Оьрму лажин кiялану ва чiявучин бусравну

На КПСС-рал райкомрай секретарьну зий, сайки ацIра шин дурссар. Мий дия ттул оьрмулуву яла гуж бишин шайсса, даву дан гъира бусса, дуллалимур канища дуккайсса шинну. Цалчинма секретарьну му чIумал ия СумбатIлиясса Сутаев Султи Закарьяевич, хъинну ххуйну кьамулгу бувнав Новолакрая бувкIсса на, гъирарай зийгу байбивхьуссияв.

ЧIал къавхьуну гьалмахчу Сутаев С.З. МахIачкъалалив цамур даврийн увцуна, райондалингу гава Новолакрая увкIуна ХIусманов Аьвдулжалал Рамазанович. Му ттун гилува кIулссия. Аьвдулжалал ия хъинну дакI марцIсса, инсаннан хъинбала бан хьхьичIунсса, къаччан бикIан бан махъаллилсса, даврил чулухуннайсса тIалавшинна хъуннасса инсан. Ттущал райкомрай зий бивкIсса инсантуралгу Аьвдулжалаллуя ххуйсса бакъа къаучинтIиссар.

Ттун Аьвдулжалал кIулли даврий акъа, шава ужагърайгу, жу цавай къатраву, ца зивулий ялапар хъанай бивкIру, кулпатирттащал 3-4 метра дусса площадка ляхну, кунначIан кув буххавугу чан къашайва. Мунал иминсса пишгу, шаппаминнащалсса ххуйсса отношениегу эбратрансса бия. ТачIав лахъсса чIу бувну къакIулли, оьрчIайнсса аьй-бювкьугу пишлищал дайва.

Жул 2-3 шин хьусса душ мудан му учIаннин ялугьлай бикIайссия, «Жалал-ттаттал бакI бакьин бан» тIий. Цалвагу хъягу хъяй учинтIиссия: «Гуляй, дитикьай му ттул кьабакI кIучIну чIарардалу, акъа оьккину чIалан икIарача». Гулян тIурчан му бакI бакьин баву яла ххирамур тIуркIуя.

КIай шиннардий, ттущала зий бивкIсса чIявуссанная ххуйсса асарду дакIниву ливчIунни. Ваччиял КьурбанмахIаммад, Ккуллал ва Къяннал Гьарунхъул, ЦIущуллал Зайнуллагь, ЦIувкIуллал Жамалуттин, Вихьуллал Шяъван, Даххаев Рамазан, МахIаран ва Аьвдурашид, райкомрай зий бивкIсса душру-хъами дакIнин багьукун, ххуй чулийсса асарду дакIниву гьаз шай.

Амма хIакьинусса хавар Аьвдулжалаллуяр. Цува райкомрал цалчинма секретарь ухьурчагу, гьарца райондалий дансса давурттая жущалгу маслихIат байва, «зула пикри бусира» учайва, инициативагу поддержать дайва (дайдихьулул чIарав ацIайва), зунма къулайну чIалачIимур, партийно-политический давриву бан аьркинмур бувара, дуллалимуния ттунгу кIул бувара чайссия.

Райондалий дан ккаккан дурсса къулайну чIалачIисса царагу даву ХIусманов А.Р. акъар куну жу, райкомрал зузалтралгу, къакьадитайссия. Зузалтрайн вихшала дуну икIайва, жугу, жаваб дулаву жуйнна ларсун зий, рязи хьунмур буллайгу бикIайссияв.

КIива иш кIай шиннардий нава хIала хьуну бувсса, ттуятува Аьвдулжалал рязину ливчIсса.

Ккуллал дянивмур школалий парторганизациялул отчётно-выборный батIаву дан лавгра. Активныйну ларгунни, 17 коммунист, миннавугу – ца хъамитайпа. Бюрорай секретарьну цинявппагу рязину увчIунни Аьбдуллаев Рамазан, кIира лараймур образованиегу дусса, хъинну хIарачат бусса коммунист, ххуйсса учитель. Махъунмай нани ххуллий жущал машиналуву учитель Къянчиевгу ур. Ганал жухь увкунни:

– Аьбдуллаев секретарьну увчIин къааьркинссия, кIа хьхьичIвагу колхозрал парткомрал секретарьшиврия укьан увссия, – куну.

– Циван, ссахлуну укьан увссия? – учав.

– Арснан ссуннат бувну тIий, – увкунни.

