69 ар ортчиз ке яке Кызьы Лёва, Марьёк но мукетъёс Йыр-визь дуннее вуылӥзы повесть-фэнтези

Мешокын кин ке пыф-пыф кариз. Онтипагай сое гадь бордаз ик ӝиптӥз но Лёва пала берытскыса вазиз:

- Я, табере пыдын...

- Кин отын? – вырись мешокез чакласа, пияшлэн йырсиосыз пежыр ӝутӥськизы.

Но песятай шунытак вазиз:

- Педя ӵушъял. Мынам покчи эше.

- Педя?

Кымесысьтызы фонарикъёссэс кысыса, вужеръёс кыштыр вамышъязы сюрес урдсытӥ. Нокин гинэ медаз дугдыты.

- Песятай, нош кызьы асьмеос лагере пыром, отын возьмаськисьёс сыло ук, - шыпыртӥз Лёва.

- Кенерез кыӵе, ӝужыт-а? – тунсыкъяськиз Онтипагай.

- О-о, ӝужыт, но пу маке. Эшшо...

- Мар эшшо?

- Видеокамераос вань, шуо...

- Эн сюлмаськы, пыром. Тон кыскись интыез гинэ ӝог шедьты. Пеймытын быгатод-а?

- Быгато, - оскытӥз Лёва.
* * *

Мани синъёссэ усьтыны выриз. Тач-тач лякиськем синлысъёсыз ӧз кылзӥське. Йырыз, карусельын туж зол бергам муртлэн выллем жӧлмамын. Сюлмыз шуген нылаш синъёссэ посӥз… яркыт чагыр ин чилектэм кадь югектӥз. Усьтэм синъёссэ Марьёк нош ик ворсано луиз.

- Кытын мон? – ас понназ малпаз нылаш. Огшап улэмез бӧрсьы синъёссэ дӥсьтытэк гинэ нош ик усьтыны выриз. Синлысъёсыз пыр чильпыраз ибам – сокем чылкыт, сокем чагыр…

- Кытын мон? – таяз рад ымдуръёсыз мырдэм кылӥськымон шыпыртӥзы. Нылаш пуксиз, котырзэ чаклаз. Тодмотэм инты, яркыт-вож писпуос, куакъёс, нош ачиз со сыӵе ик вож-вож но туж небыт турын вылын пуке. Паймымон шыпыт, укыр яркыт но лэйкась. Яке нылашлэн йырыз бергамен-а ваньмыз озьы потэ?

- Эй, кытын мон? – таяз рад черетскиз ни Марьёк. Со вискын пыдзэ кин ке бичатӥз. Нылаш куаляк луыса, пидесъёссэ гадь бордаз ӝиптӥз. Вутурын кадь лэйкась ожо вылысь со кырымпыдэсаз тэрымон пичи адямиез синйылтӥз.

- Тон кин? – паймиз нылаш.

- Ну, алангасар, воксё погмад ук! – йыркуро вазиз пичи адями, тыбыр сьӧрысьтыз чильпырась бурдъёссэ тупатыса. – Мон – Кылчин. Уд адӟиськы-а мар-а?

Пиёк нылаш шоры пыдэстэм чагыр синъёсыныз учкиз но пыртӥз адскись киосыныз вакчи штаниоссэ курткиз. Собере понназ нукыртӥз:

- Огпол но одӥг шуре кык пол пыремзы ӧй вал на, кытысь-марысь мынам йыр вылам усид на…

- Лагерьысь, - шудон мунё выллем пиёклэн нукыртэмез Манилы тунсыко потӥз, - Нош Кылчинъёс вань шат?

- Уд адӟиськы-а мар-а, - нош ик ӟургетӥз пиёк, - Акыльтӥ ни ваньмызлы валэктыса...

- Кинлы – ваньмызлы?

- Ма, ветло татӥ олокыӵеосыз но, я бурдъёсме кыскаса эскеро, я кӧтам чиньыосынызы донгало, я пыдъёсынызы тани пачкатӥзы, алангасаръёс ик вань, - куатаськем тусо луиз Кылчин. – Шутэтско шуисько ни вал, кытысь вуид на? Уг валаськы: мар тӥледлы кулэ? Асьтэос асьтэ выжыдылэсь куштӥськиды но, от ведь, маке курадӟиськоды на... Я, тон берпуметӥез ни, дыр…

Марьёк номыре ӧз вала. Котыр лейкась дуннеез эшшо чаклаз на. Кудпалан меда лагерез?

- Кылчин, кытын мон? Кызьы татчы шеди, а?

- О-о, кутске ини, - йыр бордаз кутӥськиз пияш. – Кылзы: тон –Йыр-визь дуннеын. Тӥляд, удмуртъёслэн, Йыр-визь дуннеязы. Татчы вуид кыскись интые шедьыса, лушкем кылъёсты вераса, валад-а?

