Од Толкувонь средняй общеобразовательнай школась Ковылкинскяй райононь рм

«Шачема-касома крайнязе».

Сёрмадозе 11-це классонь тонафнись

Очкина Анна Петровнась

Тонафтысь Цаплина Валентина Алексеевнась
Тядянь-авань шачем крайняй,

Сетьме зарянь уженяй,

Вельхкссот сенем менельсь гайняй

Кизонь мани эрь шиня.

И. Девин

Мон шачень, тейне арам, инь мазы республикаса – Мордовияса. Сонь колганза кати-мзярда заслуженнай поэтсь Никул Эркай мярьгсь тяфта: «Мордовиять эзда кельме ширеса шачсь М. Горький, лямбе ширеса – М.Ю. Лермонтов и шинь мадома ширеса – С.А. Есенин». Вов тяфтама смузю ломань ёткса эряхть мокшэрзятне. Синцьке эсь ётксост лихтсть-касфтсть ломатть, конат содафт марнек мирти. Синь лувкссост сембе русень патриархсь Никон, Степан Разинонди лездысь Алена Арзамасская, Скульпторсь Степан Эрзя, народнай моронь морсись Лидия Русланова и ламотне лиятне.

Мокшэрзятне эсь модаснон лангса эряйхть кунардонь-кунардонь пинкнень. Васенда ульсть ськамост. Меле ёткозост кармасть шоворькшнема лия кялься корхтай ломаттне – русне, татархне и стак тов. Тяни мокшэрзятнень масторса корхтайхть ведьгемоньда лама кяльса – тняра нациянь и национальностень ломаньда.

Мокшень крайса аш кодамовок башка ащи мазыши и козяши вирьхнень, паксятнень и ару кожфта башка. Но сякокс тя крайть ули оцю виец, кона бта усктанза эстейнза. Сон пяк сятяв—прокс стане, кода Левитанонь картинанза. Но сонь эсонза, кода и тя картинатнень эса, и ащи сембе простой и сяка пингть царственнай мазышиц Россиять природанц.

Мокшень крайса лама, мезь можна няемс: панжи и лятьф паксят, келуналхт, вирьхть, коса кизонда минь кочксетяма инезихть, кстыхть, имошт, панкт, коса аф сизихть морамати нармоттне, козы сай мяльце молемс тяфтак, штоба кельгозь ванондомс сонь козяшинц лангс.

Тя вирьхне касыхть монь велезень перьфкя, конань лемоц Од Толку. Оцюкс мон сонь аф лувса. Эсонза ниле ульцят: Центральнай, Московскяй, Школьнай и Заречнай, коса эрян мон. Центральнай и Заречнай ульцятнень ёткова шуди аф оцю ляйня Рябка. Берякованза касыхть шуфтт, конат аф максыхть тейнза ёфси коськомс. Кизонда минь сидеста якатама рапцяв калонь кундама, а кундамда меле пицетям уха, конань шинец мле срады сембе велева.

Веленьконь кучкаса ащи церькав. Строяфоль сон нинге кевейхксыеце векста. Революцияда меле тиезь складкс, а аф кунара ломаттне ушедсть петемонза. Тяни тоса ётафнихть службат.

Но эряйда Толкуса иляткшни аф лама. Оттне тушендыхть ошу. Мон сидеста арьсян, мзярс велезе нинге кармай эряма. Пяк надиян, што ламос. Надиян, што республиканьконь картаста аф нардави тяфтама мазы вастсь, кода Од Толку велесь.