Анатолий Перевозчиков Пу коньки Верос Митя школа азбаре пырем бераз ик Вова эшеныз чырткемъяськиз но шумпотонзэ вераны дыртӥз: «Ой, Вови, тодӥськод-а шур кынмем ни! Ма быдӟа шуд со! Нош ик конькиен нискылалом, хоккеен шудом »

Верос
Митя школа азбаре пырем бераз ик Вова эшеныз чырткемъяськиз но шумпотонзэ вераны дыртӥз: «Ой, Вови, тодӥськод-а шур кынмем ни! Ма быдӟа шуд со! Нош ик конькиен нискылалом, хоккеен шудом...»

– Зэм-а, Мити? Уд-а ӧрекчаськы?

– От веть та Вова эшезлы уг оскы. Ку-о мон тонэ эстымтэ мунчое лэзьялляй ини?

– Ноку.

– Иське, малы уд оскиськы? Мон школае шур дуртӥ ветлӥсько шуыса тодӥськод ук. Али но выж доры вуи но ас синъёсылы ӧй оскы: пӧртмаське кожай. Шур дуре васькыса, йӧэз бодыен кокай. Юн ни шуыса тодэм бере йӧ вылэ султӥ. Пыдын гинэ но нискыласа но утчай: чидатэ.

– Ма кызьы мон сое тыныд вузалом? Со пулэсь ук, тятялэн лэсьтэм маке.

– Ӵок, пу ке, мыным яралоз сыӵеез но. Мамаез городысь басьтыны косыса, кӧня пол ини вазиськылӥ. Весь вунэтэ. Табере со городэ чаляк уз мыны ни... Вуза, Мити, – сюлворе Вова.

– Уг! – чутрак пумит луэ Митя.

Эшезлэсь верамзэ пумозяз кылзытэк, Вова школае бызьыса пыриз. Класс, кудаз мумиз дышетэ, буш. Анаез учительскойын, дыр. Сумкаез татын. Сое усьтыса, Вова уксё пуйызэ утчаны кутскиз. Шедьтӥз. Кык куиньлыксэ басьтыса, янчиксэ азьло интыяз ик понӥз. Сумкаез ворсаз но Митя доры школа азбаре потӥз.

– Мити, тани уксё, – Вова эшезлы кык куиньлык манетсэ мычиз.

– Уг шуи ук. Ма тон, адями кылэз но уд валаськы ни шат?

– Малы Мити озьы вераськиськод? Оло, ӧжыт потэ шат?

– Кык куиньлыкед ӧжыт луоз ай! Кызьы уд валаськы, кин нош пу конькиез вузалоз? Сое аслад но лэсьтэмед луоз ук! Эн кышка, кутскид ке, быгатод! Ӵок, нырысь-валысь, оло, уродгес пӧрмоз. Бӧрысь ини мукетъёс но киужедлы вожъяськозы. Мон ведь конькиме ачим лэсьтӥ, шуыны луоз. Зэм, тятя но кӧня ке юрттӥз ик. Со туннэ заводэ мынӥз. «Корт коньки шедьтӥ ке, одно ик басьто», – шуиз. Соку мон пу конькиме тыныд дунтэк сёто, валад-а? Весяклы!

Вова, та верамез кылыса, кык пыд йылаз тэтчаны кутскиз.

– Дугды ай, дугды! Дырызлэсь вазь эн шумпоты. Вордскем чуньы вылын эн ворттылы! Азьло ик шумпотӥськод но берло бӧрдоно медаз луы... Тятя коньки ӧз шедьты ке, соку мар?

– Шедьтоз, шедьтоз, Мити. Кызьы уз шедьты собыдӟа городысь? Отын ваньмыз вань. Пичи вень но, бадӟым-бадӟым машина но...

– Тон озьы шуиськод... Городын но нылпиос вань ук, соослэн но нискыламзы потэ, соослы но коньки кулэ. Табере валад-а, малы тятя конькитэк бертыны быгатоз?..

Нош со уксёед лушкамын, луоз. Мын ай, чалякгес пон интыяз!

– Табере мама классын, дыр, ини, – йырзэ ошиз Вова.

– Классын ке, мар сыӵеез? Сёт кияз.

– Тыныд капчи вераны. Уг, уг сёт кияз. Лушкай шуыса, со монэ жугоз.

– Ма бен, ачид тодод, мар карод. А так-то мамаедлэн кияз сётыса ик умойгес луысал. Оло, ӧз но жугысал. Тон ведь янгыштэ, умойтэм лэсьтэмдэ валад. Иське, мамаед простить карыны кулэ. Я ойдо ни, школае пыром, урокъёс кутскозы.