- Ӧй.

- Валалод ай, - киыныз шонтӥз Кылчин. – Кылзы сак: татысь потыны уд быгаты, сизьым тубат пыр ортчытэк. Сизьым тубатэз пырпотӥд ке… - Кылчин жаляса учкиз нылаш шоры, - потод.

- Ой-ёй-ёй, - лулӟиз Кылчин, - Эшшо огпол кылзы: тон - Йыр-визь дуннеын. Татын ӧвӧл нокыӵе лагерьёс. Татын - сизьым тубатъёс вылын - вашкала удмуртъёслэн осконъёссы, сюлмаськонъёссы, инмаръёссы… Татысь потон понна со тубатъёстӥ ортчоно. Валад-а?

- Уг поты мынам номыре утчаме, - бӧрдыны дась ни вал Марьёк. – Уд ке вераськы кытын лагере, ачим шедьто.

Нылаш лӧбак султӥз но азьлань вамыштӥз. Яркыт-вож ожо батут выллем тэтчытӥз сое. Мани пичи гинэ ӧз усьы. Солань-талань учкиз – котырысьтыз нюлэс пеймыт кариськиз, эшшо юнгес лэйканы ӧдъяз.

- Мар монэн? Оло, висьыны уси? – йырыз бергаса, нылаш нош ик турын вылэ лэзиськиз.

- Ну, марлы тӥ сыӵеесь, адямиос? - керӟег ӧпкелиз Кылчин. - Тон – Йыр-визь дуннеын! Татысь огшоры потыны уг луы. Тыныд аслыд тунсыко ӧвӧл шат Йыр-визь дунеетӥ калтыртыны? Нош удалтӥз ке, Быдӟым книгаез шедьтыны, лыдӟыны? Тынэсьтыд азьвыл вуэм пияшъёслы ваньмыз со туж тунсыко потӥз.

- Кыӵе пияшъёслы?

- Геня но Ондӥ шуизы кадь вал.

- Геня но Ондӥ? Милям лагерьысьтымы?

- Тӥни, иське, кызьы тон татчы шедид, - йырыныз сэзъяз Кылчин, - Лушкем кыл верамзэс кылӥд но ачид но сьӧразы кошконо кариськид. Одӥг шуре кык пол пыриды, иське...

- Нош кытын пиос? - Кылчинэз пумозяз мырдэм кылзӥз нылаш.

- Уг тодӥськы. Аслэсьтым ужме мон лэсьтӥ, дунне гожось соосты вуттӥ, нош отӥяз кыӵе мыно ни ужъёссы – мынам сюлмаськонэ ӧвӧл со.

- Келя монэ но! - ӝотрак кариз Марьёк.

- Ну вот, азьвыл ик озьы кулэ вал, - шумпотӥз Кылчин. - Кут монэ киосыд вылэ, бурдъёсме погмамед сэрен лобеме уз луы.

Марьёк киоссэ турын пӧлы лэзиз. Пиёк солэн чиньыосыз борды кырмиськыса усьтыр-табыр тубиз но кырымпыдэсаз пуксиз.

- Я, табере ну.

Кыӵе пичи, капчи но мусо, ас понназ пальыштӥз Мани, Кылдысинэз чакласа, шлач гинэ кар но воксё паньгалоз. Шуак тодаз лыктӥз Италмаслэн Мани сярысь верамез: “Тани тонэ лушкасалзы ке, кисыязы поныса, соку валамон...” Озьыен, тӥни кытчы пыризы пиос. Нокин соосты ӧз лушка, соос кыскись интые шедьыса, Йыр-визь дуннее вуизы. Марьёк но – сьӧразы ик. Чальгес сутоно вал пиосты, соосын Манилы шулдыргес луысал.

- Татӥ азьлань мын, татӥ – бур пала. Табере – паллян пала, - трон вылын пукись эксэй выллем визьма Кылчин. Марьёк мынэ. Тэтчытъясь турынлы пумен дыше. Кӧня мынэ ни - котыраз номыр уг воштӥськы, нюлэс гинэ пэймытгес но пеймытгес луэ.

- Асьмеос умойтэм мынӥськом, дыр, - сюлэмшуго вазе нылаш, - Тэльысь потэм интые мургес пыриськом ук.

- Нош кин тыныд шуиз, нюлэскысь потыны кулэ шуыса? - чагыр синъёсыныз кырмыштӥз Кылчин. - Мын, мын, ойдо.

Эшшо дас минут вамышъямзы бӧрсьы нылаш тыпак дугдӥз:

- Всё, уг быгатӥськы, киосы жадизы, тон укыр секыт, - Кылчинэз турын пӧлы лэзиз со. Пияш капчияк гинэ бурдъёсыныз лопыртӥз, вылӥе ӝутӥськиз.

