ДЖЕТИ ДЖОЛ АЙЫРЫЛГЪАН ДЖЕРДЕ

ДЖЕТИ ДЖОЛ АЙЫРЫЛГЪАН ДЖЕРДЕ

Мен къачхынчы болуб айланнганлы – джети джыл.

Бёрю улугъаннга, къуш сызгъыргъаннга ушаш – джети джыр.

Сауутуму-сабамы тешмей джюрюгенли – джети джыл.

Тёгерек бурулама айырылгъан джерде джети джол.
Ит джыйынны иги кесегин чачыб,

Кърал чекден ётген эдим къачыб.

Ит чабхан, шкок атылгъан келе къулагъыма,

Бир кёзюм къысылса, бир кёзюм ачылгъанлай,

Илгене-уяна, къалкъыучанма алай.
Тенгиз толкъунла тау башлача кёрюне,

Тенгиз къушла да тау къушлача кёрюне,

Акъ суула да къара суулача кёрюне,

Ата джуртума тансыкъдан ёле,

Джашайма Шимал джуртда.
Айтхан эди Ата джуртда тенгим:

«Тышына кетгенден эсе,

Джуртда къалайыкъ, шейит болайыкъ».
Айтхан эдим:

«Джаныбыз сау болса,

Тышындан да бардырырбыз джихадны».
Ол джуртда къалды да – ёлдю.

Мени уа ызымдан сюрюб айланады ёлюм.

Ёлмей, андан къутулургъа джокъду мадарым.

Хаджиретни алайды къадары.

Тёрт джаным турса да джау болуб,

Тёгерегим турса да къуршоу болуб, ау болуб,

Джюрюрге керекме кёлюм тау болуб.

Къабханнга тюшсем –

Юрюлюб келген джауланы чачыу-къучуу эте,

Атылтыргъа хазырма кесими.

Халкъымы джууукълашдыра Хакъгъа,

Къазауат этеме къалам бла, къама бла да.
Эркиши тёшекде тюл, – эшикде –

Уруш баргъан тюзде, къылычы бла къолунда,

Юйдегисин, элин, халкъын-джуртун къоруулай,

Керекди алай джашаргъа, ёлюрге да.

Хар къуру да барды сайлау – барды джети джол.

Алай а, керти эркишиге бирди джол:

Халкъы-Джурту ючюн кюреше, сермеше джашаргъа, ёлюрге.

Къул-къарауаш болуб джашагъандан эсе,

Джазыуунгу кесинг джаза, джазыуунга бий бола,

Джашагъан, ёлген иги тюлмюдю?

Менден халкъыма къаллыкъ –

Эркинликни, Джигитликни юсюнден джети джыр

эмда

Амантишлени ёлтюрюб, налат ташха къабларыкъ.

Динине, тилине, адетине-тёресине болгъунчу эркин.

Джазыуун кеси джазгъынчы, Джазыууна болгъунчу Ие

Кюреширикме, сермеширикме, ёллюкме.

Сыйлы Китабны Анаяса этиб,

Энчи къралын къургъунчу халкъым –

Ёлгюнчю кюреширикме, сермеширикме.

Бетибизни, намысыбызны тас этмейик ансы,

Адамлыгъыбызны, эркишилигибизни тас этмейик ансы,

Къалгъан затланы барлыкъбыз таба.

Ёлмезлик джокъду. Алай эсе,

Ёлейик халкъыбыз, джуртубуз ючюн.

Ичкичилик, хаулелик къурутхан

сыйсызладан, манкъуртладан болмайыкъ.

Халкъыбызны джууукълашдыра Хакъгъа,

Алай къуллукъ этейик Халкъгъа.

Джашауубузну кёлтюргюч белгиси болсун ёлюм.

Тюнене, бюгюн да былайды кёлюм.

Къалам, къама тутса да къолум –

Бирди иннетим, Хакъ джолду джолум.

СЕН КЪУЛСА

Ёзден болмагъан, бизден болмагъан,

Халкъыбызгъа «халкъым» дерге унамагъан,

Джуртубузгъа «джуртум» дерге унамагъан,

Кет десенг – кетерге унамагъан,

Бирибиз бол десенг – болургъа унамагъан,

Халкъыбызгъа, джуртубузгъа къара джагъаргъа кюрешген,

Халкъыбызны, джуртубузну тонаргъа, сатаргъа кюрешген,

Ибилис джорукъгъа, имансыз къуллукъчулагъа, оноучулагъа

олтан болуб,

Аланы кючлери бла бизге солтан болургъа кюрешген,

Башха халкъланы акъсюеклеринденме деб сёлешген,

Джети атасына дери тышында табаргъа кюрешген –

Сен кимсе? Амантишмисе?

