Ад быдлаын (< роч); ад гуран скр., шс.; вакрамеш

Н. Конаков

Челядьдырйиыс Ошбыдтас мунiс пöчыскöд вотчыны да вошис. Сiйö веськалiс ош гуö. Ош быдтiс сiйöс ёнысь-ён багатырöн, кодi вермис ньöр моз нетшыштны джуджыд кыдз. Ошбыдтас босьтiс гöрысьлысь куим пуда гöр, вöчис сыысь шы йыв да мöдöдчис корсьны мукöд багатырöс, медым вермасьны накöд. Сiйö вочаасис сьöкыд нопъя нывбабакöд, кодi нуö вöлöм гöрысь вокыслы пажын. Ошбыдтас мунiс сыкöд, аддзис узьысь гöрысьöс да шынас нырсö гильöдöмöн пондiс сiйöс садьмöдны. Гöрысь чайтiс, мый ном-гут дöзмöдчö да несйис. Ошбыдтастö лэбöдiс орчча му вылö. Сэнi сiйö аддзис кöдзысьöс да корис дзебны сiйöс гöрысьысь. Кöдзысь шыбитiс сiйöс кöйдыс сепысас да водзö кöдзис. Öти китыр сiйö койыштiс му вылö, мöдöс вомас. Кöйдысыскöд тшöтш Ошбыдтас веськалiс сылы вомас да сибдiс пинь розяс. Пиньыс пондiс висьны. Кöдзысь беддьöн перйис Ошбыдтасöс пиньсьыс да сьöлыштiс. Ошбыдтас лэбис горт дорöдзыс.

Коми фольклорын му вöдитысь багатыръяслöн мифологизируйтöм образъясыс абу типичнöйöсь, вевтыртöны вöралысьяслöн образъяс: Пера, Йиркап да с.в.

Литература: Ожегова 1989.

Н. Конаков

Ошлапей овлöма Эжва кывтыдын Туглимсянь неылын. Сiйö вöлöма кöч льöбъя, ки пыддиыс вöлöмаöсь ош лапаяс. Туглимсаясöс пырттöдз сiйö олöма аслас гуас, вöралöма да суседъяссö абу вöрзьöдлöма. Но кор найö пыртчöмаöсь, Ошлапей лоöма налöн медлёк вöрöгöн, пондöма гуны подасö, помкатöг усьласьöма да виалöма йöзöс. Туглимсаяс корöмаöсь Перымса Стефанöс дорйыны найöс тунысь.

Кор Стефан отсасьысьясыскöд матыстчöма Ошлапейлöн оланiн дорö, сiйö петкöдлöма тун кужöмлунсö: ва вылын ыджыдалöм да пöртчöм. Медводз кöсйöма путкыльтны пыжсö да кыпöдöма гыяс. Но нинöм абу артмöма да, пöртчöма ыджыд сирö да видлöма путкыльтны пыжсö ачыс. Но Стефанлöн пыжыс векжö матыстчöма берегö. Ошлапей пöртчöма ыджыд ошкö да уськöдчöма Стефан вылö да сылöн ёртъясыс вылö. Муртса вермöмаöсь вины Ошлапейöс. Медводз копыртчöмöн кок вож косттiыс лыйöмаöсь ньöвйöн. Таысь Ошлапей бöр лоöма ас кодьыс. Помöдз вины Ошлапейöс вермöмаöсь сöмын сэк, кор Стефанлöн тшöктöм серти вундöмаöсь яйбердса вöньсö. Бöрыннас Ошлапей гу местаын артмöма Ошлапье сикт.

Легендаас тöдчö збыль лоöмторъяслöн реминисценция – Перымса Стефанлöн вермасьöм тунъяскöд. Бöрыннас йöзлöн мывкыдын найö лоины вына тунъясöн да сувтiсны выльöн пыртöмаяслы паныд. Подаöс гуöм матыстö Ошлапейöс Юркакöд. Тайö сюжетыс вермас лоны мöд вöвлöмторъяслöн нöшта на пыдiджык реминисценцияöн: конфликтъяс мöдлаысь воöм пода видзысь войтыр да ванвисдiнса (IV-X нэмъясся ванвисдiнса археологическöй культура) вöралöм помысь олысьяс костын. Сюрöсас легендаыс топонимическöй. Та вöсна позьö чайтны, мый сiйö артмис вель сёрöн.

Легенда серти, ош корöма вежа Микöлалысь пев. Но Микöла абу сетöма, сы вöсна мый ковмöма пö эськö сетны понлы ньöввуж, а мортлы бордъяс. Сы пыдди вежа Микöла сетöма ошлы позянлун Семен лунсянь куим лун чöж овны вöрын кыдзи сьöлöмыс тшöктас. Тайö лунъясас вöрö мунлöмаöсь сöмын найö, кодъяс надейтчöмаöсь сöмын ас выланыс, сы вöсна мый вежа Микöла абу вермöма найöс дорйыны. Вöралысьяс чайтлiсны, мый буретш тайö куим луннас (Эжва катыдсаяс нюжöдлiсны тайö кадсö вежонöдз) ошъяс “кöлысясьöны”: найö чукöртчöны ыджыд чукöръясö, зэв скöрöсь. Вöравны сэки эз ветлыны, весиг лэчьяс эз видлавны. Пöрысьджык вöралысьяс и öнi на тадзи вöчöны.

Коми сиктъясын ош чуалан лунö лыйлiсны пищальясысь мöдлапöвлань, медым вöтлыны ошъяссö пыдöджык вöрö. Эскылiсны, мый койыштны кö тайö луннас лöканьысь няйт васö ывлаö, а не гид вылö, тöвнас оз сюр лыйны ни öти ошкöс.

Литература: Кайлин 1898, Конаков 1993, Старцев 1929, Fuchs 1924.

Н. Конаков

Öврам Иван вöлöма вына тунöн. Сiйö куимысь сьöлыштлöма кык сывъя коз вылö и таысь козйыс косьмылöма да сы вылысь гылавлöма став емыс.

Н. Конаков

Коми сьылан фольклорын эм öти вариант, кодöс гижöма 1964. воын Емва кывтыдысь. Тайö – йöзкостса версия вежа Öлексейлöн олöм йылысь. Тайö Войвылын паськалöм сьылансö комиöдöмыс йитчöма медводз важ крестлы юрбитысьяслöн идеология асалöмкöд. Сьыланыс пырö йöзкостса полтöса сьылан культураö, кодi абу вичкоса ни службаса. Роч сюжетъясас кö эпос сюрöсыс тöдчö ясыда, то коми вариантсö оз позь шуны эпоса жанрöн.

Коми сюжетыс ёна торъялö рочсьыс, но роч сюрöсыс векжö тöдчö, сы вöсна мый сiйöс тэчöма тöдса фабулаяс подув вылö: геройыс кöсйытöг гöтрасьö, мунö гортсьыс, дыр кад чöж кöнкö ветлö, бöр воö гортас, но сiйöс оз тöдны, сэсся кувсьö, а бöрыннас сiйöс пыртöны вежаяс лыдö. Коми текстас сюжет сценаяссö мöдлаö вешталöма, персонажъясыслысь (мамыслысь да ичмоньыслысь) нимъяссö вежлалöма, сакральнöй иннимъясыс абуöсь (сюжетыс сöвмö оз Римса, а кутшöмкö мойдлы матыса сармуын), подвигыслöн пафосыс абу сэтшöм тöдчана, сiйöс вежöны быд лунъя олöм лоöмторъяс. Стиль боксяньыс коми сьыланыс матынджык лирическöй сьыланлы да сёръя балладалы. Тайö индö сы вылö, мый сьылансö комияс тöдмалöмаöсь сёрöнкодь. И колö пасйыны, мый сiйö абу роч полтöса сьыланлысь сюжетсö комиöдöм, а аслыспöлöс формаа мойд сяма йöзкост-сьылан “импровизация” христианскöй вежалöн олöм йылысь.

