Ад быдлаын (< роч); ад гуран скр., шс.; вакрамеш

О. Уляшев

Пельтöм дзебсис зорöдö лежнöг росъяс пытшкö да пöлялiс лежнöг кöйдыссö. Турунсö пур вылö сöвтiгöн крестьянин шыбитiс лежнöгсö бокö да талялiс. Пельтöм коли пельтöг, но нöшта на ёнджыка пондiс торкавны турун пуктöмсö.

Пелысь вöлi вына вуджöрöн, видзлiс туналан вынъясысь да лёк ловъясысь. Чайтлiсны, мый тунöс позьö вермыны, нöйтны кö сiйöс пелысь беддьöн. Пелысь пуляöн позис мездысьны вöрсаысь. Эжва катыдсаяс керка лэптiгöн пуктылiсны тшупас пытшкас пелысь да сыкöд орччöн сёяна да винаа сюмöд лоток. Вужъясяс кö пелысьыс, керкаыс лоö шуда. Печорасаяс тшупас шöрас сувтöдлiсны пелысь бедь. Беддьыс сулалiс тшупассö помавтöдз. Емваса, удораса да Эжва катыдса комияс пелысь корöсьöн сöстöммöдлiсны да выльмöдлiсны важ öшмöсъясысь ва. Татшöмöн жö пелысь вöлi и Европаса да Сибирса уна войтырлöн. Позьö думыштны, мый пелысьлöн сöспу ним висьталö мöдарö. Но, буракö, сiйöс колö гöгöрвоны сöсысь видзан пуöн.

Коми этиологическöй мифъяс висьталöны, мый пемöсъясöс вöчис и Ен, и Омöль (перым-коми Куль). И колö шуны, мый Омöль уджалöма сьöлöмсяньысджык. Сiйö вöчöма яй сёйысь вöрпаясöс да лэбачьясöс, йöраöс, кöрöс, кöчöс, каньöс, шыръясöс, крысаясöс да пежгагöс. Ен вöчöма сöмын урöс, понйöс да лягушаöс (мöд версия серти, лягушаö пöрöма морт). Но бöрыннас Ен вежыштöма Омöльлысь мукöд пемöссö (кöрöс, йöраöс да кöчöс) и найöс пондöмаöсь лыддьыны сылöн пемöсъясöн, а йöзлы позьöма сёйны налысь яйсö. Каньлы Ен сетöма шоныд гöн, а öдзыс сiйö вöлöма гöнтöм. Но таысь Ен тшöктöма сылы кыйны шыр-крысаöс. Пон тшöтш жö вöлöма гöнтöм. Гöнсö сылы сетöма Омöль сыысь, мый пон сибöдöма сiйöс Енлöн медшöр вöчöмтор дiнö – морт дiнö. Артмöм боксяньыс мукöдсьыс торъялöма сöмын ош. Öти версия серти, сiйö вöлöма Енлöн пиöн. Мöд версия серти, ошкö вöрса пöртöма мортöс. Перым-коми этиологическöй миф серти, Ен да Куль став пемöссö вöчöмаöсь öттшöтш. Медводз найö вöчöмаöсь уна рöма сёйысь пемöсъяслысь тушаяссö да ловзьöдöмаöсь найöс. Сэсся сёй коляссьыс вöчöмаöсь быд пöлöс бöжсö. Пемöсъяс локтöмаöсь да бöрйöмаöсь аслыныс бöжъяссö.

Комияслöн зоолатрия вöвлöм йылысь ясыд пас абу. Но неважöнöдз на вöралысьяс пиын вöлi сiдз шусяна кыян вöрпаяслöн культ, кодi зэв матын сибирса войтыръяслöнлы. Кыян вöрпаяслöн культыс öткодявлiс найöс морткöд. Чайтлiсны, мый вöрпаяс гöгöрвоöны мортлысь сёрни, торйöн нин накöд йитчöм кывъяс. Тайöн позьö гöгöрвоöдны öлöм лёка шыасьны кыйдöс йылысь, сы вöсны мый кыйдöсыс вермис дöзмыны; вöралысьяслысь эвфемизмъясöн сёрнитöм, медым кадысь водз не повзьöдны вöрпасö. Эскылiсны, мый вöрпаяс вермöны ловзьыны, мед кöть и мöд пемöсöн. Та понда колясъяссö бура чукöртлiсны да гуавлiсны либö дзеблiсны гусяинö.

