Қазақстан Республикасының Үкiметi мен Ресей Федерациясының Үкiметi арасындағы "kazsat" байланыс және хабар таратудың қазақстандық спутниктерiн жасау жөнiндегi ынтымақтастық туралы келiсiмдi бекiту туралы

Қазақстан Республикасының 2005 жылғы 26 қазандағы N 85 Заңы

       Ескерту. Тақырыпқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

      Мәскеуде 2005 жылғы 18 қаңтарда жасалған Қазақстан Республикасының Үкiметi мен Ресей Федерациясының Үкiметi арасындағы "KAZSAT" байланыс және хабар таратудың қазақстандық спутнигiн жасау жөнiндегi ынтымақтастық туралы келiсiм бекiтiлсiн.

       Қазақстан Республикасының

  Қазақстан Республикасының Үкiметi мен Ресей Федерациясының

      Бұдан әрi Тараптар деп аталатын Қазақстан Республикасының Үкiметi мен Ресей Федерациясының Үкiметi,

  1-бап

      Осы Келiсiмнiң мақсаты "KAZSAT" сериясының байланыс және хабар таратудың қазақстандық спутниктерiн (бұдан әрi - "KAZSAT" сериясының спутниктерi) жасау, оларды геостационарлық орбитаға шығару және олардың негiзiнде ғарыштық байланыс пен хабар таратудың қазақстандық жүйесiн жасау жөнiндегi Тараптардың ынтымақтастығын жүзеге асыруға арналған негiзгi қағидаттар мен шарттарды айқындау болып табылады.
       Ескерту. 1-бап жаңа редакцияда - Қазақстан Республикасы Үкiметiнiң 2008.05.20  N 476  Қаулысымен.

  2-бап

      Осы Келiсiмдi орындау үшiн ынтымақтастық халықаралық құқықтың жалпы танылған нормалары мен қағидаттары сақтала отырып және Тараптардың өз мемлекеттерi қатысушылары болып табылатын басқа Келiсiмдер бойынша мiндеттемелердi орындауына залал келтiрiлместен Тараптар мемлекеттерiнiң осы Келiсiмге қайшы келмейтiн заңнамаларына сәйкес жүзеге асырылады.

  3-бап

      Осы Келiсiм бойынша уәкiлеттi органдар:
      Қазақстан Тарапынан - Қазақстан Республикасы Ұлттық ғарыш агенттiгi және Қазақстан Республикасы Ақпараттандыру және байланыс агенттiгi;
      Ресей Тарапынан - Федералдық ғарыш агенттiгi мен Ресей Федерациясы Ақпараттық технологиялар және байланыс министрлiгi болып табылады.
      Осы Келiсiмнiң шеңберiнде қазақстандық "KAZSAT" сериясының спутниктерiн әзiрлеу, дайындау, геостационарлық орбитаға ұшыру және кейiннен пайдалану жөнiндегi мiндеттемелердi орындаумен, сондай-ақ Қазақстан Республикасының аумағында жерүстi басқару кешендерiн және байланыс мониторингi жүйесiн жасаумен байланысты нақты жұмыстарды (қызметтердi) орындау (көрсету) жөнiндегi ынтымақтас ұйымдар (бұдан әрi - ынтымақтас ұйымдар):
      Қазақстан Тарапынан - "Ғарыштық байланыс және радиоэлектрондық құралдардың электромагниттiк үйлесiмдiлiгi республикалық орталығы" акционерлiк қоғамы;
      Ресей Тарапынан - "М.В.Хруничев атындағы Мемлекеттiк ғарыш ғылыми-өндiрiстiк орталығы" федералдық мемлекеттiк бiртұтас кәсiпорны және "Ғарыштық байланыс" федералдық мемлекеттiк бiртұтас кәсiпорны болып табылады.
      Тараптар өздерiнiң уәкiлеттi органдары мен ынтымақтас ұйымдары өзгерген жағдайда дипломатиялық арналар бойынша бiр-бiрiн жедел хабардар етедi.
       Ескерту. 3-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  4-бап

