Сюймекликге харс. Акъ башлыгъым, къара джамчым къарачай

Къарагъанча дуниягъа,

Джети къат кёкге чыгъыб,

Къарайма Джерге андан

Бирер чёбню да сюйреб,

Баргъанча ары-бери,

Джер тёбеде адамла

Бирер джюкню кёлтюрюб,

Минг джарсыу, къайгъы сюрюб,

Чабалла ары-бери.
Кёкледен къарагъаннга

Джюджю бла адамны

Джокъду джокъ башхалыгъы.

Бары да джашар ючюн

Этедиле дыгалас.

Джюджюню, адамны къой,

Джер кеси да Аламда

Кёрюнеди джилтинча:

Бир саниени джаныб,

Титиреб эм къалтыраб,

Джукъланныкъча ёмюрге.
Джердегилени къой,

Джер кеси да Аламда –

Кёзге да илинмеген

Бир бурху зат, бир тамчы.

Ёллюк джанны къайгъысы

Чексиз, ёлюмсюз Кёкге

Джеталырмы, джетерми?

Джер адамны джарсыуун,

Къайгъысын эм сагъышын

Джетдиралса да Кёкге,

Чексиз, ёлюмсюз Кёк

Ангылаялырмы бизни?

Джукъланныгъы хакъды, хакъ.

Бу биз билген дунияла

Бары да боллукъла талкъ.

Тюрленмезлик бир джорукъ.

Джюрек, аны ангыла да,

Бир рахат бол, бир сорукъ.

Быллай бир къыйыныбыз,

Барысы зее болуб,

Барысы зыраф болуб,

Кетерик эсе ёлюб,

Нек келгенек дуниягъа?

Толма да къал, ай медет,

Джарлы джюрек джарыла:

«Не ючюн?»- дейд, ай медет!..

Кёзюм кёкге аралыб,

Минг-минг джылны сорама:

Не ючюн?
Джууаб алмай да къала...

Иги умутла, джорала –

Ала да толмай къала,

Минг-минг джылны сорама:

Не ючюн?
Джаратылдыкъ – не ючюн?

Къыйналабыз – не ючюн?

Къырыллыкъбыз – не ючюн?

Барысы да – не ючюн?
Чексизлик, ёлюмсюзлюк!

Сюелиб юсюбюзге,

Оноу этесе бизге.
Мен а – сен джаратхан джан,

Санга да салама дау:

Дуниянг бла къозуб, къозгъаб,

Дагъыда этесе шау.

Не ючюн?
Акъылым джетген кибик,

Къолумдан келген кибик,

Къурарыкъма мадарла

Бойсунмазгъа къадаргъа.

Кюреширикме кёлюм бла.

Иннетинг-сёзюнг-ишинг

Джашау ючюн сермешсин.

Сермешсин Тюзлюк ючюн

Эмда Эркинлик ючюн.

Джарашмайла кёлюме.

Джашау ючюн ёрге тур –

Джол бермейик ёлюмге.

Кёб алгъыш, тилек айтылгъан кече.

Нюр джаннган кече,

Кёк-Джер-Кёл джашнагъан кече,

Джулдуз сютю гюллеге тамгъан кече,

Кёк джерни сугъаргъан кече.
Къан джаннган кече,

Джан къаннган кече,

Сан талгъан кече.

Некях кече.

Кёб таурух, хапар айтылгъан кече.

Керамат сёзле,

Аламат сёзле,

Аманат сёзле,

Ант сёзле

Айтылгъан кече.

Не терекге, не джаныуаргъа,

Не къанатлыгъа, не адамгъа –

Тынчлыкъ джокъду бир джаннга джерде.

Иссилик мыйыны къайнатады,

Сууукълукъ санланы бузлатады,

Бир суу басады, бир къар басады.

Марай, сакълай, джашаргъа кюрешебиз.

Бир-бирде къыйынлыкъны кесибизге –

Бир-бирибизге, табигъатха да джетдирген кесибизбиз.

Адам джюрегинден келгеннге ушайды.

Къара иннетни къорлугъу шайтан –

Ол да адам джюрегинде джашайды.

Джаннетде тура билмеген адамгъа

Сынау дунияны бергенди Аллах,

Тюзелгенни къайтарырча ызына.

Алай а, тюзелирге ушамайды адам,

Аллах буюргъанча джашамайды адам.

Аны ючюн келликди Ахырзаман.

Ахырат азабны да чегерикди адам.

Джаратханын билмейме мен.