Коми сюжетыс заводитчö оз эпос сяма панасöн, кöнi тöдчö сылы ладмана библияса тоника (челядьтöм пöрысь эня-ая корöны нылöс либö пиöс), а мойдса формула сяма панасöн. Сэнi абу некутшöм тöдчана сакральнöй помка, код понда Öлексея Божьяыс öтдортчö гöтрасьöмсьыс, кыдзи тайö тöдчö роч вариантъясас (кöсйö служитны Енлы). Коми сюжетас вель тöдчана кöлысь пир кежлас дасьтысьöм йывсьыс да пир йывсьыс висьтасьöм. Тайö фрагментсö тэчöма Öлексея Божьялысь аскутöмсö паныд сувтöдöм вылö йöзкотырын вылi статуса мортлöн (сарнывлöн жöниклöн) аскутöмлы: кöлысясьысьясыс мунöны оз сар либö боярин ворота пыр, а крестьянинлöн ворота пыр; жöникыс пуксьö крестьянин пызан сайö да таысь озыр рöдвужыс сiйöс дивитöны. Роч текстас Öлексейыскöд колльöдчигöн сылöн том гöтырыс кулöм верöссö бöрдöдысь сьöп кодь. Коми версияас колльöдчöны мöд ног: том гöтырыс юалö верöсыслысь, кыдзи сiйöс öнi колö нимтыны. Вочакывйыс оз ладмы жöниклöн статуслы: сiйö кузь туйö петысь моз корö нянь шöрöм. Ритуала сюрöса сiйö фрагментыс, кöнi невестаыс вундö куим нянь шöрöм. Куимнан шöрöмыс символизируйтöны торъя инициальнöй акт: öтиыс – нылалöмкöд колльöдчöм либö челядьдыр казьтылöм, мöдыс йитчöма кöлысь символикакöд (индö öтлаын нянь тупöсь сёйöм вылö, но тайö сюжетас няньсö оз сёйны), коймöд шöрöмыс кузь туйö мöдöдчысь мортлы вылö да йимчöма гуасян семантикакöд. Öлексея Божья бöрйö коймöдсö. Тайö ладмö сылöн бöрйöм олан туйкöд – гортсьыс мунöм, кодöс позьö öткодявны кулöмкöд.

Коми сьыланас Öлексея Божьяыс – кöлысьса да сакральнöй вöчöмъяс торкысь жöник, торкö йöзкотырас урчитöм арт-ладсö. Но торкалöмыслöн абу некутшöм помка, тöдчана ачыс торкöмыс, медым Öлексея Божьяыс лоис мифологическöй геройöн, кодi öтдортчö котырöн олöмысь да йöзкотырса вылi статусысь. Та боксянь кö видзöдны, Öлексея Божьялöн подвигыс тшöктытöг жертвуйтöмын – олöм тыр-бурсьыс öтдортчöмын.

Водзöсö вель дженьыда висьтавсьö йöзкотырса да быд лунъя волысьöмъяс йылысь: том ичмоньöс мыждöны верöсыслöн вошöм понда да пуксьöдöны дзескыдiнö. Пырмунiгмоз гаравсьö, мый Öлексея Божья олö вöрса келляын, пöрысьмö. Роч версияас моз танi оз висьтавсьы, кыдзи Öлексея Божья ветлöдлö юрбитны, корысь туйын олö саридзсайса вичкояс дорын, а сэсся думыштö бöр локны ай-мам керкаас. Батьыс сiйöс оз тöд, но лэдзö узьны курöг видзанiнö. Роч текстъясас Öлексеялöн ай-мамыс бур сьöлöмаöсь, а писö кедзовтöмын мыжаöсь öксылöн кеслачьясыс.

Кулöм бöрас Öлексея Божьясö тöдмалöны. Коминас та йылысь гижöма унджык и та боксянь коми версияыс матын рочыслы. Ветлысь-мунысьлöн кулöм йылысь тöдмалöны курöг видзанiнсянь öвтысь чöскыд зын серти. Чöскыд дукыс вöлöм кылö сылöн шойсяньыс. Мый ветлысь-мунысьыс налöн пиыс, ай-мымыс тöдмалöмны киöн гижöм гижöдысь. Медпомас висьтавсьö Öлексея Божьякöд колльöдчöм йылысь. Тайö бара жö торъялö роч сьылансьыс. Гортсö оз вермыны вöрзьöдны. И сöмын кор кылö пророклöн гöлöс да висьталö, мый колö вöчны рöдвужыслы, эзысьöн да зарниöн коялöм туй кузя кулöмасö нуöны вичкоö.

Дзебсясьысь ветлысь-мунысьлöн (дзебсясьысь сектаса мортлысь статуссö религиознöй гöгöрвоöм) состояние серти позьö тöдмавны, кутшöмöсь христианскöй вежалысь вежалунсö йöзкостса гöгöрвоöмлöн мифопоэтическöй вужъясыс. Вежаыслöн подвигыс буретш татшöм состояниеын, кодi ёна торъялö мукöд йöзыслöн олöмысь. “Артсö” торкöм пыр Öлексея Божья лоö мифологическöй герой статуса.

Мезень катыдын Öникаöс тöдöны шемöс вöчысьöн, манакöн, кодлöн вöлi нöшта кык вок. Латьюдiнсянь куим километр ылнаö, мöдлапöлас, найö лöсьöдiсны отшельник келля. Öника олöма дыр, нимавлöма йöзöс да подаöс бурдöдöмъяснас. Дзебöмаöсь сiйöс аслас келляас, сэтчö жö сувтöдöмаöсь казьтылан крест. Шемöс отсöгöн бурдöдчылiсны и сылöн гу вылас нин. Та понда Öникалöн келляыс (сiдзи и шулiсны – Öника келля) лои культа местаöн. Келлясö вöлi тшупöма жытник кодьöс. Пытшкас вöлi Öникалöн гуыс. Öдзöсыскöд воча стенас джоджсяньыс йиркöдзыс вöлi тыр сувтöдлöма иконаяс. Орчча сиктъясысь воöм комияс да рочьяс öтиöн-öтиöн пыравлiсны да öшлiсны козинъяссö торъя сёр вылö. Келля кутысьыс öзтылiс кадилö да кевмысьöмсорöн тшынöдлiс гусö, келлясö да козинъяссö. Кевмысьöм бöрас ставöн мунлiсны Келля ты дорö. Васö тысьыс и öнi на чайтöны вежаöн. Колiс шыбитны ваас некымын кöрт сьöм, корны вежа Öникасö бласлöвитны, сэсся мыссьыны. Вежа васö нулiсны и гортас. Вежанас ваыс лоöма Öникалöн коркöя вöчöм понда. Сэтчас легендаын висьтавсьö, мый öти вöралысь виöма понсö да вöйтöма тыас. Вежа Öника юöма тысьыс став васö да гуалöма понсö. Тадзи сiйö мöдöдöма сылысь ловсö райö. А вöралысьсö синтöммöдöма. Сэсся Öника бöр лэдзöма став васö тыас. Таысь ваыс лоöма вежа.

Öникалысь образсö ёна мифологизируйтöма. Шуам, сiйö петкöдчö тунъяс йылысь преданиеясын, кöнi висьтавсьö чужва да ю сувтöдöм йылысь. Вежа Öникалöн вöлöма шемöса еджыд вöв. Сiйöс Öника ыстывлöма отсасьны мöдлапöвса Латьюдiнын олысь крестьяналы. Вöлыс вуджлöма юсö да весиг кокыс абу кöтасьлöма. А бöрсö вуджигас сiйö йöз мыжъяслöн сьöкта вöснаыс вöйласьöма шегйöдзыс.

Öтув юрбитöмъяс кындзи, келляас ветлiсны и öткöн-öткöн, кор кодкö висьмылiс либö жö висьмылiс ли вошлiс пода. Корысьыслы колiс юрбитны да кöсйысьны вежаыслы отсöгсьыс козин. Козин туяс вайлiсны паськöм (висьысь сертиыс – челядь либö верстьö паськöм), дöра, чышъянъяс, шальяс, серöдöм ки чышкöдъяс, вышивайтöм креста ичöтик дöрапасъяс, а тшöтш и сьöм. Кольöм нэмся 30. вояс помöдз келля кутысьыс öтчыд вонас вузавлiс вайöм кöлуйсö. Сiйö сьöм вылас ньöблiсны сисьяс да öбразъяс. 1942. воын сотчис медводдза келляыс. Келляыскöд тшöтш сотчисны и сэтчöс олысьяслöн шуöм серти “нэмöвöй” öбразъяс. Ожман бöрас келлясö лэптiсны выльысь. 1964. воын районса партияса веськöдлысьяс тшöктiсны сiйöс сотны. Недыр кад мысти вежа Öника пондiс петкöдчывны келля кутысьыслы да сиктса олысьясыслы. Выль келлясö вöчисны пöвъясысь, сэтчöс юралысьясысь гусьöн. Перестройка бöрын келля местаас лэптiсны пу часовня. Вежа Öника культлöн шöр элементъясыс кольöмаöсь и öнöдз на.

