IV. Дуйг1нила х1язани жагали ирнила абзани дурадурк1ни.
V. Дурх1нази бамсриихъахъни ва «Гьанк1» бик1уси айту буч1ни.
Гьанк1
Гьачам гьанк1ра дяг1ра жалдухъи сари: чиди ц1акьсил, чидилли гушиубси адамлизибад кьац1 кебасес бирарал.
Дяг1 шят1бик1ули, к1ухбик1ули, адамличи хъямбашули саби, амма гушиубсилизибад илини ц1ац1али буцибси кьац1ла кесек кебасес биубли ах1ен.
Г1ур ил адамличи гьужум барили саби гьанк1ли. Х1янчили вамсахъурси, х1ялагариубси адам, гашила милякъ бебк1ибмад, ускаи сай. Илх1ели илала някъбазибси кьац1ла кесек, гьанк1ли сегъуналра къиян ках1ебихьили хьалли, саби-сабил баткабухъи саби.
VI. Дурх1нази халкьла г1якьлула мурхьдешла кьадри аргъахъни ва айтуличила пикруми дурахъни.
Кружокла итогуни кайъни.
Ишбарх1и нушани аргъира.
1. Дарган мезлизир дахъал гьар-урла х1язани ва айтуби лерли диъни.
2. Мез ункъли руркъусилис х1язанала дугьби жагали иресра айтубала мурхьси мяг1на иргъесра г1яг1нили биъни.
3. Ирнила х1язанани дурх1нала гъай саркъахъес кумекбирули диъни.
VIII. Г1ях1ил жавабти лугути дурх1нас гапла гъайличил кьиматуни кадалтни.
ХI. Хъули х1янчи бедни. Хала бег1тази хьардаили, сагати багьираби, х1язанала жураби дучес ва тетрадунази делк1ес.
Тема 25. Сек1улти иргъахъути дугьби.
Кружокла мурадуни: а) миц1ирти ва миц1ирли ах1енти сек1ултачила буч1антала баянти мурхьдарни; б) дарган мезла дурсрачир яра кружокличир касибти багьудлуми г1ямрулизир багаладирни якьинбарни.
Кружокла г1яг1ниахълуми: суратуни, таблицаби.
Кружокла башри.
I. Кружокла мурадуни аргъахъни.
Баян. Инсанти иргъахъути дугьбачи чи? ибси суал кабалта, г1урилти сек1айчи (миц1ирти диаллира х1едиаллира) се? ибси суал кабалта. Чи? Адам. Се? Х1яйван. Се? Гажин.
Достарыңызбен бөлісу: |
