Н. С. Байтеряковлэн творчествояз кырзанлэн интыез

Н.С.Байтеряковлэн творчествояз кырзанлэн интыез

Тини озьы Н.С. Байтеряков удмурт кылбуретын шара но шыпыт лирикаен артэ нимаз ор кылдытиз: мозмонэн пычам психологической лирика.

Николай Семеновичлэсь кылбуръёассэ мозмонэн, куректонэн артэ чеберезлы оскон мур лирической пуштросо каро. «Котьма сярысь со сюлэмыз вось луыса гожтэ. Шумпотэ-а,
куректэ-а, малпаське-а – со кезьыт сюлэмын кылбураны уг быгаты», - пусъе удмурт поэт В.Романов.

Зэм но, озьы, угось сыче мылкыд котьку кырзанэ куриське.

Нош крезьгурчиос, чошатскыса выллем, Н.Байтеряковлэн кылбуръесызъя кырзанъёс кылдытъязы. Кылбурчилэн чуръёсыз лэйкытэсь, крезьгурась, со – кырзась кылбурчи. Нош ас калыктэ, солэсь улонзэ, историзэ тодисьтэм адями ноку но калыкезлы матын уз луы, нырысь ик со мед луоз калык сюлэмез шодись – валась но сое утись, кылбур но, кырзан но адями сюлэмен, улонэн герзамын мед луозы.

Поэтлэн тросэз кылбуръёсыз, ожлы сиземын-а, чылкыт яратон сярысь-а, жильыртись ошмесэз возьматэ-а, вордиськем интыеныз данъяське-а – котькудизлэн аслаз гожтон-кырзан манерез, сюлме пырись нюжаез вань.

Огаз Николай Семёнович вераське, аспортэм диалог нуэ ошмесэн: «Вай, ошмесэ, я, вай, юо мон тынэсьтыд юзмыт вудэ…» Мукетаз шаерезлы вазиське: «Нёжало шаере, бусыё шаере, чагыр-лыз лентаен, пужъятэм шобырен пыраськод тон чебер вотъёсы». Яке сюлмысь лабыртэ эш-калыкеныз: «Я, вай, эше, ос усьтиськон азьын вужзэ зечен-бурен келяломы». Я син азяз пуктэ оже бырем эшъёссэ: «Колэ зеч, бертымтэ солдатъёс». Ваньмыз та чуръёс возьмато Николай Байтеряковлэсь инкуазь шаереныз, калыкеныз котьку чош луэмзэ. Соос люконтэм: поэт но калык, поэт но инкуазь.

Кылбурчилэн сыче улон позициез лыдзисезлы, калыкезлы матын. Соин ик нош но нош вордисько выль кырзанъёс, сюлэмез вырзытись вунонтэм крезьгуръёс.

Николай Семеновичлэн кылбуръёсызъя гожтэмын ог ньыльдон кырзанъёс, кудъёсыз пыремын удмурт крезьгуро лулчеберетлэн зарни шыкысаз. Соос сиземын зырдыт яратонлы, вордскем шаерлы но буре ваёнлы.

Ож тема быгатыса возьматэмын «Топольёс» кылбураз. Со валамон, угось Николай Семенович – войнае ветлэм со отын кыдам адями, кудиз «жыны войнаез ортчытиз окопъёсын, чемысь вуылиз тушмонэн ваче син, сосырмылиз…». Солэн лирической героез, кудиз туж матын луэ аслыз поэтлы, ож лудын кылем эшъёсыз азьын кыл кутэ: шонер-а со улэ туннэ, быдэстэ-а соослэсь лэсьтытэк кельтэм ужзэс? Бен, кылбурчи соосыз котьку но тодаз возе, со данъяське ожысь геройесын но валэктыны тырше: соос ноку уз вунэ, асьмелэн зеч ужъёсамы улозы, «выль пушъетъёсын» улозы.

Сюлэм пыр потись, мур малпаськытись, лулпушез тырись, сюлэмез вырзытись луэ та кылбур. Войнае ыштэм гажанъёссэс возьмась кышномуртъёслэн сюлэм чеберенызы, соослэн ноку кысонтэм яратонэнызы но соин артэ ик куректэменызы, возьмаменызы пачылмем кылбур.

Автор кылбурлэн нырысь чуръёсаз ик лыдзисез малпаськонэ уськытэ: «Топольёс… дугдытэк шыпырто, кинэ ке утчало кадь соос, кинлэсь ке юало: «Ку бертод?»

Та чуръёссэ шыпытэнгес, кепырасагез кырзаськом – вераськом.

Нош отияз валамон луэ ини топольёслэн ма сярысь шыпыртэмзы:

«Кемалась пи кошкиз ож лудэ,

Нош тополь весь возьма но возьма.

Сад улын кышномурт куректэ,

Садэти нош ветлэ югыт май.»

Топольёс сяна, оже кошкем пиосмуртэ возьма на нылкышно. Солэн куректон-кайгуэз уката яркыт пуксе син азе, «югыт маен» чошатыса (яратондэ ыштон, солэсь мозмон но шулдыр, чебер вормон толэзь…)

Нош улон азьлань мынэ, «жужытэсь топольес» пормо ини «пересь топольеслы», соос интые «выльесыз жутисько вож садъёс». Улонэз уд дугдыты, «аръёс ворттись вал кадь дырто…» (валлэн образэз поэтлэн творчествояз огпол гинэ уг кутиськы, со туж чаляк ворттыны быгатэ, кутыны сое туж секыт, нош берыктыны – эшшо но…)

Кылбурлэн берпум ньыль чураз автор лыдзисьёслы азьланезлы оскон мылкыд пычатэ, нош бырем эшъёсыз азыьн со кылзэ сётэ:

«…Колэ зеч, бертымтэ солдатъёс,

Топольес уз, уз ыштэ нимдэс».

Тини озьы, одиг кылбур – кырзанзэ гинэ уже кутыса но, Н.Байтеряковлэсь лириказэ валаны луэ: та кылбур чуръёсын мозмонэн, ыштонэн – куректонэн артэ чеберезлы, зечезлы оскон вамышъя. Нош эшшо но сюлэмез вырзытись каре кырзанлэн гурез.

Алнашысь композитор Н.Постников «Нёжало шаере» кылбурезлы но кылдытэм вунонтэм крезьгур. Кин меда сыче лякытак но, со дыре ик волмытак вазиськыны быгатоз аслаз вордиськем шаерезлы: «Нёжало шаере, бусыё шаере, юг лента кадь пичи шуръёсын, пужъятэм шобырен пыраськод тон чебер вотъёсы». Та чуръёсты лыдзыса, син азе пуксе вордиськем интыос, но быдэ вуэмъя соос пичи дырен чош чем но чем вотъёсы пырало – огшоры овол – пужъятэм шобырен. Татын поэт уже кутэм кадь ас калыкезлэсь вашкала вакытысен кибашлы луэмзэ возьматонэз. Нош та веранме юнматыса кадь, Николай Семёнович паймыса вера: «Песятай-а шедьтэм та шулдыр интыез, песянай-а меда синмаськем».

Поэт вераны турттэ, туннэ шудо нуналмы понна, чебер интыосмы понна тау карыны кулэ вашкала чыжы-выжыосмылы, та чебер интыез шедьтэмзы но утемзы понна. Угось солэн музъемез огшоры гинэ овол – со «сюрелась шепъёсын, тюрагай куараен» авторлэн сюлэмаз чузъяське, кудиз котьку но котьма вакытэ «буйгасьтэм сюлмыныз вордиськем музъемзэ данъялоз».