Пислэг сьӧры Фэнтези Нырысетӥ глава Атай öз берты

Фэнтези

Натӥ урокъёслэсь быремзэс гинэ возьмаса улэ, одӥг пыдыныз дораз ни. Атаез туннэ командировкаысь бертэ. Со бадӟым машинаен ужа, пöртэм городъёсы вуылэ, отысь олокыӵе но вузъёс вайылэ. Вуоно бертэмаз Натӥлы телефон басьто шуиз. Люда эшезлэн кадь: отын фотокамераез но, радиоез но луоз.

Нылаш вень йылын кадь пуке. Гырлы уг жингырты. Натӥ ассэ буйгатыны но выре: урок пумтэм-йылтэм öвöл ук, быроз. Но тани кема витем куара дзинь-дзинь! чузъяськиз.

Натӥ классысь пиослэсь но азьпал донгаськыса ик потӥз. Люда эшсэ но öз возьма, пумен сутоз ай, малпаз. Нош соиз бöрсяз кесяське ни:

— Натӥ, кытчы лобатӥд?

— Ойдо ӝоггес! Атай мыным телефон басьтӥз.

Эшсэ Натӥ возьмано ик уг кожа, уката ӝоггес вамыштэ. «Телефон» шуэмез кылыса, Люда нюшмылёк сямзэ соку ик вунэтӥз, син куспын эшсэ сутӥз.

— Телефон? Мынам кадьзэ ик-а басьтӥз? — ёртэ эшсэ.

— Öвöл, атай мыным Москваысь ваёз.

— Мар-о, тон сое öд адӟылы на-а? — Людалэн ваньзэ тодэмез потэ.

— Öй, конешно, атай туннэ гинэ командировкаысь бертэ. Али дорын ни, дыр. Ойдо ӝоггес, — дыртытэ Натӥ.

Урам кузя нылъёс бызьыса сямен тубизы. Уй ӵоже усем лымыез сюрес вылысь трактор донгем ни. Ӵукна нош лымы пельтэм интыостӥ школае гуштылыса-гуштылыса мынӥзы. Вамышъяны каньыл, кезьыт гинэ бамъёсты чепылля, но нылъёс толлэсь лекъяськемзэ уг ик шöдо кадь.

Натӥлэн коркаез пролкаын, соин ик атаезлэсь машиназэ кыдёкысен адӟыны уг луы. Кожонэ вуизы но, кыкназы ик тыпак дугдӥзы. Капка азьын нокыӵе машина öвöл.

— Öз ву на, дыр, — ӝож мылкыдзэ вормытэк, Натӥ эшсэ дораз öз но öтьы ни. Люда но мултэс юанъёс öз сётъя, зӥрак берытскиз но дор палаз бызьыса кошкиз.

Атайзэ возьманъяз, Натӥ ӵуказе урокъёслы дасяськон сярысь ик вунэтӥз. Укное учкылон гинэ йыраз. Анаез корка пырыку гинэ, ваньмыз шуак тодаз лыктӥз: курегъёсты сюдон но, мунчое ву нуллон но.

«Кызьы вунэтӥськем?» — аслыз пайме Натӥ. Атаез командировкаысь котькуд бертонэзлы мунчо эстыны куре ук.

Анаез туж жадьыса, лэся, вуэм. Магазинын али огназ ужа. Ӵукна тямыс часысен ӝытазе сизьым часозь. Доразы ӵемысь керӟег луыса вуэ. Басьяськисьёс котькыӵеез вань ук. Куд-огез керетон гинэ утчало: я соиз товар соослы уг яра, я таиз. Соос валлин анаез йыркурзэ Натӥ вылэ но погыльтэ. Тышкаськон муг кема-а, мар-а шедьтыны.

Нош туннэ паймымон кадь: анаез, номыр юатэк-маратэк, кылиськиз но сиськытэк диван вылэ выдӥз. Шобретсэ йыр вылаз ик кыскиз. Натӥ капчияк лулскиз. Курегъёс доры ӝогак потӥз. Ву но нуллӥз.

Корка пырыкуз, анаез азьло сямен ик кылле на вал. Мунчоез нылашлэн эстылэмез öвöл, солы пичигес ведраосын ву нуллыны гинэ оско ай.

«Атайлэсь бертонзэ тодэ ук, малы анай уг султы, мунчо уг эсты?» — пайме нылаш. Нош анаез, мышкин выдыса, вырӟылытэк кылле.

Ма карыны паймыса, Натӥ ӵуказе урокъёслы дасяськыны пуксиз. Лыдӟиськон куспаз дырын-дырын машина куараез кылэ, сак кариське: öвöл, таиз но палэнэтӥ ортчиз, соос доры öз кожы.

Мунчо но нылашлы маза уг сёты. Ку эстозы на? Чидатскиз-чидатскиз но анайзэ сайкатоно кариськиз:

— Анай, султы ни, мунчо эстоно.

Нош анаез йырзэ но öз ӝуты. Натӥ пала öз но берытскы, куаразэ мырдэм поттыса кадь шуиз:

— Мунчо ум эстэ.

— Атай вуоз ук, — нылашлэн бöрдонэз ым дураз ни.

— Уз вуы. Тон но, урокъёстэ дасяд ке, выдыса изь.

— Нош атай ку-о вуоз? — нош но нош тэбине Натӥ.

— Уг тодӥськы, — мултэс юанъёс медаз ни луэ шуыса кадь, лек вазиз Нина Петровна.
Кыкетӥ глава

Песяйлэн мадемез

Туннэ арнянунал, школае мыноно öвöл. Изь, кöня мылыд потэ. Натӥ но изьысал на, дыр, но вераськем куараослэсь сайказ. Гуразьпалан анаез кинэн ке лабыртэ. Ма, песянаез лыктэм ук! Пыжиськемъёссэ вайиз, дыр. Мусо песяез ноку буш ки уг лыкты.

Натӥ назьыльскиз, синъёссэ посӥз но небыт шобрет улысь пыдъёссэ выж вылэ лэзиз: султоно! Но мар со сыӵе? Кин ке нырзэ кыска, викышъя. Анаез. Анаез бöрдэ. Натӥ кышкатскиз. Вырӟылытэк пуке.

— Кытысь мон тодӥсько, кытын со. Толон жингыртӥз: машинае, пе, тӥяськиз. Ку тупатозы — уг тоды, — викышъям пыр кадь кылӥське гуразьпалась. — Анай, мон солы уг оскиськы ни. Кылемаз но командировкае кошкисько шуиз, нош адямиос сое ёрос центрысь кышномуртэн адӟылӥллям: магазинысь, пе, аракы басьтыса кошкизы.

— Я, тон олокинлэн но верамъёсызлы эн оскы, öжыт-а, мар-а кыл вöлдӥсьёс, — вазе пумитаз песянаез.

— Тани пук тазьы шузимыса: оло зэм но машинаез тӥяськиз, оло кин ке дорын улэ шунтӥськыса. Тодӥськод ук сямзэ.

— Ой, оскем уг поты вал. Я, дырызлэсь вазь эн керӟегъяськы ай. Ачим тани воршудмылэсь курисько. Уз кушты Пислэг выжымы. Мар-о, Натӥ изе на-а, кокрокъёсы сӥялозы ни. Ветло ай, учко, — Марьяпай, нуноксэ сайкатонтэм вылысь, чалмыт гинэ лыктыны тырше.

Нош Натӥ, шуак луэменыз, шобрет улаз чулькак зымыны öз вуы но, песяез азьын, али гинэ сайкамзэ возьматыса, синъёссэ зыраны, назьылляськыны кутскиз.

— Натӥ, ма, тон сайкам ни ук, ойдо султы, мон тыныд яратоно кокрокъёстэ пыжыса вайи.

— Улмоен-а? — лöптӥз Натӥ.

— Ойдо султы но адӟод.

Натӥ халатсэ вылаз куштӥз но мисьтаськон доры гуразьпала мыныны уг дырты. Тодэ: анаез гордэктэм синъёссэ ватыны тыршоз яке со пумысен маке вераны тыршоз. Сугон сузяй, я жаг пыриз, шуоз. Со Натӥзэ ялан пичи кожа на, лэся: номыре валасьтэм, синтэм.

«Анай, мыным тямыс арес ни, мон будӥ ни, мон троссэ адӟисько-валасько. Малы мынэсьтым ваньзэ таныны турттӥськоды?» — анаез пумитэ кеськемез потэ Натӥлэн.

Озьы ик вань, Натӥ гуразьпала вуиз гинэ, анаез дӥсяськыны кутскиз. Курегъёс доры, пе, потало.

Огназы кылем бере Натӥ песяезлэсь юатэк öз чида:

— Песяй, мон умйылтӥм маке пислэг сярысь верамдэ кылӥ. Садысь бурдоослы тупатэм кормушкаме адӟид-а? Али, кезьыт дыръя, пислэгъёс отчы ӵем пуксьыло. Мон тысь но тырыса уг вуттӥськы.

Натӥлэн, валамон, атаез сярысь юаськемез потэ вал, но öз дӥсьты. Тодэ ук: бадӟымъёс солэсь троссэ ватыны тыршо. Собере песяез азьын но али гинэ султӥ, номыре öй кылы шуыса пöяськыны выриз ук.

— Утялты, нылы, пислэгъёсты, утялты, тысьтэ но эн жаля. Соос бордысь асьмелэн воршуд ниммы кылдэмын. Монэ тани Пислэг Марья шуо. Зэм, али воршудзыя уг верасько ни, фамилизэс верало, — нунокезлы лад-лад валэктэ Марьяпай.

— Нош мар-о со воршуд? Асьмеос пислэгъёслэсь-а, мар-а кылдэмын?