– Варч, кIай 17-гу коммунист циняв рязийну бияхха кIа итан. Ина виламур пикри кIиккува цан къабусав? – учав.

СсихI къадурккуну, шавай лавгунни. КIюрххил даврийн бучIаннин, райкомраву столданий бур Къянчиевлул ттуятусса аьрза, ай, «на хьхьичIунмай къабуругайсса, партиялул-политикалул даву къакIулсса, кадранащал зун бюхъу бакъасса» зузала бур, тIий. Ду-дакъасса мукуннасса цикссагу аьйрду ккаккан дурну дур цIуну увчIусса секретарь Р. Аьбдуллаевлуйгу. Яла хъунмур аьйгу – арснан суннат бувсса!

Оьвкунни Аьвдулжалаллул. «Буккав аьрза? Насуча, кIа парторганизациялийн, хIадур бува масъала райкомрал бюрорайн», – увкунни.

Цибанссия, ттун цимилагу гьан багьунни Ккулувн школданийн. Циняв коммунистуралгу, махъсса учительтуралгу бувсунни, цалгу бушиву арсру, миннангу суннат бувшиву, Аьбдуллаевлухун бахчилачаву нахIакьсса душиву, мунаяр секретарьну итан лайкьсса цама акъашиву.

ХIадур бав масъала бюрорайн. Аьбдуллаевгу тIайлану увчIушиврий, бюрорай секретарьну цIакь унни.

Бюро къуртал хьуну махъ Аьвдулжалаллул ттухь барчаллагь увкунни масъала ххуйну хIадур баврихлу, амма кIулну бикIу утти Къянчиев виява чичлантIиссар, ду-дакъасса диялдакъашивурттах луглай, куну.

Вания махъ районналул активравасса таманссаннал на бакIрай бацIан буллай, «бацIу тти Къянчиев вихуна ахчинтIиссарча», тIий бия.

Мяйжаннугу, вайннал тIийкун хьугу хьунни. Айивхьунни чичлай. Микку ттун дакIнийн багьунни, махъсса 10-15 шинал мутталий районналул каялувшиву дай давурттай, вайннавухва партиялул райкомрал аппаратравагума, цимиягу ххуй-ххуйсса зузалт-къуллугъчитал букьан бувсса «арсурвавран суннат бунни» тIий аьрзарду чичаврийн бувну.

Ва масъалалул хIакъиравусса ттула пикри кIибачIав ХIусмановлущал.

– Партиялул ларайми органнал мукунсса тIалавшинна дияхха. Миннал увкумур жущава биттур къабан къахьунссар, – увкунни.

КъатIайлархха. Щала бусурманнал дунияллий суннат бувай. Му цичIар исламрацIун личIину дархIусса аьдатгу дакъар. Медициналулгу дуван ккаккан дурсса зат дур. Анжагъ цаппараннан укун инсантал кьюнуравух буккансса багьана-хIучча хъанай бур. На мунил хIакъираву та ЦК-лийн чичинна учав. Чигу чичав. Тавакъювгу бував жаваб «Партийная жизнь» журналланий рищара куну. Ца барз ванил дянив къалавгун Аьвдулжалал оьвтIий ур цачIана. «Ина мяйжаннугу ЦК-лийн чивчуссияв? Ма, дукки жаваб», – увкунни.

«Ва аьдат, диндалулмунин ккалли дуллай, лайкьсса инсантал давурттая букьан буллалаву къатIайлар. КIанттул органнал цала хIукму бан аьркинни мунил хIакъираву», – тIий чивчун бия.

Вания махъ арснан суннат баврихлу цаягу инсан къуллугърая укьан увсса иш цавагу къавхьуссар. Укунма махъсса районнайгу.

Хъирив нава обкомрай зузинийгу мукунмасса ишру къавхьуна.

КутIану учин ччимур вари: Аьвдулжалал Рамазанович ия хъинну дакI марцIсса, давриву сант дутан кIулсса, агьалинащал ххуйну маз лякъин шайсса, цащаласса зузалтрай дакI цIуцIисса, кулпатраву, чIахху-чIарахнащал хIал бавкьусса инсан. Нава ХIусмановлущал зий бивкIсса шиннугу ттула оьрмулуву ляличIину ххуйсса, ххарисса, талихI бусса шиннуну ккалли дара.