- Ну вот, бурдъёсы бурмизы, - кескич пальыштӥз со.

Марьёк жадем суйёссэ посӥз:

- Милям шуо: Кылчин адямиез шуг-секытъёслэсь, адӟонлэсь уте, нош тон воксё мукет вылэмед…

- Кызьы мукет? - ӝожомиз пиёк, - Мон ке ӧй луысал, тон со кыллён интыяд ик кулысалыд ни! Нырысь синъёсыд кысысалзы, собере – йырыд, воксё шузимемед бере – сюлмыд. Мон юрттытэк тон ноку ӧй вуысал Йыр-визь дуннелэн кунгожез доры. Мон тонэ быронлэсь ути, мон тыныд дорад бертыны луонлык сётӥсько! Нош тон… Нош тон… Нокин но монэ сыӵе ӧз ултӥя на...

- Вождэ эн вай, мон янгышен... - пичи пиёк шоры жалясь тусын учкиз Марьёк.

- Ма бен, кылзы ма азьланяз кароно, - буйгатскиз, лэся, Кылчин. - Сизьым тубатэз тон монтэк ортчод ни. Огнад. Пӧрмытӥд ке – дан тыныд но шудо улон.

- Нош ӧй ке?

- Ӧд ке, ӧд ке... Малы со сярысь малпаськонэз? Тынэсьтыд азьвыл кошкем пиослэн сыӵе малпан йыразы но ӧй вал. Соос киосынынызы гинэ шоназы, тэтчаса ик ява азьлань кошкизы: ваньзэ вормом, ваньзэ вормом, хи-хик... - Кылчин пичи кикыосыныз бамзэ ворсаса пызыкъяз но рос-просгес кариськиз:

- Я, ӟеч лу! Али паллян пала кожод на, отӥяз вуод ни. Нош мыным берытсконо: кин тодэ, оло, кыскись инты эшшо кинэ ке вуттоз. Одӥг шуре кык пол пырись ӧвӧл шуо ке но.

Кылчин оп шуытозь вылӥе-вылӥе ӝутӥськиз но чылкыт ин пушкын сылмыны ӧдъяз. Но чагыр вужерез малы ке сьӧд виштылы пӧрмиз. “Сизьым му пыр мед виялод!” тулкымен-тулкымен шуккиськиз Кылчинлэн юзырес луэм куараез. Нылаш ӝогак султӥз, дэремзэ тупатӥз но паллян пала кожиз. Пеймыт-вож тэль капка сямен кыкнапалтӥз усьтӥськиз. Инвисын адӟиськиз яркыт-ӵуж шунды. Тӧдь-тӧдь мамык вылэ лёгаськыса, Марьёк сопала вамыштӥз.

Оло, ваньмыз та – уйвӧт? - малпаз нылаш, небыт мамык вылтӥ мынонъяз. Соку со кемагес мед кыстӥськоз. Макем синмаськымон удмуртъёслэн Йыр-визь дуннезы! Марьёк ноку ӧй малпасал. Тӥни отын, яркыт шунды дорын, возьма, дыр, сое Геняез. Та аспӧртэм дуннеын со одно синйылтоз Марьёкез, синйылтоз но соку ик яратоз. Нырысь учкемен. Киноосын кадь. Лейкась сюрес кузя соос мынозы кыдёке-кыдёке.

Нош мар меда каро ни анай-атаез? Марьёклэн тусыз шуак пильмаськиз. Нылзэс ыштыса, кытчы пырон инты уг шедьто, луоз. Манилэн син азяз пуксиз мусо чебер анаез, визьмо, мултэс вераськисьтэм атаез. Кызьы соос сярысь вунэтод?! Оло, берытсконо? Нылаш тыпак дугдӥз но мышсэ учкиз. Тӧдьы-тӧдьы мамык сьӧрын нюлэслэн вужерыз но уг адӟиськы. Номыр ӧй вал кадь.

- Тон – Йыр-визь дуннеын, тӥляд, удмуртъёслэн, Йыр-визь дуннеязы, - пеляз нош ик шуккиськизы Кылчинлэн кылъёсыз. - Татысь потыны уд быгаты сизьым тубат пыр ортчытэк...

Нылаш берен шунды пала берытскиз: ӝоггес шедьтоно со сизьым тубатэз...

Нош шунды ялан вылэгес но вылэгес ӝутӥське. Солэн яркытэз но шунытэз Манилэсь мылкыдзэ сьӧраз, чагыр инэ ӝутэ кадь. Кельыт-ӵуж шар шоры нылаш пырак учке, но, паймоно кадь, синъёсыз уг мальдо. Пумен-пумен шунды улын кылдэ чильпырась ӵуж вужер. Собере со вужер чебер нылкышнолы пӧрме. Кузь дэремез зарниен кисьтаське. Кышномуртлэн киосыз, вӧсяськись муртлэн кадь, инэ ӝутэмын. Но… уг, со уг вӧсяськы, аслаз киосыз вылын, кӧкыын выллем, лейкатэ Шундыез.