Аллахны ишлери бизге ташалла,

Ёзге, адам аны Джаратханнга бара эсе къаршчы,

Аллахны, адамны да джауун – Ибилисни –

Къара джинни эте эсе кесине башчы,

Сора, адамны ангылагъан, кечген да къыйынды.
...Аллах адамны джаратыб, сюйюб, сыйлы кёрюб:

«Къалгъан джанла, адамгъа баш уругъуз»,- деди.

Нюрден джаратылгъанла Аллахлары айтханны этиб,

Адамгъа шеждеге бардыла.

Джангыз Ибилис джаратхан Аллахына бойсунмай:

«Мен – отдан джаратылгъан, топракъдан джаратылгъаннга

Баш урлукъ тюлме»,- деб тохтады.
Ма аны ючюн болду ол Аллахха ассы.

Аны ючюн сыйсыз этиб,

Аллах кёкледен быргъады Ибилисни.
Энди джаратхан Аллахларын къоюб,

Ма ол къара джиннге баш уралла адамла.

Баш уралла эм ачы джауларына – Ибилисге.

Сора къалай джетмез адамгъа къыйынлыкъ?!

Имандан чыгъыб, Аллахына бойсунмай тохтаса,

Къыйынлыкъладан да дерс алмай, тюшюнмей тохтаса,

Сора не этсин Аллах да чамланмай?

Джанады мыйы, джарылады джюрек...

Билсем да сорама: не ючюн, нек?

Билсем да сорама: не ючюн, нек?

Кийикча къачыб, къаягъа ёрлеб,

Баш сакълаб тургъан нарат терек,

Сабыр болсун сени да аджалынг.

Мурдарлагъа сеннге джетген тынч тюлдю.

Алай а, мийикден тёбеннге къараб,

Хар джыл сайын, хар ай сайын, хар кюн сайын,

Туугъан чегетинги, мингджыллыкъ чегетинги

Кесе, кюйдюре, къурута тургъанларын кёрюб,

Сакъларгъа, къорууларгъа къолунгдан келмей,

Хаман титиреб, къыйналыб туруу –

Хар кесиле тургъан бла кесиле туруу,

Хар ёле тургъан бла ёле туруу,

Ёлгенден эсе, ким биледи, къыйын болур.

Хоу, ёлюб кетген андан тынчыракъ болур.

Бошуна чыкъмагъанса мийикге, ёрге.

Сени джанынг ауруйду Терекге, Ташха да –

Сени къадарынг башхады.

Бола тургъанны Аллахха билдиресе,

Аллахны оноуун да джерге эндиресе,

Халкъгъа джетдиресе, Халкъгъа сингдиресе.

Сен баш сакълай, джан къутхара чыкъмагъанса мийикге.

Нарат терек, сени бош тенг этдим кийикге.

Аллахданды сени къадарынг-джазыуунг:

Айт халкъынгы къууанчын, джарсыуун,

Къутхар халкъынгы, кесинги да азабдан...

Аны ючюн берилгенди сеннге иман, дин,

Аны ючюн берилгенди сеннге фахму, билим,

Аны ючюн берилгенди сеннге мийиклик,

Аны ючюн берилгенди артыкъ ангы-эс, джигитлик.

Алкъын этерсе кёб ашхылыкъ-игилик.
Тенг болма къамжакъгъа-къуртха.

Къутхар кесинги, халкъынгы да къутхар.

Аллах бергенни сыйла, сакъла, джакъла эмда къатла.

Учаргъа деб берилгенле къанатла.

Ийнаннганнга Ол – насыб эм къууанч.

Имансызгъа уа – бир бош таурух, хапар...

Джаннет, джаханим – дунияда, ахратда да бар.

Джашасала да,

Бирини ашы кырдык, бирини ашы джарыкъ

Болса да,

Мараб тургъан кючле бардыла:

Аланы джюреклери къарады, эршиди –

Ариулукъну, адамлыкъны джауларылла ала,

Табигъатны, адамны джауларылла ала.

Джулдузкёз сабийбет джашауну джауларылла ала.

Джауумла тохтамай джаугъанлы – юч ай.

Юч ай мен да тохтаусуз кёкге къарагъанлы,

Ол ачылыб, андан кёрюннюкча Къарачай:

Мийик таулары, Минги Тауу агъарыб, ышарыб,

Къара суулары, гара суулары боркъулдаб, шоркъулдаб,

Джашил чегетлери шыбырдаб, шууулдаб, –

Бары да меннге салам бере, тансыкълаб.