Ца за ттигу бусан ччива оьрус мазрай. Из тех 10 лет работы в райкоме партии первые 5-6 лет я могла любому работнику независимо от ранга и родственных, дружеских связей без стеснения сказать о недостатках в работе, недочётах в деятельности, или недостойном поведении (на мой взгляд), а когда время прошло, появились друзья, близкие знакомые – уже не тот был уровень моей смелости, хотя по работе уже имела опыт. Вот тогда я оценила политику партии – менять время от времени место работы, пусть даже отличного работника, посылать в другие районы и города, пусть даже другой национальности, вот тогда я оценила практику партии, направившей наших лакцев партработников в Агульский, Кахибский районы. Вот тогда был Дагестан единым и неделимым ни на районы, ни на национальности. А коррупция, клановость и покровительство – это явление уже нынешнее, тогда невозможно было. Такова была установка партии...

Аьвдулжалал ччяни жуятува личIи хьуна. Амма хIакьинусса кьинигу мунал хIалимшиву, иминсса, хъинбала ччисса пиш, дакI аьчухшиву, инсаншиву, агьалинай, даврий дакI-лякьа цIуцIаву ва цаймигу ххуй-ххуйсса хасиятру хъама къаритай. Ччя-ччяни дакIнийнгу утара. Бунагьирттал аьпабаннав цал!

Сагъират Сулайманова

ш. Хъювхъи

ХIусманов Аьвдулжалал Рамазаннул арс КПСС-рал Ккуллал райкомрал цалчинма секретарьну зун увкIуна 1967-кусса шинал. На СумбатIуллал шяраваллил советрал исполкомрал секретарьну зий уссия.

Аьвдулжалал Ккуллал районналул бакIчину зий ия 1980-ку шинал декабрьданийнин.

13 шинал мутталий районналий Аьвдулжалаллул бивтсса оьрмулул ва даврил ххуллу бия цинявннан эбратрансса, мяш хьунсса. Мув ия хъинну аькьлу бусса, хасиятрал хIалимсса, партиялул лавсун нанисса, та ххуйсса чIумуха лавхьхьусса, даврил ххуллул лахъишиву ва утташиву кIулсса адамина. Мунан хъинну кIула шяраваллил хозяйство, мув ия ххаллилсса юристгу.

Аьвдулжалаллущал аьрхIал зий партиялул райкомрал сакиншиннарал отделданул инструкторну ттул хьуна 5 шин. Мув мутталий нава зузиссаксса хIаллай ттуща цукунчIав Аьвдулжалаллуя хиянатсса махъ учин къахьунссар, так ххуймур, хъинмур бакъа.

Мунал я цала канилусса зузалтрайн, ягу цачIанма бувкIсса инсантурайн лахъсса чIу, къаччан бикIансса ихтилат бувну къакIулли. Мунан хъинну ххирая къакIулмур цIуххайма, давриву, ичIаллил оьрмулуву маслихIат байма.

Ттун ттунмагу оьрмулуву хьунабавкьусса чIявусса маслихIатру бувссар, ччарча даврил, ччарча дуккаврил хIакъираву.

Аьвдулжалал давриву инсанная тIалавшинна дусса ия. Къуллугърал лавайнугу дакI хъунасса акъая.

Даврийн учIавривух агьалинал социально-культурныйсса оьрмулул шартIру щаллу дуллай айивхьуна, райцентрданийсса зузалтрал яшаврил, ичIаллилсса условиелуха зий ия.

Ваччав бувуна къуллугъчитал яхъанансса шанма къатта, зузи бувна хIаммам, электрофицировать дурну, къуртал дуруна районналул щархъурду. Къулагъас хъун дуруна культурно-просветительныйсса даврих. Районналул циняв щархъаву шяраваллил клубру кIура баен бувна Культуралул къатрайн, биялсса культуралул зузалтрал штатру ххи хьуна. Зий буссия районналул комбинат бытового обслуживания. Къулагъас хъуннасса дия ххуллал даврих. ШавкIуллал неххайх, Ваччиял, ЧIяйннал ратIайхсса, Хъюйяту Вихьуллал чулинмайсса неххайх ва цаймигу ламурду бан бувуна.

Районналул агьалийнал маэшатрал щаращух – шяраваллил хозяйствалух ляличIийссара хъуннасса аякьа дайва.

Гьарун Саэдовлул цIанийсса Ккуллал колхоз Москавлив ВДНХ-лул ХIурматрал улттуй цимигу шинай дуссия. Бакреслив, Бажиганнай, Бабаюртуллал зонардай агьамсса давурттив дуний, райкомрал бюрорал, райисполкомрал член шинал мутталий ирглий гиккува ацIан командировать увайва. ЛухIи ризкьилул ва яттил жинс ххуй даврил цIаний зийна икIайва.

