улыса, коркась одћг ныл но куинь пиос потћзы. Таосыз бадњымесьгес ни. Писпуос сьќрысь тушо пиосмурт адњиськиз, вќзаз – егит пи. Соос пќйшурамысь берто. Пќйшурасьёсты кышномурт нылпиосыныз џош пумитаз.

Буй? Нош кышномуртэз – со мон? Милям вить нылпиосмы? Малы калыклэсь палэнын улћськом?

3

Йыры берганы кутскиз. Вирзћбетэ воксё улће лэзиськиз, дыр. Тани-тани пограло, пыдъёсы мамык выллем небыт луизы, соос монэ уг возё ни. Синъёсы но кынисько. Пограны ќй вуы, суйтћм кин ке кутћз. Солэн йќтскемезлэсь сайкай, лэся. Синъёсме усьтћ но – Ке шорам пальпотыса учке.

– Отчы тыныд мыныны уг яра, – суредысь нюлэс куш шоры чиньыеныз возьматћз.– Отын – тынад азьпал улонэд.

– Мынам али отчы мынэме потэ! – Келэсь мозмытскыны вырисько, нокызьы уг пќрмы.

– Света, буйгатскы, – Ке куаразэ чик уг будэты, мынэсьтым куронме уг кылы, кожалод. – Али отчы сюрид ке, берен потыны уг быгаты ни. Вань улонэд ву кадь пожаськоз.

– Азьпал улонме тодћсько ни бере, малы мон сое кема аръёс џоже возьмалом? – буйгатскеме уг луы, олокыџе кужым мугорме азьпала – чебер суред доры нуыны турттэ. Со кужымез мон шќдћсько, пумитъяськеме чик уг поты.

– Света, тон татысь потод – ваньзэ вунэтод…

– Йыры чос пызен тырмытэмын кожаськод-а?! Кызьы мон та адњемме вунэтом? Йырвиме мынам вань ук! – вожпотонэ уката кужмояз. Валаса но ќй вуы, пыд улысьтым бодыез киям басьтћ но Келэн йыраз шукки. Ке палэнскыны ќз вутскы, кык киосыныз ик йыр бордаз кутскиз но каллен гинэ лэзиськиз музъем вылэ. Нош мон азьпала бызьыса кошки. Дас вамыш лэсьтыса вуи-а, ќй-а, кытчы ке џемтћ но пограй. Ќй, ќй џемты, одћг пыдме кин ке киыныз кутћз кадь. Мыным озьы потћз. Султыны уг дћсьтћськы. Шоканме но огдырлы дугдытћ. Сюлэмылэн йыггетэмез пелям ик шуккиське. «Ке сылэ, дыр, мон вќзын, – малпасько ас поннам. – Со сяна кин луоз?»

Нош йырме љутэме уг поты. Келэсь ваземзэ витисько. Мае яке кинэ ке возьмаку, дыр туж кален мынэ. Ташбака кадь гызмыльтэ. Кќня минут мон кыллисько ни меда? Оло, вќзам нокин ќвќл? Йырме каллен гинэ љутћ но… берен лэзи. Мынэсьтым ог куинь вамышын тодмотэм адями пуке. Мар со каре? Йырме выльысь љутћ. Адями шоры учкисько. Нош солэн синъёсыз олокытчы мертчиськемын, мон пала йырзэ берыктыны ик уг малпа, лэся. Интыысьтым султћ. Юбо кадь сылћсько, интыысьтым вырњыны уг дћсьтћськы. Оло, шыпытак пегњоно? Нош кытчы? Берлань мынэме уг поты. Азьпал улонам мыным сюроно. Тћни со югдэ, ас дораз ќте. Нош пиосмурт пуке сюрес вылын. Палэнтћз уд ортчы, котырак писпуос но куакъёс, пыд куараме со мурт соку ик кылоз.

– Ма каром? – пиосмуртлэн шуак ваземысьтыз куаляк луи. Мар со юаз? Мынэсьтым-а яке кинлэсь ке-а? Оло, асэныз ачиз шара вераське? Ымнырзэ мон пала уг берыкты.

– Тћледлы маке луиз, оло? – вазьытэк ќй чида. Тодмотэм пиосмурт чалмыт пуке, мынэсьтым юанме ќз вала, кожалод. Вот бакча сульдэр! Пельыз но уг кыл, оло? Малпаськемме шќдыса кадь, пиосмурт мон пала йырзэ берыктћз, собере – мукет пала.

– Мон огнам. «Тћ» татын ќвќл, – тазьы шуэмысьтыз мар вераны ик пайми.

– Ма… Тћ… Кызьы шуом ай…

– Тон но мон кин ке понна тћ луиськом, – олокыџе мудрон кылъёс шедьтэ та пиосмурт. Пумитаз кызьы вазьыны но уг валаськы. Пиосмурт интыысьтыз султыса, мон пала лыктыны кутскиз. Мынам нокыџе кышканэ ќвќл. Син шорам йќтћз џыж-горд тушез. Осто, воксё пересь адями ук та, мырдэм вамышъя. Нош ымнырыз тодмо кадь. Кытысь сое адњи меда? Малы нош сокем мќзмыт тусо?

– Њеч-а, бур-а, юлтоше, – вазиськиз пересь.

– Њечесь-буресь, њечбуресь… – шораз пальпотыса учкисько, нош йырам соку ик юанъёс кылдћзы: «Малы монэ юлтош каре? Мыным озьы вазиськисьёс ќй вал на».

– Мон татын огнам. Тыныд мон – тон. Валад-а, нылы?

– Валай, песятай.

– Тазэ тон њеч верад, сюлэмы ик небњиз, – пересь вќзам ик султћз но шорам учке.

– Песятай, малы тон сыџе мќзмыт тусо? – та юанэлэсь шараяськемзэ шќдыса но ќй вуы. Юамелэсь возьдаськыса, синъёсме шорысьтыз воштћ, музъеме учкисько. Соку син шорам йќтћз пересьлэн киысьтыз пичигес гинэ горшок. Пиосмурт шорам учкемысь уг дугды. Ымнырысьтыз мќзмыт тусыз уг быры.

– Мќзмыт – со висён ќвќл, – шуиз но огдырлы чалмиз, собере веранзэ азьланьтћз. – Мќзмонэз безменэн уд мерта. Мќзмонлэн эшез одћг – пальпотон.

– Куректон, бќрдон мар со? Мќзмон но пальпотон ог-огзылы тушмонъёс уг луо шат? – пересен эчешеме потыны кутскиз.

– Куректон но бќрдон – со сыџе ик мќзмон. Ку, кытын, кызьы, ма понна – адями ас мќзмонзэ пќртэм сямен возьматэ. Пальпотон но одћг выллем гинэ уг луы. Со серекъянлы но, горонлы но пќрме.