— Ой, нылы, мон ваньзэ радызъя вераны уг быгаты ни, дыр. Вашкалазэ вунэтӥськом. Аслам анаелэсь верамзэ гинэ тодӥсько. Со котькуд ӵукна, азбаре потыса, шунды пала кариськыса, шыпыр-шыпыр гинэ воршудэзлэсь куриськоз вал.

— Песяй, воршуд — со Инмар-а? — юам вылысь юа Натӥ.

— Азьвыл, туж-туж вашкала дыръя, адямиос инкуазь кужымъёслэсь пумтэм кышкало вылэм: гудырилэсь, сильтöллэсь, бадӟым вулэсь. Соин ик инкуазьлы вöсяськизы. Анаймылэн дэмдорез но вал.

— Маиз, маиз? — нырысьсэ со кылэз кылыса, öз вала Натӥ.

— Дэмдорез, шуисько. Сое киросэз сямен чыртые ошыса нулло вылэм, — нунокезлэн тунсыкъяськемезлы шумпотэ Марьяпай. — Но анае дэмдорзэ чыртыяз öз нуллы, пичи гинэ пу шыкысаз ватыса возиз. Милемыз матаз но ветлыны öз лэзьылы, ӵашъёз шуыса кышкатылӥз.

— Тон сое адӟылӥд-а?

— Мон но тон кадь ваньзэ тодыны турттӥсь вылӥськем, лэся. Одӥг пол, дорын нокин öвöлтэм дыръя, кышкаса ке но, со шыкысэз усьтӥ. Отын горд пильыс басма вылын со кылле: котырес, ыргонлэсь, бадӟым ик öвöл. Одӥг палаз бурдъёссэ вöлъям тылобурдо пуктэмын, нош мукет палаз — кыӵе ке пусъёс. Озьы гинэ тодӥсько на.

— Нош али со кытын? Песяй, мыным возьматод-а?

— Анай кулэм бере кытысь гинэ со шыкысэз öм утчалэ, нокытысь öз сюры ни. Нош солэн, анай верамъя, туж бадӟым кужымез вал. Котькыӵе шуге-леке мед сюрод, солы вазиськыса куриськиськод ке — одно юрттэ. Соин ик анай сое синчеберез кадь утьыса возиз. Нош ми öм быгатэ. Ма быдӟа ыштон, ма быдӟа сьöлык... — чигиське Марьяпай.

— Мар-о, выжыкылысь синпöртмась боды выллем-а со дэмдор?

— Соин-а, мар-а ӵошатод ни, нылы. Сьöлыкъёсмы понна, воршудмес вунэтэммы понна, дыр, вашкалаосмы асьмелэсь дэмдормес басьтӥзы. Йылолъёсмес вунэтӥм, сямъёсмес ум чаклаське. Воршудмес но мукет инмаръёсын воштӥм, — öпкеле Марьяпай.

— Нокытысь-нокытысь но сое шедьтыны уз лу ни-а? — песяезлэн кылъёсызлы Натӥлэн оскемез уг поты.

— Вашкалаосмы сое асьмелэсь ватӥзы, нылы, — озьы шуыса, Марьяпай синпумзэ кышетэныз амалтэк ӵушалтӥз.

— Нош… — Натӥ песяезлы юанзэ сётыса öз вутты, корказьын анаезлэн йыг-дым каремез, кесяськемез кылӥськиз.

Öс усьтӥськиз но, куараез корка тыр чузъяськиз:

— Ма, мар ишан та? Кин озьы öч каре? Нош ик ведраостэк кылим. Натӥ, тон-а, мар-а мунчое ву нуллӥд? Кин косӥз? Куддыръя тышкаськыса косӥськод — уд вырӟиськы. Кытын тон? Али йырситӥд кыскало ай, — дугдыны уг вала анаез.

— Остэ, Нина, я мар-о луиз, мар-о сокем кушетскид? — нылызлэсь пыртэм ведразэ берыкъя Марьяпай. — О-о, пыдэссэ поттэм. Мунчое вудэс кельтӥды-а, мар-а? Али гужем öвöл ук, кырын — толсур, кылем уй кызь вить градус кезьыт возьматӥз.

Натӥ шокчыны но уг дӥсьты. Али солэн йыраз одӥг малпан: кызьы анаезлэн ки улысьтыз пегӟоно. Дыр ортчоз — мумиз буйгалоз. Нош йырыз кур дыръя ки улаз эн ик сюры: чабкоз но, маин ке шуккоз но, нылызлэсь йырсизэ но уз жаля.

— Мон атай бертоз шуса ву нуллӥ вал, нош тон мунчоез öд эсты, — Натӥ, озьы вераса, пальтозэ ошетысь кыскиз но коркась бызьыса потӥз.

— Бертоз, возьмаса пук солэсь бертэмзэ, эшшо тон йырез кур кариськод на, — бöрсяз кесяськыса кылиз анаез.
Куинетӥ глава

Пислэген тодматскон

Кыре потэм бераз гинэ Натӥлэн бöрдонэз пöсьтӥз. «Мон юри, öчкарыса озьы öй лэсьты ук. Атай, тонэ возьмаса ву нуллӥ, — öпкеле Натӥ. — Тон дыраз бертысал ке, мыным но кыл кылоно öй луысал, ведраос но быдэс кыльысалзы. Улэ кыкнады ченгешыса-керетыса, мон кошко тӥ дорысь. Мон ке öй луы ни, жалялоды ай, бöрдоды…»

Озьы малпаськыса-нискетыса мынон сяменыз Натӥ ачиз но öз вала мур лымыетӥ вамышъямзэ. Пальто кисыяз кылем тысьёссэ чиньыосыныз посэ. Пыдъёсыз сое чияпу вылэ ошем кормушка доры нуо вылэм. Нылашлэсь матэктэмзэ шöдыса, пислэгъёс отысь лобӟизы, одӥгез гинэ вöзысь улмопулэн вылӥ вай вылаз пуксиз.

— Пислэге, ӵуж гаде, малы мынэсьтым пегӟиськод? — вай вылын пукисезлы вазиськиз Натӥ. — Тани мон тыныд нош ик тысь вайи. Песянай шуэмъя, асьмеос тонэн одӥг воршудысь. Яке со мукет сяменгес шуиз вал-а? Котькызьы ке но, асьмеос тонэн одӥг выжыысь, вашкала ӵыжы-выжыосмы тонэ данъяло вылэм. Я, Пислэге, чаль дорам матэгес, оло, асьмеос но эшъяськом.

Пислэг вай вылын вырӟылытэк пукиз, Натӥлэсь верамзэ туж сак кылзӥз кадь. Собере шуак вырӟиз но, уллань лэзиськыса, нош ик выллань ӝутскиз. Натӥ сокем мöзмыт учкиз, — пислэг, нылашез жаляса кадь, кормушка вылэ пуксиз. Тысез öз ик адӟы, Натӥ вылысь синъёссэ уг вошъя.

— Натӥ, — малпамтэ шорысь тодмотэм векчи куара чузъяськиз. Нылаш сопала, тапала учкиз — нокин öвöл.

— Натӥ, мон со, Пислэг, тыныд вази. Адӟисько, мынэсьтым маке юамед потэ.

Нылаш Пислэг шоры учке но синъёсызлы уг оскы. Зэм ик-а соин тылобурдо вераське?

— Эн паймы, Натӥ. Мон со, Пислэг, тонэн вераськисько.

— Пислэге, ӵуж гаде, тон зэм но вераськыны быгатӥськод ке, мынам тыныд — таӵе куронэ, — Пислэг лобӟоз, ышоз шуыса кышкаменыз, Натӥ куронзэ ӝог вераны тырше. — Пислэг воршудмылэн дэмдорез вылэм. Песянай верамъя, отын тылобурдо, пе, суредамын вал. Со семьямылы, ӵыжы-выжыосмылы туж юрттэ вылэм. Но сое ыштӥллям, соин, дыр, анаен атае куспазы керетыса уло, мон шоры но черекъяло. Пислэге, оло, тон тодӥськод, кытысь со дэмдорез шедьтоно?

— Ыштӥллям бере, шедьтыны уз луы ни, — вазиз Пислэг. Натӥлэн синъёсыз эшшо но мöзмытэсьгес луизы. Но Пислэг веранзэ азьланьтӥз: — Вашкала ӵыжы-выжыосмы дорысь гинэ со сюроз на.

— Иське, ми со дэмдорез нокытысь ум шедьтэ ни?

— Мон озьы öй шуы ук. Вашкалаосмы дорысь шедьтом, — туж оскытыса кадь вера Пислэг. — Шуг-секытъёслэсь уд кышкаськы ке, асьмеос доразы вуылыны быгатом.

— Нош кызьы асьмеос вашкалае берытском, со адямиос öвöл ни ук? — Натӥез Пислэг юри иса кадь потэ нылашлы.

— Малы уз луэ? Кытчы-о соос пырозы? Дунне вылын номыр но чиптэм-чаптэм уг быры. Зэм, тон али соосты уд адӟиськы, но монэн ӵош дунне вöлмытлыклэн мукет сӥяз потӥд ке, соосын монэн сямен ик вераськод, — паймытэм вылысь паймытэ Пислэг.

— Ой, мон соглаш, Пислэге, — нылаш нырысьсэ пальпотӥз. — Вера гинэ ма карыны.

— Нырысь ик, мон тонэ ачим кадь ик пислэг каро. Озьытэк асьмеос вашкалае потыны ум быгатэ. Отчы кема лобоно, — валэктэ ӵуж гадь. — Нош ми, пислэгъёс, туж ӝог лобаны быгатӥськом. Кужыммес но трос ум быдтӥське. Адӟылэмед вань ке, бурдъёсынымы шер-шер гинэ шонаськом, озьы кужыммес шыръяськом.

— Ой, мынам ноку но лобаме öй вал на, — Натӥ уката лöптэ.