- Кыӵе чебер! – пачылась мылкыдзэ возьыны чидатэк вазиз Мини. – Кин тӥ?

- Шунды Мумы, - лякытак вазиз кышномурт но нуныезлэсь пиштӥсь йырзэ киыныз маялтӥз. – Эк, ерпечка, эшшо ке бичиятыны выре, шулдырак серектӥз но Шундылэн шудӥсь тылсиосызлэсь палэнскиз.

- Шундылэн анаез вань шат? - ӧз оскы Мани.

- Ваньмызлэн анайзы вань: Музъемлэн, Шундылэн, Толэзьлэн, тынад…

- Нош мон тонэ адӟылӥ ни, - музейысь Шунды Мумы тусо пельугыез синйылтэмзэ тодаз вайиз Мани, - тон отын кортлэсь лэсьтэмын, вашкала удмурт кибашлы лэсьтэм, туж чебер. Но улонын тон чебергес…

Шунды Мумы пальыштӥз но Мани доры лаптӥськыса, синъёсаз шуныт учкиз:

- Тон но – чебер.

- Ӧвӧл, - возьдаськиз нылаш, - Монэ ваньзы серекъяло гинэ, мон – укыр лапег, ымнырам трос-трос пужыез, ныры но… чатырес.

Шунды Мумылэн син котыраз векчи-векчи сиосыз кылдӥзы, со капчияк серектӥз:

- Озьыен, ӝужыт, пужытэм но кузь ныро адями тынэсьтыд чебергес?

- Уг тодӥськы…

- Эк, адямиос, адямиос… - лулӟиз Шунды Мумы, собере Манилэн ныр йылаз лякытак тэшкыльтӥз, - Тон туж мусо. Нош чеберез котькудӥзлэн аслаз, валад-а?

- Тодӥсько. Но мон шоры нокин уг учкы, отӥгес каро, - чагиськиз нылаш.

- Тынад чеберед тани татын, сюлэмад, - Шунды Мумы шунытак йӧтскиз Манилэн мӧляяз. – Сое адӟоз визьмоез гинэ. Нош шузиос тыныд кулэ ӧвӧл, озьы-а? – нош ик серектӥз Шунды Мумы.

Марьёклы сыӵе капчи луиз.

- Озьы, - пальыштӥз со.

Зарниен пиштӥсь кышномурт чеберак султӥз но тӧдьы пилемъёс вылтӥ тэтчась Шундызэ кияз кутӥз. Пиштӥсь ерпечка пумитъяськыны выриз ик, собере нуныяськись писэй выллем анаез борды ӝиптӥськиз. Солэн йырысьтыз одӥгзэ пиштӥсь тылсизэ ишкалтыса, Шунды Мумы Манилы сётӥз:

- Та зарни сиез чыртывесь интыын нуллы, туж секыт дыръя гинэ потты, со одно юрттоз.

Озьы шуыса, Шунды Мумы аслаз ерпечка нуныеныз тӧдьы бус пӧлы сылмиз.

Марьёк паймеменыз ымзэ усьтыса огшап сылӥз на. Собере киысьтыз зарни си шоры учкиз, сое чырты бордаз думылӥз но воротникез улэ ватӥз. Я, табере кытчы мыноно?
* * *

Пеймыт уй пушкы выем лагерьын шыпыт. Лёва но Онтипагай лагере пырон капка доры, куак улэ, интыяськизы. Капка вӧзын ик возьмаськисьлэн коркаез. Вӧзаз, юбо вылын, адӟиське пичи видеокамера. Со меӵак капка шоры мертамын.

Чиньы тэрымон виско-виско кенер сьӧртӥ, уй лампа ултӥ, солань-талань ветлӥсь адями адӟиськиз. Ачиз возьмаськись, лэся. Огназ? Ӧвӧл, тӥни эшшо одӥг вужер. Кӧшкемыт учыръёс бере огназлы шимес потэм, вылды.

Онтипагай сак учке: пунызы ӧвӧл. Туж умой. Песятай штани кисыысьтыз консерва банка поттӥз, мукет кисыысьтыз эшшо одӥгзэ. Та банкаосты тюккалэн ваче керттылӥз но Лёвалы сётӥз:

- Умой кут, эн ӵашеты, - вазиз со нунокезлы. Собере киосаз пӧзьы понӥз но мешокысьтыз пыф-пыф карись ӵушъялзэ поттӥз, тюккаллэсь пумзэ венёлэн пыдаз думылӥз.