Аьвдулжалаллун къаччия лажинлякъулт, лямпIуртал, хьхьичI цаятура цалла, хъирив идарарттал хъуниминная тIайламунил тIалавшинна дувайва.

Буслан бикIайва, цала кулпатран ПатIиман пенсия бишин ихтияр къадуллуна тIий собесрахьхьун, мунил даврил стаж бакъассар тIий. Аьвдулжалал районналия лавгун мукьахгу МахIачкъалалив жаваб дулайсса давурттай зий ия: Республикалул шяраваллил хозяйствалул продукция машан ласайсса инспекциялул хъунаману, ччатIул продукциялул управлениялул отделданул хъунаману.

Мий давурттай зузинийгу Аьвдулжалаллун хъама къадиртуна районгу, мунил агьалигу. На нава колхозрал председательсса чIумал цимийлагу лагайссия ппалул багьлулсса буван, колхозран концкорма дула учин, къалмул гьанна, иникIма ласунссса кумаг тIалав буллай. Мудан аьркинмунил щаллу айва.

Цал аьпабаннав, рухI хъинний дишиннав. Цала арсругу цува кунма агьалийнан бусравсса, хIурмат бусса хьуннав!

Аьлилов МахIмуд,

ш. СумбатIул

Рамазаннул арс Аьвдулжалал зузиссаксса хIаллай на мудан райкомрай завсектором партийного учёта зий бивкIссара. Ттул му даврий зий хьуну дур 25-ра шин.

Аьвдулжалал ниттил увхьунссия райкомрал секретарь хьун куну. Му ия зузалтращалгу, цинявппа агьалинащалгу хIал бавкьусса, му ттун чIалан икIайва ца жула яла хьхьичIунману.

Мунан тачIав ссибивзун къакIулли, ссибивзнийгу дахьа личIину урувгун ва дурсса даву мукуннияр укун къахъинав куну, бусантIиссия дансса куц.

Ттул даву дия личIлулну, хъис гъалатI къахьунну дан аьркинсса. Мудан ялув авцIуну икIайва. Цал обкомрая оьвтIий бур увкунни ца партбилетрал отчётная карточка къадуркIунни, тIий. На, ттучIа му гьан дурсса документру бури куну, ххал бав.

Оьвкунни, гьан дурну дур, ваничIа документру бур куну. Ай, жучIан къадуркIунни тIий, вих хъанай бакъар. ЦIунилгу оьвтIий бия, бюрорайгу ххал бивгьуну, зущара дакъа хьушиврий кандидатский карточка цIунил чичара тIий, нагу наказать бувну. Ттухь кунни: «На ялавай най урача, мий отчёт гьан дурсса документру була», – куну. Лавсун лавгунни. Ххал барча, гайннай цайва тахсир хьуну бивкIун, чагъардавух Москавлийн гьан дансса отчётный карточка ччурччуну дия, увкунни, обкомрай тахсир къахьун, нагу бюрорай обсудить бувну, наказатьгу бувну, цIусса кандидатский карточка дулара, куну бия. Аьвдулжалаллул, тIурча, циванни тахсир зуй хьуну буна, тахсир бакъама наказать уллан куну, обкомраща зия хьушиврий бюрорайгу бивхьуну цIуну кандидатский карточка дуллуссар.

Ва ия цала зузалт ххирасса. Жу цинявппа зузими ванан ца кулпат кунма чIалан бикIайва, ванащал зун бигьану бикIайва. Ва зузисса чIумал колхозру гужсса дия. Партиялувун кьамул бувсса колхозниктал гъинттул чIумал зунттай, Бабаюртлив, Бажиганнай давурттай бикIайва, чIумуй сурат рищун, партбилет ласун бучIан къахъанай, Аьвдулжалаллухь укунсса иш бур учайхту, га цIана цала машина гьан бувну, бучIан байва чIумуй. Жун муная хъинсса унугу, нигьгу дикIайва, начгу дикIайва. Амма хIурмат байва. Райкомрал давриву низам дирхьуна мунал.

Уммукусум МахIаммадаьлиева,

пенсионер, ш. ЧIяйми

ВА ИЯ ТА ЧIУМУЛ ИНСАН

На, Нугъайннаву инженер-механикну зий шанна шингу дурну, армиялувун увцун, шанна шин армиялийгу дурну, зана хьура буттал шяравун Хъусрахьхьун.