Öшкамöшкалöн нимъясыс индöны сылöн форма вылö (ньöввуж, мегыр) либö вакöд йитöд вылö. Öтл. коми (öтувперым) öшмöс, кодi некыдз абу йитчöма ни öшкöд, ни мöскöд. Та вылö видзöдтöг йöзкостса этимологияын да традицияа мöвпсямын сiйöс гöгöрволiсны öшка мöскаöн, но векжö йитлiсны вакöд. Тöлысьвывса ныв йылысь мифлöн вариантын öшкамöшкаыс зэрöм бöрын лэччöма шор дiнö юыштны. Юигас воöма ватланъяса ныв да сы вылö видзöдтöг кöсйöма гумовтны васö. Öшкамöшка ньылыштöма нывсö, лыбöдöма енэжö да сетöма тöлысьлы. Сэтчö нылыс пыр кежлö и кольöма. Кор мыччысьлiс öшкамöшка, чайтлiсны, мый “космосса öш” лэччö ю дорö юны, а сэсся öшкамöшкаыс бöр качö вылö. Кор “öшкыс” юлiс уна, мыччысьлiсны кымöръяс да зэрлiс.

Йöзыс öшымöс чудлы веськодьöсь, но мукöддырйиыс сiйö скöралö: шыбласьö ёгöн, чагъясöн, оз сет гумыштны ва. Чайтлiсны, мый татшöм ногöн пасйöм мортыс регыд кулас.

Паляйка овлiс Тыдорын, ыджыдалiс стихияяс вылын да пемöсъяс вылын. Тадз, шуам, öтчыд Паляйкалöн кыйсянiнö воис вöралысьяслöн артель, юралысьнас вöлi Вежайка тун. Вежайка шуис Паляйкалы, мый Паляйкалöн кыйсьöмыс оз ладмы да тайöн дöзмöдiс сiйöс. Куим лун чöж сэсся Вежайкалöн артельыс волiс тыртöг, а Паляйка муртса вермылiс кыскыны кыйдöссö вöр керкаöдзыс. Вежайкалöн тшöктöм серти ёртъясыс кöсйисны керавны Паляйкаöс узигас. Но Паляйка шуис нимкыв и Вежайкалöн ёртъясыс черъясöн шеныштчöмöн кынмисны места вылас да сулалiсны сiдзи асылöдзыс. Асывнас Паляйка лэдзис найöс да шуис, мый налöн лоö уна кыйдöс, а сiйö пондас волыны тыртöг, но гортас нуас на серти унджык кыйдöс. Сiдзи и лои. Кор кыйсьöмыс помасис, Паляйкалöн вöлi сöмын медводдза лунъясас кыйöмаыс, а Вежайкалöн артельыс лöсьöдчис мöдöдчыны гортас озыр кыйдöсöн. Друг поводдяыс вежсис: тöв шöрын пондiс кисьтны зэр, куим лун мысти лымйыс сылiс, юяс туисны и вöр керкасö ойдiс. Вежайкаяс кайисны вевт вылас, но ваыс пыр содiс. Найö кавшасисны орчча пу вылö, но ваыс пыр содiс, и найö гöгöрвоисны, мый Паляйкатöг налы не мездысьны. Вежайка мый вынсьыс горöдiс, мый мездöмсьыс найö сетасны Паляйкалы кыйдöс джынсö. Ваыс пыр жö чинiс. Вöралысьяс лэччисны пу вывсьыс да пырисны вöр керкаас. Сэнi чöла пукалiс Паляйка да кулис уръясöс. Кыйдöс джынсö сетiсны Паляйкалы. А Вежайка думыштiс бöръяысь вермасьны сыкöд. Сiйö шуис, мый тупкас Паляйкалы вöр керкасьыс петан туйсö, лыддис нимкыв да юис кунка ва. Сэк Паляйка тшöтш жö кисьтiс кункаö ва, шуис нимкыв да юис. Кор Паляйка юис васö помöдзыс, Вежайка кулiс.

Кор Перымса Стефан воис Тыдорö бурсьывны, Паляйка вöзйис сылы вермасьны, медым тöдмавны, кодыслöн эскöмыс вынаджык. Вермасянiннас бöрйисны ва. Паляйка кöсйис уйны ва увтiыс Тыдорсянь Шежамöдз да вöзйис уйны тшöтш и Стефанлы. Но Стефан шуис, мый сiйö мöдас мунны ва веркöсöдыс да видзöдны, мед Паляйка оз мыччысь васьыс кадысь водз. Кыкнаныс шыöдчисны асланыс енъяс дiнö, шуисны нимкывъяс да петiсны туйö. Тыдорса олысьяс вöтчисны на бöрся ю пöлöныс. Стефан аддзис, мый Паляйка кокниа уйö Шежамлань, да шуис нöшта вынаджык нимкыв. Паляйка пондiс пöдны. Сiйö мыччис юрсö ва увсьыс, медым шуны воча нимкыв, но Стефан юрас крестöн вартöмöн бöр вöтлiс сiйöс ва улö да мыждiс сёрнитчöмсö торкöмын. Тадзи вöлi некымынысь. Медбöрын сэсся Паляйка усис эбöссьыс да петiс васьыс. Сiйö муртса эз во Шежамöдз. Йöзыс аддзисны, мый туныс ворссис, да шыбитчисны сiйöс нöйтны. Паляйка шуис нимкыв да бара сунiс ваö. Но Стефанлöн нимкывйысь сiйö пондiс пöдны да бöр петiс косö. Сиктсаяс сiйöс кватитiсны, вундiсны яйбердса вöньсö да виисны.

Паляйкаöс дзебисны Шежамсянь кывтыдланьöджык. Сiйö местасö нимтiсны Айка тылаöн. Вермас лоны, мый коркöся тылалы тунлысь нимсö сетöмыс йитчöма сылöн нимлöн этимологиякöд паль (< роч) ‘сот(ч)öмин, тыла’.

Агиографическöй литератураса важроч “Житие св. Стефана...” гижöдын Перымса Стефанлöн медшöр паныд сувтысьнас петкöдчö Пам, важ пермяналöн медвылi жрецыс. “Житие...” гижысь Епифаний Премудрый висьталö Пам йылысь: “...некий волхов, чародеевный старец, лукавый мечетник, нарочит кудесник, волхвам начальник, обавникам старейшина... его же древле перьмяне нехрещении чтяху паче всех прочих чаровник, наставника и учителя себе нарицающе его”. Пам кыв жрец вежöртасын паныдасьлö коми сьылан да мойда фольклорын. Памыс сэнi пода виян пурт кутысь – вермас лоны важ пермяна жрецъяслöн функция колясöн.

Перым-комияслöн Кудым-Ош йылысь легендаясын висьтавсьö, мый сылöн айыс вöлi пам, кодi петкöдчö оз вылi жрецöн, а ожман юрнуöдысьöн. Батьыслöн кулöм бöрын памнас бöрйöны Кудым-Ошкöс. Сiйö юрнуöдö ылi вузасьны ветлiгъясö, веськöдлö карвыв дорйöмöн, но абу жрец.

Литература: Епифаний 1897, Климов 1964.

Н. Конаков
ПАПЕРЕК КОЛЬ быдлаын (< роч папоротник + коми коль); парма коль вэ.; паперек быдлаын; паперус вс.; папорос лет.; папортник уэ., шс.; паперт турун уэ., печ., п.-к.; лудiк турун печ., сыкт., шс.; лудук турун изь.; лудык турун ем., уэ., уд.