- Вождэ эн вайы, эше, - мырдэм кылӥськымон шыпыртӥз песятай. – Милемлы огдырлы кошконо луоз. Нош тон тӥни отчы, со корка доры мынод. Отын тонэ лёлёен сюдозы.

Озьы вераса, Онтипагай ӵушъялэз лагере нуись сюрес урдсы интыяз, ачиз кыштыр гинэ берен куак улэ гылӟиз.

- Я, пие, тон дась-а? – Лёва шоры кырмыштӥз Онтипагай.

- Дась, - юн вазиз пияш.

- Соку, ойдо…

Пеймыт куакъёс пӧлы ватӥськем Лёва азьвыл ик дасям пичи изэн корка шоры лэзиз. Тып! вазиз ӵапак укно янак борды шуккиськем из. Онтипагай но Лёва со вискын, куакъёслэн вужеразы ватскыса, бызизы кенер кузяна, лагерьлэн мышпалаз кариськизы, нош ик тась-тась выдӥзы турын пӧлы. Сак карем пельёсынызы кылӥзы: корка ӧс усьтӥськиз.

- Кин со? – кылӥськиз возьмаськисьлэн кураез.

- Мар отын Иллёк? – вазиз мукет куара.

- Ӧйтӧд, номыр уг адӟиськы.

- Ма, писпуысь улмо усиз, дыр, - буйгатӥз юлтошез.

Воргоронъёс, капка азьтӥзы котырскыса, тамаксэс аратыны малпазы гинэ... Шӧдтэк-шорысь сюрес палась кылтыр-колтыр кылӥськиз. Куалектэменызы кыкназы но корка борддоръёс борды ӝиптӥськизы. Колтыр карыса, кин ке капка дорозь ик вуиз но, пичи но дугдылытэк, кенер пыртӥ ортчиз, лэся: азбарын колтрак кариз на но... неномыртэм шыпыт луиз. Возьмаськисьёслэн йыркузы ик ӝутӥськиз кадь, кыкназы но синкабакъёссы золтӥськымон учко азбарысь лампалэн югдэмез улэ. Тани-тани отын адӟиськоз йыртэмасьлэн шимес вужерез. Иллёк юнгес кырмиз кисыысьтыз пистолетсэ. Нош юлтошезлэн киосыз ыгы кадь возизы ни корка вӧзы пыкъям лопата ныдэз. Я, матэгес мед лыктоз синазькыль, соос сое уть-мать ожалтозы. Иллёк и-ийа! шуыса кеськыны дась ни вал, но… сьӧсь изьвер интые югыт азе пичи комок питырскиз. Огшап интыяз сылӥз, зынъяськиз но пичи пыдъёсыныз токыль-токыль карыса корказь пала питыраз. Бераз думылэм банкаослэн колтыртэмзы солы нокыӵе ик ӧз пот кадь.

Возьмаськисьёс огшап шып улӥзы. Нырысь ик ӧз чида Иллёк:

- Эй, Васи, ӵушъял, лэся, ук, хе-хе-хе, - серекъяны ӧдъяз со.

Юлтошез, корка борды урдылэм писъёс вамен канжаськыса, кияз кырмем лопатаеныз валче корказь пала пограз.

- Ухо-хо… - серемзэ возьыны ӧз быгаты со но.

- Вот, изверь ке изьверь! Вала ведь, кин солы юрттыны быгатоз, хе-хе-хе, хо-хо-хо, - серекъяса Иллёкен Васи ӵушъяллы юрттыны дыртӥзы. – Жагез пыд улэ куяло угось, отчы шедем, мискинь… Ма-ма-ма, юромо пыдаз думылэмын, лэся, вот йӧнтэмъёс! – муспотон ӵушъяллэсь пыдъёссэ мозмытонъязы ботьыртӥзы пиосмуртъёс. Ужзы сярысь соос огдырлы вунэтӥзы, шӧдске, пичи пиос сямен ӵушъялпи котыр бергазы, уй кунозэс корка пыртыса, пакетысь йӧлзэс сётӥзы. Ӧз шӧдэ угось: ӵапак тазьы вырон сяменызы лагере кыштыр гинэ пыриз кык адями. Туж капчиен, туж огшоры: одӥгез, зӧкезгес, котомкаысьтыз кӧня ке полэс куасалляськись тубатсэ поттӥз, кенер борды пыкъяз, со тубатъя нырысь ӝутӥськиз векчиез вужер, собере зӧкезгес. Клоп, клоп, тэтчазы соос турын пӧлы. Собере векчиезгес вужер, музъем дорозь куасалскыса, дыртӥз пыдлось улмопуос пала, зӧкезгес, кияз мешокен, – сьӧраз.

- Тани со, - шыпыртӥз Лёва, - тодмо скамья доры вуыса.