«Визьмо вераське. Нош кин со? Малы азям потћз? Оло, со азьпал улонысьтым џыжы-выжые?» – малпаськисько ас поннам. Нош пиосмурт мадёнзэ азьланьтэ:

– Мќзмон но пальпотон ог-огзытэк улыны уг быгато. Дунне вылэ кудћз вазьгес вордћськемын, тодмо ќвќл. Адями пушкын огез кемагес кузёяськыны кутскыку, мукетыз сое улля… Мќзмон но пальпотон адямилы эсэп кылдыто.

«Эсэп? Адямилэн сэпез вань? Нош эсэпез ќвќл кадь. Эсэпсэ валано, шуо. Та философ монэ воксё паймытэ. Малы со мыным тае вера? Номыр но ќй юасал ке, чалмыт сылысал меда?» – юанъёсылы валэктон уг шедьтћськы, малпаськыны дыр но ќвќл, пересь уг чалмы.

– Малы мон мќзмыт тусо – сое тодэмед потэ. Тани та янгыш, – киысьтыз горшоксэ музъем вылэ пуктћз.

– Огшоры горшок? – паймемме ватэме уг луы, малы ке сое одно ик шарае поттћсько.

– Со огшоры ќвќл… Пушкыз зарниен тырмытэмын, – пересьлэн ымныр тусыз чик уг воштћськы.

– Зарниен? – мынам ымы ик усьтћськиз, пересь шоры кучыранлэн выллем бадњым синъёсыным учкисько. Паймыку синъёс питырско угось.

– Зарниез мон бакчаям гудћськыкум шедьтћ. Соин мар карыны уг валаськы…

Мынам сереме потћз. Пересь соку ик бур киысьтыз азьчиньызэ возьматћз, шыпыт кариськыны косћз:

– Э-э, татын серекъянэн йырин ќвќл. Зарнилы эн синмаськы, синмыд мальдоз, шуо. Озьы ук? Зарни шедьтэмме властьёс тодћзы ке, ваньбурме талалозы, асме каталажкае пуктозы. Зарни сярысь кышноелы но вераны уг дћсьтћськы, одно ик со калык пќлы кыл вќлдоз… Та зарниен выль корка пуктэме потэ. Зэм, зэм…

«Осто, та Лќпшо Педунь ук! Шедьтэм зарниеныз со выль корка љутћз. Малы монэ пќяны выре? Э, валай. Та зэмос Лќпшо Педунь ќвќл», – малпаськонме куспетћ карыса, пересь доры матэктћ но бур киыным тушсэ кыскыса утчай.

– Тон Алексей Леконцев! Лќпшо Педунь кариськыса ветлћськод.

– Ќб-ќб! – вќсь луэмезлы чидатэк, пересь кеськемзэ но ќз шќды:

– Кыџе ле-ле лекам сэп?

– Сундур гуртысь Алексей Леконцев. Эгра ёросысь, – валэктыны турттћсько. Ачим валатски ни: та пересьлэн тушыз лякем маке ќвќл.

– Мон сыџе адямиез уг тодћськы. Сундур гуртэз кылэме но ќвќл… Эгра палъёс вань шуыса тодћсько. Тћлядэз Эграды-а со, милямез-а, созэ мар шуыны уг тодћськы…

– Тон Лќпшо Педунь ук!?

– Озьы, нылы, озьы.

– Тон Эгра палась ќвќл шат?.

– Э-э, нылы, – нош ик азьчиньызэ љутћз.– Мон выжыкыл дуннеысь ук. Музъем вылын улћсь адямиослэн дуннеенызы тон эн сура. Мынам вордћськем гуртэлэн нимыз ќвќл.

– Тон адями ук. Лќпшо Педунь нимтулыд, – валаны турттћсько пересьлэсь верамзэ.

– Озьы, мон адями. Тћляд, адямиослэн, визьмынызы мон кылдытэмын. Выжыкыл дуннеысь потыны, палэнскыны уг быгатћськы. Одћг даурын гинэ улћсько.

– Мон Выжыкыл дуннее сюри-а, мар-а? – пушкам кыџе ке кышкан пырыны кутскиз. – Малы мон тонэн пумиськи?

– Э-э, тон, нылы, монэным ќд пумиськы, тон доры мон ачим потћ.

– Малы? – интервью басьтћсь мурт кадь юалляськисько ни.

– Малы, малы… Тынад кылчинэд мынам пелям сипыртћз…

– Кылчинэ? – Лќпшо Педуньлэсь верамзэ чидатэк витисько, нош со мадёнзэ уг азьланьты ни. Маке но малпаськыса сылэ, олокытчы палэнэ учке. Зэмзэ но мон выжыкыл дуннее сюри-а, уг валаськы. Пересь со сярысь ќз иворты.

Лќпшо Педунь азе пуктэм горшок син азьысь шуак ышиз. Мульфильмын кадь, ява. Оло, со адскисьтэм луиз?

Одћг вакытэ палэнынгес тодмотэм куара кылћськиз. Мышкам учки но – нокин ќвќл. Йырме берен берыктћ. Лќпшо Педунь но ышем. Осто! Ваньмыз та син пќет ќй вал меда? Али гинэ Лќпшо Педунен вераськыса сылћ ук. Кытчы пыриз? Мынам кылчинэ Лќпшо Педуньлэн пеляз маке но сипыртэм, пе. Юнме шорысь ќвќл, дыр, со. Тодћсько: кылчин – со адямилэсь улонзэ утись. Та кылэз пичиысен кылэме вань.

Ог ньыль арес дыръям шур дуре огнам мынћськем. Меџ ярдурын, пе, сылћсько. Кышканэз уг валаськы на. Одћг вамыш лэсьтысал ке, вуэ питыраны быгатысал. Азям олокытысь тќдьы дэремен кышномурт потћз. Сое адњеме вунонтэм кылиз. Китћм кутыса, кышномурт монэ дор пала нуись сюрес вылэ поттћз. Со вакытэ песянае мон доры шокпотыса вуиз:

– Осто, нылы, малы татчы лыктћд? Вуэ усёд ук!

– Монэ шур дурысен татчыозь апай келяз, – верасько песяелы.

– Кыџе апай мурт? Кытын со?

– Али гинэ татын вал…

– Кыџе тусыз? Кызьы дћсяськемын? Пересь-а, пинал-а? – юалляське песяе.

– Тќдьы-тќдьы дэремен вал со…

– Осто, инмаре-кылчинэ, – вќсяськыны кутскиз песяе. – Бадњым тау тыныд, Инмаре-кылчинэ… Нылы, тынад кылчинэд вылэм со.