Чайтлiсны, мый Иван лунö дзордзалысь паперек коль отсöгöн позьö лоны вöвлытöм вынаöн, нюжöдны олöм, корсьны гуалöм озырлун, лоны тыдавтöмöн. Паперек коль корсьысьлы колiс лоны крепыд сьöлöмаöн да повтöмöн, сы вöсна мый лёк ловъяс зiльöны торкны сiйöс, повзьöдлöны и весиг кулöмöдз вайöдöны. Паперек коль корсигöн эз позь видзöдны бöрлань. Индöны весиг урчитöм инъяс, кытысь пö аддзылöмаöсь дзордзалысь паперек кольсö, но судзöдны сiйöс некод абу вермöма. Висерын висьтасьöны, мый ю сайын джуджыд сус пу улын Иван войö дзоридзалö биа паперек коль, мый сылöн югöрыс сиктöдз судзö. Но сöмын шуд корсьысьяс воöны юöдзыс – биыс кусö.

Унаöн видзлiсны паперек коль вуж апотропейнöй средство туйö. Сiйö вöлi и бурдöдчанторйöн кутшöмсюрö висьöмъясысь.

Литература: Иваницкий 1890, АЧМ.

И. Ильина
ПАРАСКЕВА-ПЕКНИЧА быдлаын – вежа мученик.

Комияслöн Параскева-Пекнича дорйö нывбаба удж, чужтанлун да гозъя олöм. Эскöмъяс серти, Параскева-Пекнича оз сöмын дорйы нывбабаясöс да налöн котырса лючки олöмсö, но вермö и чорыда накажитны найöс, кодъяс сiйöс оз пыдди пуктыны. Чайтöны, мый сiйö ачыс ёна мучитчö став нывбабаыслöн мыжъяс понда.

Коми фольклорын öнöдз на кольöмаöсь соционормативнöй сяма быличкаяс Параскева-Пекничалöн мыжа нывбабаяс дiнö волöм йылысь. Тадз, шуам, Параскева-Пекнича волö нывбабаяс дiнö вöтöн либö збыльысь да мыждö найöс пекничаö уджалöмысь. “Нывбабаяслöн пекничаö песласьöм понда Параскева-Пекничалöн тушаыс лöмöсь, а синмыс да паськöмыс няйтöн тырöма”. Чайтöны тшöтш, мый сiйö волö кутшöмкö нелючки дырйи да индö помка вылас.

Чайтöны, мый нывбабаясöс, кодъяс дыр оз вермыны чужтыны либö кодъяслöн кулалöны челядьыс, накажитöма Параскева-Пекнича. Мыжъяссьыс налы колö кевмысьöмöн корны сылысь прöща. Медлада кадыс та вылö Öкмысöд Пекнича Ыджыд лун бöрын. Роч Войвылын (Кардор да Вöлöгда губерния) XIX нэм заводитчытöдз тайö лунсö пасйылiсны кыдз нывбабаяслысь тувсов праздник. Уна коми сиктын буретш тайö лун вылас усьлiс и Параскева-Пекнича праздник, кöть и вичкоса календар серти Параскева-Пекнича луныс арын (важ ног йирым 28. лун). Тадз, шуам, Емва бердса Онежье сиктын тайö луннас нывъяс ворслiсны чепъяс вылö öшöдöм ыджыд гытсан вылын, Летка бердса Прокопьевка сиктын да Вашка бердса Ёртöм сиктса Крестовка грездын ветлiсны öбразъясöн.

Став Асыв-Войвыв Европаса традиция серти, Параскева-Пекнича часовняяс лэптылiсны туйвежъясын да ва бердын. Öти татшöм часовня лэптылöмаöсь XVIII нэм заводитчигöн Вашка бердса Кöдж сиктын. Сэтчöс праздникöн вöлöма Петыр видзса медводдза пекнича. Йöзкостса эскöмъяс серти, сiйö луннас часовняса Параскева-Пекничалöн шемöса енпöв вермö бурдöдны висьысьясöс. Оз прöста тайö праздниксö нимтыны тшöтш и Заветнöй лун висьысьяслöн. Öнi на тайö луннас öбразъясöн ветлöны Кер ю дорö. Сэнi пöрысь нывбабаяс да нывкаяс мыськовтöны Параскева-Пекнича енпöвйöн вежöдöм ваын вичкоса да гортса енпöвъяс. Енпöвъяссö оз позь сюйны сулалысь ваö, сы вöсна мый эскöмъясын сiйö петкöдчö кулан ва метафораöн. Висьталöны, мый öтчыд сюйöмаöсь Параскева-Пекнича енпöвсö тыö да “пыр жö лыбöма ён тöв да шондiыс саялöма”. Ковмöма выльысь ветлыны Кер ю дорö, “а то Ен дöзмас”. Пöрысь нывбабаяс да челядь гумлалöны вежöдöм васö дозмукъясö. Бур кö поводдяыс, тайö луннас горувланьынджык купайтчöны. Праздник бöрас куим лун чöж юас ваыс бурдöдан вына.

Литература: Жеребцов 1972, Конаков 1993, Шарапов 1995, Sharapov 1995а, ПЛ ЧМ.

В. Шарапов
ПАСЬКÖМ ем., уэ., печ., сыкт., шс., уд.; кöмкот-платтьö печ.; кыш-кöм лл.; кышöд-кöмкот вс., лл.

В. И. Лыткинлöн да Е. С. Гуляевлöн чайтöм серти, кык кыввужъя паськöм кывйын тöдчöдöма дзоньнас паськöм да кöм комплекс. Сiдз жö и хант кывйын сахнир: сах ‘вылi паськöм’ да нир ‘кучик кöм’. Интереснöйöсь паськöм кывлöн вежöртасъясыс эжваса сёрнисикасын: 1) анат. ‘плацента’; 2) ‘паськöм дзоньнас’. Эжватас комияс пасьтöм морт кывтэчасöн пасйöны и эбöстöм, висьысь мортöс. Татшöм морт йылысь позьö шуны и вуджöрыс абу. Та понда косясьлöм паськöм новлöм вöлi не сöмын этикет нормаяс торкöмöн, но и öпаснöйöн. Эскöмъяс серти, паськöм тшыкöдöм либö воштöм кайтö неминуча либö висьöм.

Паськöм вöлi мортлöн вуджöр да кок туй моз жö торйöдтöг йитчöма сыкöд. Чайтöны, мый мортöс позьö кокниа тшыкöдны сылöн паськöм пырыс. А. С. Сидоровлöн тöдмöсъяс серти, комияслöн вöлi дöрöм гуöм нима тшыкöдан сям: нывбабалысь гулiсны тöлысся вирöсь дöрöмсö да пуктылiсны дзуртысь пу потасö. Таысь нывбабаыс пондас висьны да сiйö пуыс моз “дзуртны”. Эскылiсны, мый ас паськöм отсöгöн позьö мынтöдчыны висьöмысь либö тшыкöдöмысь: пывсьöм мысти колiс шыбитны дöрöмтö куст вылö либö колана нимкыв шуöмöн сотны; мынтöдчыны висьöмысь позьö и висьöма паськöм мöд мортлы сетöм пыр; кагаöс тшыкöдöм бырöдöм могысь колö кöтöдны кагалысь пеславтöм дöрöм кöлысссö визувтан ваöн, куимысь чышкыштны дöрöм кöлыснас сылысь синсö, сэсся пыдзыртны васö тасьтiö да койыштны шуйга ки вомöн “Мый тэ гöрин-кöдзин, мед ставыс аслыд лоö” шуöмсорöн да с.в. Удораса да изьватас комияс чайтöны, мый висьöмысь позьö мынтöдчыны, нуны кö пеславтöм паськöмтö сиктсайса öбвет крест дiнö либö öшöдны кö сiйöс вежаинын (вежаöс дзебанiн, вежа öшмöс ли ты) быдмысь пу вылö.

