Сарайкина Полинась

Сёрмадозе МБОУ «Каргальскяй ООШ»

9-це классонь тонафнись

Сарайкина Полинась


Краезе!

Кельгома Руссь и Мордвась!

Пачкодеть тячити тон ёфксонь лаца.

С. Есенин
Эрь велеть, веленять да и кодамовок эряма вастть ули сонцень историяц. Эсь видевань мезень-мезень сонценнец. Финц эряма васттнень лемсна мяляфтовихть сяс, мес тяса шасть-кассть пяк содаф ломатть, омбонцнень – мес тоза кадсь пильгокит Оцю историясь, колмоцетнень – мес тоса эрясть тевонь кельги, кодамовок тевса пяк дока ломатть.

А монь веленязе мяляфтови сембонь коряс. Ломаненза афкукс смузюфт и тевонь кельгихть. Тяса шачсь историческяй наукань докторсь В. Балашов, а велеть фтала занци оцю васта содаф сембе Мордовияти Кильгининскяй могильниксь. Кодама аньцек парши ашесть мушенда тяста археологонь экспедициятне: авань мяштень украшеният, воинонь мечт, нал пет… . Именна тя могильникста муфоль рузонь княснень должностной тяштькссна. Тяфтама тяштькст максфтольхть дацянь кочкай ломаттненди. Сембось тя корхтай тянь колга, што ня васттнень эса серцек мокшетнень мархта эрясть рузонь ломаттне. Нинге эстоньбере мордовскяй народсь кемоста сотозе эсь судьбанц рузонь народть мархта.

Кизоста кизос ётксост сотксне виензакшнесть. Лама вий путсь соткснень кемокстамаснонды «патриарх Московский и всея Великия и Малыя и Белыя Руси» Никон. Сон вятезень атянь атяньконь языческяй вераста православнайти. Тянь мархта арьсесь цебярь эряф тядяньконди-аляньконди и тейнек. Тячемс сонь мяляфтсазь и лемнесазь пара валса народоньке.

Мокшэрзятнень юрсна пяк кърхкат. Синь ётасть историческяй оцю ки, лама мезе няйсть, лама мезе кирдсть. Мъзяра давол ётась лангаст. Учёнайхне-историкне лувозь: Рузонь кунардонь государствать – Киевонь Русть эвондамда меле и тячиень шитнень самс Отечествасонк ульсь кафта сядода лама война. Тапсезь-калафнезь ошеньконь и веленьконь монголо-татархне, ши валгома ширде немецне и шветтне… . Лама вий путфоль сяськомати. Странаньконь араламац фалу ульсь васенце тевкс сембе народоньконди. Лама ломань няфтезь пряснон афкуксонь геройкс стакадонга стака тюрематнень пингста. Рузонь геройхнень лемснон мархта серцек ащихть флотоводецть Ф.Ушаковонь, военачальникть М.Пуркаевонь, Советскяй Союзонь Геройть М.Девятаевонь лемсна. Великай Отечественнай войнать пингста мокшэрзятне ащихть васенце васттнень эса Советскяй Союзонь Героень лепнень коряс. Синь эздост сядода лама.

Марстонь пичефксне и мяльхне лездсть рузонь и мокшэрзянь ломаттнень ёткса культурнай соткснень кемокстама. Ряцок эрязь ня кафта культуратне фкя-фкянь козякофнесть. Лама тисть тянь ширде наукань, культурань, искусствань содаф ломаттне: графсь Николай Мордвинов, просветительсь Макар Евсевьев, скульпторсь Степан Эрьзя, художниксь Фёдор Сычков, морайсь Лидия Руслановась и ламотне лиятне.

Ётась тёжяньда лама киза, кода Мордвась сувась Рузонь государствати. Сон кемоста сотозе эсь судьбанц рузонь народть мархта. Ва кодама валса кортай тянь колга Максим Бебан:

«…. Я счастье, русский брат, делю с тобою,

И не знакомы нам тоска и грусть.

Ведь на века, живя одной судьбою,

С Мордвой и Чудью породнилась Русь…»

Кизоста кизос, векста векс мокшэрзянь народть ёткса шачендыхть сембе мирти содаф ученайхть, художникт, спортсметт, конат кандыхть шачема масторти и марнек Россияти сембе мирса содамоши. Синь ётксост Олимпиадань сяськихне: Петр Болотников (Рим, 1960г.), Алексей Мишин (Афины, 2004г.), Владимир Борчин, Ольга Каниськина (Пекин, 2008г.). Мокшэрзянь спортти легендакс арась боксерсь Олег Маскаев.

Да, сембе тевса Мордвась афи лядонды руснень эзда. И доказательствакс тянди азфт Николай Оглоблинонь валонза: «Мордовскяй плямась руснень мархта лама веконь эрямста няфтезе, што сон машты эсь прянь ванфтома, машты эсь культуранц кеподема, а кда тя тяфта, лисенди, што мордвась сембонди азозе эсь историческяй праванц эрямс эсь эряфсонза рузонь народть ёткса».