Лайпанов б. А
МАХТАУ СЕННГЕ, АННА-МАРИЯ
жүктеу/скачать 2.02 Mb.
|
- Бұл бет үшін навигация:
- ДЖУЛДУЗ ДЖАРЫГЪЫНА УШАЙДЫ СЁЗЮМ
- БИР МАЗАЛЛЫ АКЪ СЁЗДЮ МИНГИ ТАУ
- НАЗМУ ДЖАЗГЪАН
- ТАШ-ТЕРЕК – ДЖАНЫДЫ ХАЛКЪНЫ
МАХТАУ СЕННГЕ, АННА-МАРИЯБир къралдан бир къралгъа Бир къыз салыб келген эди Мени ючюн. Хазыр эдим берирге Джанымы да Аны ючюн.
– Гюнахларынгы барын кечейим, Дининге да, тилинге да кёчейим, Джуртунга-юйюнге да кёчейим, Джюрегинге-кёлюнге да кёчейим.
– Сен Аллахмы болгъанса гюнахларымы кечерге мени? Нек излейсе динингден чыгъыб диниме кёчерге мени? Аллахынг берген имандан, динден Мени ючюнмю чыгъаргъа излейсе сен?
Аллай адамгъа ийнаныргъа боламыды? Аллай адамгъа ышаныргъа боламыды?
Джуртуму ауушдурургъа да хазырма сени ючюн. Сени бла некях бла, некяхсыз джашаргъа да разыма. Сен а ненги къурман эталлыкъса мени ючюн? – Адетлеге къаршчы бараллыкъма сени ючюн, Джууукъ-тенг айтханнга тынгыламазма сени ючюн, Алай а, Динимден, тилимден, джуртумдан айырылмазма сени ючюн. – «Динингден, тилингден, джуртунгдан да айырылма мени ючюн, Халкъынгдан да айырылма, адетни-тёрени да бузма мени ючюн, Ата-ана, эгеч-къарнаш айтхандан да чыкъма мени ючюн. Аз да джанынгы къыйнама мени ючюн. Барымы-джогъуму билмесин киши, Сени бла болгъанымы билмесин киши – Былай джашагъаныбызча джашайыкъ да турайыкъ. Адет чекледен, кърал чекледен да ёте, Бара-келе, джашагъаныбызча джашайыкъ да турайыкъ.
Сабийлерибиз мени джуртумда тууарла, ёсерле. Аланы да алыб, келе турурма къонакъгъа. Не да – сен келе турурса къонакъгъа...» Кетдиле кюнле, айла, джылла. Кетдиле мен разы этмезге бек къоркъгъан ата-ана. Тыш къралда ёсюб джетдиле сабийле. Алай а, бир-бирибизни ангыламайбыз биз – Билмейбиз къайсы тилде сёлеширге.
Ата бла сабийлени арасында тылмач – Сабийлени анасы – Анна-Мария. Ave Anna-Maria! Ючюнчю мингджыллыкъда къошулдукъ бирге. Ючюнчю къралда къошулдукъ бирге. Ёмюрге. Чекледен, адетледен да кючлюдю Сюймеклик. Дин, тил, халкъ, джурт тыйгъычдыла, алай а, Тыяллыкъ тюлдюле Аны.
Эртде-кеч болса да юйлендиреди бизни. Джангыдан туугъанчабыз дуниягъа. Аны ючюн махтау санга, Анна-Мария. ДЖУЛДУЗ ДЖАРЫГЪЫНА УШАЙДЫ СЁЗЮМБулутла да ётелле чекледен, Суула да ётелле чекледен, Чабакъла, къанатлыла да ётелле чекледен. Аланы ызларындан къараб шашама: Чекледен ёталмагъан менме джангыз. Кече къарангыда артыкъ да джарыкъ джанады джулдуз. Аны джарыгъы ётюб чекледен, Джылланы, ёмюрлени келеди Кёкледен.
