Астана. 3 қазан. ҚазАқпарат /Гүлмира Алякпарова/ Өткен сенбі күні Астанадағы С

Қазылар алқасының төрағасы, оқу орнының тәрбие жұмыстары және әлеуметтік мәселелер жөніндегі проректоры Александр Майердің айтуынша, «Алғашқы студенттік күз» байқауы университет қабырғасында осымен 14-ші жыл қатарынан өткізіліп келеді. Байқаудың басты мақсаты - 1 курс студенттерін бір-бірімен етене таныстыру, олардың арасынан белсенді де таланттыларды анықтап, ынталандыру.

Байқау әр жылы әртүрлі тақырып аясында өтеді. Биыл студенттер концерттік бағдарламаларын Қазақстан Тәуелсіздігінің 20 жылдық мерейтойына арнады. Үш күнге созылған өнер додасына 8 факультет қатысты. Оқу орнының табалдырығын жаңа аттаған жастарға концерттік нөмірлерді жоғары деңгейде әзірлеуге қалыптасқан дәстүр бойынша жоғары курс студенттері мен факультеттер жетекшілері көмектесті. Нәтижесінде көрермендер мен қазылар назарына ұлттық рухқа, ұлттар арасындағы достық пен Отанға деген патриоттық сезімдерге толы концерттік бағдарламалар ұсынылды.

Ұлттық аспаптар ансамбльдері «Ерке сылқым», «Балбырауын», «Түркімен», «Әке толғауы», «Адай» күйлерін күмбірлете орындап, Туған елге ыстық сезімдерді оятатын «Атамекен», «Қазақ елі», «Сарыарқа», «Астана - махаббатым менің» әндерін шалқытты. Бірінші курс студенттердің арасында көркем сөздің шеберлері, қаламды жандарына серік еткендері де аз болмай шықты. Олар авторлық және танымал ақындардың өлеңдерін оқып, 55 жылдығын атап өткелі отырған аграрлық университетке арнауларын жолдады.  «Көңілділер мен тапқырлар» ұтқыр әрі ұтымды қалжыңдармен көрермендерді күлкіге бөлесе, «таңғалдыру жанрында» театрландырылған қойылымдарды, заманауи би үлгілерін, ерекше пластикалық икемділіктері мен гимнастикалық өнерлерін ортаға салды.

Биылғы байқаудың ерекшелігі «Алақай! Мен ҚазАТУ студентімін!» атты бейнероликтер сайысының енгізілуі. Яғни студенттер университеттегі алғашқы күндерден алған әсерлері туралы үш минуттық фильм түсіруі керек болды. Бұл байқауда компьютерлік жүйелер және кәсіптік білім беру факультетіне тең келгендер болмады.

Бағалау кезінде әділқазылар алқасы сонымен қатар, концерттік бағдарламаның ұйымдастырылуы мен сапасын да назарға алды.