Песянаелэсь та кылъёссэ мон ќй вунэты. Тани али но син азям пуксиз пичи дырысьтым суред. Кылчинэлэсь ымныр туссэ уг тодћськы ни, тќдьы дэремзэ гинэ вунэтыны уг быгатћськы…

Лќпшо Педунь но мынам кылчинэ пумиськиллям, иське. Кызьы? Пересь воксё дас укмысэтћ даурын улэ, каталожкалэсь сяна, номырлэсь уг кышка кадь. Нош мынам кылчинэ али мон вќзын. Пќртэм дауръёсысь ке но, ог-огенызы кыл шедьтћллям. Дугды ай, Лќпшо Педунь но утись ук! Выжыкылэз со уте. Кык утисьёс ог-огзэс, пќйшурасьёс сямен ик, кыдёкысен тодмало, вылды. Мар мон визьтэм мурт кадь вераськисько? Кылчинэ гинэ ќвќл, мон ачим но али Лќпшо Педунен пумиськи ук. Кыџе юалляськеме потэ на вал. Табере со монэн пумиськыны уз лыкты ни…
4
Пеймыт. Нокыџе сюрес уг адњиськы. Азьпалась суред гинэ ялан пиштэ. Суред пушкысь корка, азьло сямен ик, ас бордаз кыске. Со котыртћ ветлћсь адямиос уг адњисько ни, доразы пыризы, вылды. Корка дорозь кќня мыноно на, уг валаськы. Нырысь учкыса, туж ик кыдёкын ќвќл. Нош мынэмъя со суред чик уг бадњыма. Оло, отчы вуыны но уг луы? Ке алћз вал: азьпал улонэ мыныны уг яра. Малы соку мыным сое возьматоно кариськиз? Ой, малы ке

мон мыдланес малпаськисько. Азьпал улонме аслам адњеме потћз вал ук. Ачим отчы куриськи. Кабзэ шузимисько ни.

Каллен вамышъясько, кытчы ке пограмелэсь кышкаса. Азьпала мынћсько-а, одћг интыям сылћсько-а, уд вала. Вќзысьтым писпуэз яке арбериез адњысал ке, мынэмме валасал. «Теория относительности», – тодам лыктћз физика урокын ортчем тема. Дышетћсьмылэсь валэктэмзэ соку ќй вала. Њуч сямен гинэ со мадиз, уноез верам кылъёсыз мон понна валамтэмесь потћзы. Нош та тема вунонтэм кылиз Можгалась чугун сюрес станциын луэм учыр бере. Мон поездэ пукси. Вагонын калык трос ќвќл. Витисько поездлэсь вырњемзэ. Нокыџе куара поттытэк, вагонмы кошкыны кутскиз. Воксё мукет пала. «Кыџе поездэ мон пукси?» – куалектћ, интыысьтым зуркак султыса, ќс пала бызи. Потон доры вуи но – вќзысьтымы поезд интыысьтыз вырњем, милямез озьы ик сылэ. Со поездлэсь мынэмзэ укно пыр адњыса, мон мукет пала кошкиськом кожаськем. Тћни тыныд «теория относительности». Ас вылад вуиз ке, котькыџе темаез валалод, ява…

Вамышъёсме лыдъяны кутски но, шуак дугдћ: «Татын, оло, котьку уй кузёяське? Ке сьќры мон нуназе мынћ. Тыпые пыри но пеймытэ сюри. Татын ин уг адњиськы. Кизилиос но, Толэзь но ќвќл. Син азям пуксизы алигес лыдњем кылбур чуръёс:

Туннэ, пе, вордћське Џуказе.

Нош толон со пуксиз син азе.

Вазь џукна ик потћ со азе –

Џуказе малы ке но изе.

Кылбурысь нырысетћ чурзэ кема дыр џоже валаны ќй быгаты. Туннэ яке Џуказе, кудћз ку вордћське? Берпуметћ чурезъя гинэ валай – Џуказе сярысь вераськон мынэ вылэм.

Татын, пеймытын, џуказе уз вордћськы. Кќня ке сюрс џуказеосты адњытэк, мон азьпал улонам вуыны кулэ.

Малпаськыса мынонъям, мон олокытчы донгиськи. Ќй погра, кымысы но вќсь ќз луы. Кытчы донгиськемме уг валаськы. Азям номыр ќвќл кадь. Вамыштыны турттћсько, уг быгатћськы. Азям кыџе ке адскисьтэм пыкет вань. Мар со? Пияла, оло? Вќзам ик векчигес куара кылћськиз. Котырак утчаськисько, нокинэ уг адњиськы. Нош куара ялан матэктэ:

Витёнтэм интые пуксисько ке шуак,

Дунне но соку ик воштћське кадь шыпак.

Ќжытак адњиськись ымныры-тусбуе

Кельшемысь дугдэ, дыр, ваньмызлы со вие.

– Тон кылбурчи? Малы уд адњиськиськы? – шара вазиськи тодмотэм куаралы.

– Мон Пумпус… – вазись луиз.

– Пумпус? Нимыд-а, мар-а сыџе?

Шыпыт. Пумпус нимаськись маке уг вазьы. Юамез-а ќз вала яке верамез уг поты-а? Пумпус, пе. Дугды ай, та кылэз мон кытысь ке кылћ ук. Профессор Кельмаков лекцияз ќз вера меда? Пумпус… Пум но пус. Пумез возьматћсь пус? Эх, мушка йыр мон! Пумпус – со точка! Огазе-а, нимаз-а гожтћське, уг тодћськы. «Кеськон пус» но «юан пус» нимаз гожтћсько.

– Пумпус, малы чалмыт улћськод? Тон точка ук.

– Студент луэмдэ тодад вайид, иське, – вазиз Пумпус. – Мынам татчы вуэмелы тон воксё паймид. Озьы-а?

– Паймеме гинэ ќвќл… Кыл уг шедьтћськы ма шуыны… Тон, огшоры точка-пумпус, кызьы вераськись луид? Малы мон тонэн пумиськи? Яке тон-а мон азе потћд? Оло, маке луиз? Кызьы…

– Дугды, дугды, Света, укыр трос юан сётћськод, – Пумпус вќзам ик вераське, нош ассэ мон уг адњиськы.

– Тон мынэсьтым нимме но тодћськод? Кин ке вераз шат? – воксё пайми ни.

– Нош ик юанъёс сётћськод. Тонэ юан пус кожалод, – Пумпус озьы шуиз но огдырлы чалмиз, собере нош куаразэ поттћз. – Мон, Света, котькытын улыны быгатћсько: улэп но лултэм макеос пќлын но, адямиос пушкын но… Шыпыт улонэз яратћсько. Адямиосын мынам вераськеме ќвќл. Тыныд но мон ќй вазьысал, Ульфат Бадретдинов писатель ќй юрттысал ке. Со монэ огдырлы вераськись кариз. Мынам уже – пусъёс пуктон.

– Мон доры тон пус пуктыны лыктћд? – сюлэмы ик дыректћз. – Мынам улонэлы пум вуиз? Точка бере запятой пуктыны луэ-а?