Комияслöн вöралан мораль подувнас вöлi быд кыйдöс пыдди пуктöм. Дойдöм пемöсъясöс быть колiс вины, мед найö эз мучитчыны. Эз позь вайны ловъя на кыйдöссö вöр керкаö, а торйöн нин гортö. Ыджыд мыжöн вöлi дойдöм пемöсöс лэдзöм. Кыйдöссö вермис кедзовтны и кодкö öтдор. Та понда сiйöс сайöдлiсны йöз синмысь, а кульлiсны пырджык войын. Вöралiгöн вочаасигöн некор эз висьтавлыны кыйöмаыслысь збыль лыдсö, а то кодлöнкö вежöгтöмыс вермас кедзовтны пемöссö и сiйö сэсся оз мöд сюрны. Чайтлiсны, мый пемöсъяс бура кылöны веськыд либö гуся лöгалöмсö. Торйöн нин пыдди пуктылiсны дона вöрпаöс. Сiйöс кыйöм мысьт дасьтылiсны медбур сёяна пажын. Кусö öшöдлiсны тыдаланiнö, а туланлысь да низьлысь тушасö гуавлiсны бипур пöимö кодйыштöм гуторйö. Вöралысьяс сёрнитлiсны сöмын кольöм кыйсьöм йылысь. Кыйöм вöрпаöс гаравлiсны сöмын бур кывъясöн, тöдчöдлiсны, мый тайö пажыныс буретш “пыдди пуктана гöсьт” понда. Сёйтöдзыс “пыдди пуктана гöсьтсö” чукöстлiсны ас дораныс. Став вöрпасьыс торъявлiс ош. Сiйö вöлi мукöд сертиыс морт кодьджык. Сiйöс пыдди пуктылiсны медъёна, а сiйöс кыйöмыс вöлi стöч тэчаса. Мукöд вöрпасьыс торъявлiсны тшöтш и йöра, кöр, сьöдбöж, кöч да шыр.

Гортса пемöсъяс пиысь торъявлiсны кань да пон. Некутшöм пемöсöс эз позь накажитны. Мöскöс ньöрйöн вартысьлы куим во чöж эз позь юны йöв, сы вöсна мый чайтлiсны, мый мöдар югыдын мöскыс вермас водзöс мынтыны. Вöлiны торъя вöв праздникъяс (вöвъяслöн молебен лун), кор служитлiсны молебен да вежöдлiсны вöвъяссö. Пöрысь вöлöс эз позь вины, а то сiйö ёрас месайсö и сылöн сэсся некутшöм вöв дыр оз ов. Прöститтöм мыжöн вöлi вöв ныр улысь кöрым гуöм. Таысь гуысьыслöн кулöм бöрын вöлыс водзöс мынтылiс. Кор сылöн лолыс дзöрысь кер кузя вуджлiс сир биа ты вомöн, матыстчылiс мöдлапöлас йирсьысь вöв, гöрдлiс да шулiс: “Вудж, эн кö гулы менам ныр улысь кöрым”. Гуысьыс усьлiс тыас да кольлiс курасьны ваас.

Литература: Климов 1990, Налимов 1907, Рочев 1984, Сидоров 1924, Сидоров 1926, Fuchs 1924.

Н. Конаков

Пера йылысь висьтсö медводз гижис И. И. Лепехин 1771. воын на. Талун кежлö сы йылысь йöзöдöма уна текст. Медъёна паськалöма (буракö, медводз вöлöма) кык сюжета текст: чужанму дорйысь, вöрöгöс вермысь Пера да Пера вöрсаöс вермысь. Сюжетъясыслысь йитöдсö позьö кокниа гöгöрвоöдны: вöрöгöс вермöмысь Пера корö сарлысь кыйсян везöт да грамота, код серти сiйö лоö чужанмуса кыйсянiнъяс кутысьöн. Но месайнас кöсйö лоны и вöрса, вöвлöм месайыс. Пера пöръялö сiйöс да вермö. Но кутшöмсюрö текстын сюжетъясыслöн öта-мöд бöрся мунöмыс мöдара. Но эмöсь и вежсьытöмторъяс: тышкасьнысö Пера мöдöдчö тöлын (мунö лызьöн), вöрöг матыстчö лунвывсянь (Коми му серти кö), вöрöгъяслöн юрнуöдысьыс кöлеса пытшкын и кöлесаыс биа: “... вöрöг талис би кöлесаöн”, би кöлесаыс мунiс лунвывсянь рытыввылö. Москва (буретш сэтчö Пера мунö тышкасьнысö) Коми мусянь рытывланьын. Кутшöмсюрö текстын рытыв нырвизьсö тöдчöдöма: “... рытыввылö пö колö мунны, вочавидзисны юöрникъяс”.

