1. Қазақ, қырғыз елдерінің құнды, бағалы деп тапқан әдебиет, мәдениет мұраларының кейбір нұсқаларын қағаз бетіне түсіруі.
2. Фольклор жəне аты мəлім əдебиет тарихының өкілдері жайлы, əдебиеттің кейбір теориялық мəселелеріне өзінің көзқарасын аңғартып, құнды талдаулар беруі.
Шоқан əдебиет теориясының кейбір мəселелерімен де шұғылдаған, қазақтың өлеңдерiнiң поэзиялық құрылысын зерттеген, қазақтың өлең құрылысын орыс ғалымдарына таныстырмақшы болған. Қазақ өлеңдерін Шоқан: жыр, жоқтау, қара өлең, қайым өлең, өлеңдер деп беске бөледі. Қайсысы ескі түр, қайсысы жаңарақ, олардың қайсысын кімдер айтады, міне, осы жағына талдаулар береді. Шоқанның қазақ өлеңдеріне берген бұл анықтамалары-сыртқы түрі жағынан ғана берілген анықтамалар. Қазақ өлеңдерінің құрылысының негізгі жағынан келсек, Шоқанның қателіктері де жоқ емес. Оның негізгі қатесі қазақ өлеңдері құрылысының силлабикалық жүйеге жататындығын аңғармай, жыршылардың өлең айтқанда не шығарғанда қобыз, не домбыраға қосып айтуына қарап, қазақ өлеңдерінің құрылысын басқаша түсінгендiгi. Қазақ өлеңдерін сөз еткенде, оларды буын жағынан алып бөлмей, түр жағынан бөлудің де себебі де осыдан келіп шыққан.