Водзтi ассьыд паськöмтö дзик эз позь сетны öтдоръяслы, весиг недыр кежлö. Та понда важ паськöм некор эз шыбитлыны, а öшöдлiсны йирк вылö либö сарайö дзикöдз сiсьмытöдзыс. Чайтлiсны, мый сöмын нывбаба вермö сетны ассьыс кöлысь паськöм юкöнъяссö недыр кежлö невесталы, кодi лоö сылы матыса рöдвужöн либö вежанылöн. Тайö öлöмсö торкысьлысь юавлiсны: “Кувны али мый мöдöдчöмыд?”. Öнöдз кольöм традиция серти, пöрысь йöз сöмын кулöм водзас сеталöны ассьыныс паськöмсö матысаяслы да тöдсаяслы (нывбабаяс сеталöны унджык чышъянсö) “лов казьтылöм вылö”.

Торйöн нин бура комияс видзлiсны рубежа кадколастъяскöд йитчöм паськöмнысö: Эжва катыдса пинь дöрöм козьналöны кагалы медводдза пинь петiгас; печораса пернянь дöрöм козьнавлiс вежаньыс пыртiгöн; керчомъясаяс видзлiсны сьöд дöрем либö гöрд няйт дöрем – медводдза менструация вирöсь улi дöрöм; быд нывбаба бура видзлiс кöлысь паськöмсö, эскылiсны, мый сiйö вöлi торъя магияа вына: лёк ловъясöс пö керкаысь вöтлыны вермö сöмын месаньыс кöлысь сарапансö пасьталöмöн. Имитана вуджöрöн вöлi паськöм, кодöс сетлiсны ритуала козин пыдди. Удораын дзебигöн кулöмаыслöн рöдвужыс сетлiсны горт вöчысьяслы сунис тасма – öтлаö кöрталöм гöрд вöньтор-кöртöд да вöчтöм шабдi сунис чукöр. Татшöм жö вöньтор, но лöзöс да шабдi сунистöг, сетлiс пузчужöмалöн мамыс кагасö пыртöм кежлö воöмаяслы. Эжватас комилöн медводдза кöлысь лунас невеста козьнавлiс верöспуыслöн батьыслы да вежайыслы чышъян вöнь – петля бердö кöлалöм кык пельö кусыньтöмöн кыöм вöньысь тугъяса сера окшин. Пасъям, мый быд лунъя да öбрад вöньяссö, кодъясöс эз новлыны, печораса комияс видзлiсны гöрöдö либö петляö кöрталöмöн: пасьтавтöм да разьöм вöнь гöгöрволiсны кодлыкö висьöм либö кулöм сиöмöн.

Быдлунъя паськöм дорысь праздник да öбрад паськöм эз позь пеславны. Вонас öтчыд сiйöс тöлöдлiсны либö пöжлiсны пывсян гор весьтын. Кутшöмсюрö öлöмъяс вöлiны и быдлунъя паськöм песлалiгöн: мужичöйяслысь да челядьлысь паськöмсö эз позь пеславны нывбаба паськöмкöд тшöтш – мужичöйяслöн оз ло вöралан шудыс, а челядь вермасны висьмыны. Эскылiсны, мый верстьö нывбабаяслöн паськöмыс пеж и сiйö босьтö паськöмыслысь вуджöр вынсö. Гозъя йылысь, кодъяс öтлаын узьöм бöрын оз вежны улыс паськöмсö, шуöны: “налöн паськöмыс лои вуджöртöм”. Магияа вына и мужичöйяслöн улыс гачыс (дöрöм-гач быдлаын, луза-леткаса йöрдöс-гач, перям-коми йöрнöс-вешъян): нывбабалы бур вуджöрöн вöлi мужичöйлöн кальсоныс, а тшöтш и кальсон кöртöдыс. Водзтi нывбабаяс тöлысся вир петiгöн новлiсны мужичöйлысь улыс гачсö. Мужичöй кальсонöн тшöкыда вöдитчылiсны пода чужтанлун вынсьöдöм могысь (нöйтлiсны мöскöс, медым сiйö öдйöджык куканясис). Эжватас комияс кувсьöм сьöплы гортъяс пуктылiсны верöсыслысь кальсонсö да дöрöмсö.

Комияс лыддьылiсны паськöмсö мортлöн вуджöрöн. Та понда найö кутчысьлiсны паськöмсö пасьталöм, новлöм да видзöм ладкöд йитчöм öлöмъясö. Öнöдз на торъя паськöм юкöнъяс пасьталöны сьöрсьöн-бöрсьöн урчитöм ног. Тайö арт-ладсö торкöмысь пö вермас лоны кутшöмкö неминуча. И пöрччысьны колö урчитöм ногöн: шуам, сарапан быть колiс пöрччыны гугöн да юр пыр, сы вöсна мый кок пыр пöрччöм – тайö мыж, “тадзи пöрччöдöны кулöмаöс”. Гугöдöм сарапан колö видзны сундукын: “колян кö гуга сарапан вой улö вевттьытöг, сiйöс мöдасны чöртъяс новлыны”. Та вöсна быдлунъя паськöм некор эз кольлыны вой кежлö гугöдöмöн. Печораса комияс вой кежлö пöрччысьтöм морт йылысь шуöны: “тадзи узьöны сöмын кулöмаяс”. Сыктывса комияс узьысь улö лэдзчысьöм морт йылысь шуöны: “паськöмыс сöмын узьö”.

Эз ошкывны луннас паськöм вежысьясöс, сы вöсна мый тайöс лыддьылiсны тунасьöмöн. Нывбабаяс сарапанасьлiсны асывнас да эз пöрччывны сiйöс лун чöжыс, а ковмылiс кö, пасьтавлiсны сарапан вылас мöд паськöм. Вöралысь кö кыйсьыны мунiгас вунöдлiс мыйкö пасьтавны, то эз пасьтасьлы выльысь гортас, а босьтлiс вунöдöмторсö сьöрсьыс да пасьтавлiс сöмын вöр керкаас воöм мысьт, а то пö кыйсьöмыс оз ладмы. Сöмын праздникъяс дырйи позис вежсьывны некымынысь луннас. Но уна нывбаба пасьтавлiс некымын сарапан öта-мöд вылас либö некымын юбка, медым паськöмыс вöлi пашкырджык.

Уна финн-йöгра войтырлöн мöвпсямын паськöм гöгöрвосьö и торъя мортлöн образöн. Та йылысь висьталöны кутшöмсюрö коми эскöмъяс да öлöмъяс: ловъя мортлысь дöрöмсö оз позь öшöдны косьтыны “кулöмалысь” моз морöсладорнас вывлань; ичöт кагаöс тшыкöдöм бырöдiгöн вöчлiсны магияа вöчöмторъяс сылöн рузум-паськöм вылас; позьö висьмöдны морт тушалысь кутшöмкö юкöн, сылысь пеславтöм паськöмсö кö гöгрöса вундыны коланаинтiыс. Вой кежлö паськöмсö öшöдлiсны урчитöм ногöн, медым не висьмыны да не вынтöммыны. Идравлiсны кö паськöмсö дыр кежлö, гугöдлiсны, тэчлiсны торйöн нин пелька (лист да пласт) да сайöдлiсны йöз син водзысь. Ковмылiс кö вурны косясьöм дöрöм-гач пöрччытöг, вомад колiс босьтны перна, “мед не вурны шудтö паськöмад да не воштыны сiйöс пöрччысьöм мысти”.

Коми мойда фольклорын гортса кöлуйысь артмöдöны торъя мортлысь образсö сылöн паськöм отсöгöн (шуам, ошкысь пышйысь нывкалысь паськöмсö гыр вылö кышалöм). Фольклорын ас кыöм дöрöм кындзи торъя магияа вынаöсь тшöтш и чышъян, шапка, кыöм сера чувки, чуня кепысь да кепысь. Чайтöны, мый вывлань шыбитöм кепысь пöв отсöгöн позьö тöдмавны, сюрас оз гуöмторйыс (пев нырвизь сертиыс); гожöмын вöнь костö сюйöм сера чуня кепысь видзö геб-номйысь; медым висьмöдны кодлыськö юрсö, колö некымынысь шыбитны сылысь шапкасö вывлань либö бергöдлыштны шапкасö киад; перым-коми фольклорын чудьлöн став выныс вöлöма шемöса шапкаын, а лёк тунлöн выныс – сьöд чышъянас.