Тутулуб тургъанчалла:

Кёкде – Кюн, Ай,

Кёкюрекде – джюрек

Адамлада къалмагъанча ёт не аууз –

Къабышыб туралла эгерлени уятмай,

Не этгин, ол мискинлени уялтмай.

Мен а, орнундан чыкъгъан ит тюл, бёрюме.

Мени ким, не, къайда, къачан, къалай ашар –

Билмейме. Аджашхан насыбсызланы бириме.

Джауумла тохтамай джаугъанлы – юч ай.

Юч ай мен да тохтаусуз Кёкге къарагъанлы –

Ол ачылыб андан кёрюннюкча Къарачай.

Джашауум бурулгъанды кюрешге.

Къууаныб, зауукъланыб джашар орнуна,

Кюн таякъгъа, нюр джарыкъгъа ушар орнуна,

Ата-бабам сюегенча ташладан къала.

Зорлукъгъа, терсликге къаршчыды къолумда къалам,

Олду бюгюннгю уруш сауутум, къамам.

Игиликге, халаллыкъгъа салама махтау,

Джигитликге, эслиликге салама махтау,

Тюзлюкге, эркинликге салама махтау,

Муслиманлыкъгъа-адамлыкъгъа салама махтау.

Хакъ джолда баргъаннга джокъ арыу, тохтау.

Аллахны джанынданды джаным.

Аллах берген джуртуму-джерими

Топрагъындан-ташынданды саным.

Шейит болсам – Аллахха кетерикди джаным,

Халкъыма къаллыкъды сёзюм,

Джерими сугъарлыкъды къаным,

Джериме къошуллукъду саным.
Аны ючюннге рахатды кёлюм...

Иманы болгъаннга джокъду ёлюм.

Джашынг-къызынг – анга сагъыш эт.

Кимди джюрютюрюк сен тутхан байракъны,

Кимди джерлерик сен миннген Боракъны?

Кимге къаллыкъды Ай, джулдуз байрагъынг?

Сен джазгъанны кимди окъурукъ?

Огъесе, дженге-дженге дженгерми сокъурлукъ?

Сен кюрешгенча халкъым, джуртум деб,

Кюреширик табылмай къалса,

Къабырынг джарылмазмы эки?

Орнунга адам хазыр эт.

Унутуб Тейрини буйругъун,

Учхан джулдузну къуйругъун

Сылаб, къолуму кюйдюргенме,

Халкъны кесиме кюлдюргенме.

Къалай къояйыкъ Кёкге узалмай –

Мёлекле кёкде эселе,

Къахмеле джерде эселе,

Къалай турайыкъ кёкге узалмай.
Къалай болайыкъ кёкге узалмай:

Мёлекле кёкде эселе,

Къахмеле джерде эселе.

Кёкде эсе – джарыкъ, нюр.

Джерде эсе – балчыкъ, кир.
Огъай,

Эки имбашымда эки мёлек...

Мен аланы сезалмай,

Кёз алмай,

Джер къызлагъа къарайма.

Алдайма.
Мен къарагъан – къарангыды,

Мени сакълагъан – къарангыды.

Джокъду анда джулдуз не Ай...

Сау къал, Малкъар-Къарачай.
АХЫРЗАМАН НАЗМУСУ
Зорлукъ-терслик юсден кетгенликге,

Эсден кетмей, къыйнайды.

Чалдышха тыйылгъан тюзлюк

Сюргюнде сабийча джылайды.

Хорлайды аны аманлыкъ.

Ичиб, эсириб, той этелле

Итлик, хыйлалыкъ, харамлыкъ.

Къарангы кючлейди джерни,

Адам джюрегинден къычырады шайтан:

«Ибилис, хорладыкъ Аллахны,

Энди бизникиди адам».

«Ура» деб, урадыла харс.

Имансызлыъ кючлейди джерни –

Кёкге чыгъады букъу, тютюн, чарс.

Джаратхан Аллахын унутуб,

Ибилисге табынады адам.

Батыб гюнахха-харамгъа, кирге-балчыкъгъа

Тонгузча зауукъланады адам.

Патчах этиб, ётдюрелле тёрге...

...Аллахны тёзюмю бошалады –

Ахырзаманын иеди джерге.