Даврий ацIан ччай бия МахIачкъалалив завод «Стекловолокно» цIуну буллан. Ца кIулсса ххуйсса гьалмахчу на гиккун зун кьамул уван кумаг буллай ия. Ххуйсса даврий гикку зун икьралгу дурну, шавай Хъусрахьхьун увкIра ца нюжмардува зун махъунай МахIачкъалалийн учIансса икьралданий.

Амма ттул оьрмулул дахIаву Заннал цамур чулий чивчухьунссия, колхозрал председатель Аминов Бунияминнул (аьпа баннав цал, ттун оьрмулуву кIукунсса насихIатчи цама бакIрайн къаавгьуна) миннатру буллай, колхозрал хъунама инженерну ацIан багьуна. На ва жагьилсса оьрмулуву партиялул членнугу уну, вичIи дишин багьуна. Яла махъгу оьрмулуву на буттал шяраву зун ацIаврия пашман хьунсса задгу къавхьуна.

Хъиривгу ттула оьрмулуву нара дуллалисса давриву, багьу бизулуву ца Буниямин акъассагу, нава урувгуну ганаха лавщуну гьарзад нарагу дуллалисса хьуна Османов Аьвдулжалал Рамазанович.

Га ия аьжаивсса, ссавурданулгу, аькьлулулгу увччусса, жагьилнува цанма оьрмулуву ккавкмунил тарбия увсса инсан. Аьвдулжалал Ккуллал райкомрал цалчинма секретарьну увчIун мукьах районналул багьу-бизугу, районналийсса сийгу гьаз хьуна.

Мяйра шин дурссия на Казбековлул цIанийсса колхозрал хъунама инженерну. Аьвдулжалаллул хъуннасса къулагъас дия анавар къаувккуну хъирив лавну гьарца отраслилун аьркинсса пишакартал хIадур баврих.

Райком партиялул пленумрал членнугу уну, ттун ганал инсантуращалсса дахIаву, ихтилат – гьарзад чIалан дикIайва. Инсаннащалсса ихтилатраву чIу лахъ къабайва, пишгу тIий, хъяхъавугу дуллай, инсаннахгу вичIи дирхьуну, рязи увайва.

Утти заманнай хъуни къуллугъчитурал мачча-гъанми, кулпат пахру-ххара бусса бур. Мий циняв махъми агьалинаяр цивппа бюхттулну хIисав буллан бикIай. Агьалинаннив мукунми къаххирар.

Аьдулжалаллул кулпат ПатIима (аьпабаннав цил, ххаллилсса лакку хъамитайпа бикIайва), махъсса цалва оьрчIру цайми инсантурал оьрчIая личIи къашайсса, цивппа районналул хъунаманал кулпат бушиврияту пахру бусса бакъая.

Аьвдулжалал гьарнан бусравсса ия. На мяйра шин дав колхозрал (Казбековлул цIанисса) хъунама инженерну, 8 шин дав кIара колхозрал парткомрал секретарьну, 5 шинай колхозрал председательну, 4 шинай на ивкIра КПСС-рал райкомрал бюрорал членну. 17 шинай Ккуллал райкомпартиялул пленумрал членну. Хьура делегатну областной партконференциялул. Вай гьарца шиннардий хъачI-хъачIну на ванащал ттула даврий зий, ванацIа ттун зунгу, мяърипатгу, багьу-бизугу, гьарца инсаннан кьимат бищунгу, акъакьлайманащал ихтилатгу бувну, мунан кьимат бищун аьркиншивугу лавхьхьуна.

Аьвдулжалаллун кIула мюрщинавугу, хъуниминнавугу, жагьилтуравугу архIалну ацIан. ЩиякIуй хьхьичIун къауккайва.

Столданух щябивкIсса чIумалгу Аьвдулжалал яла чIивиману икIайва. Цацал ишру шайва шяравату шяраваллил къуллугъчитурая аьрзирай кайп-кайпну АьвдулжалаллучIан райкомрайн букIлакIисса.

Аьрзирай увкIма хIанттил кайпну уну чIу лахъ бувну гъалгъатIисса чIумал, Аьвдулжалаллул иминну бувчIин бувкун, аьрзачи паракьатну лагайва. Ванал хасият дакъая мукунманал ссибизан увну, милицанайн оьвчайсса.