– Я, ӧз шӧдэ кадь. Тау Педямылы, - вазиз песятай, Лёвик вӧзы интыяськыса. – Тон умой чаклад-а,ӧд янгыша?

- Ӧй, песятай, - скамьялэсь лондылэм буёлзэ киосыныз эскериз пияш, - Та со. Нош тани татын Марьёк пукиз.

Онтипагай но Лёва номыр вазьытэк интыяськизы скамья вылэ. Йырысьтыз шлем выллем изьызэ куштыса, песятай учкиз пияш шоры:

- Оло, мылкыдыд воштӥськиз? Оло, берен берытсконо, шуныт корка, шуныт валесэ?

- Мар тон, песятай, - йырыз кур луиз Лёвалэн. – Ойдо, тон монэ татын гинэ возьмалод, ява, нош мон кошки: Инмар, Кылдысин….

- Сыл ай, сыл, эк-кой тон кыӵе, ӵапак мынам егит дыры, ява, - пурысьтым йырсиоссэ берен изьы улаз донгаз Онтипагай. - Ӵошен мыном. Йырысьтыд фонариктэ юнгес кут, медаз усьы… Я, ойдо: Инмар, Кылдысин, Куазь….

Шуак ваньмыз шуласа берганы ӧдъяз. Секунд куспын скамьяын пукись вужеръёс ышизы. Зуп! бервылазы усиз сэзъяськись вайысь улмо. Но капка палась пичи коркан сое нокин ӧз кылы. Иллёк но Васи, пичи дыръязы сямен мыняса, чаклазы йӧл тяпкетӥсь Педяез.
* * *

Мани ялан вамышъя тӧдь мамык вылтӥ. Кытчы – ачиз но уг вала. Я бур пала коже, я паллян пала – пумтэм тӧдь-тӧдь улос. Улӥын, вылӥын – котькытын. Нылаш пыд улысьтыз мамыкез кырмыны выриз, но киосаз номыр ӧз шедьы. Со гинэ ӧвӧл, чиньыосыз номыре ӧз шӧдэ – пӧсь но, кезьыт но ӧвӧл кадь. Номыр ӧвӧл! Нылаш нош ик котырзэ чаклаз. Коть янгышен ке но, коть одӥг ке но вишты луысал ке! Мальдӥсь тӧдьылэсь синъёс ӝоген жадьыны ӧдъязы, йырыз поромиз.

- Э-э-эй! – кеськиз нылаш. Но, паймоно кадь, куараез но ӧз шуккиськы, ваньзэ пушказ ньылӥз тӧдь-тӧдь мамык.

Суреда, лэсьты вал татчы мар мылыд потэ, - ас понназ малпаське Марьёк, - тӧдьы-тӧдьы ӧвӧлтэме кельты вал кыӵе ке пытьы. Бен, солэн Артиысь басьтэм туфлиезлэн туж мудрон пытьыез. Нылаш огинтыяз тэтчиз но палэнскиз, мамык вылэ чебер пытьы одно кыльыны кулэ, но… номыр ӧвӧл.

- Кыӵе мӧзмыт! Кыӵе шонертэм! – кеськиз нылаш но… сялӟиськиз. Дыльдыез тёпак усиз пыд улаз, бӧрсяз – номыр ӧз кыльы! Пичи-пичи вишты ке но!

- Ой-ёй-ёй, - кесяськыса, нылаш вань кужмысьтыз азьлань бызиз.

Жадьытозяз бызиз. Соку гинэ кыдёкын-кыдёкын адӟиськиз чагыр инвис. Сюлэмлэсь пыдлось сиоссэ вешаса кадь, кылӥськиз туж чебер гур. Крезен шудо, лэся. Мани шумпотӥз: озьыен, отын адямиос вань! Жадемзэ вунэтыса, нылаш дыртӥз крезьгур пала. Азяз, выжыкылын кадь, ӝутӥськиз турлы-турлы буёло вуюись.

Крезьгур воксё матын, тӥни отын, кылӥське ни! Нылаш бызиз мамык пӧлын адӟиськись вужер доры. Ма та? Крезь. Зэмос удмурт крезь! Но соин нокин уг шуды, крезьлэн сиосыз асьсэос ӝутъясько-лэзисько. Таӵезэ Манилэн адӟемез ӧй вал на.

- Эй, кызьы со шудэ? – тунсыкъяськиз нылаш. – Кыӵе сыӵе амалъя?

Нокин ӧз вазьы. Марьёк нош ик долказ крезь шоры. Таяз рад, матэгес кариськыса, синйылтӥз пичи гинэ зор шапыкъёсты. Соос, кыӵе ке асьсэлы гинэ тупась радлыкъя, крезь пушкысь пото, выллань ӝутӥсько.

