Илини сунела излум сценаличир сагъдиру МяхIяммадмухтар МуртузагIялиев

ГIяртистунас гьунибаэс, илди хьурабарес дубурлантала унза-ганзи гьаргли дири, анкъи берклуманира хурегунанира бицIили бири.

Гьачам гьанбиркур Сергокъалала районна УбяхI МулебкIила шилизир шила советла председательли рузуси Нуллаева Загьидатли «Айгъази» бикIуси театрличи багьа агарли адалтара абалану кумекбарая или клуб барес хIядурбарибси халаси мижитла чIябар биштIати дурхIнази къаркъа-гIянжилизибад умубарахъибсири. ГIяртистунас пьеса чебаахъес сценабира гIягIнити шуртIрира хIедири. БугIярли биаб, буцIарли биаб илдани ахъси даражаличиб чучи хъарси хIянчи бири. Спектакльличи бакIибти шанти гIяртистунас баркалла бикIули шадли арбаши.

Дубурланти мурталра театрла гIяртистуни бакIахъес дурхъати гIяхIлачиван хIерли бири. ГIяртистунани сценаличир чедиахъути уюнти, дурути разити масхурти, дучIути жагати далуйти дебали гIяхIдилзи.

Даргала пачалихъла музыкала-драмала ГIямарла Батирайла уличилси театр, жагали балкьаахъурси театрла юртла халаси зал цIали бигубла акIубти къиян-жапаличи хIерхIили, гьаннара бузули саби.

Ил театрла гIяртистунани февральла 19-личиб МяхIячкъалализиб Урусла театрла биштIаси заллизиб Р.Хубецовала «Нешла уркIи» бикIуси спектакль чебаахъиб.

Ил спектакльличила ва пагьмучебти гIяртистуначила «БакIалра хIушачи вебкIнила кагъар, тилади сабину дирхмарудая» бикIуси макьала 2015 ибил дусла майла цаличиб дурабухъунсири газетализиб. ЧебяхIси ВатIан багьанданти дургъбазиб гъабзадешла бебкIаличил шел дурхIя алхунси нешла роль бузахъес гьарил гIяртистка бажардихIерирки или гьанбиркули саби, сенкIун дебали халати жавабкардешла роль саби ил. ХатIахIейкиб Россияла искусствола урибси хIяракатчи-режиссёр Мустапа Ибрагьимов уршбала неш Бахула роль Сапият ГIябдулмуслимовначи хъарбарибхIели. Гьар чинабалра кьяйда, МяхIячкъалализибти даргантасра имкан бакIиб халал пагьличил чула ролани дузахъути даргала театрла жагьилти гIяртистуни уршби-рурсби, Бимболатла роль бузахъуси РФ-ла машгьурси гIяртист СягIид ГIялибеков, ва неш Бахула роль бузахъуси пагьмучерси С.ГIябдулмуслимова сценаличиб чебаэс.

Гьарли-марли кадиркути анцIбукьуначи кьяйда, заллизибти сценаличи шипIбяргIили хIербикIулри. Гьармука душмайчил ахIерси ВатIан батахъес гъабзадешличил бургъули жагьил уршбира уршила хьунулра бетахъибси неш гьаласаибти къаралдлумачил гъайрикIули сценаличибси пардав гIяшбирухIели, эаллизибти бахъалти бисулри…

МяхIячкъалализиб спектакль чебаахъили гIергъила бархIи Сапият ГIябдулмуслимовачил театрла юртлизив къаршиикес кьасбарира. Сут бархIи биъниличи хIерхIеили, театрла хIянчизартани чула бузери даимбирулрулри.

Театрла художественный руководитель Мустапа ГIябдиевичла кабинетлизир Сапият ГIябдулмуслимова набчи хIерли раргира. Иличилси ихтилат цархIил кабинетлизиб даимбарра.