Аьвдулжалаллул ва ПатIимал ххаллилсса оьрчIру, душру тарбиягу бувну, наслулун кьабивтунни. Ва ххаллилсса адамина Аьвдулжалал Рамазанович, ххаллилсса дусгу ия ттуяра хъунасса унугу, ххаллилсса маслихIатчигу ия, яла ххаллилма каялувчи-сакиншинначи ия.

Аьвдулжалаллуяту бусларчан, ягу чичларчан, мадарасса чIапIивгу харж хьунссар, мий чичлай мадарасса чIуннугу гьанссар. Мув ия та чIумун аьркинну ляхъан увсса инсан.

Аьпабаннав цал. Алжаннул ххари аннав!

Оьмаев Кьурбанзабиуллагь Шихшал арс.

ш. Хъусращи

АЬВДУЛЖАЛАЛ ДАКIНИЙН УТЛАЙ

Ттун кIулли Аьвдулжалал Рамазанович ХIусманов Ккуллал районналийн КПСС-рал райкомрал цалчинма секретарьну увкIния шихунай. Му дия 1967-кусса шин. На му чIумал уссияв ВЛКСМ-рал Ккуллал райкомрал цалчинма секретарьну ва КПСС-рал Ккуллал райкомрал Пленумрал ва бюрорал членну.

Аьвдулжалал Рамазанович ЦIуссалакрал районналул цалчинма секретарьшиврия Ккуллал районналийн тIайла уккаврил хъунмур мурад чIалай бия коммунистурал дянивсса, миннайхчIин районналул агьалийнал дянивсса низам цIакь даву, мунийхчIин районналул кутак цIакь даву.

Му районналийн учIаннин коммунистурал дянивсса дакъагу, райкомрал члентурал дянивсса низамгума хъинну хьхьара дуккаврил барашин дуллай дия, Пленумрал члентал ссятурдий чIал хъанай, Пленум цимилагу махъун бутан багьлагьаврил. Мура тагьар дия бюрорал Заседания датIаврилгума.

Аьвдулжалал Рамазанович Ккуллал районналул цалчинма секретарьну цIакь уллайсса Пленум хьуна, КПСС-рал Дагобкомрал кIилчинма секретарьгу гьуртту хьуну. Пленумрайн муданма кунма, чIал хьуна райкомпартиялул жаваблувсса зузалтгу.

Аьвдулжалал Рамазановичлул Пленумрал членталгу гьуртту бувну, тIивтIуна бюрорал гьартасса заседание. ХьхьичIва-хьхьичI партиялул Уставрал тIалавшиннарайн бувсса низам къадуруччаврийн бувну партийный жавабрайн кIункIу бантIишиву кьянкьану бувчIин бувуна му кьини чIал хьусса райкомрал жаваблувсса зузалтран. Низам дирхьуна заллануву Пленумрал члентал щаллуну щябикIаван Пленум байбишин 10 минутрал хьхьичI, бюрорал члентал президиумраву – ххюра минутIрал хьхьичI. Му низам цIакьну яхьуна Аьвдулжалал Рамазанович районналий зузиссаксса хIаллай.

Аь. ХIусманов ия гьарца чулинай итххявххусса, щиннияргу ххуйну кIула мунан законну, шяраваллил хозяйство, партиялул политика ва идеология, яни цимурца оьрму. Амма ми кIулшиву чIалачIи къабайва, ягу нахIусса мазрайну кIул байва. Ци-бунугу ца агьамсса масъала щаллу буван багьлай бухьурча, оьвчайва муниха зузисса пишакарнайн ягу каялувчинайн. Ганал пикрилущалгу акьайва, захIматшиврувагу личин кумаг байва.

1967-ку шинал щала билаят хIадур хъанай бия Октябрьская Социалистическая революциялул 50 шин шаврил шадлугъ кIицI лаган, ци-дунугу дакIний личIансса щаллу дуван. Жу, райком комсомолланул, сипта дурссия граждан ва Буттал кIанттул цIанийсса хъунмасса дяъвилия зана къавхьуминнал хIурматран райцентрданий ва шяраваллаву хъуннасса гьурттушинна жагьилтуралгу дурну, дацIан дуван гьайкаллу. Хъунмасса захIмат бивхьуссия Ваччавмур гьайкал дацIан дувансса арцу датIлай. Жул гужрайну датIлай диял къавхьуми райисполкомрал Сверхнормативный остатокрая щаллу дуван кумаг бувна Аьвдулжалал Рамазановичлул. Му гьайкал вана хIакьинусса кьинигу Ваччиял СШ-лул хьхьичI бюхттулну дарцIуну, цал улттуйгу чивчуну: «ЦучIав хъамакъаивтуссар, цичIав хъамакъабитантIиссар. От комсомольцев и молодёжи Кулинского района. 1967 ш.»