- Вот технологиос! – паймеменыз шокыштӥз нылаш. – Мае но уд адӟы Йыр-визь дуннеысь! Ву шапыкъёс крезен шудо! Нылаш выллань ӝутӥськись шапыкъёсты синъёсыныз келяз но пачылась мылкыдзэ возьыны ӧз быгаты ни:

- Охо, кыӵе чебер! Вот зол! – инбам шоры жальмаз со. Крезьысь потэм ву шапыкъёс отын аспӧртэм суредъёс кылдытӥллям. Соос, мозаика выллем, секундлы быдэ вошъясько, крезьысь кыстӥськись чебер гуръя якто, лэся.

Кӧня пукиз нылаш крезьгурен но инмысь суредъёсын кудӟыса, ӧйтӧд. Малы ке тодаз вайиз песянаезлэсь Инву утчан гур сярысь мадьылэмзэ. Оло, ӵапак та ик вань Инву утчан гур, аслэсьтыз ачиз юалляз нылаш.

Пумен-пумен крезь шудэмысь дугдӥз. Чагыр ин син куспын бусаськиз, кытысь ке вуизы сьӧд пилемъёс, воксё зэмос улонын кадь чилектӥз, куаш-куаш гудыртӥз но ведраысь музэн зорыны ӧдъяз.

- Ой, крезь котмоз! – инструментэз маин ке шобыртыны чакласа, утчаськиз нылаш. Номыре шедьтымтэысьтыз, вылысьтыз векчи кофтазэ куштӥз, крезь вылэ золъяз.

Но кык секунд куспын ваньмыз тютьырмиз.

Зор макем ӝог вуиз, сокем ик ӝог кошкиз. Кофтазэ крезь вылысь басьтыса, нылаш зар-зар бӧрдыны дась вал. Инструментлэн пу мугорыз син куспын тӧрнам, сиосыз чигылӥллям. Быдэс улытозяз нылашлы нырысьсэ, дыр, сокем жаль потӥз лултэм арбери. Бен, 13 арес тырмытозяз солэн трос ыштонъёсыз вал ни: туж чебер льӧль сотикез вуэ усиз, тужгес яратоно дэремезлэсь адӟиськон палзэ кесиз, Выль арлы витем смартфон ӧз кузьмалэ, компьютерез вирусъёсын сэрен воксё лябӟиз, нош выльзэ ум басьтэ шуизы, скрипказэ нылаш ачиз пыдлогес ватӥз, соин шудыны мылкыдыз малы ке ӧз тырмы… Но ваньмыз со крезьлэн тӥяськемез вӧзын номыр кадь ӧвӧл!

Нылаш крезь сиосты золъяны выриз. Ӧз пӧрмы. Озьыен, Инву утчан гур ноку уз чузъяськы?!

- Эй! Вань, дыр, ук та дуннеын кин ке валась мурт? – котыр эскериськыса, кеськиз нылаш. - Малы сыӵе арбериез чакласьтэк кельтӥды? Кызьы табере сое тупатод на?

Валамон ини, нокин ӧз вазьы. Марьёк викыштӥз. Кофтаен биням инструментэз интыяз понӥз но кытчы синъёсыз учко вамыштӥз. Малы ке туж ӝож, туж вӧсь… Тодаз вайиз дорысьтыз койка улэ ватэм скрипказэ. Вот бертӥз ке, поттоз сое, оло, озьы ик шудыны пӧрмытоз. Пӧрмытоз, одно пӧрмытоз!

Озьы малпаса, нылаш пичияк буйгаз, котырзэ чаклаз. Шонер-а мынэ со? Кытысь меда Геняез но Ондӥез шедьтоно?

Малпаськыса вамышъянъяз Мани шур доры вуиз. Ярдуръёсы Кам выллем шуккиськись тулкымъёс солэсь ӝож малпанъёссэ утыр ик уллязы. Табере кытчы? Выж но, пыж но ӧвӧл. Озьыен, нылаш воксё йыромиз. Но со вискын Марьёк синйылтӥз тулкымъёс вылын лейкась ӵӧжез.

- Вити, вити, вити… - ӧтиз нылаш. Ӵӧж тае гинэ возьмам, шӧдске. Марьёк доры оп шуытозь вуиз. Ӧвӧл, песянаезлэн азбараз лыть-лать поръясь ӵӧжлы со воксё уг кельшы. Укыр бадӟым. Улэп но ӧвӧл, лэся. Ма, пыж ук со! Нылаш ярдур борды тач-тач няняськем ӵӧжез киыныз исаз. Пулэсь-а мар-а, тыбыр вылаз рос-прос инъям ӟусъёсыз но вань. Кыӵе тунсыко!

Нылаш ӵӧж вылэ тубыны дыртӥз, ӟус вылэ интыяськиз гинэ - азяз шедем тодмо арбериез адӟыса, черетскиз:

- Телефон! Генялэн телефонэз!