— Вашкалае вуим ке, тон ас тусад выльысь берытскод, адями луод. Мынам пöртмаськон кужыме соку быроз. Мар возьма отын асьмеды, кыӵе со дунне, мон уг тодӥськы. Соин ик, малпасько, капчи уз луы. Оло, малпанэдлэсь куштӥськод? — Пислэг табере нылашез кышкатыны выре ни. Натӥ озьы малпа. — Берпуметӥзэ юасько: тон соглаш-а, уд курдаськы-а? — пумпус пуктыны курыса кадь юа Пислэг.

Натӥ нырысьсэ куалектӥз: нош анаез, атаез, песянаез, Люда эшез? Соосты со выльысь адӟоз на-а? Кышкатскемзэ шöдыса кадь Пислэг будэтӥз:

— Натӥ, тон али ик анаед, атаед, песянаед доры берытскыны быгатӥськод. Корка дорозяд — сю вамыш но öвöл. Тӥни анаед тонэ утча ни.

— Натӥ, пыр ни, кытын тон? Ой, синазькыль нылпи, атай мылес. Атаед кадь пегаса ветлыны малпаськод-а? — кесяське анаез корказьысен.

— Мон соглаш, Пислэге. Ӝоггес, ӝоггес вашкалае, — анаезлэсь тышкаськон кылъёссэ кылыса, нылаш берытскон сярысь öз ик малпа ни.
Ньылетӥ глава

Натӥ — тылобурдо

Натӥ валаса но öз вутты: пальтоез, гын сапегъёсыз ышизы, киосыз интые бурдъёс кылдӥзы. Вакчияк вераса, син куспын Натӥ тылобурдолы пöрмиз. Бурдъёсыныз кык-куинь пол шонтӥз но музъем вылысь нырысьсэ ишкалскиз. Сюлэмыз ырак луыса, пыдэстэм чагыр инбамлэсь мурдалазэ шöдыны тыршыса кадь, вылӥе но вылӥе ӝутске. Пислэг сьöраз уг но вутскы ни.

— Йырыд поромиз-а сыӵе эриклэсь? — кеськиз бöрсяз Пислэг.

— Мон азьвыл тазьы вöтъёсам гинэ лобалляй. Кыӵе эркын, кыӵе умой! — черекъя Натӥ.

— Тон сокем эн кесяськы, милям но тушмонъёсмы вань. Чакласькыса лобано, — индылэ Пислэг.

— Мон али нокинлэсь но уг кышкаськы! Кыӵе эркын, кыӵе умой! — Пислэглэсь верамзэ Натӥ кылэм но уг кары. Озьы ке но синпумтӥз бадӟым сьöд макеез адӟиз.

— Пегӟим, Натӥ, али Кучыран асьме сьöры уйиськоз. Лобим матысь липет улэ, — кесяське Пислэг. Нош Натӥ кинлэсь кышканы но уг вала. Иське, со сьöд маке — Кучыран, солэсь пегӟоно. Ку дышоз ай Натӥ выль мугорызлы?!

Кучыран, зэм но, пислэгъёсты синйылтэм ни. Тани-тани вылазы омырскоз. Натӥлэсь пöрмостэмзэ валаса, Кучыранэз Пислэг палэнэ нуыны турттэ. Гочатыса кадь, Кучыран пала матэктэ но нош дорысьтыз синтэм-пельтэм лобе. Озьы кöня ке пол. Натӥлэсь липет улэ пыремзэ адӟыса гинэ, Кучыранэн шурдыт шудонзэ Пислэг йылпумъяз, ачиз но липет улэ зымиз. Татысь Кучыран соосты уз шедьты ни. Бадӟым тылобурдо, табере Натӥлы но со туж бадӟым потӥз, вадьсытӥзы кöня ке пол котырскиз на но, пайда поттымтэысьтыз, бурдъёсыныз мылпотытэк кадь шонаса, нюлэс пала лобиз.

Натӥен Пислэг липет пасьын шып гинэ пуко. Артэ шуныт.

— Нош тынад кытын-о коркаед, ой, каред? — юаз Натӥ выль эшезлэсь.

— Ми тӥни со писпулэн гырказ улӥськом, — вöзысь бакчаын будӥсез шоры возьматӥз Пислэг. — Шонергес вераса, улӥм. Ми, агай-вынъёсыным атай коркасьтымы кошким ни, будӥм. Табере асьмеос, семья кылдытыса, пи поттомы.

— Нош кöня кузя тӥ семьяяды вал?

— Тямыс кузя. Анай-атаймылэн ӝоген нош пичиоссы луозы, уен-нуналэн соос, мырдэм вормыса, милемлы сямен ик, пиоссылы но сиён нуллозы, — пыр-поч валэктэ бурдо эшез.

— Нош анай-атаед куспазы керето-а вал? — Натӥлэн тазьы юамез Пислэглы малпамтэ шорысь луиз. Нош нылашез берло дыре со юан гинэ курадӟытэ: малы солэн яратоно анаез яратоно атаеныз дугдылытэк керето, ог-огзэс уг кылзо, уг кыло? Валэктон шедьтытэк, нылаш куддыръя тазьы но малпалля: «Оло, анай-атайёс куспын озьы ик луыны но кулэ, оло, со чик но урод öвöл».

— Ма со сыӵе, ми ум но тодӥське, — валантэм юанлы валэктыны тырше Пислэг. — Кузпалъёс пи потто ке, одӥг сюлмаськонзы: пиоссэс сюдоно, соослы нымы-кибыосты бичано. Нуллыса гинэ вутты! Ымзэс бадӟым-бадӟым усьтыса возьмало.

— Ой, мон но-а табере нымы-кибыосты сиё? Мон юрдӥсько, — Натӥ вукекъяськыны кутскиз.

— Ачид но валаса уд вутты, кызьы нумыръёс, кибыос самой ческыт сиёнэд луозы, — буйгатӥз Пислэг. — Нош али ойдо азьлань лобом ни.

Липет улысь потыса кöня ке иськем ортчемзы бере Натӥез Пислэг дугдытӥз, ойдо, пе, та гуртэ пыралом. Тӥни со пурысь липето корка вадьсысь тыпы вылэ пуксьылом.

— Жадид-а, мар-а ни? — пыкылыса кадь юаз Натӥ. — Асьмеос тазьы дугдылыса вашкалае ноку ум вуэ.

— Та коркан улӥсьёслы мон ивор сётыса кельто, — Пислэг озьы шуиз но, укно доры матэктыса, нырыныз пиялае коканы кутскиз.

Укноын кин ке адӟиськиз, киыныз ик шонаса, Пислэгез улляны тырше, ачиз пумен кирос тыре.

— Ма карод, та корка куректон пыроз. Мон сое адямиослы вераны кулэ. Урод иворлы дась мед луозы, — валэктэ Пислэг.

— Нош тон сое кытысь тодӥськод? Кин тыныд вераз? — паймемзэ ватыны уг быгаты нылаш.

— Ми, тылобурдоос, сое адямилэсь трослы вазьгес шöдӥськом. Ма карод, юрттыны ум быгатӥське, ивор гинэ сётӥськом, — жаляса кадь вераз Пислэг.

— Иське, калыклэн веранэз шонер? Бурдоос, укное йыгаса, асьмелы маке вераны туртто? — Натӥ шуак тодаз вайиз песяезлэсь со пумысен верамзэ. — Иське, со ваньмыз зэм?

— Ми, адямиосын ӵошатыса, шöдонлыкмес öм ыштэ на, — валэктэ Пислэг. — Но инкуазь туж сэмберъяськемен, милемлы но капчи öвöл. Лобон сюресмес но куддыр ыштӥськом. Лымшоре шуыса, пырак уйпал шаеръёсы вуиськом. Но озьы туж шер луэ.

«Малы меда адямиослэн сыӵе шöдонзы öвöл? — малпаське Натӥ. — Оло, вашкала-вашкала дыръя, куке вань лулосъёс артэ улӥзы, адямиос но троссэ шöдыны быгато вал? Оло..» Нылаш син шораз пуктэ ни, кызьы адямиос, ог-огзы шоры учкыса гинэ, кыл вератэк, ог-огзылэсь малпанъёссэс валало. Ой, дунне вылын соку ӵашетон но öй луысал ук. Малпанъёсыз пöлы выйыса, Натӥ чал-чал лобе.

Но малпамтэ шорысь эшъёслэн лобон ӝоглыксы кулэсмыны кутскиз, бурдъёссы секытэсь луизы, омыр ик напчиз кадь. Натӥ бурдъёсыныз мырдэм выретэ, тани-тани музъем вылэ усёз ни. Пислэг, умойтэмез шöдыса, нылашлы кизэ (ой, бурдзэ, шуод ни) сётӥз.

— Пыкъяськы мынам бурдъёсы вылэ! Кужымдэ шыръя, — кеськиз. — Али асьмеос вöлмытлыклэн мукет сӥяз потон кожетӥ ортчиськом. Таиз сюрес тужгес секытэз. Татчы вань урод кужымъёс люкаськемын. Чида, Натӥ. Тон кужмо нылаш ук!

Натӥлэн бöрдэмез ик потэ. Пислэглы капчи вераны. Нош нылашлы та кык дуннеос вискын шоканы ик секыт. Кыӵе ке но кужым уллань кыске.

Малпамтэ шорысь туж лек сильтöл ӝутскиз на, котыр ваньзэ зӥр! бергатэ.

— Натӥ, бурдъёсыныд золгес шона, — кесяське Пислэг. — Вылӥе тубом, отысен сильтöл асьмемыз уз шедьты.

Натӥ, берпуметӥ кужымзэ поттыса, эшез сьöры вылӥе кыстӥське. Ой, татын зэм но каньылгес вылэм, омыр но сокем нап, пачкатӥсь öвöл.