КIула мунан кадра ябуван. Хъиннура хъуннасса бювкьу-аьй хьуну дакъахьурча, чIун дулайва цала давриву тIайла ацIансса.

Отдел культуралий, яла отдел пропагандалий зий ия мунина куну увсса, бюхъу-гьунар ххисса, мукъул усттарсса отдел пропагандалул зузала. Амма хIан хIачIавриву чансса хьхьарасса ия. Цимилагу гьаз хъанай бикIайва му даврий итаврил-къаитаврил масъала. Аьвдулжалал Рамазановичлул му ци чулийгу лап лахъину урувччуна. Мунан аьркинну дия хьхьичIра-хьхьичI даву.

Му ия низамраву авкьусса, цайминнал чулухагу мува ччан икIайва.

Бюрорай планналийн, ягу чIумул тIалавшиннарайн бувсса масъала хIадур буллай, ганиха зий ххал бигьлай, хIадур буллай бивкIминнаяр куртIну кIулну бикIайва Аьвдулжалаллун га масъалалул мяъна-мурад, цанчирча цайнува цува ивну кIантту-кIанттурдайн, хъирив лавну цала ххал бувну бикIайва га масъала ва лайкьсса кьиматгу бищун шайва.

Аьвдулжалаллун къаххирая хъуни чIюлушиннарду. Цайми райкомирдал секретарьтал «Волга» машинардай занайний, Аьвдулжалал «УАЗ» машиналия къаливккуна. Циван куну цIувххукун, мунал учайва: «Ва зунттал районни, зунттавунгу, къутаннайнгу «Волгалий» занан къашайссар», – куну.

КарчI дакъая Аьвдулжалаллун районналия увккун, ца кьинилул дянив Бакрес-Бажиганнайнгу ивну, цанния ца зоналийх – Бакресуллал ягу Бажиганнал, гьарца даэлин ияйва. КIилчинмур хьхьу-кьини уккайва гамур зоналул даэрдайх, шамулчинмур ягу мукьуйлчинмур кьини батIайва каялувчитал, бурж бихьайва ялун личин дурсса диял дакъашивуртту духлаган дуван, щаллу дурну дурив дакъарив ххалгу дигьайва.

Аякьа хъуннасса дия ризкьичитуран зунсса ва бигьалагансса шартIру дузал даврих, ичIаллил лазилакьаврих, гьарца фермалий бия ятIул мурцIурду, цавугу газет-журналлу, аьркинмур дирхьуну хIухчалтран бикIу, дояркахъан бикIу дуван бувна ххуйсса минарду, цIакьну ялув ацIайва миннан чIумуй ва тIайлану хIакь булаврил, мунияту 28-хъул жагьилсса дояркахъал фермарду, 34-хъул жагьилсса хIухчалтрал яттил къушру щаллу хьуну бия.

Цал, интту ттардал чIиру бай чIумал, жу Аьвдулжалаллущал буссияв къутаннай. Гилун бучIан багьлай бия циняв хозяйствардал каялувчиталгу, аьркинсса кумаггу бувцун. СумбатIуллал председатель увкIун ия кумаг къабувцуну. Аьвдулжалаллул амру бувна ва цIанакул лавгун (га дия ахттайн чIун) гьунтти кIюрххил Лаккуя шилун ию куну. Мяйжаннугу, колхозрал председатель, Аьвдулжалаллул тIалавшин кьянкьасса дусса кIулну, гьунттийва лугъи буллан аьркинсса кумаггу бувцун увкIуна.

Къаччия Аьвдулжалаллун щялмахъсса даву. ЧIун дия ссуттил ятту лахъан байсса. Утти, шинал сайки циняр давуртту къуртал хьуннихха тIий, гьарзат лавкьун мукьах Аьвдулжалал отпускалий лавгун ия. Цаппара колхозирттал каялувчитурал ттарду лахъан баврил даву зия дурну тIий, республикалул чулуха районналий аьй дурну дия. Аьвдулжалал, му иш кIул шайхту, отпускалия шавай иянсса мугьлат бакъа, гилунма бучIан бувну машинагу, циняв къутаннайх лагма увккун, гьарзат кIул бувну бия. Районналийн кIура аяврищал дартIуну гьартасса бюрорал заседание, тахсир хьусса жавабкартал даврия букьан бувна, куннангу кьянкьасса таммихIру бувна административнайсса ва партиялул уставрайн бувсса.

