Галина семенова тэтэ карон дыр «Удмуртия» издательстволы – 95 ар

Та пумиськонэ вуизы издателъствоын али ужась но азьвыл аръёсы тыршем адямиос, литератураен тунсыкъяськисьёс, шаерчиос. Люкаськем калыклы издательствоысь редакторъёс ма­дизы ужамзы но мылкыдъёссы сярысь.

Книгапоттонниысь валтӥсь редактор Георгий Грязев верамъя, «Удмуртия» издательство гинэ поттэ пиналъёслы ӝöк выл шудонъёс («Ым вера, пель кылэ», «Алнашысен Ярозь» но мукет). Шаертодон литература вае коньдон. Заказъёс трос. Лыдӟисьёс, шаерамы вуись куноос куро Иж но Удмуртия сярысь изданиосты. Дасямын но поттэмын «Неизведанны­ми тропами Удмуртии» бичет, калык сое мыло-кыдо басьтэ, малы ке шуоно котькуд ёрос сярысь маке тунсыкозэ тодыны, быдэс Удмурт шаерез усьтыны луэ.

Чеберлыко литературая отделлэсь кивалтӥсьсэ Сер­гей Матвеевез туж чидась адями шуо. Куддыръя кык пöртэм валанъёсты огазея­но луэ: авторлэсь мылкыдзэ лыдэ басьтоно но произведенилэсь ӟечлыксэ будэтоно – со секыт уж.

– Берло дыре тросгес ваё кылбуръёс. Адямиос малпа­ло, лэся, рифмаос шедьтэмын ке – со кылбур ини. Тунсыко, кужмо выль авторъёсты шуак вераны али уг быгаты, но малпасько, соос кылдозы удмурт литератураын. Мае лыдӟыны дэмласал? Мыным туж кельшизы «Русская клас­сика на удмуртском языке» сериысь книгаос, – шуиз Сер­гей Матвеев.

Вераны кулэ, книгаосты дасям сяна, издательствоын ужасьёс асьсэос но гожъяськыса вутто. Кылсярысь, Сергей Матвеев йылпумъяз «Эмезь гурезь» романзэ.

Издательствоысь валтӥсь художниклэн Юрий Лобановлэн туж бадӟым ныпъетэз. Чеберлыко произведениослы суредъёс дасям сяна, со ужа учебникъёсты, дышетон тетрадьёсты чеберъян бордын.

– Москваысь учебникъёсын ӵошатыса, асьме дорын потэмъёсыз пуштроссыя но, вылтуссыя но трослы чебересьгес, сое пусъё Россиысь специалистъёс но. Ми котькуд учебникез нюлыса кадь лэсьтӥськом. Огнам ваньзэ öй вуттысал. Валче ужаськоны А. Андрюшкинэн, В. Коркинэн, Н. Исаеваен, Г. Ивановаен. Ум быгатӥське Удмуртиысь калык художниклэн М. Гариповлэн ужъёсызтэк. Солэн иллюстрациосыз уг вужмо, та усточи быгатӥз возьматыны удмурт адямилэсь лулзэ. Азьланьтомы «Ху­дожники Удмуртии» книгаос бордын ужаммес, туэ 5-тӥез сыче альбом потӥз ини, – шуиз Юрий Лобанов.