Анга къарагъан адамла ёлгенден сора да, Ол джарыкъ – узакъ заманны – турады келгенлей. Джуртха тансыкълыкъ кемиреди, ёлтюреди мени – Джулдуз джарыгъына ушайды сёзюм.
Таула сюймейле дауурну, хахайны – Ала сюелле чууакъ Кёкню, джулдузну, Айны. Уллукёллюлюкге, уллу сёлешгеннге Ала кюрт юзюлюу бла этелле джууаб.
Алай а, тынчны тебгени – къыйын. Таула тебгенден сакъласын Аллах.
Ёшюн уруш этгенлени Къар, буз тюбюнде къалады ёлюклери.
Таза джанланы сюеди тау да. Тау кеси – мийиклик, тазалыкъ, Хар къуру да къаратады, тартады ёрге. Таугъа чыкъгъан чыгъады Кёкге.
Тау Сёзге – Хакъ Кертиге – табынады поэт. Кесинг берген Минги Таугъа, джандет джуртха, Я Аллах, Сен бизни тыйыншлы эт. Минги Тау – Минги Таулу – Минги Сёз Халкъымы, Джуртуму тутуругъулла, Белгисилле, кюзгюсюлле эмда ёкюлюлле. Алагъа ийнанама, алагъа таянама, аладан дерс алама – сеземе: Иннетим, сёзюм, ишим, кюрешим да болалла Минги.
Бу назмуланы джазгъан джюрекмиди, Кёкмюдю? Къайданды адамны кёлюн, джазыуун да джазгъан Акъ Сёз?
Кеслерини джюрюшлерин джюрекге бериб, Джюрекни джюрюшюн а кеслерине алыб, Ызларына алай къайытхан джарыкъ толкъунла – Къайда эсе да джети къат теренде, узакъда, мийикде болур Сизни джаратхан, сизге оноу этген Кюч. Ма ол толкъунланы Сёзге бурулгъан джюрюшлериди назму. Ма ол толкъунла джюрекде чакъдыргъан, Джюрекден чартлатхан джилтинледиле сёзле. Сиз а сорасыз: - Бу назмуланы джазгъан джюрекмиди, Кёкмюдю?
Кёк-Джюрек (Джюрек-Кёк) джазады назмуланы. Джангыз, аны, аланы да ангылар ючюн керекди керамат. Къуру джазыучугъа тюл, окъуучугъа да керекди керамат. ТАШ-ТЕРЕК – ДЖАНЫДЫ ХАЛКЪНЫТаш бла Терек Бола келгендиле таулугъа билек Ишинде, кюрешинде да. Таш бла Терек – Таулуну юйю, джурту, тарихи. Таш бла Терек – Таулуну кёлюнде, сёзюнде, джашауунда – Тёрю, тёреси, белгиси эмда ТЕЙРИСИ.
Таулуну бешиги, байрамы, къабыры да. Аны ючюн кюрешгендиле джаула (тимурла, орус патчахла, сталинле да) Таулуну къурутуб Ташын, Терегин, ташын, терегин, Таулуну айырыб Ташындан, Терегинден, ташындан, терегинден. Аны ючюн кюрешелле бюгюннгю джаула да Бизни айырыргъа Ташдан, Терекден – тауладан. Таш бла Терек – таш, терек тюлдю – Ол – джолубузду, джуртубузду, тамырыбызды, джаныбызды, джазыуубузду; Ол – Тейрибизди бизни; Ол – Ай бла джулдузду бизге.
Халкъыбызны Ташын, Терегин Тонагъанла (тонатханла), къурутханла – Джауладыла, халкъыбызны джанын марагъан. Халкъыбыз Ташын, Терегин унутхан кюн, Халкъыбыз Ташындан, Терегинден айырылгъан кюн, Халкъыбыз Ташсыз, Терексиз къалгъан кюн – Джуртун, халкълыгъын да тас этерикди ол кюн. Таш-Терек – джаныды халкъны. жүктеу/скачать 2.02 Mb. Достарыңызбен бөлісу:
|