Огъай, Амантиш – ол ичибизден чыкъгъан сатлыкъды.

Сен а – барыб тохтагъан къулса.

Аллах не адам этмегенди сени къул.

Сен кесингсе ёзден болургъа уамагъан.

Сыйсыз башынгы сыйлы этерге кюрешгенликге,

Тау артындан, тау аллындан келген бийме деб сёлешгенликге –

Сен къулса. Отуз кюмюшге

Динни, тилни, халкъны, джуртну да,

Адетни-намысны да – кимни, нени да –

Сатаргъа хазырса, сата да келгенсе.

Сен къулса. Ёзегинг джокъду сени.

Не кърал, не джорукъ ёзден эталлыкъ тюлдюле сени.

Къул болургъа, не къул тутаргъа термилген насыбсызса сен.

Ма аны ючюн излемейле къуллагъа къатышыргъа ёзденле.

БЮГЮН НАСЫБЛЫМА МЕН

Тёнгегими къыздыра Кюннге,

Сойланама къумда. Толкъунла,

Шыпан къойлача, джетиб, мени ийисгеб,

«Бизден тюлдю» деб, юркюб,

Ызларына тёнгерейле.

Дагъыда, бираздан, батырыракъ болуб,

Джангыдан башлайла оюнларын.

Мен а, ала къайгъылы тюлме –

Башха толкъунладады мени эсим.

Къымжа къызладан толуду джагъа.

Джандетдечамы кёрелле ала кеслерин?

Джюрегимде отну джагъа,

Джаталла, ача-къыса кёзлерин.

Мени джюрегимде уа от

Бурула барады шынкъартха.

Шынкъарт бла къалса уа –

Бютеу саныма тюшгенди ёртен.

Тенгиз къобуб, юсюме къуюлса да,

Ол ёртенни джукълаталлыкъ болмаз.

Хар къызда – эки джарыкъ Кюн,

Тёрт да толгъан Ай хар бир къызда.

Не сагъыш этелле экен бу къымыжа къызла?

Не болур эслеринде?

Джюрегим Кюн болуб джатады юслерине,

Тенгиз болуб къучакълайды аланы.

Мен бу ариу къызлагъа къараб,

Унутама бютеу къайгъымы, джарсыууму.

Кюн да, тенгиз да, мен да

Къызланы юлешалмай кюрешебиз.

Ийнакълайбыз, къучакълайбыз аланы.

Кюн таякъгъа, суу толкъуннга, джаш кёзге, акъ сёзге да

Къыз санлада табылады орун.

Айтама кесиме: берилген насыбны ала бил.

Илхам келди эсе – джаза кир.

Кюн тийди эсе – кечикме, хайырлан.

Тенгиз джылынды эсе – джюз да, зауукълан.
Джашай эсенг – джашаудан къууана бил.

Башха заман, башха кюн боллукъ тюлдю – бил.

Артда сокъуранмазча, кюймезча бол.
Узун-къысха, тынч-къыйын эсе да джол,

Аны сейир этген, магъаналы этген – сюймекликди джангыз.

Джарыталла: Кёкню джулдуз, джюрекни уа – къыз.

Аласыз – дуния къарангы.

Энтда бир кере тюшюндюм анга,

Къарадым да джагъада къызлагъа.

Кюн таякъ бла, суу тамчы бла бирге

Кёзюм, сёзюм да тюшдюле къызланы юслерине,

Бираздан кесим да къабландым аланы юслерине.
Къыздан сейир джокъду Джерде бир джан.

Аты – Айджаякъ, Акътамакъ, Нюрджан...

Къолунда уа – джандет терекден Хауа юзген алма,

Андан да юлюш этерге хазырды манга.

Шууулдайды тенгиз, къыздырады Кюн

(Джауаргъа ушайды, джауарыкъ болур)

Алай а, бусагъатчыкъда насыблыма мен.

Бюгюн насыблыма мен.

жүктеу/скачать 2.02 Mb.

Достарыңызбен бөлісу: