Маған «Борат» фильмі ұнамайды және Саша Коэнді күлдіргі актер деп ойламаймын Қазақстандағы АҚш елшісі

03 Мамыр 2012, 19:34

Елші сапарының мақсаты - С.Сейфуллин атындағы ҚазАТУ мен АҚШ-тың үздік жоғары оқу орындары және ғылыми-зерттеу институттары арасында ықпалдастықты орнату, университеттің студенттеріне және профессорлық-оқытушылар құрамына дәріс оқу.

Дәріс барысында Елші АҚШ туралы және АҚШ президентін сайлау тарихы туралы айтып берді. Өз кезегінде ректор Ақылбек Күрішбаев Америка президентінің алдағы сайлауында ең мықты кандидаттың жеңіске жетуіне тілектестігін білдірді.

К.Фэйрфаск «Болашақ» халықаралық бағдарламасын ерекше атап өтті және студенттерге осы бағдарлама бойынша АҚШ-тың жоғары оқу орындарына түсуге кеңес берді.

Елші студенттерді қызықтырған сауалдарға да жауап берді. Мәселен, жастардың бірі «Борат» фильміне қатысты дипломаттың жеке пікірін сұрады.

Оған К.Фэйрфакс: «Маған «Борат» фильмі ұнамайды және мен Саша Коэнді күлдіргі актер деп ойламаймын. Маған бұл фильм Қазақстанға келмей тұрып-ақ ұнамады. Себебі ол маған жағымсыз болып көрінді. Маған фильм ұнамаса да, Қазақстанның жоғары ресми тұлғалары - Премьер-министрдің орынбасары Қайрат Келімбетов пен Сыртқы істер министрі Ержан Қазыхановтың оған қатысты білдірген пікірлері қатты әсер етті. Адамдар өз атына айтылған қалжыңды дұрыс қабылдай білуі керек және әрбір қалжыңға көңілдері түспеуі тиіс. Біздің сайлауалды іс-шараларға, кандидаттарымызға қарайтын болсаңыздар, егер олардың атына біреу қалжың айтатын болса, олар міндетті түрде оған күлетін болады. Егер американдықтар сіздердің орындарыңызда болса, олар: «О, міне кино, күлкілі. Бірақ бұл Қазақстан емес! Сіз Қазақстанды көргіңіз келеді ме, онда бізге келіңіздер, көрсетеміз», деуші еді. Және мұндай көзқарас пен ұстаным бұл елге туристерді көптеп тартуға мүмкіндік берер еді», - деді Елші.