      Осы Келiсiм шеңберiнде жасалатын "KAZSAT" сериясының спутниктерi геостационарлық орбитаға шығарылады және уақытша ұсынылып отырған үйлестiрiлген ресейлiк орбиталық позицияларда орналастырыла алады.
      "KAZSAT" сериясының спутниктерi үшiн геостационарлық орбитадағы нақты орбиталық позицияларды пайдалану шарттары Тараптар мемлекеттерiнiң халықаралық орбиталық-жиiлiк ресурстарды үйлестiру мәселелерiн реттейтiн байланыс әкiмшiлiктерi арасындағы жеке келiсiмдермен анықталады.
       Ескерту. 4-бап жаңа редакцияда - Қазақстан Республикасы Үкiметiнiң 2008.05.20  N 476  Қаулысымен.

  5-бап

      Ынтымақтас ұйымдар "KAZSAT" сериясы спутниктерiнiң, жерүстi басқару кешендерi мен байланыс және хабар тарату қазақстандық ғарыштық жүйесi байланыс мониторингi жүйесiнiң, орбиталық-жиiлiктiк ресурстарының келiсiлген талаптары мен сипаттамаларын, сондай-ақ "KAZSAT" спутнигi мен жерүстi басқару кешенi объектiлерiн және байланыс мониторингi жүйелерiн пайдалануға тапсыру-қабылдап алу, қазақстандық персоналды даярлау мен оқыту шарттарын айқындайды және оларды жасалатын келiсiм-шарттардың (шарттардың) негiзiнде iске асырады.
       Ескерту. 5-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  6-бап

      Осы Келiсiмнiң шеңберiнде жүргiзiлетiн ұйымдастырушылық, қаржылық, құқықтық және техникалық сипаттағы жұмыстар жөнiндегi қағидаттар, нормалар және рәсiмдер жекелеген келiсiм-шарттардың (шарттардың) нысанасы болып табылады.
      Тараптар ынтымақтас ұйымдар жасасқан жекелеген келiсiм-шарттардан (шарттардан) туындайтын мiндеттемелер бойынша жауаптылықта болмайды.

  7-бап

      Қазақстан Тарабы осы Келiсiмнiң шеңберiнде:
      қажеттi көлемдегi жұмыстар мен қызметтердi қаржыландыруды;
      Қазақстан Республикасының аумағында "KAZSAT" сериясы спутниктерiн жерүстi басқару кешендерiн, сондай-ақ байланыс мониторингi жүйесiнiң байланыс және хабар тарату қазақстандық ғарыштық жүйесiн орналастыру және пайдалану үшiн қажеттi жерүстi инфрақұрылым объектiлерiн құруды қамтамасыз етедi.
       Ескерту. 7-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  8-бап

      Байланыс және хабар тарату қазақстандық ғарыштық жүйесi бойынша Халықаралық электр байланысы одағымен қарастырылған үйлестiру iс-шараларын ескере отырып, "KAZSAT" спутнигiн ұшыру сәтiнде геостационарлық орбитадағы уақытша бос орбиталық-жиiлiктiк ресурсқа иелiк ететiн Ресей Тарабы Қазақстан Тарабына уақытша негiзде (спутниктiң орбитада белсендi түрде болу мерзiмiне, бiрақ 15 жылдан көп емес) Тараптардың келiсiмi бойынша қолданыстағы халықаралық үйлестiру келiсiмдерiн ескере отырып, "KAZSAT" спутнигi үшiн қажеттi жиiлiктiк-поляризациялық жоспарға сәйкес үйлестiрiлген орбиталық-жиiлiктiк ресурсты бередi. Осы баптың бiрiншi абзацының ережелерi "KAZSAT" спутнигiне қолданылады.
      Тараптар радиожиiлiктiк спектрдi бөлу мәселелерi бойынша ақпаратпен алмасуды жүзеге асырады және жиiлiктердiң бөлiнуiн бiрлесiп қорғау мәселелерiн қоса алғанда, Халықаралық электр байланысы одағында орбиталық-жиiлiктiк берулердi үйлестiру мәселелерiнде бiр-бiрiне жәрдемдеседi.
       Ескерту. 8-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  9-бап