— Али асьмеос кык дуннеос вискын. Чидатскы, ӝоген татысь, та кöшкемыт кожысь, потом, — эшсэ буйгатыны тырше Пислэг.

Бурдо эшъёс вераськыса ке но лобо, сюрессы кузь потэ ни.

— Ойдо, Пислэге, кöня ке шутэтском, — сюлворе Натӥ. — Асьмеос кöняетӥ нуналзэ ини пуксьылытэк лобиськом.

— Сюлэмыд шöдэ, лэся, Натӥ. Асьмеос вашкалаосмылэн дуннеязы вуиськом ни. Тӥни со сьöд-сьöд, ӵем-ӵем нюлэс сьöрын вашкала-вашкала выжыосмы уло.

— Асьмеос соосты туннэ ик адӟыны быгатомы-а? — лöптӥз Натӥ.

— Со дунне сыӵе ик огшоры, каньыл öвöл, дыр. Ляб луэммес возьматӥм ке, доразы, оло, ноку но ум вуэ.

«Нош ик та Пислэг монэ курдатыны выре ни. Берлань сюресмы öвöл шуыса, уг вала-а, мар-а», — Натӥлэн ӵуж гадьлы вожез ик потӥз.

— Нош вашкалаосмы кызьы асьмеды тодмалозы? Пöлазы пыртозы-а? — Натӥ эсэпсэ уг шедьты.

— Ой, созэ мон уг тодӥськы. Анай-атайлэсь юаськоно вылэм, — Пислэг но сюлмаськыны кутскиз. — Но тазьы верамзэс тодӥсько: котькуд удмурт семьялэн аслаз пусэз — подэм пусэз — пе, вылэм. Азбарын, кудаз соос улӥзы, шырчик каръёссы но со пусэн тодмостэмын, пе, вал. Оло, тӥляд но сыŸе вашкала пусты вань. Адӟылэмдэ уд тодӥськы-а?

— Нош кытысь мон со пусэз адӟыны быгатысал? — тодаз вайыны тырше Натӥ. — Шырчик кар вылын но со вань ке, озьыен азбарысь мукет арберис вылын но луыны кулэ.

Натӥ мур малпаськонэ усиз. Али со семья пуссэс тодаз öз вайы ке, нокыӵе утись дэмдорез уз шедьты, озьыен анай-атаезлы юрттыны уз быгаты. Тужгес вашкала арбериоссы — пу вышкыос, но соос вылын кыӵе ке пусъёс вань-а — нылаш вераны уг тоды. Но чалме ай, Натӥ тодаз вайиз: вань, вань сыŸе пуссы! Пу лопатсы вылын. Ныдыз солэн чигемын, улӥяз — «вить» лыдпуслы тупась пус, вылӥ быжызтэк.

Со лопатэн анаез шудыны уг лэзьы, пересьёслэн, пе, со. Нылаш соку номырзэ öз вала, но лопатэз мыр-мыр учкиз вал. Соку ик пуссэ адӟиз, эшшо малпаз на: «вить» пуктӥллям, нош вылӥ быжзэ суредаллямтэ.

«Анай, тон со лопатэн шудонлэсь монэ öд алысал ке, мон со пусмес ноку öй адӟысал. Тау, анай», — сипыртэ ас понназ Натӥ. Но шумпотон мылкыдыз ӝог гинэ ӝожмытэ берытске. Котьма шуэ но, со анай-атаезлэсь туж мöзмиз ни.

«Мар меда соос али каро? Атай бертӥз ни, дыр. Ой, нош соос монэ утчало ни, дыр, уг шедьто…» — Натӥлэн син азяз соку ик анаезлэн бöрдыса-бöрдыса кöдэктэм ымнырыз, атаезлэн дырекъясь ымдуръёсыз пуксизы. Нылаш викышъяны öдъяз. Вöзаз Натӥлэсь верано кылзэ чал-чал возьмаса пукись Пислэг шуак луиз, куалектӥз:

— Натӥ, тодад öз лыкты-а?

— Лыктӥ-ӥз, — нёжтыса-нёжтыса вераз нылаш.

— Лыктӥз? Мар-о собере нискетӥськод?

— Анай-атайлэсь мöзми-и-и…

— Натӥ, — ӝот-ӝот кутскиз Пислэг. — Тон ӵапак соос сярысь сюлмаськыса, татчы вуид ук. Кутскем ужез пумозяз вуттоно. Нош нырысь асьмелы кöтмес тыроно… нымы-кибыосын. Вашкалаосмы доры сюрес кузь, сиён оло сюроз, оло уз.

Натӥ кибыослэсь юрдэмзэ но вунэтӥз кадь, Пислэген артэ куасьмыны кутскем писпу борды кырмиськиз но сул улысь сиисьёсты потта гинэ. Пислэг ас понназ пальпотэ: табере нылаш — зэмос бурдо. Сиськемзы бере соос пырак вашкалаоссылэн дуннеязы потозы. Пислэг эшшо одӥг пол, берпуметӥзэ, верано кариськиз на:

— Натӥ, азьлань мыныны пумит ке, лыктэм сюрестӥмы али ик та сьöд нюлэс дорысь берлань лобыны быгатӥськом.

— Öвöл, öвöл, Пислэг, мон дорысьтым кошкеме пумысен одӥг минутлы гинэ жаляй, — Натӥ доры дӥсьтонэз выльысь берытскиз.

Пислэг кескич пальпотӥз:

— Али асьмеос музъем вылэ тэтчом но, тон пинал ныл луод. Тазэ дуннеез мон ӟеч тодӥсько ке, сояз вуылэме öвöл, соин ик асьмелы ӵош гинэ возиськоно.

Мар карод — йыр ке йыр, пыд ке пыд. Натӥ, синзэ кыньыса, уллань нырысь уськытскиз. Пислэг со сьöры.

Нылаш чурыт музъем вылэ пыдъёсыныз йыг-йыг султэмзэ шöдӥз ни ке но, синзэ усьтыны уг дӥсьты.

— Натӥ, мон но адями луи, — мышкысьтыз Пислэглэсь куаразэ кылӥз.

Нылаш, синъёссэ усьтэм интые, соосты киосыныз юн-юн пытсаз. Эшез табере пияш луэм. Натӥлэн татчыозь пи эшъёсыз ноку öй вал на. Соин, вылды, ӵапак али кытысь ке пыдлось пушкысьтыз кепыран сямыз потӥз.

— Натӥ, — нылашлэн пельпумаз йöтскиз Пислэг. Но нылаш со пала öз но берытскы, синъёссэ но öз усьты.

— Малэсь кышкатскид? — паймиз Пислэг. — Мон сокем кöшкемыт öвöл кадь. Кöшкемытъёссэ сьöд нюлэскысь трос адӟом, дыр, ай.

Та кылъёсты кылыса, нылашлэн киосыз асьсэос шуак лэзькизы, синъёсыз паськыт усьтӥськизы. Вöзаз нокыӵе кöшкемыт лулосъёс öвöл, асэныз огъёз пияш гинэ сылэ.

Огдырлы буйгаса, Натӥ эшез шоры пырак учкыны дӥсьтӥз. Шонер верам, со чик но кöшкемыт öвöл. Я, мар кепыранэз, Натӥлы со туж учкымон потӥз. Ачиз но öз шöды, кызьы бамъёсаз возьдаськон ӵыжытъёсыз кылдӥзы.

— Натӥ, малы чалмид? — Пислэг нылашез китӥз кутӥз. — Асьмелы азьлань мыноно.

Натӥ сазьдӥськиз кадь но, кепыранзэ ватыны турттыса шуиз:

— Пислэг, тон татчыозь тылобурдо вал, тонэ пияшен адӟыны малпамтэ шорысь луиз.

— Мон ачим но нырысь кышкатски. Но тазьы шукрес, тунсыко вылэм. Асьмеос ӝог эшъяськом, эн куректы. Мон тонэ ӟеч тодӥсько ни, — шуиз Пислэг но Натӥез азьлань валтӥз.

Натӥ али гинэ валаз: толалтэысь соос гужеме вуизы. Шуныт, лымы öвöл. Кызъёс, ньылпуос сыӵеесь ик, но татын соос борддор выллем вистэм-вожтэм сыло. Натӥ йырзэ выллань ӝутӥз но… инмын куинь шунды. Паймеменыз мар вераны валатэк, Пислэгез саестӥз кыска но инме возьматэ.

— Татын, зэм но, ваньмыз валантэм, — озьы гинэ шуыны быгатӥз Пислэг, — Натӥ мон тынэсьтыд пустэ пуктысал. Асьмелы беризез шедьтоно.

— Татын сомында писпуос, малы тыныд одно беризь кулэ? — Натӥ туж курда, Пислэг утчаськонтӥяз солэсь кизэ киысьтыз лэзёз шуыса.

— Беризь — небыт писпу, сое вандылыны каньыл, — валэктэ пияш.

«Кытын ай со куаро писпуос? Та лысоосыз пыр кызьы ке потоно вал», — керӟегъяське Натӥ.

Нош Пислэг, азьлань мынон вылысь, одӥг киыныз писпу вайёсты паналля, мукетыныз сьöраз Натӥез валтэ. Öжыт-а, кема-а озьы мынӥзы, нылаш туж жадиз. Бöрдонэз ым дураз ни, но чидатске. Пияш азьын ассэ ляб лулэн возьматэмез уг поты.

Но Пислэг вератэк но нылашлэсь жадемзэ валаз ни.

— Я, пичияк гинэ кыр интыез шедьтӥм ке, отчы шутэтскыны пуксём.

Натӥ ас понназ пальпотӥз: туж шöдӥсь-валась солэн выль эшез.

Кыр инты сокем ӝог öз шедьы. Кыкназылы вöл-вöлгес тэрымон вырлы но шумпотӥзы. Пислэг куасьмем вайёслэсь тылскем аратӥз. Натӥ йырзэ Пислэглэн пельпум вылаз лэзиз но синъёсызлэсь кыниськемзэс валатэк ик кылиз. Пияш но умлэсь утиськыны öз быгаты.