-ХIурматла Сапият ГIябдулмуслимова, лерилра хIела гIямру даргала театрлизир рузули деркIилри или бураслира, къяна бетIхIерар бургар. «ИрхIилибти гIяртистуни! Жагати палтар-кьяшличил бегIбиубли, мурталра далуйтани бучIули, шадлихъуначи башули, гIямру дуркIути»,- бикIули бирар хIушаб бахъалгъунти. Амма ил дебали къиянси, чархла арадешра цIакьанира харждарес хIяжатбиркуси хIянчи биъни нуни балас. ХIела гIямруличила бурили дигахъира.

-Ну Лавашала районнизибси халали ахIенси ЧяхIимахьилизир акIубсира, 1948 ибил дуслизир. ГIядатла дубурланти - дудеш ГIябдулмуслимли ва неш Хамисли вецIал урши-рурси (авал узи ва урегал рузи) абикьутири. Бахъал дурхIни абикьес бегIтас гьамадли ахIенри дургъбас гIергъити дусмазиб. Илдани ну Мажалислизибси бахъал хъалибаргунала бегIти дубурлантала рурсби абилкьуси «Горянок» интернатлизи редира.

ВерхIел класс делчIайчи Мажалислизир калунра. ГIур МикIхIила интернатлизи шуррухъунра. КIинайс Сергокъалала педучилищелизиб белчIуди даимбарира. Кьисматли ну Ереваннизибси театральный институтлизи кира ва 1969 ибил дуслизиб ил таманбарира. Избербашлизибси даргала театр мерлабиубси буркьа юртлизиб театрла директор СягIид ГIялиевичли ну разили хIянчиличи кьабулрарира. ХIера, гьанна 47 дусла гIямру кIиэсил дила хъалибаргли бетаурти театрла хIянчизартачил ардякъун.

- Сапият ГIябдулмуслимовна, гIямрула гIеркъал гьуни дебали къантIли сипатбарири хIуни. Жагьил дубурлан рурсилис гьамадли хIебургигу театрла сценаличи гьуни баргес. Дебали чIумаси къадагъа биригу далуйтани бучIес дигути рурсбачи бегIтани, рурсбала узбани. Дила пикрили, дудешлира узбанира хIела уркIила хьул, жи хIергъибти диалри, даргантани пагьмукар гIяртистка сценаличир гьачамалра чехIерии.

-ХIуни дурути дархьти сари. Ну арикьурти, халараахъибти бегIтас

узбас, рузбас баркалла рикIулра. Илдани ну мурталра гIеррурцусири.

- Рузес рехIрихьибхIели, хIечи хъарбарибси цаибил роль гьанбиркули бургар.

-Даргала драматургиялис хьулчи кабихьибси Рабадан Нуровла «Зулму» пьесализиб набчи Сабиятла роль хъарбарибсири.

Дила пикрили, бажардирикира ил роль ункъли бузахъес.

Кьабулрарира ну театрла гIяртистунала коллективли чула «хъалибарглизи». Илала гIергъи чум спектакль диуба, чум роль режиссёртани набчи хъардариба, гьанна гьанра хIебиркур.

- Театрлизи башути дарганти бахъалгъунти хIу чераэс, хIуни дурутачи лехIбизес хIерли бирар. Даргантала хIечи диги, гьайгьайрагу, бегIла халаси кьимат саби хIела гьамадли ахIенси бузерилизиб. Пачалихъла хIянчизартани сен-сен хIисаббариба хIела бузери?

-Наб Дагъистан Республикала халкьла гIяртисткала у гибси саби.

2001-ибил дусла сентябрьла 19-личиб Дагъиста Пачалихъла Советла хIукму хIясибли -ДР-ла машгьурси гIяртисткала, 2011 ибил дусла июньна 23-личиб биалли - РФ Президентла Указ хIясибли, РФ машгьурси гIяртисткала ура наб гибсири.

Нуша гъайдикIуси кабинетлизи Сапият ГIябдулмуслимовала гIямрула хьунул адам рухIнарухъун. Ил руилри Ереванна тетральный институт белчIунси ва Сапиятличил рарх рузуси Мусаева Загьидат Ибрагьимовна.