Тöд вылö кö босьтны, мый öти фольклор текстын Пера вермасьö шондiкöд да вöчö сiдз, мый артмö-лöсялö шондiлöн во гöгöр бергöдчöмыс (видзöд шондi), вермас лоны, мый би кöлеса бырöдöм сюжетыс – шондiлöн лунся кытш лöсялöм йылысь важ мифлöн коляс.

Вöрсакöд тыш йылысь сюжетыс кык эпизода. Öтиас Пера паныдасьö вöрсаыскöд вöрын да вермасьö сыкöд. Медводз найö кыскасьöны беддьöн. Пера пöръялö вöрсаöс: кучик тасмаöн кöртасьö мыр бердö. Сэсся найö водöны узьны бипур дорö. Пера пуктö ас пыддиыс кыдз пу краж либö пожöм плака, шебралö, а ачыс дзебсьö. Вöрса чайтö, мый Пера унмовсис да вартö плакаас эзысь йыла шыöн. Пера лыйö сiйöс ньöвйöн. Вöрса ёна доймö да пышйö Ураллань. Сiйö воö Бöлван Изöдз, кöнi сулалö сылöн керкаыс, да кувсьö тагöс вылас.

Мöд эпизодас Пера аддзö вöрсалöн керкаысь сылысь мича том гöтырсö да нуöдö сiйöс гортас. Мындакö кад чöж том гозъя олöны шудаа. Но öтчыд Пера воö гортас кадысь водз да тотшкöдчытöг пырö керкаас (тшöкыдджыка пывсянö). А гöтырыс буретш пöрччöма юр кучиксö да виялö тойясöс. Пера виö гöтырсö. Татшöм сяма жö сюжетъяс эмöсь кутшöмсюрö войтыръяслöн мифологияясын. Кыкнан эпизодыслöн эм уна параллель. Медматыса аналог вöвлöма Горнöй Башкирияса башкиръяслöн. Кутшöмсюрö торъялöмъяс вылö видзöдтöг, перым-коми да башкир текстыс медшöр сюжет юкöнъясас пöшти öткодьöсь. Тайö висьталö сы йылысь, мый сюжетыс Урал бердын вель нин важöн паськалöм.

Коми мöвпсям серти, вöрсаöс (“вöрса енмöс”) виöмыс ёна торъялана лоöмтор. Кöть и сiйö вöлы кык нога (вермис вöчны и лёк, и сетны мортлы уна кыйдöс), векжö вевтыртiс сiйöс пыдди пуктöм. Чайтлiсны, мый овны кö традицияа нормаяс серти, кутны кö асьтö вöрын кыдзи тшöктöма, корсюрö козьнавны вöрса месайöс, вöрса оз дöзмöдчы да весиг отсасьö. Та кындзи торкöма и öти шöр принцип: прецедентыс (вöрса ловöс виöм) – абу норма (“вöрса енсикасъясö” эскöмыс кольö). Коми абумойда прозаын вöралысьлöн да вöрсалöн вермасьöм тема вель ёна паськалöма, но сэнi вöралысьыс либö кулö, либö муртса вермö мездысьны. Вöрсакöд вермасьысь Пера йылысь сюжетыс öтка. Тайö сетö позянлун чайтны, мый сiйö вылiджык мифа статуса.

Комияс чайтлiсны тшöтш жö и ошкöс вöрса ловлöн мыгöрöн. Эскылiсны, мый ошкöс оз позь лыйны кыкысь, сы вöсна мый мöдысь лыйöм бöрын сiйö вермис ловзьыны, кöть и доймылiс кувтöдзыс. Öтл. бышкиръяслöн эз позь кыкысь лыйны вöрсаöс. Вöрса ловöс öтчыд лыйöны и Пера, и башкир вöралысь. Буретш сiйöн, мый вöрсалöн да ошлöн образъясыс вежисны öта-мöдсö, позьö гöгöрвоöдны ошкöс мисьтöма виöм öти перым-коми текстын: ош вомöналiс Пералы туйсö и тайö мыжторсьыс Пера нетшкис сылысь гыжсö да джагöдiс.