Бёрю къанлыбыз деб, сермешмегенле,

Аллах-Адам деб, тюшюнмегенле –

Джокъду сизде не адамлыкъ,

Не муслиманлыкъ.
Ёзден болургъа излемеген къулла,

Бёрю болургъа излемеген итле,

Аман хансча джайылгъансыз сиз –

Сизден ариуланмай,

халкъыбыз Халкъ болмаз.
Туугъан джуртдан тойгъан джуртну сайлагъанла,

Адам джашаудан хайуан джашауну сайлагъанла,

Хуппеги, сюек береди деб, къара джинни сыйлагъанла,

Итлеча, къарынлары бла, къарын тюблерине къулланнганла,

Аджашханла, алданнганла, сатылгъанла...

Джайыла, кёбден-кёб бола барасыз сиз,

Ит аурууча, джукъгъан аурууча, бир къыйынлыкъ болгъансыз сиз.
Кеслерин таулугъа, къарачайлыгъа санамагъанла,

«Джыйымдыкъбыз, андан-мындан келгенбиз» деб, тургъанла,

Келген джеригизге барыгъыз – сизни тыймайды киши,

Эркин болууду, кърал болууду Къарачайны иши.

Сиз – ёзден тюлсюз, адам тюлсюз, муслиман да тюлсюз.

Чырмауукъ хансча, аман хансча, джайылгъансыз –

Сизден артылмай,

Адам да, Халкъ да , Муслиман да болаллыкъ тюлбюз.

Кесибизден, ичибизден башлансын джихад.

Ёзденлик-адамлыкъ-муслиманлыкъ ючюн барсын къазауат.
ХАЛКЪ-ДЖУРТ КЪАЙГЪЫСЫ КЕМИРЕДИ ДЖЮРЕКНИ
Алгъыш этиб, тилек этиб, ашыргъанла джууукъла –

Джукъла, Билал, сагъыш этмей бир джукъгъа.

Джоюлмадынг башхалача тутулуб,

Кетдинг, кетдинг джелмауздан къутулуб.

Эки башлы гяуур къуш да джан-джанын ашай,

Чекден ётдюнг – башха дуниягъа кетдинг,

Тилчиле, сёзчюле да къалдыла тиллерин чайнай.

Кетгенсе да – къууанч джокъду, басалмайса кёлюнгю.

Кюнюнг, Айынг – Къарачайынг – тутулуб,

Тура эсе, къалай басхын кёлюнгю?!

Баш сакъларгъа, джан сакъларгъа кюрешген,

Джети башлы эмегенлени къырыб,

Эки башлы чыгъыр къуш бла сермешген,

Аллахдан башхагъа бойсунмагъан муслим халкъым,

Иманынг да, айранынг да, Аллахха шукур, джетишелле,

Къайтукъ айтхан таулучукъларынг да джетишелле-джетелле.

Сюелелле кир байракъла – эски даула, джангы даула,

Джангы джамаулу эски даула – джалгъан даула.

Кюрешелле сыйырыргъа туугъан джерибизни-джуртубузну,

Думп этерге тарихибизни, эсибизни, эслибизни, онглубузну –

Не этиб да алыргъа онгубузну.

Амантиш сатлыкълагъа таянадыла джаула.

Бир умут агъарта, бир къайгъы къаралта,

Турадыла узакъ Ата джуртда таула.
Мен да турама мында, тенгизча чайкъала кёлюм,

Джуртум – анда, кесим – мында, халкъым – анда, кесим – мында.

Халкъ-Джурт къайгъысы кемиреди джюрекни –

Къайда да бол, ол къайгъыдан къутулургъа, артылыргъа джокъ амал.

Къайгъы ашайды джюрекни.

Къалай къурутсун аны адам?

Къалай къутулсун андан адам?

Къайгъы кетмейди джюрекден.

Ол джюрекде салгъанды уя –

Къама къынча тар болгъанды дуния.

Учунургъа, учаргъа къоймайды ол –

Тауусулгъанды джол.

Сора не айыб, къайгъысы халкъымы

Джюрекни ашаб, таусханды деб.

...Лайпанланы Билал хаджи ауушханды деб,

Хапар чыкъса – ийнанырла анга.

Умметчиле, миллетчиле да къыйналырла анга.

Темиркъазакъ Джулдуз да,

Къазакъ Бёрю да,

Джангыз Терек да къыйналырла анга.
Алай болса да,

Иги сёзюм, назму сёзюм ёлмез, джашагъанлай турур,

Игиликге-сюймекликге-ариулукъгъа-халаллыкъгъа къанат болур,

Тюзлюкге, эркинликге, джигитликге кёллендиргенлей турур.

