Дауылпаз ақынға арналған кеш
жүктеу/скачать 12.87 Kb.
|
| Дауылпаз ақынға арналған кеш
Биыл дауылпаз ақын Қасым Аманжоловтың туғанына 100 жыл толады. Облыс көлемінде түрлі іс-шаралар өткізілуді бастаса да, «Арқа сазы» ансамблі концерттік кештің шымылдығын бірінші көтерді. Жуықта «Шалқымада» өткен кештен алған әсеріміз шексіз. Көрермендер көп жиналғандықтан, зал басшылығы қосымша орындықтар қоюға мәжбүр болды. Кеш шымылдығын Қазақстанның еңбек сіңірген артисі, Мемлекеттік сыйлықтың иегері Кеңес Жұмабеков ақын өлеңін оқумен ашты. Кеңес ағамыздан кейін кезегімен сахнаға шығып отырған өнерпаздардың өнеріне де көрермендер қошеметін аямады. Атап айтсақ, ҚР еңбек сіңірген қайраткері Мейірхан Адамбековті халық сағынып қалғаны соншалық, екі ән орындап сахна сыртына кеткен ағамызды шапалақ ұрып шақырып алып «Шайтанкөлді» орындауын сұрады. ҚР мәдениет қайраткері Меруерт Башай, республикалық конкурстардың лауреаттары Дәуренбек Әркенов, Сырым Хордин, Динара Ахметжановалар да ақын өлеңдерін нақышына келтіріп орындап, жиналған жұрттың ықыласына ие болды. Көрерменнің ерекше құрметіне бөленген ансамбльдің мүшесі, жетіген аспабын жете меңгерген Гүлғайша Кәпен жайлы айтпасақ жөн болмас. Жақында ғана Павлодар қаласындағы республикалық Майра Шамсутдинова атындағы конкурстан дипломант атағын алып келген қарындасымыз өзінің шеберлігін дәлелдеп өтті. Әнші қыз тек ән ғана орындап қоймай, Қасым ақынның өлеңін мәнерлеп оқуы арқылы көптің көңілінде қалды. Қасым – қазақтың ақыны. Қасымды ұлықтағанымыз қазақты ұлықтағанымыз! Осындай әдемі кешті ұйымдастырып отырған Қали Байжанов атындағы концерттік бірлестігіне және Халықаралық «Шабыт» фестивалінің лауреаты, «Арқа сазы» фольклорлық ансамбліне, ансамбльдің жетекшісі, ҚР еңбек сіңірген қайраткері Әбдуғалисын Шоқанбаевқа айтар алғысымыз шексіз. Айсұлтан ЖАҚЫПОВ. Орталық Қазақстан. - 2011. - 28 сәуір (№ 66). - 3 б. жүктеу/скачать 12.87 Kb. Достарыңызбен бөлісу:
|