Трос-а дыр ортчиз, чырым мында гинэ-а, эшъёс сильтöл дыръя кадь ӵаш ваземлэсь сайказы. Со куара пумен золгес но золгес вазьыны кутскиз, матэ но матэ вуэ. Писпуослэн музъем вылэ зучак! усьылэмзы, вайёслэн тачыртыса тӥяськемзы кылӥське. Нюлэскын туж шимес луиз. Натӥ пияш борды ӝиптӥськиз но вырӟыны но уг дӥсьты ни.

Малпамтэ шорысь вöзтӥзы коньыос, лудкечъёс, ӟичыос, мукет пöйшуръёс бызьылыны кутскизы. Соос пумен тросгес но тросгес луо.

— Кошке мынам сюрес вылысьтым! — кытысь ке шимес, гудырес куара кылӥськиз. — Малы татчы интыяськиды?

Пислэг шуак луиз, валатскиз: та интыысь ӝоггес палэнсконо. Натӥез кызъёс сьöры валтыса ик нуиз. Ватскыса вуттӥзы гинэ — пукем интыетӥзы сьöд-пеймыт трос пöйшуръёс ортчизы, соос сьöры — кызлэсь ӝужыт адями. Пислэг, ачиз но валатэк, нылашез бордаз ӝиптӥз. Соиз дыгыр! куалекъя.

Куара-ланга чалмем бере эшъёс азьвыл пукем интызэс учкыны мынӥзы. Отын пöйшуръёс öвöл ни, коньы гинэ вай вылын пыдзэ нюлыса пуке.

— Нош тон малы мукетъёсызлэсь кылид? — адями кылэз валалоз-а, уз-а но, Пислэг коньылэсь юано кариськиз.

Малпамтэ шорысь соиз пумитаз адями куараен вазиз:

— Мон пыдме вöсь кари, соин бере кыли. Нош тӥ мар татын кариськоды? Нюлэсмуртлэсь уд кышкаське шат? Солэн сюрес вылаз шутэтскыны интыяськиллямды, соин со сыӵе йыркуро кесяськиз.

Натӥ, коньы доры матэ кариськыса, пöйшурез пыдзэ возьматыны куриз. Вöсь гинэ луымтэ пыдыз — чигем. Натӥ коньылэсь пыдзэ ӵушкон кышетэныз юн-юн биниз но табере ӝог бурмоз ни шуыса буйгатӥз.

Коньы шумпотэменыз, тау карыса кадь, вай вылысь вай вылэ тэтчиз но люкиськыкуз тазьы шуиз на:

— Нюлэсмурт туннэ пöйшуръёссэ мукет шаеръёсы улля. Мон но кошкыны кулэ. Оло, адӟиськомы на, — коньы быжыныз шонтӥз но ньылпу вайёс пöлы ышиз.

Натӥен Пислэг выль эш шедьтэмзылы шумпотыса но öз вуттэ, соиз син азьысьтызы чиптэм-чаптэм ышиз.

— Натӥ, учкы ай, отӥ югытгес кадь ни, — лымшор пала возьматэ Пислэг. — Куаро писпуос но адӟисько.

Зэм но, тани беризь, отӥязгес пипу будэ. Пислэг беризь ваез чигиз но, сое вöлыса, отчы Натӥлэсь семья пуссэс пуктӥз.

— Табере та пусэн, подэм пусэн, воршудэд тонэ шумпотыса пумиталоз, — пусэз Натӥлы сётыкуз, шуиз Пислэг. — Табере со тыныд паспорт выллем.

Лысо писпуосты куароосыз воштӥзы ни но, нылаш соосты тодманы выре. Жаляса верано, гуртын ке но улэ, троссэ уг тодма. Натӥлэн со понна аслыз вожез но потэ. Беризез со котьку тодмалоз, тужгес но сяськаякуз, зынызъя нокыӵе мукетыныз уд сура. Кызьпуэз но тöдьы модосэзъя тодмано. Нош соиз мар сыӵе?

— Пислэг, Пислэг, учкы тапала, — пияшез мырӟылэ Натӥ. — Мар мудрон писпу со?

— Кытын? Кытын? — кудпала учкыны уг вала Пислэг.

— Адямилы но кадь укша, но ӝыныё, — Натӥ кышкаменыз Пислэглэсь кизэ юн-юн кырмиз. — Со Палэсмурт öвöл-а? Песяй мыным соос сярысь мадьылӥз. Ойдо пегӟом, со кöшкемыт маке.

— Со асьмемыз адӟиз, — шуэрскиз Пислэг, — дорамы лыктэ. Пегӟим, Натӥ!

Пыдъёссы музъем вылэ ик уг йöто — бызё эшъёс. Палэсмурт тани-тани сутоз ни, ӵуш-паш шокамез ик матын кылӥське. Олокытысь-мар Натӥлы шуак тодаз лыктӥз, ас понназ сипыртӥз: «Пислэге-воршудэ, эн кушты, юртты милемлы».

Пиналъёслэн азязы асьсэ палъёсын кадь ик лабрес будӥсь палэзьпу шуак вадьсаськиз. Натӥ, кытчы пегӟыны валатэк, палэзьпу улэ ватскиз, Пислэгез но сьöраз кыскиз.

Нош Палэсмурт ӝыныё ымыныз ымтросаз ик пальпотӥз ни вал: удалтӥз ке удалтӥз солы. Кузь-кузь пал киыныз пиналъёс доры сузьтӥське ни. Но калтоназ сюремъёс син азьысьтыз чиптэм-чаптэм ышизы. Йырыз курен Палэсмуртлэн синъёсысьтыз тылгизьыос ик пазьгиськизы, котыр учкылӥськиз-учкылӥськиз на но, зӥрак берытскыса, бадӟым-бадӟым вамышъёсын бызьыса синтэм-пельтэм кошкиз.

— Кызьы Палэсмурт асьмемыз öз адӟы? — эшъёс паймыса ог-огзы шоры учко. — Вадьсамы ик султӥз, но öз адӟы.

— Пислэг, мон воршудэлэсь куриськи, оло, со асьмелы юрттӥз, — шара малпаське Натӥ. — Палэзьпу азямы öй вал, но кытысь ке но шуак кылдӥз. Со сьöрысь Палэсмурт асьмеды öз адӟы ни.

— Со озьы ик вань, дыр, Натӥ, воршудмы асьмелы юрттӥз.

— Нош кытысь асьмеос воршудмес шедьтом, вашкала ӵыжы-выжыосмес кытысь пумиталом? Кытчы мыныны но ум тодӥське. Коть одӥг адямиез адӟысалмы ке, — оло аслыз, оло Пислэглы ӝожтӥське Натӥ.

— Тӥни, вераса гинэ вуттӥд, отӥ адями лыктэ ни, — паймытӥз Пислэг.

— Кин? Кытын? — адӟымтэысьтыз керӟегъяське нылаш.

— Пересь воргорон. Кияз сарва, — адӟемзэ вера пияш. — Ойдо со пумитэ. Оло, воршудмы сярысь маке тодэ.

Натӥ но табере тöдьы-тöдьы дӥсен пересез адӟиз. Йырсиез но солэн дӥсез кадь тöдьы пужмертэмын.

— Чырткемесь, песятай, — куаретӥз Пислэг, пересь азе потыса.

Нош соиз тодмотэм адямиослы öз ик паймытскы кадь, кема возьмам куноослы кадь пальпотӥз:

— Чырткемесь, гыдыкъёсы! Мар утчаськоды-бичаськоды та бадӟым нюлэскын?

— Ми ум бичаськиське, песятай, ми воршудмес утчаськом. Оло, тӥ тодӥськоды, кытын Пислэг воршудысь ӵыжы-выжыосмы уло? — пиналъёс кема улэм, трос адӟем пересьлэн трос тодэмезлы оскыса юасько.

— Пислэг, шуиськоды? Тодӥсько кадь, тодӥсько соосты, шур сопалан уло. Асьтэос-а сюрес шедьтоды, келяно-а тӥледыз? — пальпотыса ик юаське пересь.

— Келялэ вал, келялэ, песятай, — лöптӥзы нылпиос.

— Но соос доры озьы гинэ пырыны уз луы ай, пöлазы ваньзэ уг басьто. Воршуд яке семья пусты вань-а? — выжыятэ келяськыны соглаш кариськем мурт.

— Вань, вань! — воршудзэс шедьтыны быгатозы ни шуыса, шумпотӥз Натӥ.

— Я соку, мынэ бöрсям, эн мыкыръяське, монэн но, куспады но, нокинэн но эн вераське, — валэктӥз пересь. Эшшо будэтӥз на: — Куронъёсме öд быдэстэ ке, воршудды доры ноку уд вуэ.

«Та вашкалаослэн дуннеязы, оло, выжыкылын кадь: отчы эн мыны, тазьы эн кары», — малпа ас понназ Натӥ. Юрттӥсь шедьтэмзылы нылпиос туж шумпотӥзы, пересь сьöры быж сямен мыно. Куронъёсыз но солэн сокем быдэстонтэмесь öвöл: эн мыкыръяськы но эн вераськы.

Одӥгез паймытӥз пиналъёсты. Пумитазы пöйшуръёс сюро ке, кышкатскыса кадь дорысьтызы ури-бери пегӟо. «Адямиосты адӟылэмзы öвöл, дыр, но, соин кышкало», — аслыз валэктон шедьтӥз Натӥ.