Гозъялöн кöлысь бöрас нин нажöвитöм паськöмыс видзö не сöмын найöс, но и радейтöмнысö. Чайтöны, мый тайöс позьö торкны, керыштны кö гöтырыслысь чувки пöвсö шöри либö пывсигас гусьöн пыркнитны верöсыслысь дöрöмсö. Эжватас комилöн гозъя йитöд символöн петкöдчö чышъян, кодöс найö кутiсны киас сьылöдiгас. Кулö кö кодыскö, чышъянсö косялöны шöри: öти торсö пуктöны кулöмалы гортъяс, а мöдсö видзö гозйыс. Гöтырсö пöръявтöмлун символ туйö невесталöн нывъёртъясыс козьнавлiсны том верöслы вурöм гач кокъяса жöник гач.

Коми фольклорса да öбрадса текстъяслöн анализ петкöдлö, мый паськöм вермис гöгöрвосьыны и мортлöн символа муртасöн, кодi пасйö мортлысь вежсьöмсö (пыртöм / пырттöм, гозъя / гозтöм, дзоньвидза / висьысь, ловъя / кулöма). Кор тун пöрччысьлiс да тымбыльтчылiс нюкыля пу увтi, медым пöртчыны вöрпаö, сiйö вермис дзикöдз воштыны морт мыгöрсö, гусявлiс кö кодкö сылысь пöрччöм паськöмсö.

Эмöсь кулан паськöмкöд йитчöм öлöмъяс: оз позь пасьтавны либö ас вылад петкöдлыны, кыдзи пасьталöны кулан паськöмсö – регыд кодкö кулас. Праздникъяс дырйи кö пöрысь йöз пасьтавлiсны водзвыв дасьтöм кулан паськöмнысö, сiдзкö, найö кöсйисны öдйöджык мунны мöдар югыдö. Öпаснöйöн вöлi и гадайтчигöн кулöмаöн пасьтасьöм. Чайтöм-гöгöрвоöмъяс кулöмалöн лов да сылöн паськöм костын веськыд йитöд йылысь тöдчöны коми эскöмъясын: дыр кö не пеславны мортлысь паськöмсö, кодын сiйö кувсис, то лолыс мöдас мучитчыны; кулöмаöс оз позь пасьтöдны рöма да сера паськöмö – “а то сылöн лолыс оз вермы инасьны да пондас ветлыны ва вывтi да виччыны, кор паськöмыс быгалас, а сiдзкö и, кокняммас”; кулöмалысь паськöмсö колiс кольны гöрöдъястöг (вöнь, чышъян, кöм кöв да перна кöв), а то сiйö пондас тшöкыда дöзмöдчыны ловъяяслы вöтöн. Сiдзкö, и кулан паськöм дасьтöмсö, кодöс быть вурöны гöрöдтöг, позьö гöгöрвоны кулöмсö да мöдар югыдö вуджöмсö кокньöдöмöн. Тадзи жö (ньöти гöрöдтöг) вурлiсны ритуала паськöм нывбабалы, кодi кöсйис вöтлыны шеваöс. Эскöмъясын кулöма вылö пасьтöдöм паськöм вермис имитны ловъяяслы: чайтлiсны, шуам, мый весиг кулан дöрöмысь босьтöм сунисöн позьö лöньöдны медся этш тöдтöм мортöс. Чайтлiсны, мый мортöс позьö немö воштыны, пасьтöдны кö сы вылö кулан паськöм вуран емöн вурöм дöрöм.

Литература: Налимов 1908, Микушев, Чисталев 1968, Плесовский 1968, Сорвачева, Сахаров, Гуляев 1966, Сидоров 1928, Сивкова 1991, Уляшев 1993, АЧМ.

В. Шарапов
ПАСЬТÖМ УР сыктывса, вэ., уэ., уд.; кульöм ур уд., ем.; кулем ур вэ., печ. – нимкывъя гöнтöм ур.

Пасьтöм ур – тунъяслöн вöчöмтор. Пасьтöм ур отсöгöн тунъяс тшыкöдлiсны вöралысьясöс. Пасьтöм уркöд паныдасигöн сiйöс быть колiс вины, мед кöть урыс некытчö эз туй, а то вöралысьлöн “тшыкас киыс” и пыр кежлö вошас вöралан шудыс. Пасьтöм урöс позис вины сöмын торъя сямöн. Пищальтö колiс октыны нянь пуляöн да лыйны кок косттiыд бöрвыв да вискытöг. Лыйöм пасьтöм урсö вöралысь гаровтлiс коз лыскö да гуавлiс. Чайтлiсны, мый та бöрын тшыкöмыс вуджлiс пасьтöм урсö ыстысь тун вылö. Вöлi и сложнöйджык ритуал, кодöн накажитлiсны лёк тунöс. Виöм урнас вöралысь мунлiс сiйö морт ордас, кодöс чайтлiс тшыкöдчысьнас, да юавлiс, сiйö туналiс урсö али эз. Мöдыс кö эз висьтась, но эз видзаась, кор вöралысьыс бöр мунлiс, сiдзкö, сiйö и вöлi мыжанас. Вöралысь бöр мунлiс вöрö да мыр вылын керыштлiс пасьтöм урсö шöри. Сэсся сiйö керыштлiс куим том коз, водтöдлiс найöс йывъяснас лунвылö, пуктылiс на вылö шöри керыштöм пасьтöм урсö да биасьлiс. Пасьтöм ур сотчигкостiыс вöралысь куимысь лыйлiс пищальсьыс тыртöм патронъясöн. Быд лыйöм бöрын сiйö шулiс: “Кодöс лыйлан? – Мыжа мортöс”. Чайтлiсны, мый таысь пасьтöм урöс ыстысь тöдысьыс куим лун мысти кувсьылiс.

Гежöдджыка чайтлiсны, мый пасьтöм урöн вöрса накажитлiс кутшöмкö мыжысь либö прöста вильшасис. Татшöм урлы вöралысь лыйлiс став патронсö да волiс гортас кыйдöстöг. Пасьтöм урö вермис пöртчыны и нинöмöн торъявтöм ур, эз кö вöралысь сiйöс пыдди пукты либö жалитiс. Тадз, öти Эжва катыдса вöралысь-тун урсö лыйтöдзыс шуöма: “Конерэй, лыя вед дай усян”. Вöралысь абу вермöма кыйны не сöмын сiйö урсö, но и дыр кежлö воштöма вöралан шудсö. Сöмын унаысь сöстöммöдчöм мысти сiйö вермöма косöдны вöвлöм кужöмсö.

Литература: Сидоров 1928, Uotila 1989, ОУ ЧМ.

Н. Конаков
ПАЧ быдлаын (< роч печь); гор лл., п.-к. (öтл. удм. гур < öтувперым gor ‘гор, пач’).

Овмöсын пач зэв тöдчана. Сiйö сетö би, шоныд, сёян да артмöдö горт олöмын микроклимат. Та вöсна пач йитчö уна мифа чайтöм-гöгöрвоöмкöд. Пач да сыкöд йитчöм кöлуй – öгыр, шом, нянь зыр, пач чышкан лыс, пачысь босьтöм из либö сёйиз – видзöны пеж вынъясысь. Тадз, войнас гортсьыс чеччысь кулöм тун йылысь быличкаясын тунлöн гöтырыс (салдат, ветлысь-мунысь да с.в.) кайö пач вылö, а туныс кайны оз вермы. Гöтырыс мездысьö пач лыс, нянь зыр отсöгöн либö сетö кулöмаыслы пач вомсьыс сёйиз (из). Туныд оз удит йирны изсö петук горзытöдз либö сэтшöма ылалö, мый мортыс удитö пышйыны. Быличкаясын вöралысьяс йылысь, налысь запасъяссö да кöлуйсö сёйысь вöрса йылысь вöралысь нуö дöрöм увтiыс öзйысь öгыр либö сетö вöрсалы гор вылысь дон из, кодöс вöрса оз вермы йирны. Удмуртъяс да войвыв рочьяс тшöтш жö эскылiсны, мый пач видзö пеж вынъясысь.

Пачлöн образыс йитчöма медводз чайтöм-гöгöрвоöмъяскöд керка видзысь, олыся йылысь. Олысяöс либö пывсян айкаöс комияс нимтöны тшöтш и гуранькаöн. Урчитöм лунъясö олысяöс чöсмöдлiсны, пач вом улö либö гöбöч пыранiнö пуктылiсны шырöм няня йöв тасьтi. Рыныш айкалы рыныш пачö кольлiсны вой кежлö сёркни да пöжалöм картупель, пывсян айкалы – нянь. Вöр керкаын “видзысьыслы” вöралысьяс кольлiсны горъяс нянь да сугöн, медым видзчысьны “биысь, ваысь, скöр вöрпаысь, лёк йöзысь”. Сёянсö сюйлiсны пачас сёр рытын либö югдытöдзыс – рубежа кадö. Луз бердса комияслысь гижöма и вира вись вайöм йылысь: пач едждöдöм мысти пач вылас начкылiсны межöс да мавтлiсны пачсö сылöн вирнас, “медым пачыс вöлi джодж рöма”. Олысяяслöн пачкöд йитöд вылö индöны и ворсöмъяс горань, горанька, гуренька, гораней, кор олысясö чукöстöны пач улысь, кöрталöны син либö корсьöны дзебöмтор. Ворсöмъясыслöн медшöр условиенас вöлi пемыд (аддзытöмлун) да пачсянь (гöбöч öдзöссянь) мунöм. Тшöкыда ворслiсны куття дырйи.

Пач юкöн нимъясын ясыда тöдчö зооантропоморфнöй символика: пач мыш, пач вом, пач под, пач кымöс. Вартöм пач – вульва да рушку эвфемизм. Рушкуа нывбабалы эз позь пырны керкаö сёй пач тэчигöн, медым пачыс эз пот сылöн чужтiгöн. Кага чужöм йылысь гöгиньяс шулiсны: “пачыс потiс”.

Пачлöн (выльысь) чужтысь ролькöд йитчöма висьысьясöс да вежöмаясöс некымын бурдöдан ног. Сёйöн мавтöм да пачын “пöжалöм” – биын символа чужöм, кулöм да выльысь чужöм. Коми быличкаясын горсайса вежöма тшöкыда локтö йöз муюгыдö жöникöн (невестаöн), пывсянö вайö морт паськöм да перна. Луз бердса материалъяс серти, тшыкöдöмаöс бурдöдны корöм тун восьтiс пач труба да чукöстiс тшыкöдысь нывбаба-тунöс. Кор мöдыс воис, туныд тшöктiс бурдöдны висьысьсö. Татшöм ногöн, пач восьтö мöдар югыдö пыранiн. Пач киссьöм вöталöны кулöм водзын. Дзебан öбрадъясын “гыöртöм пач” либö “еджыд буса (еджыд лымъя) пач” – кулöмлöн метафора.

Пач юкö керка ылдöссö сувтса ног да водса ног: эньладор / айладор, пач сай / ен ув пельöс, джодж ув / пöлать-гöбöч да с.в. Куття дырйи гадайтчигъясö, подаöс луд вылö вöтлiгöн да выль керкаö вуджигöн восьтылiсны пач юшка, сэрöг öшинь, юрйыв öшинь. Нöдкывъясын пач лоö космос метафораöн. Сiйö йитчöма мифа (бордъя) шондi öш да жöритысь ош образкöд, кутö пыр вежласьысь олöм идея, муюгыдса гöра да пу идея, кодъяс öтувтöны олöм да кулöм, кад да ылдöс.

Коми вариантъясас роч духовнöй кывбурсьыс кольöма сöмын геройлöн нимыс да кутшöмсюрö сьылан формула (тыш вылö чукöстöм сямаяс), кодi пырö историко-героическöй сяма сьылан сюжетикаса типологическöй формаяс лыдö. Став сьылан гижöдас мыччöдöма куим сьылан тема вариация: 1) молодечöс ожман вылö чукöстöм, 2) молодеч мунö тышкасьны, 3) сiйö усьö тышас. Тайö куим темаыс öдвакö артмöдлiсны коркö öтторъя цикл. Мый тайö сюжетъясас паныдасьлö öти и сiйö жö геройлöн нимыс, позьö, буракö, гöгöрвоöдны сiйöн, мый йöзлöн мывкыдын христианскöй вежалöн нимыс лои нарицательнöйöн да ассоциируйтчылiс воин образкöд. Сюжетлöн паськалöмыс важ крестлы юрбитысьяслöн оланiнын да “бур сьылысьяслöн” нырвизь (кодi артмöма, буракö, важ крестлы эскöмлöн имитöм понда) паськалöминын вынсьöдöма роч духовнöй кывбуръясса Федор Тиронлысь нимсö салдат сьыланкывъясса нимтöм салдат пыдди, кодъяслысь сюрöс тэчассö велöдiсны коми сьылысьяс.

Вежа мученик-воинлöн образыс босьтö сьыланкывса лирическöй геройлысь мыгöрсö, код дiнö йöз мывкыдыс велалöмаджык. Образыслöн условносьтыс артмöдсьö роч сьылан сюжетъясса нимтöм молодечöс нимтöм да образъяслöн системаö мойда рöмъяс (Сивка-бурка вöв, вöрöгöс вужнас нетшыштöм кыдз пуöн виöм, öти здукöн кузь туй вуджöм да с.в.) пыртöм пыр. Тайö – фольклорнöй вуджöдöм либö образсö мöд традицияса оланпасъяс серти кодируйтöм.

Фольклорнöй сьылан тема вариацияяс: ожман вылö мöдöдчысь молодеч вöталö имитана вöт; молодеч колльöдчö мамыскöд; дойяссьыс молодеч кувсьö йöз муын; кулысь воин шыöдчö вöв дiнас; молодечлöн кувсьöм йылысь юöртöны горткотырыслы. Вариацияясыс индöны, мый, буракö, сöмын öти тема (багатырлöн тыш вöрöгкöд) эпическöй сяма. Сьыланкывлöн сюжетас тöдчана роль ворсö вöв, мойдса персонаж, мойдса геройлöн шемöса отсасьысь. Педöр Кирон вöталö ожман йылысь юöртысь лэбачьясöс, каретаö доддялöм вöвъясöс да лёк поводдя (гым, чард, сьöд кымöр, сувтса зэр). Тайö артмöдö сьыланкыв сюжетыслысь мифа контекстсö да мыччöдö майшасьöм. Та боксянь найö артмöмны лироэпическöй жанръясысь, рекрут бöрдöдчанкывъясысь. Педöр Киронлöн мамыс лöсялö “рекрут мамлöн идеала образлы, кодi водзвыв кылö пиыслысь кулöмсö да оз кöсйы сiйöс лэдзны ожман вылö”. Педöр Кирон кутö асьсö рекрут моз. Та вылö индö и мамыслы имитана вöт йывсьыс висьтасьöмыс, и бласлöвитны корöмыс, и тыш водзын вичкоö ветлöмыс. Рекрут (“ловъя покойник”) да сьыланкывса герой, йöз муын кулысь молодеч – тайö кык семантическöй планыс коми сьылысьлöн трактовкаын вывтi ылынöсь вежа мученик-воин Федор Тиронлöн образысь. Роч духовнöй кывбуръясса геройöс татшöм ногöн интерпретируйтöмыс матынджык да гöгöрвоанаджык коми сьылысьяслöн фольклор мывкыдлы. Сiйö вежис кывбурыслысь сюжет подувсö да пыртiс сылöн художественнöй тэчасö выль элементъяс.

Вынсö петкöдлöм могысь Педöр Öлексан “тасавлöма” Эжвасö и ни öти пыж абу вермылöма мунны бокытi, найöс пыр вайлöма берегö. Педöр Öлексанлöн керкаыс сулавлöма Эжöра куръяын. Кöсйылöма кö кодкö пырны куръяас, сiйöс шыбитлöма кызь вит верст сайö кывтыдланьö.

Коми пеж I ‘пеж, няйт’; уд. II ‘тшöг, гос’, удмурт пож ‘гудыр, няйт’ < öтувперым *pëž ‘няйт, гудыр’ || мокша pižä ‘мыж’, эрзя pežet’ ‘мыж’ = перымöдзса *pečz. Коми сёрнисикасса сöс I ‘пеж, няйт’; II ‘мыськытöм вурун сöс’; изь. сöс вый ‘вöрвань’; удмурт сэс ‘няйт’ < öтувперым *sesk ‘няйт, пеж’ || мокша seks, seksa, эрзя ‘туша, юр, паськöм няйт’, саам sāχs ‘сiйö жö’ = перымöдзса *säksä. Сöстöмлун пасйö сöстöм кыв.

Пеж – вывтi лёктор, сылöн урчитöм форма абу. Пеж вуджö кöлуй пыр, стихияяс да пемöс пыр, а сiдзжö и веськыда мортсянь мортлы (пырджык нывбабасянь сыкöд узигöн). Öти мифа сюжетын нывбаба лои пеж кутысьöн нывбабасö вöчигöн нин: Ен вöчис нывбабаöс, но эз удит помав яндзимсö да колис понмöс сiйöс видзны. Омöль ылöдiс понсö яйöн да сьöлыштiс нывбабалы кок вож костас. Таысь и артмис тырмытöм органыс. Мöд версия серти, пежыс лоöма вывтi уна да пода кутöма висьны, а муыс лёка чужтыны. Сэк öти нывбаба босьтöма став пежсö ас вылас да голяöдзыс вöйöма пежас. Мукöд нывбабаыс воöмаöсь отсöг вылö да босьтöмаöсь быдöн мындакö пеж аслыныс.

Пежсö кутöны верстьö нывбабаяс (торйöн нин рушкуасигöн да тöлысся вир петiгöн). Пежыс вуджö не сöмын мукöд йöз дiнö инмöдчигöн, но и, шуам, кöлуй вомöн воськовтiгöн. Та вöсна мужичöйяс видзисны кöлуйнысö татшöмторсьыс да нинöм эз сетлыны киысь киö (торйöн нин чöрс), а пуктылiсны нывбабакöд орччöн, медым не зависитны сыысь да не воштыны вöралан киподтуйсö, а вöравны мунтöдз эз узьлыны нывбабакöд либö сöстöммöдчылiсны пывсянын. Весиг пеж кутысьöс гаралöм вермис торкны кыйсьöмсö. Та вöсна вöралiгöн нывбабаöс нимтылiсны кыдзкö мöд ног.

Сöстöммöдчигас пывсьылiсны “первой жарас” (сiдзкö, öдзыс некод на эз удит пывсьыны) да киськасьлiсны кöдзыд ваöн. Мукöддырйиыс öбрадыс вöлi татшöм: койыштлiсны гор вылö, изъяс вывтiыс визувтысь васö чукöртлiсны чуманö да киськасьлiсны гор выв ваöн. Мужичöй кö воштылiс пеж пондаыс ай вынсö, пежтöм морт бурдöдлiс сiйöс татшöм ногöн: висьысьыс водлiс вылыс джоджас, а мöдыс öдзыс висьталöм ногöн дасьтылiс ва, пывсьöдлiс сiйöс, коявлiс сiйö ванас да кок вож костас некымынысь сьöлыштöмöн вöтлылiс пежсö дзескыдiнö либö тшöктылiс пациентыслы не мöвпавны нывбабаяс йылысь да не сёрнитны накöд узьлöм йылысь. Узьлiгöн вермöны пежасьны и нывбабаяс. Пежсьыс найö мынтöдчöны дöрöм юрйывтiыс пöсь öгыр нуöдöмöн. Узьлiс кö мужичöй öти нывбабакöд да сэсся сöстöммöдчытöг мöдкöд либö прöстö воськовтлiс сы вомöн, мöд нывбабаыс лолiс пежа. Сыктывсаяс чайтлiсны, мый нывкöд узьöм бöрын мужичöйыс ныв вомöныс воськовтöмöн вермис сiйöс сусьöдны да пежавны. Меж тестикула сёйöм отсалiс и нывбабаяслы, и мужичöйяслы, пеж понда кö налöн эз вöв эбöсыс узьлыны öта-мöдыскöд.

Тшöкыда пежсö йитöны секскöд да чужтöмкöд. Та вöсна чайтöны, мый челядь вермöны пежасьны верстьöяслöн улыс паськöм дiнö инмöдчöмысь, челядьлысь да верстьöлысь паськöмсö öти ворйын песлалöмысь, öти кöв вылын косьтöмысь да с.в. Кутшöмсюрö информаторъяс (вэ., печ., изь.) пежöн нимтiсны кагаöс бурдöдöм “повзьöмысь”, кор кагасö киськалiсны мамыслöн улыс дöрöмсьыс пыдзыртöм ваöн. Челядь вермисны пежасьны, вöлiны кö налöн вежай-вежаньыс пежаöсь, гöтрасисны кö öти и сiйö жö вежай-вежаня челядь, кöть найö и эз вöвны вира рöдвужöн, эз кö козьнавлыны пузчужöмалöн ай-мамыс гöгиньлы гöг сюрöссö вундöмсьыс чышъян либö ки чышкöд. Чужтöм бöрас торъя öбрадъясöн сöстöммöдлiсны и нывбабаясöс, и подаöс. Сöстöммöдтöдзыс нывбаба дiнö либö вайсьöм пода дiнö матыстчылiсны пожöм сартасöн вомас либö пызйылiсны сiйöс вомысь ваöн.

Пемöсъяс пиысь медся пежаöсь пежгагъяс, шыръяс, каньяс, а тшöтш и кöчьяс да понъяслöн Омöльöн сетöм гöныс. Но пежасьны, тшыкны, урöсмыны, урсасьны, сöсмыны вермöны и мукöд пемöс. Неважöнöдз на нывбабаяслы эз позь сёйны сир юр, буракö, сы вöсна мый сир вöлi черияслöн да валöн месайöн, а нывбаба вермис найöс пежавны. Öнi тайö öлöмыс сайöдöма да гöгöрвоöдсьö мöд ног: “сир юр вильöдöмыд куш жытникö гусясьны пыралöм кодь”. Вöрпаяс оз сибöдны ас дiнас пежасьöм мортöс, сы вöсна мый пежыс и мöдар югыдын ветлö мортлöн либö пемöслöн ловкöд. Тшöкыда пежасьлiс пода, сы вöсна мый та вылö эз ков кöсйöмöн тшыкöдöм, тырмымöн вöлi, инмöдчылiс кö сы дiнö либö воськовтлiс кö сы вомöн пежа нывбаба. Йöзкостса магияын мортлысь либö подалысь висьöмсö либö пежсö “вуджöдлiсны” öтдор пода вылö либö мöд морт вылö: висянiнö пуктылiсны чышъян, дöрöм либö мыйкö мöдтор да сэсся шыбитлiсны сiйöс ывлаö надеяöн, мый кодкö босьтас либö воськовтас сы вомöн; туй вылö шыбитлiсны корöсь, кодöн пывсьöдлiсны висьысьöс; пежа мортлысь сёян колясъяссö вердлiсны баляпилы, понлы, ялавичлы. Некымын ногöн бурдöдлiсны тшыкöдöм вöралан понъясöс: кодзöм понлы вердлiсны сылысь жö косьтöм колькъяссö, тшыкöдöм понлысь нырсö писькöдлiсны сир пиньöн, тшынöдлiсны тусяпуöн, уйöдлiсны сiйöс юяс вомöн. Пон и ачыс вермис мынтöдчыны пежсьыс, курччылiс кö дзоньвидза понмöс; дзоньвидза кö курччылiс висьысьсö, висьысьыс таысь эз бурдлы.

Пежасьны позьö и сулалысь ваын купайтчöмысь. Медым косöдны пежсö ваас, колiс сiйö жö ваас купайтчыны мöдысь. Но а визувтысь ва сöстöммöдö быд пежысь. Та понда бурдöдны пежасьöмаöс корлiсны туйвыв йöзöс либö ю либö шор сайын олысьясöс. Туйвыв йöзöс челядьöс да пöрысь йöзöс моз жö лыддьылiсны пежтöмöн. Чайтлiсны, мый найö вермöны бурдöдны пежысь. Пöдöм да пежасьöм ваа эновтöм öшмöсъяс сöстöммöдöм могысь öшмöсас лэдзлiсны сöспу корöсь.