Алай бла мен да къутулуб ёлюмден

Ахырзаманнга дери джашарма биргегизге.

Тургъан бузоу кир этер.

Эй джанларым, биз джатыб турсакъ,

Дуния бизге не этер?

Биз бёрю болуб чабмасакъ,

Боюннга дуа, белге къама

Гитчеликден огъуна такъмасакъ,

Дуния бизге не этер?
Динибиз, Джуртубуз демесек,

Халкъбыз, Адамбыз демесек,

Игилик этмесек, излемесек,

Аллахдан иман тилемесек,

Муслиман болургъа кюрешмесек,

Дуния бизге не этер?

Бир кишиде джокъду гюнах.

Алай буюргъанды Аллах.

Мадар этсем къадар этерикди Ол.

Джылай эди бир насыбсыз.

Джылай эди экинчи насыбсыз.

Джылай эди ючюнчю насыбсыз.

Бири да сагъыш этмей эди.

Къарай эди кеси джаратхан джанлагъа...

Мёлеклерин, файгъамбарларын, китабларын ийгенден сора да,

Тюрленирге, тюшюнюрге унамагъан джанлагъа.

Ол кеси уа – Джангыз Терекча,

Шийирлери – азат тёлюча,

Джюреги уа – Къазакъ Бёрюча.

Бары да меннге – Къарачай.

Ай бла джулдуз.

Ишлеген темир ашалады, тауусулады.

Уруш темир да кюеди, сынады, ууалады,

Ёлюм къайда да джетеди бизни.

Ёлгенден эсе, тот кесе, тёшекде,

Иги тюлмюдю, эрча эшикде –

Аякъ юсюнде, ат юсюнде,

Сабан тюзде не уруш тюзде,

Ишлей, кюреше, сермеше ёлген?

Не байракъ алыб, не джамчыгъа чырмалыб,

Алай къайыта турмагъанламы урушдан?
Ата джурт ючюн, халкъ ючюн

Сермешгенни-ёлгенни чыкъмагъанмыды сыйы?

Ол насыбха, насыблыгъа саналмагъанмыды?

Биз а – ол нарт ата-бабаланы

Туудукълары-джетеклери тюлбюзмю?
Къалам да, къама да

Дин-тил ючюн, адет-намыс ючюн, халкъ-джурт ючюн,

Игилик-тюзлюк-эркинлик ючюн

Сермеширге керек тюлмюлле?!

Не уллусунда, не гитчесинде

Адеб-намыс , бет-уят дегенледен джукъ джокъду.

Аладан хапарлары да джокъду.

Джашагъанлары, ашагъанлары да тонгузча,

Онгсузгъа бий, онглугъа къул болургъа кюрешген,

Таякъдан башха бир затдан къоркъмагъан,

Таякъдан башха тилни ангыламагъан

Бу джийиргеншлиле бла боллукъмуду джашаргъа?

Адам болургъа, Халкъ болургъа излей эсек,

Былача ит, тонгуз болургъа излемей эсек,

Быладан айырылмай джокъду мадар.

Была кеслерича этерге излейле бизни да.

Тонгузла тонгуз этерге излейле бизни да..
Къаршчы тургъанны къырыб, ёлтюрюб,

Джууаш болгъанны къул-къарауаш этиб,

Башыбызгъа, бойнубузгъа миниб,

Алай джашаб турургъа излейле.

Башха джол къоймагъанла была бизге.

Не иман бла джашарбыз, не иман бла ёлюрбюз.

Кесин адамгъа, муслиманнга, ёзденнге, эркишиге санагъан

Дин-тил ючюн, Халкъ-Джурт ючюн турайыкъ ёрге.
Аллах-адам ючюн, дуния-ахырат ючюн,

Эки дуниядан да юлюшлю болур ючюн,

Кеси кесибизден кёлюбюз чыкъмаз ючюн,

Аллахны бизден кёлю чыкъмаз ючюн,

Турайыкъ ёрге.

Барыбыз да турайыкъ ёрге.

Ол кёбмюдю, азмыды – билмейме мен.

Къартны, сабийни, тиширыуну, къарыусузну бир джанына чыгъарсанг,

Сауут туталлыкъ эркишиле – бир онбеш минг.

Ол азмыды, кёбмюдю – билмейме мен.

Иманы толу эсе – бюгюлмезлик кючдю ол.

Иманы къарыусуз эсе – джукъ да тюлдю ол.
Хакъ джолда баргъан ким эсе – аныкъыды хорлам.