-Сапият ГIябдулмуслимова, даргала поэт А.Каймаразов хьунул адамлис викIуси кьяйда: «ХIу агарси юртлизир, гIямру хIейрар жагали, азир чирагъ алкалра шалахIебикIар хъали» даргала театрла сценара декIар-декIарти ролани дузахъули жагабирути ва шалабирути, хIечил бузути хьунул адамти лебни балас. Илдала уми дурили дигахъира.

-ХIуни бурусиличи кьабуллира. Нуша халати гIяртистуни гIямрулис ишар дузули дуэс гIямал бетаруси ахIен. Леб нушала театрлизиб гIяхIти гIяртисткаби. Нушала мякьлар иш Загьидат. ГIурилтала уми дурулра: Сапият, Загьидат, Салимат, Сакинат, Рашидат, Басират, СалихIят, ХIузаймат, ГIяйшат, Зарина, Сайгибат, Аминат, Муъминат (Сапият дарган ретаурси кIарахъан рурси сари).

-Сапият ГIябдулмуслимова, набчил ихтилатрухъес замана баргнилис хIед халаси баркалла. ХIела чархлизи Дурхъаси Ахърила ВегIли чIумаси арадеш хьурабараб, хIуни деркIибти дусмачи хIерхIеилли, хIянчиличи гъира имцIабиаб. Сценаличибад дарганти разибирахъули, арали калаби. ХIела рурсила рурси риштIал Алияни челябкьлализир хIулрукIахъаби.

Хьунул адамтала байрамличил театрлизиб бузути лебилра хьунул адамти мубаракдирулрая. Чархлизиб чIумаси арадешличил, мурталра уркIбазиб разидешличил, анкъилаб баракатличил гIямру деркIаба хIушани. Диаб даршути гIямру хIушала хъалибаргуназир. Сапиятра Загьидатра «дурибти гIяхти гъайлис баркалла» или дурабухъун.

Сапиятра Загьидатра гьуниббатурли, театрла режиссёр Мустапа ГIябдиевичличи ацIира.

–Нуша сегъунти къиянти шуртIразир дузулрал хIебалуси хIергар. Илкьяйда биалра театрла хIянчизарти репетициябира дирули урга-ургади спектакльтира чедиахъули бузули саби.

Сапият ГIябдулмуслимовагъунти пагьмукарти гIяртистуни республикала царалти театртазибра дебали камли саби. Ил Владикавказлизиб дураберкIибси «сцена без границ» фестивальличир бегIлара ункъли хьунул адамтала роль бузахъантала ургар цаибил мерличи лайикьрикибсири.

«Илини сценаличиб роль бузахъулицун ахIенну, сунела героиняла гIямруличил хIеррирули сари»,-илгъуна кьимат кабалтули саби Сапиятлис критикунани.

Р.Хубецовала «Нешла уркIи» спектакльлизибси неш Бахула роль бузахъес хъарбарибхIели, илала арадеш къулайли ахIенри. Нушала тилади чекасили, ил роль Сапиятли дебали халати устадешличил ва пагьмуличил бузахъес бажардирикиб. Илини сунела излумачила сценаличиб хъумкартур.

Гьаннала гIергъира Сапиятличи декIар-декIарти спектакльтазир ролани дузахъес хIерли сари. Мисаллис бурасли, Испанияла драматург Касокила «Галгуби тIашли дубкIар» спектакльлизибси нешла рольра илини бузахъуси саби. Рахли хатIа хIеркули виасли, Сапиятли даршличи гъамли спектакльлизир бутIакьяндешдариб. «Зулму», «Вершала неш», «Ца мукекила бегI пурс кьяца», «Нешла уркIи» -илди лерилра спектакльти гьандикихъесра гьамадси ахIен»,-буриб Мустапа ГIябдиевичли.