Астана ақшамы. – 2014. №130. – 15 қараша Өтешқызы Г. Үш жылдық бюджет жобасы талқыланды

Өтешқызы Г.

Негізгі бөлім бойынша сөз алған Астана қаласының Экономика және бюджеттік жоспарлау басқармасы басшысының орынбасары Гүлнәр Жүсіпова депутаттардың қарауына 2015-2017 жылдарға арналған бюджеттің жобасын ұсынды. Осыған орай, бас қаладағы Білім, Ішкі саясат, Жастар мәселелері жөніндегі басқармалар мен Туризм, дене тәрбиесі және спорт басқармаларының басшылары баяндама жасады.

Қай салаға болсын қосымша қаражат қажет. Мәселен, Білім басқармасы басшысының міндетін атқарушы Бағлан Сматаеваның айтуынша, бұл салада 1-4 сынып оқушыларын т­амақтандыру, кейбір мектептердегі ескірген компьютерлердің орнына жаңасын сатып алу және бір­неше білім беру мекемесіне күрделі жөндеу жұмысын жүргізу үшін қосымша қаржы керек екен.

Алдағы үш жылға жоспарланған шараларды жүзеге асыру үшін Жас­тар саясаты мәселелері жөніндегі басқармаға 1 819,5 млн теңге, соның ішінде 2015 жылға 707,2 млн теңге қажет. Осы жөнінде мәлімдеген аталмыш басқарманың басшысы Талғат Рахманберді келесі жылы Қазақ хандығының 550 жылдығына, со­нымен қатар, Ұлы Жеңістің  70 жыл­дығы мен 2015 жылдың Қазақстан халқы ассамблеясының жылы деп жариялануына байланысты және Астана қаласының бейбітшілік пен келісім қаласы болып аталуына орай жастардың арасында кең ауқымды идеологиялық іс-шаралар өткізілетінін айтты.

Ішкі саясат басқармасына қосымша 40 млн теңге қажет болса, қалалық Туризм, дене тәрбиесі және спорт басқармасының ал­дағы үш жылдық шығындарына 18 513,7 млн теңге, соның ішінде 2015 жылға – 5 879,8 млн теңге керек көрінеді. Басқарма бас­шы­сының міндетін атқарушы Самат Қабдулин бұл ретте қаланың құрама командалары мүшелерін республи­калық, халықаралық жарыстарға дайындап қатыстыруға, республи­калық маңыздағы спорттық іс-шараларды өткізуге, сондай-ақ, балалар мен жасөспірімдерге спорттық білім беруге қосымша қаражат қа­жеттігін алға тартты.

Халық қалаулылары да үнсіз қал­мады. Депутат А.Күрішбаев кейбір студенттер үшін қоғамдық көліктердегі жол жүру ақысын төлеудің едәуір қиындық туғызып отырғанына алаң­даушылық білдірді. Оның айтуын­ша, ай сайын студенттер университетке келіп-кетуге ғана шамамен 9-10 мың теңге жұм­сайды екен. Ал, Алматыда көп балалы, аз қамтылған отбасылардан шыққан студенттер үшін жолақы билеттерінің құны арзан.

– Астанада небары 5 жоғары оқу орны бар. Өздеріңіз білесіздер, біздің Агротехникалық университетте оқи­тындардың көбі – ауыл­дан келген ба­лалар. Олардың жағдайы керемет деп айта алмаймыз.

Өйт­кені, ауылда жұмыс жоқ. Соған байланысты әлеу­меттік жағынан қорғалмаған отбасылардан шыққан осындай студенттер үшін айлық жолақы билетіне 50 пайыз жеңілдік қарастырылуын сұраймын. Бұл мәселе Астанада да оң шешімін табуы керек, – деді А. Күрішбаев.

Одан әрі депутат қала мектеп­теріндегі үш ауысымдық оқытудың жайын сұрады. Осыған орай, Г.Жүсіпова жаңадан ашылып жатқан мектептер санының жыл өткен са­йын арта түсуіне байланысты бүгінгі таңда біздің қалада бұл мәселе аса өзекті емес екенін ескертті. Депутат Б.Солсанов қаладағы №20 мектеп оқушыларының үш ауысымда оқитынын, аталмыш білім беру мекемесінің ғимараты құлаудың аз-ақ алдында тұрғанын жеткізді.