– Эн кышка, Света. Пумпус – со бырон ќвќл. Шайвылысь гинэ пумпусэз интыысьтыз уд вырњыты ни. Нош мукет учыръёсы мон ялкарыны, кужым люканы юрттћсько. Ачид тодћськод, пумпус бере выль предложение кутске. Мон туннэ, Света, тыныд пусме уг пукты. Азьпала мынон сюрес вылад гинэ пусме кельто. Малызэ ачид валалод…

Пумпус чалмиз. Нош мон мар юаны но уг валаськы ни. Кќня ке дыр ортчыса, Пумпус кырњаны кутскиз:

Витёнтэм интые пуксисько ке шуак,

Дунне но соку ик воштћське кадь шыпак…

Куараез пумен пичияз, бќрысь копак ышиз. Радиоез кысэм кадь луиз.

Пумпуслэн верам кылъёсыз йырысьтым уг кошко. Азьлане мынон сюрес пытсамын шуыса, мон валай. Табере мыным кытчы мыноно? Берен потон сюрес уг адњиськы. Та пеймыт дуннее мынам кылеме уг поты.

Синъёсме паськыт карыса ик учкисько тодмо суред шоры. Мынам солы воже потыны кутске ни. Гочатыса кадь улэ, бордаз но кыске, нош вќзаз мыныны уг лэзьы. Ќй адњиськысал ке син азям, оло, умойгес луысал.

Ке монэ татчы алдаса ќз пырты меда? Мар понна? Ке мыным Буйен пумиськыны юртто шуиз вал. Буй доры ќй вуы, олокыџе дуннее сюри. Зэмзэ вераса, ачим отчы куриськи. Азьпал улонзэ кинлэн адњемез уз поты?

Буй доры мон уг мыны. Кулэ кариз ке, со монэ ачиз шедьтоз.

Кытчы мыныны, ма карыны паймеменым, музъем вылэ пукси. Киосыным эскерыса валай: котырак турын будэ, небыт валес дасямын, кожалод.

Буйлы юрттэт курыса кесяськи ке но, со уз кылы. Мон мукет дуннеын. Нош Ке али но пограм интыяз кылле меда? Оло, кулэмын? Ой, оломар йырам лыктэ. Мынам сое чик но вќсь кареме уг поты вал. Жалянме пачкатыса, мынам вожпотонэ эрико луиз – тћни озьы Келэн йыраз боды «вуиз».

Музъем вылэ выдэмме тодћсько. Нош собере мар луиз, тодам вайыны уг быгатћськы ни. Изи-а, ќй-а, кќня дыр џоже кылли – йырам номыр кылемын ќвќл.

Пель сьќрам тылобурдолэн чирдэмез кылћськиз. Чалмытын кема дыр џоже улћськод ке, огшоры куара но аспќртэмгес чузъяське. Озьы мыным йќтэ. Тани али но бурдолэн кырњамез туж мусо потћз, кожалод, со крезьгурлэсь номыр чеберез ќвќл ни та дунне вылын. Синъёсме усьтћ но – лыз инбамын яркыт шунды пиштэ, одћг пилем но уг адњиськы. Мон небыт, буй-буй будэм турын вылын кыллисько. Зуркак султћ. Котырак утчаськисько. Азьпалан коркаос. Осто, мон бакчамы пумысь возь вылын ук! Кызьы татчы вуиськем? Нокин уг адњиськы. Шундылэн пиштэмезъя валасько: али лымшор. Син азям йќтћз коркамы вќзысь садэтћ ветлћсь адями. Анай яке атай меда? Иське, соос куноысь бертћллям. Монэ ќз ыштэ-а? Лобыса выллем бызи коркамы пала. Али гинэ валатски – мон гольык пыд. Кытын кутчанэ? Тыпак дугдћ. Кызьы мынам пыдъёсылы вќсь уг луы, валантэм. Пичи дыръям гужем нуналъёсы гольык пыд бызьылэме вань. Анаелэсь но атаелэсь лушкем гинэ. Соос кышкало вал, пыдыным пияла вылэ лёгисько шуыса. Нош асьсэос пичи дыръязы гужембыт гольык пыд ветлылћллям. Соку пыдкутчан но вылымтэ на угось, куазь но пќсь луылэм. Со сярысь џемысь тодазы вайыло.

Мон пичи мурт ќвќл ни. Возь вылтћ гольык пыд ветлэмме адњизы ке, мар малпалозы? Уно аръёс џоже дышетскыса, таид огпалмем, шуозы. Атае но анае азе гольык пыдын уг поты, гид сьќртћ ватћськыса мыно но корка пыро. Оло малпанме шќдыса, оло мукет муген, адями садысьтымы кыштырак гинэ потћз но бакча пала лыктыны кутскиз. Монэ медаз адњы шуыса, турын пќлы выдћ. Йырме љутыны уг дћсьтћськы. Вќзам лыктћсь ќвќл. Иське, со монэ ќз адњы. Озьы гинэ малпаса вуи, вќзысьтым кыџе ке куара кылћ. Йырме љутћ но – мон вќзын пиосмурт сылэ. Атай? Со ќвќл кадь.

– Света, султы, – кылћськиз тодмотэм куара. Пиосмурт шоры сакгес учки.

– Буй?! – паймеменым мар шуыны уг тодћськы ни. Пиосмурт мыным бур кизэ мычиз, интыысьтым љутскыны юрттћз. Мон азьын зэмзэ но Буй сылэ. Сыџе ик веськрес мугоро, љутскем мылкыдо, ымныраз пальпотон.

– Кызьы тон монэ соку ик тодмад? – паймиз, лэся, со.

– Юанэд мултэс.. – шуи но гуньдэм кадь луи, озьы верано ќй вал, потћз мыным.

– Мон тыныд, Света, верай вал ук, асьмеос куке но одно ик пумиськом шуыса. Тани со нунал вуиз, – егит пи шорам меџак учке. Озьы учкемез университетэ пырон вакытысен вунонтэм кылиз.

– Вераны капчи, лэсьтыны секыт, – калык визькылэз тодам вайи мон.

– Пумиськыны секыт ќвќл… Кытын вал тон? Мон кемалась витисько ни тонэ, – Буй мынам гольык пыдъёсы шоры учкиз, лэся. Мон солы кызьы валэктом, ачим но кытћ, малы ветлэмме уг тодћськы бере. Малпанэ сыџе вал ке но, кылы мукетсэ вераз.

– Бакчамы сьќрысь возь вылын ялкари. Мон кабзэ мќзми ни вал шулдыр возьлэсь, куаро писпуослэсь. Дорын, азбарын, садын ужасько, нош инкуазе потаны малы ке дыр уг шедьтћськы, – кылы сэраз, эшшо олома но вераны быгатысал, но дугдћ. Тормоз дыраз ужаны кулэ, шуо. Мултэссэ зулёд, со мултэсэз ас вылад ик усёз. Сыџе дыръя бумерангез тодазы вайыло. Оскиз-а мынам верамелы, Буйлэн ымныр шораз учкыса, сое уд вала.