Кема-а озьы мынӥзы, öжыт-а, но Натӥлэн малпанъёсыз воштӥськизы. Малы пересь мыкыръяськыны öз лэзьы? Мар отын сыӵеез? Озьы малпа ке но, нылаш мыкыртӥськыны уг дӥсьты. Пислэг но, ас малпанъёсыз пöлы выйыса кадь, чал-чал мынэ. Вераськыны но соин уг яра. Озьы Пислэг шоры учкыса мынонъяз, Натӥ канжаськиз, катаез ик пыдысьтыз усиз. Пересь ӝегамзэ медаз адӟы шуыса, Натӥ пыдэпононзэ кутчаны ӝогак гинэ мыкыртӥськиз но… пыдъёсыз куспытӥ шуак Палэсмуртэз адœиз. «Ма, со песятай öвöл ук! Палэсмурт милемыз пöям!» — паймеменыз нылашлэн кеськемез но, вырœемез но уг луы ни.

Песятай нылашлэсь дугдэмзэ шöдӥз, валатскиз но син куспын Палэсмуртлы пöрмиз.

— Пегœим! — кеськиз Натӥ.

Палэсмуртлэсь кытчы ватскыны пиналъёс табере тодо ни. Кытын меда утись палэзьпузы? — бызён сяменызы кыкназы но горд пурыосын писпуэз синъёсынызы утчало.

Палэсмурт вожомиз: нылпиосты пöяны нош ик öз пöрмыты. Сьöразы уйиськыны вырӟиз ни вал ― йыраз выль малпан чилектӥз. Уз, табере со сьöразы уз ни уйиськы. Ӵок, песятай кариськыса, пиналъёсын ӵош удмуртъёс доры вуыны öз кылды ке. Мукет амалъёс öвöл-а, мар-а. Нош воршудэн улӥсьёс пöлы сюремез туж потэ. Улэм-вылэмзы шоры палэнысен вожъяськыса учкылэ. Укыр ӟеч уло соос. Луд вылэ пото ке, кизем-пальккем юзы вож ожо кадь вожектэ. Вылтӥз коньы бызьылымон, сёр ворттылымон луэ, шепезлэн секталаезлы чидатэк, модосэз-куроез някыртӥське. Куинь кырым араса, культозы тырме. Куинь культо араса, уробозы тырме. Кутсан дыръя шуккемзылы быдэ сюэн-сюрсэн тысез пазьгиське. Кеносъёсысьтызы юзы ноку уг кулэсмы.

Удмуртъёс куспазы тэрытскыса, тупаса уло, керетонэз, вылтӥяськонэз уг тодыло. Нылпиоссы но соослэн кылзӥськисесь, лякытэсь будо. Инмаръёссы но соослы юрттӥсько, шуглэсь-леклэсь утё.

Палэсмурт, ма шуод, синмаське адямиослэн улонзылы, но алама сямыз соослы уродзэ лэсьтыны куре-косэ. Вожъяськонэз буйганы уг сёты, алама сямъёсты соос пöлы но вöлмытэмез потэ.

«Ма, удмуртъёс доры мон нылпиостэк но мыныны быгато, подэм пуссы гинэ кулэ», — буйгатэ ассэ Палэсмурт. Тодэ: пусэз аслыз кариз ке, удмуртъёс доры сюрес усьтӥськоз. Уго та калык вань пусъёссэ йыраз возе, нош, вунэтонтэм вылысь, книгае но гожтыса кельтэ. Со книгазэс удмуртъёс туж утьыса возё.

Зэм, Палэсмурт, нылпиосты лул потымон бичатыса, подэм пуссэс таланы но быгатысал. Котьку сямен со озьы каре. Но берло вакытэ Нюлэсмурт солы йыркурзэ возе. Кин ке чагиськись луиз ке, Нюлэсмурт ачиз бичатыса Палэсмуртлэсь лулзэ поттоз. Соин ик Палэсмурт кырсь ужъёссэ лушкемен лэсьтыны тырше.

Нош Натӥен Пислэг палэзьпу сьöры ватскизы но потыны уг дӥсьто ни.

— Пислэг, асьмеос палэзьпу улын кемагес пуким ке, Палэсмурт асьмемыз ыштоз, — дэмла Натӥ, — ватскемысь потэммес возьмалоз-возьмалоз но акыльтоз. Соку, оло, палэнскоз?

— Со асьме сьöры öз уйиськы, оло, зэм но палэнскиз, — Натӥя ик кариськиз пияш.

Но Палэсмурт малпанэзлэсь озьы гинэ уг куштӥськы. Удмуртъёс доры сюремез туж потэ уго. Нылпиосты весь чакласа улӥз. Нош соосыз палэзьпу улысь кематэк öз потэ. Ӝыт вуыса, шутэтскыны выльысь пуксемзэс но кема возьмано луиз. Нылпиос умме усизы гинэ, Палэсмурт, кенœали кариськыса, Натӥлэн кисыяз пыриз. Одӥгаз, кыкетӥяз, куинетӥяз. Тани! Шедьтӥз Натӥлэсь подэм пуссэ. Нылаш медаз шöды шуыса, туж чакласькыса, каллен гинэ кисыысь потӥз. Ымаз — вашкала пус.
Тямысэтӥ глава

Бадӟым мурт но Гондыр нюня

Нылпиос шуак огӵош сайказы. Номыре валаны уг быгато: оло гудыртӥз-ӵашйиз, оло музъем зурказ-пилиськиз. Огдырлы пеймыт луиз, шунды öз адӟиськы ни. Нош ик гудыртӥз, музъем но дыректӥз. Нылпиос вадьсы кызлэсь, оло, дас поллы бадӟымгес адями кылдӥз. Одӥг пыдыныз лёгиськиз но, нылпиос вöзы бадӟым гоп кылдӥз. Пислэген Натӥ шокчыны ик уг дӥсьто, озьы ке но бадӟым мурт вылысь синъёссэс уг вошъяло. Тани со мыкыртӥськиз но киыныз кыз борды йöтӥськиз. Соку ик бурсэм куара кылӥськиз. Вайёсты тӥяса, кин ке музъем вылэ усиз. Нош со бадӟым мурт кыз йылысь аслыз оло сиён, оло юон шедьтэм. Оскалтэмез бере ымдуръёссэ ну нюлышъя ук. Мукет пыдыныз лёгиськемзэ нылпиос öз адӟе ни — со бадӟым муртлэн вамышез туж кузь вылэм. Музъем зуркамез гинэ кылӥзы.

— Пислэг, — вань куараос чалмем бере гинэ вазьыны дӥсьтӥз Натӥ, — кин ке но кыз йылысь усиз кадь, шуккиськиз, дыр. Оло, учкомы?

— Ойдо ӝоггес, Натӥ, — соку ик соглаш кариськиз пияш.

Дырто ке но, нылпиос туж чакласькыса мыно. Кинэз гинэ öвöл та нюлэскын! Уд но вала, кин пöялоз, кин уродзэ лэсьтоз.

Котырак эскериськизы но адӟо: зэм но, кыз улын кин ке вань. Бадӟым, гоно. Отысь ик викышъям куара кылӥське.

— Натӥ, — нылашлы кылымон гинэ вераны турттэ Пислэг, — со гондыр öвöл-а? Усьыкуз но бурсӥз. Нош али викышъя. Гондыръёс бöрдо-а?

— Сыӵе вылӥысь усьыса, кин меда уз бöрды, — ассэ но малпаса вера Натӥ. — Тӥни султэмез но уг луы ни, лэся.

Дӥсьтыса но дӥсьтытэк нылпиос Гондыр доры матэктӥзы.

— Гондыр уром, — выжыкылысь вазиськемез шуак тодаз вайиз Натӥ, — туж-а вöсь луид?

Тазьы вазиськемез кылыса, Гондырлэн сюлэмыз соку ик няськаз. Со адямиослэн уром, дядяй, нюняй шуэмзылы туж шумпотэ. Ачиз адямиослэсь кылдэмын ук. Кылзӥськымтэысьтыз Инмар сое гондырлы пöрмытӥз вал.

— Вöсь сокем öй луы, султыны юрттӥды ке, тау шуо. Кöт туж ӝож, — жалясь муртъёсызлы ӝожтӥське Гондыр. — Мушъёслэсь чечызэз шедьтӥсько гинэ, сокеме писпу кузя тубисько, со бадӟым нодтэм мурт дасез вылэ вуэ ни. Чечыме талаз.

— Малы сыӵе бадӟым, кужмо муртэ нодтэм шуиськод, Гондыр уром? — паймиз Пислэг. — Со бадӟыменыз ик котькинэ вормоз ук!

— Озьы кадь но, туж нодтэмесь ук соос. Номыр ужаны уг валало, дасьсэ гинэ таланы быгато. Чечые туж жаль потэ. Нош визьзы мынам мында но öвöл. Корка но пуктыны, асьсэды дӥсяны-кутчаны но уг пöрмыто, — лад-лад, дядяй кадь, вера Гондыр. — Собыдӟаесь ке но, адямиослэсь курдало. Соос татчы трос öз кыле ни, ваньзы сямен мукет интыосы кошкизы. Адямиос сыӵеесь öвöл: соослэн котькыӵе ужез ужаны визьзы тырме. Нош тӥ кытысь татчы вуиды? Кыӵе муген?

Гондырлэсь сюлмысь вераськемзэ шöдыса, пиналъёс ваньзэ верано кариськизы. Зэм, Палэсмуртлэн пöяськемез бере кинлы ке оскыны секыт ни вал. Но Гондырлэн синкылиосыз нылпиослэсь сюлэмъёссэс шунтӥзы, оскон сётӥзы.

— Гондыр уром, ми воршудмес утчаськом, Пислэг воршудмес. Оло, кылылэмед вань? — оскытэкгес юаз Натӥ.

— Пислэг воршудэз-а? Кызьы, пе, ум тодэ. Тодӥсько. Туж лякытэсь удмуртъёс со воршудын уло. Соос монэ уг обидо, шорам нюняй, дядяй гинэ шуыса вазисько. Мон но соосты уг исаськы, — пиналъёслэсь мылкыдзэс няськатыса ик вераське Гондыр.

