Сол сияқты мейрамның екінші күні экономикалық, ветеринарлық және энергетикалық факультеттерінің ұжымдары құрған «Абай», «Бірлік» және «Алтыбақан» ауылдары келін түсіру, бесікке салу, құда түсу салттарын көрсетті

АСТАНА. 18 наурыз. ҚазАқпарат /Гүлмира Әлиакпарова/ - Астанадағы С.Сейфуллин атындағы Қазақ агротехникалық университеті Наурыз мейрамын атап өтті.

Университет қабырғасында Наурыз думаны үш күн тойланды.

Оқу орнының ректоры Айтбай Бұлашевтың айтуынша, үш мың жылдан астам тариыхы бар Әз-Наурызды атап өту жоралғыларын молынан қамту, салт-дәстүрлерімізді барынша көбірек көрсету және студенттер мен профессорлық-оқытушылық құрамды кеңінен жұмылдыру үшін, биыл мереке алғаш рет, оқу орнының барлық 9 факультетінде жеке-жеке құрылған ауылдарда атап өтілді.

 Мысалға, алғашқы күні техникалық факультеттің ұжымымен жасалған «Ақсақалдар» ауылы бата беру рәсімін, компьютерлік жүйелер факультетінің «Әйгерім» ауылы қыз ұзату дәстүрін көрсетті, ал сәулет өнері факультетіне қоныс тепкен «Шеберлер» ауылы ұлттық киімдер мен қолөнер бұйымдарынан көрме ұйымдастырды.

 Сол сияқты мейрамның екінші күні экономикалық, ветеринарлық және энергетикалық факультеттерінің ұжымдары құрған «Абай», «Бірлік» және «Алтыбақан» ауылдары келін түсіру, бесікке салу, құда түсу салттарын көрсетті.

 Ал соңғы күні, агрономия, жерге орналастыру және гуманитарлық факультеттерінде құрылған «Бәйтерек», «Ақындар» және «Толағай» ауылдарында тұсау кесу, көрісу рәсімдерін және ақындар айтысын көруге болды.

 Ең үздік ауылды анықтау мақсатында бірнеше адамнан құралған қазылар алқасы әр күні ауыл-ауылды аралап, ұжымдардың мерекелік бағдарламаларын тамашалады. Қазылар ауылдардың дайындық шеберлігін «мерекелік безендіру», «ұлттық киімдер кию», «ұлттық тағамдар жасау», «ұлттық спорт ойындарын көрсету», «салт-дәстүрлерден көрініс көрсету» санаттары бойынша бағалады.