      Тараптар 1975 жылғы 14 қаңтардағы Ғарыш кеңiстiгiне ұшыратын объектiлердi тiркеу туралы  конвенцияға  сәйкес осы Келiсiм шеңберiнде жасалатын және ұшырылатын "KAZSAT" сериясының спутниктерiн ғарыштық объектiлер ретiнде тiркеудi бiрлесiп қамтамасыз етедi.
       Ескерту. 9-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  10-бап

      Қазақстан Республикасының кедендiк аумағына, соның iшiнде қазақстандық "KAZSAT" сериясының спутниктерiн жасау, жерүстi басқару кешендерi мен байланыс және хабар тарату қазақстандық ғарыштық жүйесiнiң байланыс мониторингi жүйесiн жасау мен оны орбитаға ұшыру мақсаты үшiн үшiншi елдерден әкелiнетiн қосалқы жабдықты, бағдарламалық қамтамасыз етудi қоса алғанда, жабдық және оның жиынтықтары Қазақстан Республикасының аумағында кедендiк төлемдер алудан, салықтар мен өзге де алымдардан толық босатылады деп келiстi.
      Аталған жабдықты және оның жиынтықтарын кедендiк ресiмдеу Қазақстан Тарабы мемлекеттiк органдарының лицензиялары мен басқа да рұқсаттары ұсынылмастан, тек Қазақстан Тарабының уәкiлеттi органы беретiн, осы Келiсiмнiң мақсатында олардың пайдаланылатынын растайтын құжат болған кезде жүзеге асырылады.
       Ескерту. 10-бапқа өзгерту енгiзiлдi - Қазақстан Республикасы Үкiметiнiң 2008.05.20  N 476  Қаулысымен.

  11-бап

      Тараптар осы Келiсiмнiң шеңберiнде жұмыстарды орындау барысында пайдаланылатын зияткерлiк меншiктi қорғауды Тараптар мемлекеттерiнiң заңнамаларына, сондай-ақ қатысушысы бiр уақытта Тараптардың мемлекеттерi болып табылатын халықаралық шарттарға сәйкес қамтамасыз етедi.
      Осы Келiсiм шеңберiндегi ынтымақтастық Тараптардың және ынтымақтас ұйымдардың осы Келiсiм шеңберiнде немесе осы Келiсiмге байланыссыз бiрлескен қызмет басталғанға дейiн алған олардың зияткерлiк меншiк құқықтарын қозғамайды.

  12-бап

      Тараптар, уәкiлеттi органдар және ынтымақтас ұйымдар Тараптар мемлекеттерiнiң заңнамаларында және осы Келiсiмде белгiленген тәртiппен жасырын ақпарат алмасуды жүзеге асырады.
      Жасырын ақпаратты Тараптар, уәкiлеттi органдар және ынтымақтас ұйымдар көрсетiлген ақпараттың жеткiзгiшiне "Жасырын" деген белгi қою жолымен таңбалайды. Мұндай таңбалау үшiн жауапкершiлiк ақпараты осындай жасырындылықты талап ететiн Тарапқа, уәкiлеттi органға немесе ынтымақтас ұйымға жүктеледi.
      Құпия ақпаратты беру және қорғау берушi Тарап мемлекетiнiң заңнамасында және 2004 жылғы 7 шiлдедегi Қазақстан Республикасының Yкiметi мен Ресей Федерациясының Үкiметi арасындағы Құпия ақпаратты өзара қорғау туралы  келiсiмде  көзделген тәртiппен жүзеге асырылады.
      Әрбiр Тарап, оның уәкiлеттi органы немесе ынтымақтас ұйым екiншi Тараптан, оның уәкiлеттi органынан немесе ынтымақтас ұйымнан алған құпия және/немесе жасырын ақпаратты өз мемлекетiнiң заңнамасына сәйкес қорғайды.
      Осы Келiсiм шеңберiнде орындалған бiрлескен әзiрлемелер туралы кез келген ақпарат оның қатысушысы болып табылмайтын үшiншi тараптарға тек Тараптардың жазбаша түрде ресiмделген келiсiмi бойынша берiлуi мүмкiн.

