Литературая люкетаз ужасьёс, «Удмурт шаер»

Пӧртэм-пӧртэм изданиослэн усьтэм бамъёссы но ӵапак со сярысь верало. Тани, шуом, писатель проза удысын ужа ке, жанрзэ пӧртэмъяны тырше: огшоры гинэ ӧвӧл – яке со лекмыт-серемес верос («Шудтэмлык юрттӥз»), яке выжыкыл сӥё кузьмадёс («Пи-пи-пи»). Кыкез ик таос берло аръёсы «Кенеш» журналын потӥзы. Фёдор Пукрокович кузьмадёсъёссэ-повестьёссэ лыдӟисьёслы кузьма ни, «Выль синмын» бордысен, 1981-тӥ арысен кутскыса. Вашкала улонэн, язычествоен, мифологиен герӟаськемъёсыз потылӥзы «Инвожо» журналын, соос пӧлын пусйымонэсь луо «Шайтан воштэмъёс», «Шунды-мумы», «Инпи но дэймонъёс». Жаляса верано, прозаен произведениоссэ авторлы, книгае люкаса, «Кизили ныл» сяназэ, кияз кутыны ӧз кылды на.

«Егит дояркалы» нимам кылбурез, тодӥськомы, Г. Ганьков кырӟанлы пӧрмытӥз. Таӵе сайкыт мылкыдо, капчи шокась чуръёс бордысен кутскыса, Ф Пукроков лыдӟись доры вуттӥз кылбурен книгаоссэ: «Вылӥысен учкем потэ» (1969), «Думем тöл» (1973), «Сюресъёс» (1980). С. Зяблицев берыктэмен, устоосыз кылбуръёсыз ӟуч кылын но печатламын вал.

Лирика öрез Ф. Пукроковлэн пумен муромиз но паськытаз. Озьы со нырысьсэ удмурт литератураын кылдытӥз кылбурен роман-малпаськон – «Ошмес син». 1984-тӥ арын со 112 бамен потӥз «Удмуртия» издательствоын. Берлогес сое «Родниковое око» шуыса ӟуч кылэ берыктӥз А. Демьянов. Кылбурчилэн-философлэн пумтэм малпаськон нюжаосыз сое поэмаос борды кутскыто. Дуно аныкайзэ нош но нош буре вайыса, кылдытэ «Кытын-о тон, анай?» (2003) поэмазэ. Тае ӟуч кылэ берыктӥз со ик – А. Демьянов. Егитъёслы лыдӟыны автор дэмлаз «Шудтэль» поэмазэ. Таиз печатламын туэ «Удмурт ПЕН-клуб» альманахын.

Фёдор Пукрокович нылпиосыз но уг вунэты. Солэсь «Мар дунне вылын котьмарлэсь дуно?..» шуыса кутскись «Вордӥськем шаер» кылбурзэ-кырзанзэ котькудӥз тэтэ карись ныл яке пи но тодэ, дыр. Пичиослы кылбурчи кузьмаз «Милям дормы» (1994) книгазэ.

Огвакытэ, 1970-тӥ аръёслэн шоразы, Ф. Пукроков эшъяськылӥз республикаысьтымы Мунё театрен. В. Холин режиссёрен ӵош гожтӥзы но пуктӥзы нылпиослы ӟуч кылын куинь пьеса. Та бöрсьы кылбурчилэн Удмурт театрлы но ужаны мылкыдыз араз. «Корка пырон» спектакль сцена вылын 1984-тӥ арысен мынӥз, В. Короленко нимо Ӟуч драмтеатрын но пуктэмын вал.

Ӟуч кылэз умой тодэмез, философ луыса улонлэсь мур сӥоссэ бугыртыса учконэз юрттӥзы «Тайна трёх иллюзий» повестьсэ-исповедьзэ кылдытыны. (Тае со удмурт кылын но гожтӥз.) Калыклэн улоназ, колхоз производствое егитысен ик пыриськемез вуттӥзы очеркъёс, книгаос гожтонэ.

Литератураез эскерисьёс понна Ф. Пукроковлэн литературовед сямен гожтэмъёсыз но тодмо луо. Со учебникъёсысь М. Покчи-Петров но А. Ермолаев сярысь статьяосыз.