Ад быдлаын (< роч); ад гуран скр., шс.; вакрамеш

Н. Конаков

В.И.Лыткинлöн да Е.С.Гуляевлöн чайтöм серти, акань кывлöн медводдза вежöртасыс – ‘ичöтик ворсан чой, нывбаба’. Позьö öткодявны коми ак- (-ань ичöтмöдана-лелькуйтана суффикстöг), финн akka ‘пöрысь нывбаба, чой, нывбаба’, саам akka, а сiдзжö коми сёрнисикаса ак вежань ‘вежань’.

Аканькöд йитчöм коми фразеологизмъяс, а сiдзжö кутшöмсюрö эскöмъяс да öлöмъяс висьталöны, мый морт мыгöра чача да мортлöн лов-вуджöр йылысь либö орт йылысь чайтöм-гöгöрвоöмъяс костын эм йитöд: син акань; син аканьыс сувтса либö сувтса син – вöрзьытöм, сьöкыд видзöдласа морт йылысь; увлань юра син акань, гуга син акань – тунлöн öбича. Верстьöяс чайтлiсны, мый челядьлöн аканьöн кутшöмсюрö ворсöмъяс вермисны висьтавны водзö олöм йылысь. Эскалiсны, мый нывкаяслöн рузум аканьöн ворсöмъясыс имитлiсны налöн горткотыр шудныслы да чужтан вынныслы. Зыряна висьталöны, мый ворсiгас ассьыс аканьяссö нывъёртъясыслы сеталысь нывкалöн горткотыр олöмас оз ло шуд ни судзсьöм. Чайтлiсны, мый аканьöн ворсöм серти позис водзвыв гöгöрвоны-висьтавны локтан вежсьöмъяс йылысь не сöмын челядьлöн олöманыс, но и дзонь горткотырлöн олöмын: “дзебöны кö челядь кулöмаöс да бöрдöдчöмöн гуалöны аканьяссö керка пельöсö, сiдзкö, тайö горткотырас кодкö регыд кулас”. Быд нывкалöн ворсан горткотырас пырджык овлö сымда жö рузум акань, мында морт нывкалöн збыль горткотырас. Но аканьяслы некор эз сетлыны горткотырсаяслысь нимъяс, мед не йитны ловъя йöзöс ворсан пöвныслöн рöккöд да видзны быд сикас тшыкöдöмысь. Ай-мамныс видзöдiсны нывкаяслысь аканьясыслы паськöм вурöмсö, тшöкыда и асьныс отсасисны да и ворсiсны тшöтш, но пыр кыйöдiсны, мед паськöмыс вöлi вурöма выль дöра торъясысь, некыдз эз позь вурны кодöнкö новлöм паськöм вундасъясысь. Комилöн эскöмъяс серти “ловъя мортлöн дукöн йиджтысьöм” паськöм – сылöн вуджöрыс. Чайтлiсны, мый татшöм паськöма аканьöс гуалöм бöрын сылöн збыль “пöлыс” вермис сьöкыда висьмыны либö весиг кувны. Тöдчана, мый “аканьöс дзебöм” бöрын челядь некор сэсся эз перйывны гуалöм аканьсö муысь. Помкаавлiсны тайöс сiйöн, мый татшöм аканьöн ворсöм вермис вайны неминуча.

Аканьяслысь чужöмсö пасйылiсны еджыд, югыд либö уна рöма дöра вундасъясöн. Но пырджык чужöм тэчасыс вöлi стöча пасйытöм. Сöмын 20-30-öд воясö, кор сиктса челядьлы пондiсны сьöлöм вылас воны кабалаысь гартöм аканьяс, чужöм вылас мöдiсны саöн либö карандашöн пасъявны син, ныр да вом. Та боксянь зэв петкöдчанаöн лоö татшöм перым-коми эскöм: пондасны кö челядь ворсны тунлöн кодь “сувтса” синма аканьöн, вермасны асьныс синтöммыны либö гортаныс лоö неминуча. Тöдса, мый войвылын да Сибирын уна войтырлöн традицияа культураын оз позь вöлi пасъявны аканьяслысь вом ни ныр, син ни пель. Чайтлiсны, мый чужöмсö серпасалöмысь аканьыс вермас ловзьыны да лоны мортлы öпаснöйöн. А вот ловъяс-видзысьяслöн антропоморфнöй пу мыгöръяслысь ныр-вомсö пасъявлiсны век. Онгон вöчигöн вомсö, синсö да пельсö вундылiсны медбöрын. Тайö символа керöмсö вöчлiсны лов-видзысьöс ловзьöдтöдз. Уна сикас войтырлöн традицияа чайтöм-гöгöрвоöмъяс серти, ловъяс-дорйысьяс да ловъяс-отсасьысьяс пырöны-овмöдчöны асланыс мыгöр-серпасъясаныс буретш ныр-вом да син-пель пыр. Стöча серпасалöм чужöма акань йылысь казьтыштöм чайтöм-гöгöрвоöмъяс, буракö, позьö паныдавны и традиция подулын, код серти öнi сиктса зыряна лов-дорйысь пыдди öшинь костас чужöмнас ывлаö пуксьöдöны йöзкостса паськöмö вöччöдöм ньöбöм аканьöс. Тöдчана, мый изьватаслöн потандорса сьыланкывъясын аканьöс орччöдöны мортлöн вуджöркöд, видзыськöд: Пидзöс помöй аканьöй, öшинь дорын вуджöрöй.

Коми мойда фольклорын ловзьöм акань дорйö да отсасьö мамтöг кольöм нывгеройлы. Тöдчана, мый мойдъясын сёй аканьöс вöчöм петкöдчö рушкуасьöм метафораöн (öткодяв сёйысь вöчöм чачаяслöн челядькостса нимкöд сёй папу). Фольклор текстъясын торйöн пасйыссьö идзасысь, сюмöдысь да сёйысь вöчöм аканьяслöн дженьыд нэмыс. Коми кывйын сёй аканькöд метафораа öткодялöм тöдчöдö мортлысь ыдъясьöмсö да йöз юрöн олöмсö (сёй монь, сёй морт). Кöтасьны полысь йöзöс комияс ышöдöны татшöм кывъясöн: “он нöдзды, абу сёй монь”. Зыряналöн мича ныв дiнö либö гöтырпу дiнö шыöдчöм роч акань тöдчöдö нывлысь аддзывлытöм, абу мувывса мичлунсö.

Тöдчана комияслöн аканьöн вöдитчöм тунасьöмын да традицияа мантикаын. Перым-коми вежадырся гадайтчöмлöн вариант серти, ныв кö перъяс увлань юра гырнич улысь аканьöс, сiдзкö, тайö вонас сiйö ваяс кага. Зыряналöн чайтöм серти тайö туналö лёка кагаасьöм либö шой вайöм. Комияслöн да хантъяслöн öтув оланiнъясын (Тюмень обласьт, Шурышкар район) рузум акань отсöгöн нывбабаяс мынтöдчылiсны лёк вöтъясысь: öтвыв нуръясьлiсны вежа кыдз пу улын да сёйигкостiыс висьтавлiсны öта-мöдныслы вöтъяснысö; кыдз пусяньыс неылын кодйылiсны гуранъяс, кытчö сэсся гуавлiсны буретш та вылö вурöм рузум аканьяссö. Пасъям, мый татшöм жö ритуал вöлi важöн и удмуртъяслöн: кор рöдвуж пиысь кодкö висис, нывбабаяс вурлiсны рузум акань да гуавлiсны сiйöс. Зыряналöн тунасян практикаын эм гусясьöмын мыждан мортöс накажитöм акань отсöгöн: чайтлiсны, мый тужа-нужаö веськалöм мортыс вермас гусясьысьсö нинöмö воштыны, сюяс кö гусясьысьсö вежысь аканьöс нимкыв лыддигмоз муö. Л. Н. Жеребцовлöн мыччöдъяс серти, перым-комияс тунасян аканьöс дасьтiгöн мавтлiсны аканьлысь юрсö асланыс вирнас. Перым-комияс эскылiсны, мый кувсьöм тöдысьлы гортъяс быть колö пуктыны сизим аканьöс, а то сiйö сизим мортöс нуас сьöрсьыс гуö. Керчомъяса комияс шуöны, мый тунасян аканьöс колö вöчны “пеж” пуысь – пипуысь, а челядьлы чачаяс бурджык вöчны кыдз пуысь либö пожöмысь.

Кристианскöй мифологияысь босьтöм серпас. Зыряналöн космогоническöй миф серти, Ен лöсьöдiс ангелъясöс-отсасьысьясöс муюгыд артмöдiгöн на, мусö артмöдöм мысьти. Та вылö сiйö видзис аслас мам-чöжлысь саридз пыдöсысь перйöм кольк. Му ладмöдöм-лöсьöдöм бöрын Ен вöчис енэж да аслас ангелъяскöд овмöдчис сэтчö. Эскöмъясын да фольклорын ангеллöн образыс водзö некыдз эз сöвмы.