«Нарходза» өткен наурыз// Республикалық қоғамдық-саяси газет «Айқын»// 26 сәүір 2012ж.
Тұрар Рысқұлов атындағы Қазақ экономикалық университеті наурыз тойын атап өтті. «Нархоз» деген әйгілі атты иеленген бұл жоғары оқу орнының атағы бүгінгі таңда республика ғана емес, шетелдерге де мәлім. Негізінен, еліміздің экономика, қаржы саласының мамандарын дайындайтын университеттің түлектері қазір республиканың түкпір-түкпірінде қызмет етіп жүр.
Демек атағы алысқа тараған университетте өткізілетін іс-шараның барлығы да бүгінгі күнде студенттердің білімін шыңдап, жеткілікті тағылым-тәрбие алуға арналғанын айта кетуге тиіспіз. Университет басшылығының бастамасының өткізілген Наурыз тойы қызғылықты өткен шараның бірі болды. Ұлыстың ұлы күніне арналған мерекеде студенттер би билеп, өз өнерлерін көрсетті, елімізге белгілі әншілер әуелете шырқап ән салды. Қазақтың «Салтанат» би ансамблінің ұл-қыздары майыса билеп, жұртшылықты риза етті. Ал университет ректоры озат студенттерді алғысхатпен марапаттап, олардың өмір жолына сәттілік тіледі.
Біз бұл орайда аталған оқу орнының халықаралық білім бағдарламасы факультетінің наурыз мерекесіне бір кісідей ерекше дайындықпен келгенін айта кетуге тиіспіз. Бұлай айтуға да негіз бар. Өйткені факультет студенттері жақсы оқумен қатар, әртүрлі шараларға да белсене қатысып, жақсы нәтижелерге қол жеткізіп жүр. Биылғы оқу жылында факультеттің КВН командасы сахналық қойылым номинациясы бойынша бірінші орынды иемденді. Сондай-ақ факультетте Research Club, Student Business Agency, Cinema-Club, Business case-club, сонымен қатар америкалық Patriots футбол клубы құрылған. Халықаралық білім бағдарламасы факультетінің студенттері ағылшын тілінде өткен «КИМЭП жастар дебаты - 2012» біріншілігінде көзге түсіп, жүлдегерлер қатарынан көрінді. Әрине, мұның бәрі факультет деканы, экономика ғылымының докторы, профессор Айнагүл Амангелдіқызы Адамбекованың ұйымдастырушылық қабілетінің арқасында екенін айта кетуге тиіспіз. 2006, 2007, 2010 жылдары жоғары оқу орындарының үздік оқытушысы атағына ие болған ғалым студенттерге арналған 8 оқу кітабы мен оқу құралдарының авторы. 2010 жылы экономика саласы бойынша жастар арасындағы мемлекеттік сыйлықтың иегері атанған Айнагүл Амангелдіқызының еңбегін факультеттің бүгінгі жетістігімен байланыстырған лазым.
Өйткені факультеттің атын шығарып жүрген студенттер жетерлік. Атап айтар болсақ, Айдар Әбілғазин қалалық, республикалық «БҰҰ-ның жастар моделі Қазақстанда» байқауына қатысқан, Angry Birds зияткерлік командасының капитаны екенін айта кеткен жөн. Ал 1-курс студенті Данияр Бейсенов болашағынан зор үміт күттіретін студенттердің бірі, ол бірнеше рет халықаралық ғылыми-тәжірибелік конференцияларға қатысып, ЖОО арасындағы «Парламенттік жүйе» дебатына қатысып, І орынды жеңіп алған. Университеттің спорттық өміріне де белсене араласады, жақында ЖОО арасындағы баскетболдан өткен жарыста оның командасы ІІІ орынды жеңіп алды.
Факультеттің 3-курс студенті Ақтан Тауымбаев та - белсенді жастардың бірі. Ол ғылыми конференцияларға белсене араласып, Ресейде қаржы университтері арасында өткен халықаралық конференцияда ең белсенді алты жастың қатарына енгенін айта кетуіміз керек.
Осындай алымды да, шалымды, мықты, болашағынан мол үміт күттіретін студенттері бар университте наурыз мерекесін тойлау жыл сайын дәстүрге айналған. Университеттің жасыл алаңында өткен наурыз тойы сөйтіп, көпшіліктің есінде қалды. Наурыз тойына көптеген қонақтар келді. Қысқасы риза болып тарасты.
Берік БЕЙСЕНҰЛЫ
|
