9 мамыр Жеңіс күні Қымбатты соғыс және еңбек ардагерлері ! Құрметті аудан тұрғындары!

Қаһарлы үні, қанды ізі бүгінге дейін сезіліп тұрған, халық есінде мәңгілікке сақталып қалған Ұлы Отан соғысының біздің әділет сүйгіш, бірлікшіл, ержүрек халқымыз үшін Ұлы Жеңіспен аяқталғанына да, міне, 66 жыл толды.

Отан үшін от кешіп, ұлы сүргіннің қақ ортасында болған, соғыстың барлық қасірет-қайғысы мен қорқынышын көзбен көріп, бастан кешкен адамдар арамыздан жыл санап сиреп келеді. Бұл жауынгер – еңбекші ардагерлер – қаһарлы жылдарда қаһармандық үлгісін көрсетіп, қиындық-қасірет атаулыны қажырлылықпен жеңіп шыққан батыр аға ұрпақтың соңғы өкілдері. Сол үшін бұл адамдарды көздің қарашығындай сақтауымыз керек. Олардың денсаулықтары, әлеуметтік тұрмыс-жағдайлары аудан басшылығының назарынан тыс қалып көрген емес.

9 мамыр – Жеңіс күні мерекесіне орай да бірқатар арнайы іс-шаралар топтамасы ұйымдастырылып жатыр. Мұндағы басты мақсат – аға ұрпақтың ерлік істерін жастарға үлгі-өнеге ету, отты жылдарда Отан үшін қаза тапқан боздақтардың аруақтарына, ерліктеріне тағзым ету, ҰОС ардагерлеріне тұрғын үй-тұрмыстық мәселелер бойынша көмектер көрсету, тағы басқалар.

Сіздердің ерліктеріңіз, сіздердің патриотизмдеріңіз бүгінгі күні Республиканы өркендету жолында тарихи міндеттер атқарып жатқандар үшін үлгі-өнеге болып табылады.