Сложнöйджыкöн петкöдчö сюжет, кöнi Пера гöтрасьö вöрсалöн гöтыр вылын, а бöрыннас виö сiйöс. Вöрсалöн гöтырыс олö Урал бердын (асыввылын) керкаын либö горсйын (башкир вариантын), сiдзкö, таладор, шöркост, йöзлöн муюгыдысь бокын. Верöсыс олö ловъяслöн муюгыдын, кодi пырöдчö и йöзлöн муюгыдö. Пералöн гöтрасьöмыс вöрсалöн сьöп вылын вежö вöрсалöн гöтырлысь социальнöй статуссö, а традицияа мöвпсям канонъяс серти, тайö кулöм да выльысь чужöм кодь. Татшöм ногöн, Пералöн гöтырыс быттьöкö чужö шöркост, йöзлöн муюгыдын да сылы позьö сэнi овны.

Гöтырсö виöм помкаыс – юр кучиксö кульöм – тшöтш жö пыдi символикаа. Обса йöгра чайтлiсны, мый юрын да юрсиын олiс нёльöд лов. Та вöсна найö кульлiсны вöрöгъяслысь юр кучиксö, медым вины ловъяссö. Шаманъяс некор эз шырсьывны, сы вöсна мый эскылiсны, мый юрсианыс налöн лолыс, выныс да вуджöрыс. Мый лолыс да магияа выныс юрсиын да мый юрси воштöмкöд вошö и вын, тöдлiсны и уна мукöд войтыр. Татшöм ногöн, Пералöн юр кучиктöм (ловтöм) гöтырыс вынтöм да кулöма нисьö ловъя, олöм да кулöм костын.

Пералöн мукöд вöчöмторйыслöн ясыд мифологическöй подулыс абу. Найö висьталöны сöмын сылöн багатыр эбöс йывсьыс. Вöрысь Пера вайлiс öтпырйö кук-куим йöраöс. Сiйö кыскылiс додь, кодöс эз вермы вöрзьöдны вöв. Пера вермис верст сайö шыбитны сё пуда из. Сiйö вайлiс пельпом вылас дас кык тупу кер да сетавлiс найöс суседъясыслы додь сюв вылö. Öти сиктса вылö дöзмöмысь Пера сöвтiс сылысь керка вылö дасьтöм керъяссö тшупас пытшкас. Керка бокö сувтöдöм лызьыс судзлiс керка вевтöдзыс. Лызьнас сiйö орддьöдлiс вöла доддяöс. Пера вöлi зэв вытя, вермис öтпырйö сёйны дас пельнянь тасьтi да юны вина чепня. Гöтырсö виöм бöрын сiйö эз нин гöтрасьлы, олiс öтнас. Кык вокыс эз вöвны сэтшöм эбöсаöсь, а чойыс вöлi багатыр жö да олiс войвыв саридз дорын, видзис кöръясöс. Мукöддырйиыс чойыс волывлiс Пера ордö кöръясöн либö сiйö ачыс ветлiс чой дорас пон даддьöн.

Пера кулöм йылысь эм некымын версия. Öти версия серти, сiйö олöма дыр. Мöд серти, Пера пöрысьмöма, мунöма öти вокыскöд пармаö (Урал бердö) да сэнi пöрöмаöсь кыкнаныс изъясö. Коймöд версия серти, Пера вöрзьöма сарлöн козьналöм кыйсян везöт зэвтiгöн, кодöс нюжöдöма ю веськыдладорса кыдз пусянь мöдлапöвса пожöмöдз. Пера воöма гортас, водöма водзвыв дасьтöм сус пу гортйö да кувсьöма. Либö жö сiйö нюжöдöма везöтсö асладор берегса пожöмсянь мöдлапöвса козйöдз, но сэтшöма зэвтöма, мый козйыс чегöма. Пера усьöма да кувсьöма дойяссьыс.

Литература: Гусев 1949, Климов 1990, Климов 1991, Лепехин 1822, Ожегова 1971, Ожегова 1989, Попов 1938, Рочев 1984, Руденко 1973, Сидоров 1928.