– Коркамы џогамын-а?

Буй та юанме гинэ витем, кожалод, кутскиз ук вераны:

– Коркады пытсамын ќвќл. Ќсады йыгаськисько, нокин уг вазьы. Кутонзэ кыски но – ќс усьтћськиз.. Корка пушкады пыри. Њечъяськемелы вазись ќз луы. Котырак утчаськи но берен потћ. Гид котырады ужаськоды, дыр, шуыса малпай. Бакчаяды но, садады но пырай – нокинэ ќй синйылты. Улон корказэ пытсатэк, адями кыдёке уз кошкы – возьмано кариськи. Возь вылысь мон тонэ соку ик синйылтћ но… тодмай. Выжыкыл дуннеысь нылмурт кадь адњиськид, ява! Зэмзэ верасько. Собере шуак ышид. «Пограз ук та», – малпай соку.

– Мон «пограй», тынэсьтыд ватћськыса.

– Кышкад, оло? – паймиз Буй.

– Атае бертэм кожай… Туннэ кыџе нунал? – мон шуак луи, кыџе нуналэз но, толэзез но вераны уг тодћськы.

– Туннэ гудырикошконлэн дас куинетћ нуналэз, – шуиз Буй, мынэсьтым сюлэмшугъяськонме со ќз вала кадь: «Анае но атае куное толон кошкизы вал ук, малы соос туннэ џукна ќз бертэ? Кытын ке љегатско, оло?»

– Ваньзэ вунэтћд, иське? – пальпотыса учкиз мон шоры Буй. «Малы «ваньзэ»? – пайми. – Ачим но уг валаськы, кызьы ортчись нуналлэн лыдпусэз йырысьтым тќлњиз. Мон пересь ќвќл на ук».

Корка пыримы. Чай юыны ву љогак гинэ быректытћ. Љќк вылэ сиён-юон тыри.

– Пуксьы, – шуисько Буйлы. – Куноез кќс кылын уг сектало.

– Тау, Света. Мынам сиеме уг поты.

– Мар тон вераськиськод? Мон ваньзэ дасяй, чай но лэзи ни.

– Тау, тау. Вождэ эн поты, мон уг пуксьы љќк сьќры.

– Уд гажаськы, иське? – Буй шоры учкисько. – Оло, юрдћськод?

– Озьы эн вераськы, Света…Зэмзэ верано ке, мон куинь нунал сиськытэк улыны кулэ.

– Куинь нунал? – воксё абдрай. ­– Тон адями-а?

Буй пальпотћз, номыр ќз вазьы. Љќк сьќрын огнам чай юыса пуки. Буй азбаре потћз, отын, пе, возьмало. Кытчы со мыныны малпа меда? Ќйтќд, «тамаша та Маша» кадь ик та Буй шур дурысь Буй нимо егит пи.

Университетэ пырыны экзаменъёс сётон дыръя Буй воксё мукет вал кадь. Яке мон сое валаса ќй вуы-а? Синмаськыку ваньмыз мукет сямен адске, вылды: писпуос но љужытэсьгес, шунды но яркытгес, тылобурдоос но шулдыргес чирдо. Буй монэ вунэтымтэ. Утчаса шедьтэм ук. Мон адресме ќй вера вал… Визьтэм мурт сямен малпаськисько ни. Ачим келяса мынћ ук егит пиез автовокзал дорозь. Сыџе дыръя вунэтэмед потћз ке но, уз пќрмы.

– Тћляд татћ Иж шур бызе. Ойдо ветлом отчы, – џектћз Буй. «Таид шуртэк улыны уг быгаты. Ачиз но шурлэсь нимзэ нуллэ угось», – малпаны вутски, нош пумитаз воксё мукет верай:

– Анай но атай юазы ке кытын ветлэммес, сизьым шур йылэ вуим шуом.

– Шурлэсь синзэ утчамы шуим ке, соос уз пайме, дыр.

– Шурлэсь синзэ? Верамдэ ќй вала. Ошмеслэн синмыз вань, нош шурлэн…

Буй нокыџе ќз кариськы, мынэсьтым паймемме витем, кожалод.

– Котькуд шур адње но, кылэ но, ивортэ но… – Буй азьпала вамыштћз, мон – со сьќры. – Шур бќксэ но.

– Бќксэ?! Тон, Буй, монэ бакомытод ни. Олома но вераськиськод. Шур кызьы бќксоз? Пудо ќвќл ук со! – егит пилэн азяз султћ, синъёсаз учкисько.– Тон уд пќяськиськы-а?

– Уг, Света, – пальпотћз Буй. – Шурлэсь бќксэмзэ ачим ќй кылы, но адямиос мадьыло со сярысь. Юнме уз супыльтэ ук. Шурлэн сиемез потыкуз, со бќксэ, пе.

– Кинэ яке мае со сие? Тодосчи сямен тон валэкты ай мыным.

– Тодосчиос та пумысен номыр уз вералэ. Наукаен со герњаськемын ќвќл, шуозы, – рос-прос валэктыны кутскиз Буй. – Шурлэн сиёнэз – кыџе ке лул. Адямилэн-а, пудолэн-а, тылобурдолэн-а – ваньмыз солы «ческыт» потэ, лэся. Пересьёс юнме шорысь уг ало: шурын огнад эн пыласькы. Тужгес но лымшор вакытэ. Шур, пе, сыџе дыръя лулдэ кыскоз.

– Пересьёслэсь сыџе алонзэс мынам кылэме вань, – тодам лыктћз песяелэн мадемез.– Вуэз курланы но уг яра, шуо. Гуртысьтымы одћг егит кышномурт, пе, ву ваем ошмесысь. Чай пќзьтэм. Вулэн шќмыз кельшымтэ, лэся. Ошмесэз со олокызьы но тышкаськем. Џуказеяз ик со кышномуртлэн ымныраз яраос потћллям. Дыр ортче, нош яраосыз уг быро. Ошмес дуре ветлыса, вулы њеч кылъёсын вазиськемез бере гинэ кышномуртлэн ымнырыз чеберскем.

– Тон, Света, выжыкылчи кадь мадиськод.

– Вань улон – со выжыкыл. Озьы шуо ук. Нош асьмеос выжыкылчиос. Котькуд адямилэн аслыз гинэ тупась мадёсэз вань…

Иж шур кузя ми кема ветлћм. Пиналъёслэсь чорыгамзэс но учкыса сылћм. Куке нокытчы уд дыртћськы, сюлэмлы но каньыл. Буйен олома сярысь но вераськыны вутским. Одћгзэ гинэ ќй вала – малы со мон доры лыктћз: оло, зэмзэ но мыным синмаськемын яке монэным матысьгес тодматскемез потэ? Нырысетћ пумиськонын ик со яратэмез сярысь уз вера, мыным со осконтэм потоз.