Къалгъан джолла барысы – харам.

Хакъ джолда бара эсе халкъ,

Аллах эсе миллетни иннети-сёзю-иши-кюреши,

Сора аны хорлаяллыкъ джокъду киши.

Кёкню да, джерни да, джюрекни да.

Джюрекде джашайла:

Игилик , аманлыкъ да,

Адамлыкъ, хайыуанлыкъ да;

Иман да, шайтан да,

Умут да, тюнгюлюу да,

Ёлюм да, ёлюмсюзлюк да,

Акъ да, къара да,

Джарыкъ да, къарангы да,

Дуния, ахырат да,

Джаннет, джаханим да...

Джашау – аланы кюрешлериди.
джаныуар – Адам болургъа,

сюрюу – Халкъ болургъа кюрешедиле.

Адам болургъа, Халкъ болургъа кюрешиу –

Олду джашауну магъанасы.

Юсюнгю, кийиминги да таза тутсанг,

Юйюнгю, арбазынгы да таза тутсанг,

Хоншугъа, тийреге, джууукъгъа-узакъгъа да иги болсанг,

Къартха, сабийге, тиширыугъа, онгсузгъа артыкъ джан аурутсанг,

Къара кючледен адамны сакъларгъа, джакъларгъа кюрешсенг,

Аллах айтханча, буюргъанча джашаргъа кюрешсенг –

Адамлыкъ-муслиманлыкъ олду.

Барын сакъларгъа, джакъларгъа, айнытыргъа-къатларгъа кюрешсенг,

Билиминги, фахмунгу,

кючюнгю, саулугъунгу, джашауунгу алагъа юлешсенг –

Эки дуниядан да юлюшлю болуу олду.
Кесинг таза, халал, иги болсанг,

Къалгъанланы да алай болурларын излесенг,

Кишиге бий, къул болургъа унамасанг,

Кишини да кесинге бий, къул этерге излемесенг,

Бир Аллахдан башхагъа бойсунмасанг, къуллукъ этмесенг,

Аллах Къуранында айтханча джашасанг –

Адам болуу, муслиман болуу – олду.
Джюрегингде хайуанлыкъны, джаныуарлыкъны ёлтюрсенг,

Ичингде, тышынгда да шайтаннга джол бермесенг,

Кесинг да, адам улу да толу иманлы болур ючюн кюрешсенг,

Адамлыкъ-муслиманлыкъ хорлар ючюн кюрешсенг –

Аллах-Адам да боллукъдула сеннге разы.
АЛЛАХ БОЛУРГЪА ИЗЛЕЙДИ АДАМ
Адам ёмюрлюкге, ёлюмсюзлюкге –

Чексиз насыб, зауукъ, къууанч джашаугъа –

Джаннет джашаугъа термиледи.

Саулугъун, джашлыгъын да тас этмей,

Болджалсыз, аджалсыз джашаб турургъа излейди.
Ёлюрге деб джаратылгъан джан

Ёлмезге излейди.

Кесин да, тёгерегин да тюрлендире,

Ёлмей джашаб туругъа излейди.

Аллах болургъа излейди адам –

Андады аны къыйынлыгъы.

Мекка, Медина да – Кавказ.

Ахыр джуртум андады мени,

Ары айланыб къылама намаз.

Кимден, къайдан эсе да келеди ауаз:

Тюшюнюрге, нюрленирге унамасагъыз,

Аллах чачарыкъды сизни,

Джуртсуз къоярыкъды сизни».

Аллах айтханча джашамадыкъ биз,

Керамат ауазгъа тынгыламадыкъ биз.
Чамланды Аллах:

Чачылды Хазар къралыбыз,

Чачылды Булгар къралыбыз,

Чачылды Алан къралыбыз,

Къарачай къралыбыз да чачылды.
Сюрюлмедикми Ата джуртубуздан талай кере?

Турмадыкъмы джесирде, сюргюнде къырыла-ёле?

Сынамадыкъмы джюз минг тюрлю азаб, палах?

Дагъыда джазыкъсыныб, тюшюнюрле деб,

Ата джуртха къайтармадымы Аллах?
Алай а, бизде болмагъанча ангы-акъыл-эс,

Ачы тарихибизден этмейбиз оюм, алмайбыз дерс.

Аллаху акбар дейме, къылама намаз,

Къулагъыма уа келеди ауаз:

Тюшюнюрге, нюрленирге унамасагъыз,

Аллах чачарыкъды сизни,

Джуртсуз къоярыкъды сизни».