Пиос, паськыт но ӝужыт ӧсэз усьтыса, коридоре пыризы. Отын пиналъёс круген бергаса шудо, кырӟало. Круг шорысь пичи ныл (со вылын курень школьной форма) «Разом делаем вот так» кылъёсыз нёжъяса, киоссэс выллань ӝутӥз. Нылпиос но солэсь адӟем каризы. Кин кизэ берло ӝутӥз, сое круг шоры султытӥзы но выльысь кырӟаса берганы кутскизы.

Митяен Вова та шудонэз ӧз ик синйылтэ кадь, соос номыр куаретытэк классазы пыризы. Отысь выж чылк-чылк миськемын. Борддорез тӧдьы бурен буямын. Огвадесын адӟиське бордгазет. Нош доска вадесын – вылӥын – Ленинлэн портретэз но солэн гожтэм кылъёсыз: «Дышетсконо, дышетсконо но дышетсконо». Ӧс дорынгес тӧдьы гур сылэ. Партаос сьӧрын кӧня ке пиналъёс пуко. Уроклы кулэ книгаоссэс, тетрадьёссэс, ручкаоссэс поттыло...

Митяен Вова парта доразы матэктыса ӧз вуэ, ӝӧк сьӧрын пукись дышетӥсьлэн куараез кылӥськиз: «Митя но Вова, кызьы-о пырыку вазёно?»

– Чырткемъяськоно, – Вовалэсь азьлогес вераз Митя.

– Вот али классысь потэ но чырткемъяськыса пыре.

Дышетӥсьлэсь кылзӥськытэк ӧйлась. Пиос ог-огзы шоры учкизы но классысь потыса выльысь пыризы.

– Чырткемесь! – ӵош вазизы соос.

– Умоесь. Табере вот асьтэос но чылкак мукетэсь луиды кадь – культурноесь, дышетскем адямиос кадь... Я, мынэ, пуксе, ӝоген звонок сётозы.

Зэм но, ӝоген гырлы жингыртӥз но урок кутскиз...

Ӝытазе Вовалэн ӵужатаез куное вуиз. Со та гуртын ик мукет нылпиосыз дорын улэ. Нош куддыръя нылзэ но нуноксэ чаклан сямен Воваос доры но пыралля. Вовалэн ӵужатаез шоро-куспо мугоро, йырсиез бурен маяллям кожалод, ымнырзэ кисыриосын гожмамын, бездыны кутскем пичи синъёсыз пежъян кадь лэчытэсь, пыртӥ потыны туртто. Озьы соос пинал лулэз рентген сямен эскеро, кожалод. Соин ик, кыӵе ке шумпотондэ яке куректондэ вато шуыса, эн ик малпа. Нош Вовалэн со вакытэ йыраз пу коньки кортӵог кадь мертчиськемын вал. Со гинэ шугъяськытэ на пияшез, мукетыз номыр но кулэ ӧвӧл ни. Но бадӟым шумпотонзэ яке сюлмаськонзэ-а шуод со шараяны уг дырты. Угось вакчи улоназ со трос пол «сутӥськылӥз» ни. Вуюись кадь чебер малпанзэ шарая гинэ – со уг быдэсмы ни. Таяз учыре но озьы ик луоз шуыса, Вова шудбур бурдозэ кыре лэзьыны уг дырты...

Но ӵужатайлэсь маке ватыны быгатод шат? Нунокезлэсь шугъяськонзэ со соку ик шӧдӥз. Но мугзэ котыръяса утчаны кутскиз:

– О, тынад пие, сукыриед пыже ини. Нуноксэ ӟыгыртыса, тыбыраз топ-топ вешаз, юалляськыны ылаз: «Кыӵе мар дышетсконэд мынэ, пие? Кыӵе отметкаосыныд шумпоттод ай туннэ?

Вова шуак ӧз куареты. Соин ик песятаез веранзэ ачиз ик азинтӥз.

– Маке но, пие, синъёсыд пилемен возъяськемын. Маке но луиз, оло? Вера, вера, пие. Секыт издэ кушты сюлмысьтыд. Ӧд ке кушты, со уката секытомоз. Кайгулэн-куректонлэн сыӵе сямыз вань: сое нокинлы но уд вераськы ке, со вуюись кор кадь котме, тордэ...

Озьы но, тазьы но Вовалэн ӵужатаез выриз нунокезлэсь сюлмаськон-шугъяськонзэ портыны. Ӧз пӧрмыты. Вова ваменскиз, вамен тулзэ куртчиз. Мугез огшоры но валамон. Со понна, кенешно. Нош ӵужатаезлы ӧз усьтӥськы бере, кытысь со тодоз...

Ӵуказеяз Вова школаысь бертыкуз ик ӵужатаез доры дыртӥз. Тыбыраз дышетскон котыр нуллон песьтэрез, киосаз – пу конькиос. Синъёсыз шумпотонэн ӝуало, пельпум сьӧраз бурдъёсыз вань кожалод.