  13-бап

      Тараптар және олардың уәкiлеттi органдары өзара келiсiм бойынша осы Келiсiмнiң шеңберiндегi қызмет туралы жұртшылықты хабардар ете алады.

  14-бап

      Осы Келiсiмдi түсiндiруге және/немесе iске асыруға байланысты даулар туындаған жағдайда Тараптар немесе олардың уәкiлеттi органдары оларды реттеу үшiн консультациялар немесе келiссөздер жүргiзедi.
      Осы баптың бiрiншi абзацымен көзделген рәсiмдерге сәйкес реттелмеген даулар Тараптардың бiреуi екiншi Тарапқа осындай реттеу туралы жазбаша сұрау жiбергеннен кейiн 6 (алты) ай iшiнде Тараптардың кез келгенiнiң өтiнiшi бойынша төрелiк сотқа жiберiлуi мүмкiн. Төрелiк сотты құру тәртiбi мен жұмыс жасау шарттары осы Келiсiмге қол қойылған күннен бастап бiр жыл iшiнде Тараптар жасайтын жеке келiсiммен белгiленедi.

  15-бап

      Осы Келiсiм қол қойылған күнiнен бастап уақытша қолданылады және оның кyшiне енуi үшiн Қажеттi мемлекетiшiлiк рәсiмдердi Тараптардың орындағаны туралы соңғы жазбаша хабарлама алынған күнiнен бастап күшiне енедi.
      Осы Келiсiм Тараптар өздерiне алған мiндеттемелердi толық орындағанға дейiн қолданылады.
      Кез келген Тарап екiншi Тарапқа осы Келiсiмнiң қолданылуын тоқтату болжамдалған күнге дейiн кемiнде 6 (алты) ай бұрын оның қолданылуын тоқтату ниетi туралы жазбаша хабарлама жiберу жолымен оны тоқтата алады.
      Осы Келiсiмнiң қолданылуын тоқтату оның қолданылуы тоқтатылғанға дейiн заңды тұлғалардың осы Келiсiмнiң орындалуына байланысты туындаған құқықтарын немесе мiндеттемелерiн қайта қарау үшiн құқықтық негiз бола алмайды.
      Осы Келiсiмге Тараптар арасында жеке хаттамалар жасасу жолымен өзгерiстер мен толықтырулар енгiзiлуi мүмкiн. Аталған хаттамалар осы Келiсiмнiң күшiне енуi үшiн көзделген тәртiпте күшiне енедi.
      2005 жылғы 18 қаңтарда Мәскеу қаласында қазақ және орыс тiлдерiнде әрқайсысы екi түпнұсқа данада жасалды әрi екi мәтiннiң күшi бiрдей.

       Қазақстан Республикасының        Ресей Федерациясының

      Осымен 2005 жылғы 18 қаңтарда Мәскеу қаласында жасалған Қазақстан Республикасының Үкiметi мен Ресей Федерациясының Үкiметi арасындағы "KAZSAT" байланыс және хабар таратудың қазақстандық спутнигiн жасау жөнiндегi ынтымақтастық туралы келiсiмнiң бұл көшiрмесiнiң дәлдiгiн куәландырамын.