Галина семёнова русь дорысен Россиозь

Таиз ар Россилэн историезлы сӥземын. Таин валче шаерамы трос ужрадъёс ортчо. «Русь дорысен Россиозь» нимаське Национальной библиотекаын ужасьёслэн дасям адӟытонзы. Со сӥземын Россилэн кунлык басьтэмез дырысен 1150 ар тырмонлы, усьтӥськиз Некрасов нимо библиотекаын. Национальной библиотекаысь общественной но естественной наукаосъя отделэн кивалтӥсь Валентина Мальцева верамъя, та адӟытонэз дасякузы, соос кунмылэсь историзэ котыр ласянь возьматыны выризы.

История калыкез котьку тунсыкъятӥз, но тросэз сое уг тодо яке уггес валало. Куд-огезлэн одно ик юанэз кылдоз, мар вал сюрс 150 ар талэсь азьло. Кытысь потӥз та лыдпус? Уго 862-тӥ арын луэм учырез нырысь сокем ик ӧз сактэ. Нош азьланяз со дуннелэсь историзэ воштӥз. Историографиын та учырез «варягъёсты ӧтён» шуо. Вакчияк верано ке, шундыӝужан славянъёс но фин-угор калыкъёс куспазы тэрытэк улӥзы. Ваче ожмаськонъёслэсь жадьыса, соос кенешизы: та калыкъёсын кивалтыны но зэмлыкез чакланы кулэ палэнысь мурт. Озьы асьсэлы эксэе ӧтизы Рюрик князез. Та адями бордысен кутскиз ӟуч история.

Адӟытон вашкала Русь бордысен кутске но тупен-тупен маде ӟуч историлэн тужгес бадӟым вакытъёсыз сярысь. Кылсярысь, бигер-монголъёслэн зӥбетсы улэ пачкамез, Совето Союзлэсь кылдэмзэ но куашкамзэ, туала Россилэсь улэмзэ. Трос егитъёс, школаын ды-шетскисьёс. Ижысь 22-тӥ лицейысь нылъёсты нокин но татчы кужмысь ӧз ысты. Катя Романова, Варя Паксютова но Аня Актыбаева та выллем адӟытонъёсы одно ик вуылыны тыршо.