Нош ик ферма гидъёс пала вуим. Иж дуре васькыкумы татћ ик ортчимы вал. Али фермаын скалъёс ќвќл, дыр. Гужем соосты лагерьын возё. Гидъёсын кунянъёс гинэ кќлало.

Џын зын олокытысь вуиз. Буй сое шќдћз-а, уг тодћськы, чалмыт улэ, нош мон котырак утчаськыны кутски.

– Маке луиз, оло? – паймиз Буй.

– Џын зын лыктэ…

Фермалэн одћз гидысьтыз џын љутске. Валатски: гидлэн одћг ќсэзлэн пасьёстћз со потэ. Иське, пушказ маке но љуа.

– Тылпу! – кеськемме ик ќй шќды..

– Мар? – шуак луиз Буй, шорам синъёссэ паськыт карыса учке.

– Пожар! – бызисько ни гид пала. Онграм мурт сямен кќня ке сылэмез бере Буй но мон сьќры уйиськыны кутскиз. «Гид пушкын кунянъёс ќвќл меда? Пудо утисьёс доразы бертэмын, дыр. Нош возьмаськись бер љыт гинэ лыктоз, вылды, – йырам пќртэм малпанъёс бергало. – Џындћсь ќсэтћ пырыны уз луы, мукет паласьтыз ќсэз усьтоно». Шокпотыса отчы вуи. Со пытсамын. Бордаз тунгонэз ќвќл. Пушкытћз шат пыкъямын? Буй кыскаса-донгаса выриз, ќс уг усьтћськы. Гид пушкын кунянъёслэн бќксэм куараоссы кылћськизы. «Осто, быриськиз! – сюлмы ик вќсь луиз. Оло, тылпу кысћсьёслы жингыртоно? Гуртын бригада коркан гинэ телефон вань. Отычы бызьытозь гидысь кунянъёс сутскозы ук!» Ма карыны валатэк, пыдыным вань кужмысьтым џыжи някырскыны ќдъям ќсэ. Со усьтћськиз. Гид пушкы џын вќлскемын. Чыртыысьтым кышетме басьтыса, гид вќзын сылћсь бекчее месћ – отын кќня ке вуэз вынь вылэм. Собере кышетэным ымнырме џоксай.

– Ќсэз паськыт усьты!– косћ Буйлы, ачим гид пушкы бызьыса пыри. Мискинь кунянъёс кытчы мыныны уг валало. Одћг интыязы бергало, бќксо. Висъет капкаосты усьтћ но кунянъёсты улляны кутски. Нош соос капкаез уг адњо, вќзтћз ик ортчо, пушкысьтыз потыны уг валало. Киысьтым бодыелэсь но уг кышкало. Кќня ке улляме бере одћгез кунян усьтэм капкатћ потћз, со сьќры мукетъёсыз но кыстћськизы. Гидэ пырон бадњым ќс пала ќз кошке, љуась тыл пала мыныны кутскизы.

– Вот визьтэмъёс! – азязы султћ. – Тћни ќс со палан!

Куд-ог кунянъёслэн тыбыразы бодыеным шуккылћсько, нош соос вќсь каремме чик уг шќдо ни кадь. Кунянъёс кызьы но озьы берыктћськизы, собере кыре потћзы.

Мукет висъетлэн капкаез пась ке но, кунянъёс одћг интыетћзы бергаса ветло, круген экто, кожалод. Шоканы пумен секытгес луэ. Гид сэргы люкам турын-а яке пулъёс-а тачыр карыса љуало. Тыл уката бадњыма, педлось омыр пыремен со кужмояз, вылды. Шќдћсько: кужмы лябње. Нош Буй кытын? Малы со юрттћськыны уг пыры?

Мукет висъетысь но кунянъёс потыны быгатћзы, мон соосты усьтэм ќс пала уллясько. Огез кунян шуак берыктћськиз но шорам лыктыны ќдъяз. Йырыз шузимем-а, кышкатскем-а, уг валаськы.. Киосме вќлъяса но сэзъяса пумитаз мынћсько. Со уг дугды, синъёсыз уг адњо, кожалод.

– Кытчы мынћськод?! Тылэз адњемед ќвќл?! – гид тыр кесяськисько. – Шузи йыр! Тћни эшъёсыд кыре пото ни!

Кунян монэ лёганы но быгатысал, вќзтћм трактор кадь ортчиз, мон палэнскыны вутски. Сьќраз бызисько. Тыл пала вуыса, пинал ошпи тыпак дугдћз. Кытчы мыныны уг вала ни. Вќзаз вуи. Кунян монэ адњиз, лэся – берытскиз. Шорам мќзмыт синъёсыныз учкиз. Маке но вераны турттэ, кожалод. Синкылиосыз но потэмын кадь. Мыным гинэ озьы йќтћз-а? Пќсьлы чидатэк, кунян интыысьтыз вырњиз. Табере со ќс пала мыныны кутскиз. Потон интыез адњемезлы шумпотыса-а, мар-а, со вал сямен тэтчаса кошкиз. Нош мынам азьпала вамыштэме уг луы. Пыдъёсы кор кадь секытэсь. Син азьысьтым гид берганы ќдъяз. Синъёсы адњемысь дугдћзы.

– Буй! – кеськемме тодћсько на, собере йырсазьме ыштћськем.

Гидысь монэ пудо утисьёс поттћллям. Соос, тылпуэз адњыса, гуртысь вуиллям – кусып кыдёкын ќвќл угось. Кезьыт вуэн ымнырме пылатэмзы бере синъёсме усьтыны быгатћськем. Бус пыртћ кадь адњисько адями тусбуйёсты. Соос шорам учко.

– Буй, – кален гинэ вазиськи, куараелэн кужымез ќвќл, – кытын тон?

– Мон татын, Света…

– Буй, тон адями-а? – вожпотонме вераны турттћсько, уг пќрмы, кужыме копак быремын.

– Света… – буйгатыны выре, лэся, монэ Буй. – Мон Буй ќвќл…

– Кин тон? – интыысьтым вырњыны турттћсько, нош кин ке монэ султыны ќз лэзьы, кылльы на, шуиз. Таиз мукет муртлэн куараез вал.

– Мон тыныд юрттыны ќй быгаты, Света. Мон тыллэсь туж кышкасько…

– Тон Буй ќвќл? Соку кин тон? – синъёсаз учкыны турттћсько, но адњыны уг быгатћськы. Џын мынэсьтым синъёме бусомытэм.