— Ой, Гондыр нюняй, соку тон милемлы ӵыжы-выжыосмы доры сюрес возьматод-а?

— Сыӵе ӟеч адямиослы кызьы уд возьматы. Тӥ мыным юрттӥды, мон — тӥледлы. Нош подэм пустэс сьöрады басьтӥды-а? — юаське Гондыр.

— Вань, вань пусмы. Натӥ, возьматы ай Гондыр нюняйлы, — дыртытэ Пислэг.

Натӥ дуно пусэз понна кисыяз пыриз но — отын номыр öвöл. Мукетъёссэ но кисыоссэ бугыръяз. Буш.

Пислэг, нылашлэсь керӟегъяськемзэ адӟыса, валатскиз ни: пуссы ышем.

— Мон али ик со пусэз выльысь вöло, — буйгатыны тырше пияш.

— Кытчы со луыны кулэ? Ялан кисыям ветлӥз. Киргатӥ, оло… Нош сое Палэсмурт кадь кескич лулъёс шедьтӥзы ке? Соос воршудамы пöяськыса пырозы, трос аламазэ лэсьтозы, — мар малпаны ик уг вала ни Натӥ. — Выжыосмы монэ каргалозы. Мар каром, Пислэг? Гондыр нюняй, визь-кенеш сёт!

— Нюлэсмуртлы вазиськоно. Пöйшуръёссэ татчы вайыны куроно, котькуд писпу, котькуд куак, котькуд турын-куар котыртӥ мед утчаськозы. Соку ыштэм пусты ӝог сюроз, — валэктэ Гондыр.

Юрттӥсьёс вуэмлэсь азьло пияш беризьлэсь подэм пусэз выльысь вöлӥз. Тыршиз пырак азьвылэз кадь лэсьтыны, шедьтӥсез соку ик мед тодмалоз.

Пöйшуръёс пöлысь доразы нырысь тодмо коньызы вуиз. Пыдыз бурмем ни, чырткем тэтча. Со но пусэз одно шедьтом шуыса оскытӥз.

Пиналъёс буйгазы, коньыосын, лудкечъёсын, ӟичыосын, гондыръёсын ӵош соос но утчасько. Нунал ӵоже вань нюлэсэз эскеризы, но… пуссы öз сюры.

— Я, сокем эн кайгыре, гыдыкаосы, — буйгатэ Гондыр. — Пусты урод киосы сюриз шуыса ум малпалэ.

— Я, кызьы уд малпа? Нош… пусмес лушказы ке, со муз вылын уз луы ук, кинлэн ке кисыяз. Гондыр нюняй, асьмеос тазэ лыдэ öм басьтэ. Ма кароно? — сюлворе Натӥ.

— Ойдолэ Тöлперилы вазиськом. Со вань лулосъёслэсь кисыоссэс берыкъялоз. Оп! шуытозь шедьтоз, — таӵе дэмланэзлы Гондыр ачиз но шумпотӥз.

Тöлпери мукет шаеръёсын вылэм, Гондырлэсь öтемзэ öз кылы. Соку «нюлэс нюняй» Пислэглы вазиськиз:

— Шулан лэсьтыны быгатод-а? Тöллэсь кузёзэ шуласа öтёно. Озьы со ӝог вуэ.

Та дэмланэз пияш возьмаса кадь улэм, гумы вандыса, солэсь ӝог гинэ шулан пöрмытӥз. Шудыса эскериз. Куараез кужмо, кыдёке чузъяське.

— Золгес, золгес шула, Пислэг! — куре Натӥ. — Тöлпери тонэ мед кылоз!

Трос-а, öжыт-а дыр ортчиз, но Тöлпери вуиз. Вань котыр дуннеез со сӥсъяз-поръяз, йырин-чукин бекыръяз.

Возьмаськон сяменызы Пислэг мукет пеллян гумы лэсьтӥз. Таиз уг шула, кырӟа. Тöлпери огдырлы чалме ке, пияш гумыеныз шудэ. Макем ненег гуръёс кылдытэ! Натӥ öз чида ни, гумы шудэмъя песяезлэсь кылэм кырӟанзэ мытӥз. Со вакытлы Тöлпери но чалмытскиз. Натӥлэсь кырӟамзэ вань нюлэс кылзӥз кадь.

— Тани воршуддылэн пусэз, — гудыртӥз Тöлпери, — Палэсмуртлэн кисыяз вылэм. Ассэ но дорады погылляса вайи. Я, ӟеч луэ! Монэ мукет азьын возьмало.

— Вань тöлъёслэн кузёзы! Музъемозь тыныд йыбырттӥськом! Тау! — Тöлпериез келяса, кеськизы нылпиос.

— Палэсмурт, тон нош ик милемыз пöяд. Адӟиськод-а, кöня милям эшъёсмы, юрттӥсьёсмы. Ми тынэсьтыд ум кышкаське ни. Аламазэ лэсьтыны малпад на ке, ми нош соослы вазиськом, — Палэсмуртэн табере туж дӥсьтыса верасько пиналъёс.

— Мон тӥледлы уг люкеты ни, уг но пöяськы, — янгышсэ валай шуыса, возьматыны тырше Палэсмурт.

— Тон милям сюрес выламы эн пумиськылы ни, воршудмы доры мыныны эн люкеты, — лек вераны тыршо Натӥен Пислэг.

Палэсмурт кылзэ ыштэм мурт кадь, куара но уг потты, йырыныз гинэ мыкыръя.

Нылпиос Палэсмуртлы оскизы — кышкамзэ адӟизы. Табере соос воршудзы доры Гондыр нюняен ӵош мынозы, со сюрес возьматоз.

Палэсмурт, зэм но, кышказ. Нош Гондыр лушкаськемез сярысь Нюлэсмуртлы вераз на ке? Палэсмурт табере уродзэ лэсьтыны уз дӥсьты ни, но ас малпанэзлэсь уз куштӥськы. Пиналъёс сьöры удмуртъёс доры мыноз. Зэм, ватскыса, нокинлы адӟиськисьтэм кариськыса. Кызьы малпаз, озьы ик лэсьтӥз: пиналъёс азьысь чиптэм-чаптэм ышиз.

Нылпиос Гондыр эшенызы сюрес вылэ потӥзы. Пислэг пеллян гумызэ шудэ, Натӥ кырӟа. Ӝожмытсэ но, шулдырзэ но удмурт гуръёсты тодаз вае. Кытысь нылаш соосты кылылӥз — ачиз но уг тоды. Кырӟанъёс пушкысьтыз асьсэос кисьтӥсько кадь: зыл-зыл, лэй-лэй.

Палэсмурт сьöрысьтызы уг кыльы. Натӥлэн кырӟаменыз ӵош сюлэмаз шуныт пыре. «Ой, кытысь сыӵе пöсь лыктэ? — сюлмыз шуг луэ Палэсмуртлэн. Салкым, кезьыт утчаса, пукись вуосты коласа мынэ. Со но уг юртты. Лэймыт удмурт гуръёс сюлэмзэ бугыръяло, позыръяло. Кышкатскыса кадь, номыре медам кылы шуыса, пельёссэ ӵокта. Но озьы кема мыныны уг чида. Натӥлэсь кырӟамзэ нош но нош кылэмез потэ. Сюлэмыз куре.

Нош ма со сыӵе? Палэсмурт мугорыз шоры паймыса учке. Солэн ваньмыз ӝыныё вал ук: одӥг киыз, одӥг пыдыз, йырыз но, мугорыз но ӝыныё. Сюлэмыз гинэ но ӝыны вал. Нош табере ваньмыз будыны кутскем. Палэсмурт керӟегъяське, выль мугорызлэсь кышкатске. Нылпиос дорысь синтэм-пельтэм пегӟысал ни но, Натӥлэн кырӟамез сое думыса кадь возе.

Эшъёс артэ вамышъяло, жадёнэз уг валало. Инмын шунды яркыт пиштэ, сюресчиос понна шумпотэ. Натӥлэн жингрес куараез борды тылобурдоос но итӥсько. Коньы но выль эшъёсызлэсь уг кыльы, вай вылысь вай вылэ тэтчаса сьöразы дыртэ.

Тани азязы кыр усьтӥськиз. Синъёссы палёмизы: ма быдӟа шур! Мукет пал ярдурыз инвисозь вуэ. Нош вуэз синкылилэсь но чылкыт. Пыдэсыз ик адӟиське. Чорыгез нош — пичиез но, бадӟымез но — кутыса быдтонтэм.

Удмуртъёс шур сопалан уло, соин ик отчы маин ке потоно. Шур дурын пыжъёс но, пуръёс (плотъёс) но öвöл. Натӥен Пислэг нош сыӵе паськыт шурез нырысьсэ адӟо. Соин ик Гондырлэсь мар верамзэ чидатэк витё. Нош соиз номыр уг вазьылы, китыр-котыр учкылӥське гинэ. Кинэ ке адӟиз, шултӥз. Вуысь вить кузя вучайыос потӥзы. Гондыр шур сопала возьматӥз но, соосыз син куспын пур лэсьтӥзы.

— Тани татчы пуксьыса, шур вамен потыса, тӥ, пиналъёс, воршудды доры вуоды. Мынам тапал нюлэскын ужъёсы трос, тӥ сьöры уг мыны ни, — шуиз Гондыр но нылпиослы плот вылэ интыяськыны юрттӥз.

— Ӟеч сюрес тӥледлы! — сӥзиз Гондыр нюнюзы.

Пур ярдур бордысь ишкалскиз но, нылпиос шöдӥзы: со секытгес луиз, кин ке доразы пуксиз на кадь. Натӥен Пислэг ог-огзы шоры паймыса учкизы но, номыр öз куаретэ.

