Тол бабай но Натӥ Тик-так шукко борддорысь часъёс. Урамын тӧл жиетэ, шула. Натӥ уг изьы, йыраз весь малпан берга: «Выль ар праздникозь кӧня ке нунал гинэ кылиз, нош мынам дэреме ӧвӧл на. Чебер чилясь дэремен мон принцесса кадь луысал»

- Кызьы изёд, Васи?! Уйбыт малпаськисько ни инбамын самой яркыт кизили выллем чилясь дэрем сярысь...

- Шедьтэм ма сярысь сюлмаськыны. Адямилэсь чеберзэ дэремъя уг учко, гыдые.

- Васи, ӝоген вуоз сыӵе паймымон праздник - Выль ар! Мыным одно ик кулэ сыӵе дэрем!

- Валай мон! Тыныд юрттоз Тол бабай гинэ: солэн туж трос пӧртэм чилясь дэремъёсыз вань!

- Нош кызьы мон Тол бабай доры сюрес шедьто?

- Тыныд юрттоз та бадяр боды. Сое бур кияд кутӥд ке, со тыныд сюрес возьматоз. Палляназ кутӥд ке, кужым сётоз. Музъем берга, нунал ортче, сюрес адямиез вите.

Ӧс вӧлак усьтӥськиз но, инвис дорозь лента сюрес кылдӥз.

- Та сюрес тонэ Тол бабай доры вуттоз. Нош улэ со йӧ гурезьёс сьӧрын, кытын кизилиос чиляса шудо, горд шунды тол тырето валес вылын кӧла.

Натӥ ӝог султӥз, шуныт шубазэ дӥсяз, пыдаз гынсапег понӥз, сюрес вылэ потӥз. Капчиен, кырӟаса вамышъя нылаш. Трос-а, ӧжыт-а мынӥз, вуиз со ӝужыт гурезь доры. Гурезь быдэсак йӧен шобырскемын. Йылыз пилеме йӧтэ. Ма кароно? Соку Натӥлэн йыраз лыктӥз: «Бен мусо Васие мыным боды сётӥз уг! Со мыным сюрес возьматоз!». Кутӥз Натӥ бодызэ бур кияз но, соку ик сюрес кылдӥз, кудӥз ӝутске гурезь йылэ.

Ма карод? Натӥ малпаськиз-малпаськиз но гурезе ӵабъяськыны кутскиз. Вамыш лэсьтэ, кыклы берлань гылӟе. Пумак жадиз, пӧсяса котмиз, нош сюресэз ӝыныез гинэ ортчемын. Ӝожомиз нылаш: «Бен кылё уг мон чебер дэремтэк Выль аре!». Натӥлэн синкылиосыз быльырало, йӧлы пӧрмыса, гурезь уллань питырало.

Татын Натӥлэн йыраз лыктӥз: «Киям мынам бадяр бодые вань ук! Кызьы мон со сярысь вунэтӥ?». Натӥ ӝог кутӥз сое паллян кияз но шӧдӥз, кужымез мугораз уг тэры, пыдъёсыз ас понназы вамышъяло. Одӥг вамыш лэсьтэ - куинь иськеме кошке, кыкетӥ вамыш лэсьтэ – кык сокеме кошке. Озьы Натӥ вуиз гурезьлэн йылаз. Татын нуназе кадь югыт, кизилиос уйылӥськемен шудо. Натӥ валаз,татын сюрес быриз шуыса. Ма табере кароно? Озьы малпаськонъяз, киысьтыз бодыез усиз но гурезь уллань питыръяськыны кутскиз. Натӥ ӝог сое кутӥз но серектӥз:

- Ялан вунэтӥсько коӵышелэсь кузьымзэ! Со юрттоз сюрес шедьтыны.

Натӥлэн сюлмыз шумпотонэн пачылмиз. Бодызэ бур кияз кутӥз, синзэ кыниз но, азьпалаз сюрес кылдӥз. Со весяком гурезьлэн йылаз кыстӥське. Натӥ синзэ усьтӥз:

- Тӥни кытын Тол бабай улэ!

Бодызэ кутӥз но шулдыр вамышъяны кутскиз.

Оло кӧня дыр ортчиз но, вуиз Натӥмы корка доры. Огшоры корка та ӧвӧл: паймымон, уйвӧтын но адӟонтэм! Быдэс азбар сюрс кизилиослэсь лэсьтэмын, нош корка чилясь лымы пырыосын пужыятэмын. Паймыса учке нылаш выжыкыл корка шоры. Со вакытэ Натӥ доры Тол бабай потӥз.

- Ӟечбур, нылаш! Кин-о тон? Малы лыктэмед?

- Ӟечбур, Тол бабай! Мон Натӥ! Лыктӥ мон тон доры юрттэт курыны. Ӝоген вуоз Выль ар, выль дэремен пумитаме потэ.

Натӥ мадиз пересьлы кыӵе дэрем солы кулэ. Тол бабай сое кылзӥз:

- Чырткем тон, Натӥ! Адӟисько, азьтэм ӧвӧл, кышкасьтэм. Сыӵе гинэ адями татчы вуыны быгатэ. Одӥгзэ гинэ вераме потэ: адямилэсь чеберзэ дэремъя уг учко. Я юртто тыныд, нош мыным но тынэсьтыд юрттэт кулэ.

- Мон юртто, маин быгато, песятай.

- Уд кышка-а ужлэсь?

- Уг!

- Корка пуштэ одно ик утялто. Тани песянае но котьку вера: «Кыӵе тон, Натӥ, шаплы, быдэс коркаез утялтӥд сыӵе ӝог!»

- Эн дырты, нылаше. Мынам коркае йӧлэсь.

Натӥ ӝог пыриз корка, адӟе, зэм но, ваньмыз йӧлэсь: диван но, валес но, ӝӧк но. Нылаш ужлэсь ӧз кышка, ӝог валес утялтӥз, пересьлэсь дӥськутсэ сузяз, шкафе ошиз. Киосыз ӟонгырало ини, но нылаш уг возьматы песятайлы кынмемзэ. Собере Натӥ кухня пала вамыштӥз, отын тусьты-пуньы миськиз, дасяз песятайлы выль лымы комокъёс, кынтӥз ческыт мороженой (соосты Тол бабай тужгес яратэ сиыны). Оло кӧня дыр ортчиз но, нылаш, ужзэ лэсьтыса, Тол бабай доры лыктӥз, дораз диван вылэ пуксиз.

- Мон ужме быдэстӥ.

- Адӟисько, тон туж ӟеч, шаплы нылаш. Ӧд кышка шуг-секытлэсь но, кезьытлэсь но. Сыӵе юрттӥсен мон соглаш улыны.

- Тол бабай, мон тонэ туж гажасько, яратӥсько, тынэсьтыд лыктэмдэ арлы быдэ витисько, но монэ гуртын возьмало ини мемие, атае, песянае, Васи коӵыше. Туж бадӟым тау тыныд, сыӵе ӟеч кылъёсыд понна.

- Мон валасько тонэ, Натӥ! Берт гуртад яратоно адямиосыд доры. Нош тыныд мынам кузьым кузьмаме потэ.

Пересь куинь пол киыныз чабиз но, корка кык лудкечъёс сандыкен пыризы. Отысь соос поттӥзы чилясь выль дэрем. Нылаш ма вераны ик уг тоды, сыӵе паймемын вал дэремлэн чеберезлы.

- Бадӟым тау, Тол бабай! Тау!