Шумпотэменыз нылаш пыж вылысь пичи гинэ ӧз палды. Зэм но, артысь ӟус улын адӟиськиз пияшлэн вунэтэм арбериез. Марьёк ӝогак сое поттӥз. Озьыен, нылаш ӧз йыромы! Озьыен, пиос но та ӵож вылын вал! Озьыен, Марьёк соосты одно шедьтоз!

Зэм, телефон тӥяськемын вылэм, пиялаез пилиськем. Ойдо, ӵок, со понна Мани табере тодэ: со шонер сюрес вылын! Сьӧд вылын горд гожо телефон зэмзэ но Генялэн, соин вераськемзэ нылаш кӧня ке пол адӟылӥз!

Таш! Зуркалскиз пыж. Нылаш мырдэм кырмиськыса вуттӥз. Учке но – ӵӧж-пыж сое мукет ярдурозь вуттэм ни. Татын ваньмыз туж яркыт но чебер: азьпалан ӵуж-ӵуж сяськаяськись возьёс, кыдёкынгес – суредам кадь сыло кызьпуос, пелез шумпотто уӵы гуръёс, висказ тачыртӥсь ӟозъёс… Бурдъяськем мылкыдо Марьёк пыж вылысь васькыны дыртӥз. Но, укыр дыртэменыз-а, мукет мугъёсын-а, кисыяз пукись аслаз телефонэз тюак усиз. Ярам, ву дорозь ӧз вуы, ӵӧжлэн вӧлэм бурдъёсыз борды чуказ. Нылаш телефонзэ басьтыны дыртӥз (связь кылдӥз ке, одно ик анай-атаезлы жингыртоз, медаз сюлмаське). Но… Ӵӧж, малэсь ке кышкатскыса кадь, ярдур бордысь шуак палэнскиз, мур интые кошкиз.

- Вити, вити… - либатыса ӧтиз нылаш. Ӵӧж-пыж нокыӵе ик ӧз кариськы, ас котыртӥз берытскиз но мукет ярдур пала кошкиз.

- Э-эй, сыл! – кеськиз нылаш. – Телефонме гинэ басьто! Но йӧспӧртэм техника сое кылэм но ӧз кары. Кин ке вылӥысен, пульт кутыса, ӵӧжез ас сяменыз ужатэм кадь. Кӧтыз ӝожен, нылаш пыд улысьтыз сюй комокез ӵыжиз. Юнме. Туфлиезлэн чукатон еэз тӥялскиз, Марьёклэн пыдкукез палдӥз. Ну вот, кызьы табере тупатод? Нылаш туфлизэ берен кутчаз, но еэн юнматымтэ маке со мунчое потан сланцылы пӧрмиз… Шлач,-шлач. Эх… Но гольык пыд уд мыны ук! Азяз вӧлдӥськем чебер возь но табере сокем чебер ӧз пот ини: телефонэз ӧвӧл, пыдкуез кеськемын, нош сюлмыз… Сюлмыз малы ке сыӵе шуг… Я мар со нырзэ кыскаса пуке? Ӝоггес шедьтоно пиосты! Нылаш италмасъёс пӧлы вамыштӥз.

Тодмо кырӟан берга Марьёклэн йыраз. Тодысалзы ке эшъёсыз, макем трос италмас татын. Сыӵезэ Марьёклэн адӟемез ӧй вал на. Лэсьты вал фотография, сэлфи, келя вал лагерьысь нылъёслы, Италмаслы, Наталлялы, собере пукты вал контактэ – ваньзы-ваньзы мед адӟозы.

Кеськем пыдкутчанзэ Мани модосъёсын юнматыны выриз. Пӧрмиз кадь. Но турын пӧлтӥ мынонъяз, пыдкукез нош ик палдӥз. Йырыз курен Марьёк туфлизэ ик кыдёке сэрпалтӥз. Ӵок, мыноз гольык пыд. Татын турын сыӵе небыт, песянаезлэн ыжгон носкиез кадь. Нылаш малы ке оскиз: кема мыноно уз луы ни, ӝоген, тӥни со кызьпуос сьӧрын, адӟиськозы Геняен Ондӥ. Но кызьпуос сьӧрын вал эшшо кызьпуос, собере нош ик италмас, собере нош кызьпуос... Нылаш жадиз. Пыдъёсыз нярӟизы, кӧтыз сюманы ӧдъяз. Кызьпуослэн сайулазы пуксьыса, со синъёссэ кыниз. Ма меда али ужало лагерьын? Маин сюдо? Кӧня дыр ортчиз татчы шедемез дырысен? Нош мар малпало анай-атаез? Сое ыштыса, кытчы пырон инты уг шедьто яке та сярысь уг тодо на? Нош песянай? Песянай котьку сямен ческыт перепечъёссэ пыже, дыр. Одӥгзэ ке но али си вал…