Книга 10-тӥ июне Эшъяськон юртын ортчиз \"Удмурт дунне\"

УЛОЗ КЫЛ, УЛОЗ ГАЗЕТ, УЛОЗ КНИГА

Трос шуныт но ӟеч кылъёс верамын вал книга сярысь но, удмуртъёслэн валтӥсь газетазы пӧртэм вакытъёсы ужамъёс сярысь но. «Удмурт дунне» газетлэн валтӥсь редакторез Зинаида Рябинина пусйиз: та уж – газетэз 100 ар ӵоже поттэмъёсты сӥлы карон но тау кылъёс веран. Энциклопедие пыриз 1735 нимтул, но книга бордын уж таин уг йылпумъяськы, азьланяз со электрон амалэн дасямын луоз, ватсанъёс но тупатонъёс пыртыса.

Оскон вань, удмуртъёслэн валтӥсь газетсылы сӥзьыса, зэмос энциклопедия но потоз. «Удмурт дуннелэн» 100 аръем историезъя энциклопедической справочниклы дунъет сётыса, Историяя, кылъя но литературая Удмурт институтэн кивалтӥсь Алексей Загребин пусйиз: сое дасянын та книга инъет луоз.

«Удмурт дунне» газетэн кема аръёс ӵоже кивалтӥз Алексей Шкляев. Газетлэсь историзэ «Войнаысь ивор» бордысен кутскон солэн сюлмаськеменыз кылдӥз. Алексей Петрович ик басьтӥськиз вал газетын азьвыл аръёсы ужамъёсъя но внештатной корреспондентъёсъя список дасян борды. А. Шкляев пусйиз: книгалэн дунлыкез – газетлэн историез 1915-тӥ арысен кутскемын.

Журналистъёслэн фестивалязы вуэм куноос но веразы книгалы синмаськемзэс. Фин-угор журналистъёслэн огазеяськонэнызы кивалтӥсь Николай Ишуткин верамъя, «Удмурт дунне» газет пӧртэм ужпумъёсъя азьпал радъёсын мынэ, тае возьматэ газетлэн дауръем историезлы сӥзем книга поттон но.

Вал мукет но вераськисьёс. Критик но литературовед Александр Шкляев, дауръем газетлы сӥзьыса, кылбур но лыдӟиз. «Кизили» журналлэн валтӥсь редакторез, «Советской «Удмуртия» газетын будэм писатель Ульфат Бадретдинов ас вакытаз ужамын воргорон журналистъёс пӧлын. Нош туннэ синмаськыса вера газетэз поттӥсь нылкышно журналистъёс сярысь. Тодосчилэн Риф Насибуллинлэн но трос ужъёсыз газетэн герӟаськемын. Лыдӟисьёслэн нимынызы газетчносты ӟечкылаз Ижысь Валентина Соколова. Визьмо, чебер, вераськыны дышетӥсь газет поттӥськоды, пе. Талэсь ӟеч кылъёс вералод на шат!