Аьмсса ризкьи чIявусса бия, районналул дакъая ми ххуйну щаллу бувансса каши. Амма район цимур-цагу захIматшиврува личайва, цанчирча Аьвдулжалал Рамазанович, циняв вихшаласса районнайн, гай районнайсса кумардацIух, коллектордацIух увккун, сияхIрайн ласайва чIивину-хъунну ххулу бувансса кIанттурду. Хъирив цIа куну тIайла буккайва колхозрал жавабкартал. Мукунсса тIалавшинна душаврин бувну район 4-5 хъинну оьккисса къурагъшиву хьусса шиннардийгу хъунисса зараллу къавхьуну личайва.

Хъунная Аьвдулжалаллул чулуха гьарца журалул кадра хIадур баврил, ми цанна-цанна лайкьсса давурттай битаврил ялувсса аякьа. Цува районналийн увкIун хъунма хIал къалавгун хозяйствардал сайки циняв каялувчиталгу бивтуна ларайсса ва хасъсса дянивсса кIулшиву дусса, даврил опыт бусса пишакартал, оьллал фермардай ва яттил бригадарттай – хасъсса дянивсса кIулшиву дусса. Ххуйя миннан лахьхьин бавугу, кьянкьая тIалавшиннагу.

Къаччия Аьвдулжалаллун жулла даву цайминнах ялугьлагьи дурну. ЧIярусса гъараллу хьуну, ЦIахъардал къуманивусса ламул ялтту нех дагьну, бачIи ламу бувгьуну бия. На му чIумал райисполкомрал председательнал хъиривчуну уссия. Га бакьин буван багьлай бия хьхьичIва-хьхьичI Лакрал районналун. Амма интту фермарду гила буххинсса ххалах ялугьлай чIалай, га бакьин буван тIайла бувккуна Хъусращиял Татаев Аьлил каялувсса строительтурал бригада. Аьмсса каялувшинна дуван нагу тIайла увккун, хьхьудяризаннин зий ламу бакьин бувссия.

Аьвдулжалаллул дувансса даву дусса чIумал, къакIула игьалаган, му чIалай махъмигу зун бикIайва.

ЦIана арцугу, щин нанисса кIанттурду бунува, щин диял дакъа бур райцентр, мукунна Ккуллал шяравалу.

Агарда щин микIлачIурча, цинявппа ччаннай бавцIун, миннуха зун бикIайссия. Миннал бакIчину икIайссия Аьвдулжалал Рамазанович цува.

МуначIа хъунная инсаншиврул культура, низам.

Клубраву торжественный мероприятиярттал хъирив концерт дуний ягу укуннасса концерт, чIун дирирну клубравун увкIуний, та концерт къуртал хьунцIакул щяикIайва, сахIналин бувккусса коллективрдангу хъунмасса гъира-шавкь дикIайва ххуйну балай учингу, къавтIун бизангу.

Аьвдулжалал Рамазановичлун хъинну кIула захIматчинангу, ганал захIматрангу лайкьсса кьимат бищун, зузалтрал дянив бяс-ччаллил даву дачин дуван. Му чулиннай кьянкьасса тIалавшин дия гьарца хозяйствалул хъуниминнаягу, аьмну районналийгу. Цала захIматран бищлайсса кьимат чIалай, циняв зузалтгу хъунмасса гъираращал зун бикIайва цала хьхьичI бавцIсса буржру ххину-ххишалану биттур буван.

Мукунсса захIматрал низам сакин даврийн бувну, районгу, Хъусращиял, Ккуллал, Вихьуллал, Хъювхъиял, 2-мур ЦIувкIуллал хозяйствартту цимиллагу лайкь хьуна Республикалул, РСФСРданул, СССР-данул бахшиширттан, чIявусса зузалт тIурча – хIурматрал цIардан, орден-медаллан. Цимиллагу цIакь хьуна хозяйствардал ва аьмну районналул кутак. Цала хъуннасса аякьалийну хьуна муная районналул агьалийнал бутта, бусрав-барчаллагьрай районналия Республикалийн лахъмур къуллугърайнгу лавгуна.

ХIажи Исмяилов, ш. Хъусращи