Шурлэн шораз вуыкузы, вуысь малпамтэ шорысь кышномурт зымыса потӥз. Йырсиез кузь, лэзьямын, шунды шорын чиль-чиль сьöд пиштэ. Нылпиосты адӟыса, со пальпотӥз но кузь йырсиосыныз Пислэглэсь чыртызэ котыртӥз. Пияшлэн синмаз учкыса ик, сое сьöраз вуэ кыске ни. Натӥ Пислэгез китӥз кутыса вуттӥз, мырдэм возе. Тани нылкышно-Вумурт соосты кыкназэс но сьöраз вуэ васькытоз ни.

Но малпамтэ шорысь кин ке Вумуртлы коньдон куштӥз. Соизлэн синъёсыз корт уксёлэсь мальдӥзы, Пислэг но кулэ öз луы ни. Кузь-кузесь пыдпыдэсъёссэ возьматыса, вуэ зымиз но öз возьматъяськы ни.

Со дыре ик пур вылазы адями кылдӥз. Шуак луэменызы, пиналъёс кызьы меда вуэ öз питыралэ. Учко но: ымнырыз тодмо кадь. Кытысь адӟылэмзэс валаны уг быгато.

— Эн кышкатске, пиналъёс, — вазиз со пумитазы.

Палэсмурт?! — куараезъя тодмазы нылпиос. Но малы со али палэс öвöл? Мар веранэз, нош ик кинлы ке пöрмытскиз, дыр.

— Тон милемлы уд люкеты ни шуид вал ук, малы нош сьöрамы калъяськид? Милемыз Вумурт сямен вуэ кыскод-а? — пыкылэ Натӥ, нош аслаз бам вылтӥз синкылиосыз васько. Татын, шур шорын, соослы нокин юрттыны уз быгаты ни, вань эшъёссы сопал ярдуре кылизы. Нош ик пöяз соосты кескич Палэсмурт.

— Дугды ай, Натӥ, мон öй вала, нош кин Вумуртлы коньдон кисьтӥз? — валаны турттыса кадь юа Пислэг. Палэсмурт шоры мыр-мыр учкыса будэтӥз на: — Тон Вумуртлы кузьым сётӥд но, со милемыз сьöраз вуэ öз кыскы ни. Палэсмурт, тон милемыз Вумуртлэсь утид-а? Малы? Урод лэсьтэм интые тон милемлы юрттӥд?

— Натӥ, Пислэг, мон табере тӥледлы аламазэ номыр уг лэсьты ни, — Палэсмуртлэн куараез ик небытгес луэмын. — Тӥ монэ мукет кариды, сюлэмме шунтӥды. Мон палэс öвöл ни. Али мон тӥ азьын сыӵе, кыӵе табере котьку но луо. Мукет муртлы пöрмытскыны но, адœиськисьтэм луыны но уг быгаты ни, пöртмаськон быгатонлыке ышиз. Вождэс эн поттэ, но мынам котьку но удмуртъёс пöлын улэме потэ вал. Отчы сюрыны нокыӵе амалъёс öй вал. Нош тӥ ми пала вуиды но, валай: пöяса ке но, удмуртъёс пöлы пырыны быгато. Басьтэ, пиналъёс, монэ сьöрады. Мон йöнтэм ужъёслэсь палэнски ни.

— Палэсмурт, кызьы ми тыныд оскыны быгатом? — пайме Натӥ. — Тон али гинэ милесьтым подэм пусмес лушкад вал ук.

— Тӥ мукетсэ лэсьтыны быгатоды шуыса тодӥсько, нош таиныз мынам удмуртъёс пöлы ӝоггес пыреме потэ вал, — валэктэ Палэсмурт. — Мон али палэс öвöл ни, мугоры воштӥськиз, соин Ÿош урод сямъёсы но кошкизы.

— Натӥ, ойдо Палэсмуртэз но сьöрамы басьтом. Мон солэн верамезлы оскисько, — йылпумъян лэсьтыса кадь вераз Пислэг.
Дас одӥгетӥ глава

Воршудэн пумиськон

Озьы лабыртыса мынонъязы, öз но шöдэ мукет ярдуре вуэмзэс. Плотсы яр борды мырӟиськиз ни, нош сюресчиос музъем вылэ лёгиськыны уг дӥсьто. Ярдур турлы-турлы сяськаосын ковер кадь куэмын. Кыӵеез гинэ отын öвöл: тöдьысяська но, инвожо но, куакагырлы но, италмас но, купанча но — вераса быдтонтэм. Ваньзы одӥг вакытэ сяськаяло.

Кыдёке-кыдёке œег бусы кыстӥське, со сокем нап, пушказ пырыны ик уд быгаты, нош быгатӥд ке но, šужыт кызъёс пöлы сямен йыромод — сокем юзы удалтэмын. Нош возь вылын ма мында пудо! Соосты возьмась но öвöл: асьсэ понна ветло, жалем-жалем турынэз ишкало. Нылпиосты адœыса но, соос öз кышкатске. Вöзтӥзы кошкисьёсын, œечбуръяськыса кадь, йыръёссэс мыкыръяса кылизы.

Нош пыдлонгес коркаос адӟисько. Соос зöк коръёслэсь ӟун-ӟун ӝутэмын. Укнооссэс пужыятыса-пужыятыса вöлэм наличникъёс чеберто, капкаосазы но пужыос пуктылэмын. Сюресчиос одӥгаз азбаре йыгаськизы. Нокин куаретӥсь öз луы. Капкаез донгизы но, со капчиен усьтӥськиз. Корка öссы но усьтэмын. Йыгаськизы-йыгаськизы, нокин потӥсь öз луы. Öтьымтэ куноос пырыны öз дӥсьтэ: валамон ук, кузёосыз доразы öвöл.

Ураме потӥзы, со кузь кыстӥське вылэм. Одӥгысьтыз гидкуаысь пырак инмозь ик ӵын ӝутӥське. Отчы вамыштӥзы.

Тани татчы вань гурт калык люкаськем вылэм. Ваньзы — пересез но, мöйыез но, покчиез но — тöдьы-тöдьы дӥсен. Тылскем котыре кариськиллям но киосынызы вылӥе, инме, кыстӥсько, асьсэ понна кыŸе ке кылъёс верало.

«Песяе анайзэ вошудэзлэсь куриське шуиз вал, тани али мон со куриськонэз адœисько», — малпаз Натӥ.

Доразы муртъёс пыризы шуыса, нокин öз паймытскы. Одӥгез нылкышно пöлысьтызы потӥз но лыктэмъёслы вазиськиз:

— Гажано ӵыжы-выжыосмы! Ми тӥледыз кемалась возьмаськомы ни. Милям шаерамы вуэмды бере ик тӥледыз адœим. Сюресты капчи öй вал, но тӥ номырлэсь öд кышкалэ. Воршуддэс, дэмдордэс утчамды милемлы туж дуно. Тӥляд шаерады воршудзэс тодӥсьёс пумен ичи но ичи кылё. Озьыен, ӝоген ми тӥледлы юрттыны ум быгатэ ни. Тӥ милемыз тодады öд вайылэ ке, милемын куриськонъёс пыр öд вераськылэ ке, кусыпъёсмы бырозы. Натӥ, анай-атаедлы, гурт калыкедлы юрттон вылысь, тон Пислэген собыдӟа сюресэз ортчид. Ми воршудмылэсь дэмдорзэ тӥледлы ӟечсэ гинэ сӥзьыса кузьмаськомы. Семья куспады но, гуртоосты пöлын но керетонъёс мед чалмозы, адямиос ог-огзэс кылыны-валаны, ог-огзылы оскыны мед быгатозы. Натӥ, Пислэг, тӥ Палэсмуртлэсь но кезьыт сюлэмзэ шунтӥды, быдэс луыны юрттӥды. Семьяды но сыŸе ик юн, одӥг кырым кадь луоз, палэс öвöл, быдэс кылёз.

Пиналъёс воршудзэс возись нылкышнолэсь верамзэ шокчыны дӥсьтытэк кылзо. Кызьы соосты подэм пуссытэк но тодмазы? Нимъёссэс но, лыктэм мугзэс но — ваньзэ-ваньзэ адӟизы-тодӥзы. Палэсмурт палэс öвöл ни ке но, солэсь но кин луэмзэ соку ик валазы. Собыдœа шат та вашкала Ÿыжы-выжыоссылэн шöдонзы? Удмуртъёс табере Палэсмуртэз пöлазы уз пыртэ ни-а? Нош со сыӵе оскыса лыктӥз вал. Натӥ озьы гинэ малпаса вуиз, нылкышно веранзэ азьланьтӥз:

— Нош Палэсмуртэз ми шумпотыса пöламы кутомы, солэн сюлэмыз лякыт, малпанъёсыз чылкытэсь. Со понна тӥледлы, пиналъёс, музъемозь йыбырттӥськом. Тӥ ас ужъёсыныды бадœым сюлэмо луэмдэс возьматӥды. Ми адœиськом: дэмдормы оскымон киосы сюре. Вань улытозяды со тӥледлы мед юрттоз. Тодӥськом, дорады ӝоггес вуэмды потэ. Соин ик ум ӝегатэ ни. Али шур дуре потӥды ке, тӥледыз валъёс возьмалозы. Соос тӥледды ас шаерады вуттозы.

Натӥен Пислэг доразы валэн бертонлы öз шумпотэ. Гонӟыртыса вордӥськем палъёсазы ку вуозы ай? Нош шур пала матэктӥзы но, вуысь, бадӟым тулкымъёс ӝутыса, бурдо валъёс потӥзы. Пиналъёсты тыбыр вылазы пуктыса, соос шур выллане лобизы…

— Нылы, султы ни. Учкы ай, кыӵе телефон мон тыныд Москваысь вайи.