– Ке мон… Света…

Та кылъёсты кылыса, нош ик йырсазьме ыштћськем.
6

«Малы монэ Ке пќяз, ассэ Буй карыса?», – тазьы малпаны гинэ вуи, Ке куаразэ сётћз ни:

– Мон тыныд синмаськи…

– Мынам тонэ кылэме уг поты! – соку ик пумитаз кеськи, нош синъёсы номыр уг адњо. Котырак пеймыт. Оло, мон сукыр кыли? Мар вераны-юаны уг тодћськы. Ке но куаразэ уг потты ни. Вќзам-а со, уг шќдћськы. Маке сярысь малпаны ик кышкасько. Ке вань малпанъёсме «лыдњыны» быгатэ угось. Кќня ке улыса, чиданэ быриз.

– Ке… – кален гинэ вазиськи.

– Мар вералод, Света?

– Малы чалмыт сылћськод?

– Тынад монэ кылзэмед уг поты. Ачид озьы верад.

– Ачим… – гуньдэм кадь луи, зэмзэ но кылэме уг поты шуыса верай. Малы мон озьы вырисько? Аслэсьтым ачим возьдаськеменым, ымныры ик џыжектћз кадь. Ке сое шќдћз меда? Кытын мон кыллисько? Малы нокинэ уг адњиськы?

… Ки бордам кин ке йќтскиз. Куаляк луи.

– Эн кышка, Светлана, – соку ик вазись луиз. Тодмотэм нылмурт куара.

– Кин тон? – ќй чида юатэк.

– Мон тынад эмъясь врачед – Людмила Сергеевна…

– Кытын Ке?

– Кыџе Ке? Кин со? – паймиз, лэся, эмъясь.– Татын нокин ќвќл.

Мон, иське, Кеез вќтаса адњиськем. Нош вќт – со шараятэк кельтэм малпанъёсты адњон, дыр. Валантэм: Ке мыным зэмзэ но синмаськиз вал меда? Вќтэ гинэ озьы мыным возьматћз-а?

Буйлэн нимызлэсь кызьы кылдэмзэ тодыны мыным Ке юрттћз-а яке ачим-а валатски, та юанъёсылы валэктонъёс уг шедьтћськы. Буйлэн вордћськем палъёсаз вуэмме тодћсько на, нош собере мар вал – йырысьтым копак тќлњемын. Аслым паймисько, монэным тазьы ќз луылы на.

– Светлана, кызьы кќлћд? – либытак юаз врач. Мон мар шуыны уг тодћськы. Кожалод, воксё ќй кќл, Кеен уйбыт вераськыса улћ. Докторлы сое шараяме уг поты.

– Малы уд вазиськы, Светлана?

– Людмила Сергеевна… – тодам вайи врачлэсь нимтулзэ. – Малы мон номыр уг адњиськы?

– Тынад синъёсад – повязка. Профессор Мулдашев валян тыныд операция лэсьтћз, – валэктыны ќдъяз эмъясь. – Кќня ке нунал тыныд повязкаен кыллёно луоз.

– Мон адњо на-а? – кышкатскемме ќй ваты.

– Одно ик, Светлана… Мулдашев сярысь кылэмед ќвќл-а?

– Уфаысь Эрнст Мулдашев, оло, со?

– Бен, бен! – тодмамелы шумпотћз, лэся, Людмила Сергеевна. – Дано профессорез татчы ќтёно луим. Синъёсыд тынад тылпуын сутскыны кутскиллям вылэм… Операция умой ортчиз. Тон азьло сямен ик адњод.

Эрнст Мулдашевлэсь кык книгазэ лыдњеме вань. Паймымон тодосчи – олокытчы но ветлэ, оломае но адње, син висёнъёсты но эмъя, книга гожъяны но вутске. Книгаосысьтыз куд-ог малпанъёссэ уг валаськы. Огшоры гинэ гожтэмын кадь, нош йырам уг тэро. Инмаръёслэн карзы, пе, вылэм. Кытын, кызьы, малы – олокыџе юанъёс кылдо. Ваньмыз со выжыкыл ќвќл меда?

…Нуналлэсь но уйлэсь вуэмзэс уг валаськы. Дыр но кема кыстћське. Сукыр адямиос кызьы уло меда? Кќня чидан кулэ!

Тани нош ик Людмила Сергеевна вќзам лыктћз. Огназ ќвќл, лэся, кинэн ке вераське.

– Светлана, њечбур.

– Њечбуресь, Людмила Сергеевна.

– Туннэ повязкадэ куштом…

Та кылъёсты кылыса, сюлмы џемгес йыггетыны ќдъяз кадь. Пушкам кыџе ке кышкан но вань, вќзаз ик шумпотон но возиське.

Йырысьтым бинетсэ басьтћзы. Нош мон синъёсме усьтыны уг дћсьтћськы.

– Светлана, учкы мон шоры, – вазиськиз врач. Синъёсме кален гинэ усьтћ но соку ик Кеез синйылтћ.

– Уллялэ сое! Уллялэ! – кесяськыны кутскемме валаса но ќй вутты. – Кошкы татысь, Ке! Тонэ адњеме уг поты!

Людмила Сергеевна монэ буйгатыны ќдъяз, мон ымнырме шобрет улэ донги. Кќня ке улыса, палатаын шыпыт луиз. Эмъясь мыным либытак гинэ вазиськиз:

– Светлана, татын, мон сяна, нокин ќвќл ни. Возьматы ымнырдэ…

Врачлэсь кылзћськытэк ќйлась, шобретме палэнтћ. Син азям йќтћзы тумбочка вылысь џыж-горд сяськаос.

– Пионъёс? – паймыса учки Людмила Сергеевна шоры.

– Тыныд со…

– Кин вайиз? – ќй чида юатэк.

– Буй, – шуиз но шорам учкиз врач. – Татын Ке ќй вал. Тани Буй Ошмесовлэн паспортэз, – документэз мыным усьтыса возьматћз.

– Буй татын? – малы ке но сюлмы уг оскы, нош ик Ке уг пќяськы меда шуыса малпаськисько.

– Сое татчы ќтём-а? – врачлэн юамезлы мон соглаш кариськемме йырме выретыса возьматћ…

Буй шорам пальпотыса учке:

– Њечбур, Света. Асьмеос нош ик пумиським.

– Кызьы тодћд мынэсьтым татын кыллемме?

– Сюлмы вераз, – Буй мыным матэгес кариськиз.

– Мон адњи тынэсьтыд вордћськем интыдэ, – шуи но мукет номыр вераны уг тодћськы. Буйлэсь ваземзэ витисько.

– Мон ваньзэ тодћсько ни, Света.

– Ке вераз? – егит пилэн синъёсаз меџак учкисько.

– Кыџе Ке? Мар тон вераськиськод?

Та кылъёсты кылыса, бакомем кадь луи. «Оло мон визьтэммисько? Иж шур дуртћ кинэн ветлћ? Кыџе ке ведћн монэ ќз нуллы меда? Осто, инмаре, эн кушты монэ. Буйлэн «нокыџе «ке» уз люкеты асьмелы» шуэмез йырам туж пыдло пыџамен-а, мар-а мон азе олокыџе адњонъёс-син пќетъёс кылдћзы?»

– Света, мар чалмид? – Буйлэн ваземез малпаськонме куспетћ кариз. «Ке монэ пќяз» шуыны турттћсько вал, но ќй дћсьты, Буй уз вала.

– Буй, кытысь тон та вакытэ пионъёс шедьтћд? – вераськонэз мукет ќре выжтон понна юай мон. Егит пи пальпотћз. Солэн пальпотонэз сыџе шуныт – соку ик ымнырам вуэ: шораз мыньпотыса учкисько ни.

– Утчась мурт шедьтэ, – шуиз но, тумбочкаысь сяськаосты басьтыса, мыным мычиз, зынъяны куриз.

– Йырез поромытћсь ческыт зынзы, – мукет номыр вераны ќй тоды ни…

* * *
Туннэ мон больницаысь потћсько. Палаталэн ќс дорысеныз монэ Буй пумитаз. Нош ик пион сяськаосын. Одћг букетсэ со Людмила Сергеевналы кузьмаз, кыкетћзэ – мыным. Собере Буй монэ љип-љип њыгыртћз.

– Њечкыласько тонэ, Света, тон зэмос герой вылэмед. Љуась гидысь кунянъёсты утемед сярысь газетэ но гожтћллям.

– Кыџе газетэ? Уд пќяськиськы-а?

– «Удмурт дунне»-е гожтћллям, – кисыысьтыз газет поттћз Буй.

– Мон доры, палатае, кыџе ке гит кышномурт ветлћз вал. Маке но юалляськиз. Газетысь со шуыса чик ќй вала.

Больницаысь Буен џош потћмы. Учкисько но – тубат вылын Ке сылэ.

– Ке? – куаляк луи. Буй нырысь ик шорам, собере Ке шоры учкиз.

– Со Ке?! Кин со сыџе? – Буй матэктћз Ке вќзы. – Мар тыныд кулэ? Малы мон кадь ик дћсяськид? Малы Светалы улыны люкетћськод?

Ке номыр уг вазьы, пальпотыса сылэ.

– Тон серекъяны выриськод?! – вожез потћз, лэся, Буйлэн, Кеез донгыса лэзиз, ачиз ќжыт гинэ ќз погра.

– Пушкысьтыд мон потэмын. Коть оскы, коть эн – мон тынад вераськон сямысьтыд улњемын. Огдырлы гинэ тынэсьтыд палэнски… – Ке эшшо маке вераны турттэ вал, Буй ќз чида: тодмотэм муртлэн пельпумаз мыжгиз. Ке нокыџе ќз кариськы, нош Буй одћг киыныз пельпум бордаз кутскиз. Со вќсь луиз угось.

– Солы мыжгеме аслым вуиз. Мар со сыџе? – шорам паймыса учке Буй., мон но синъёсме шорысьтыз воштыны уг быгатћськы. Кќня ке секунд гинэ ортчиз – Ке ќвќл ни. Чиптэм-чаптэм ышиз. Кытчы пыриз, омыре-а сылмиз? Уг валаськы. Буй но паймемзэ уг ваты – таџезэ адњемез вылымтэ на.

– Ке пушкам пыриз, – оло юаз, оло вераз со, Келэсь верамзэ тодаз вайыса.

– Буй, тон университетысен мыным мар шуид вал?

– Уг тодћськы ни, – Буй зэмзэ но вунэтэм, вылды, верам кылъёссэ.

– Асьмелэн пумиськонмылы нокыџе «ке» уз люкеты, шуид вал тон.

– А-а, – ортчемзэ тодаз вайиз Буй, гор-гор серекъяны кутскиз. Мон но серемме кутыны ќй быгаты ни. Со вакытэ вќзамы анаен атае матэктћзы. Серекъяммес адњыса, соослэн мылкыдзы каньылак луиз кадь. Мќзмытэсь ымныръёстћзы пальпотћсь тылсиос ортчизы…

– Вертолётмы ке луысал! – таџе малпанме шара вераллямелы ачим но дыши ни кадь. Нылпиосмы будозы. Кытын соосты дышетом? Матысез школа ог кызь иськемын. Сюрес отчы ќвќл. Буйлэн нюлэскын улыны џектэмезлы нырысь туж пумитъяськи вал. Кќня бќрдћ! Анаен атае но жаль потћзы. Адямилэсь пќртэмесь-а, мар-а луыны турттћськоды шуыса пыкылэмзы али но пель сьќрам кылћське.

Ваньмызлы дышоно вылэм. Нюлэс – мынам доре. со сюдэ но, шунтэ но, тазалыкмес утьыны но юрттэ. Зэм, куддыр љож мылкыд кылдэ. Тани али но пиелы нокыџе турын-куар уг юртты. Эмъясьёслы оскон гинэ кылиз на…

Куинетћ нылпиме вордэме бере мон тодам вайи азьпал улонме адњемме. Ваньмыз син азям пуксиз: зќклэсь но зќк тыпы но, со пушкы пырон но, пеймытэтћ кытчы ке лобон но, кыдёкысь чибори суредэз адњон но, Ке но, Лќпшо Педунь но, Пумпус но… Кызьы тыпы пушкысь потћ, соиз мыным валантэм кылиз. Келэсь кытысь, малы вуэмзэ но та дырозь уг тодћськы. Оло, Буйлэн лулыз, ассэ Ке шуыса, мон доры ветлћз? Адями вќтаку, лулыз солэн лоба, пе. Озьы меда? Кин ке мыным ваньзэ мед валэктысал.

Пель сьќрам кыџе ке тодмотэм бадњым куара кылћськыны кутскиз. Со пумен кужмоя. Коркамы ик зурканы ќдъяз ни. Изись нылъёсы кышкатскыса сайказы. Висись пие синъёссэ усьтћз но шорам паймыса учке. Коркась бызьыса потћ. Инме учки но – вадьсамы ик вертолёт. Одћг интыяз ошиськыса сямен улэ, васькыны уг дћсьты, кожалод. Тани со коркамы вќзысь нюлэс куше лэзиськы кутскиз. Мар вертолёт со? Пичигес гинэ. Интыыысьтым вырњыны уг дћсьтћськы. Пичи нылъёсы коркась потыса вќзам султћзы. Вертолётысь кин ке васькиз – бызьыса ми пала лыктыны ќдъяз.

– Атай! – кеськиз Лена нылы, Буйэз тодмаса. «Осто, инмаре, – ас поннам сипыртћ, – Буй кылэм мынэсьтым куараме».

– Александр кылле? – вќзам матэктэм бераз ик юаз Буй. – Сое больницае нуоно!

Пимес љогак дћсяса, вертолётэ пуктћмы.