Ад быдлаын (< роч); ад гуран скр., шс.; вакрамеш

О. Уляшев

Комияслöн чайтöм-гöгöрвоöмъяс серти, Шондiсö вöчис Ен. Шондi вöчан кад йывсьыс эм некымын версия. 1. Ен вöчис Шондiсö космогенез заводитчигöн косысь-мамыслöн колькйысь, кодöс сiйö судзöдiс океан пыдöсысь. Та бöрын сылöн Омöль вокыс мöд колькйысь вöчис Тöлысь. 2. Шондi чужис сёрöнджык, кор Муыс вöлi нин, а сы весьтö Ен вöчис енэж да овмöдчис сэнi. Космослöн вылi юкöн вылын ыджыдалöм вöсна вермасигöн Омöль вöчис Шондi джынйысь Тöлысь. 3. Шондi да Тöлысь чужисны ёна сёрöн, кор вöлiны нин му да йöз да йöзыс кöдзисны нин. Омöль вöчис Тöлысь, таысь лои кöдзыд, няньыс пондiс кынмавны, а йöзыс тшыгъявны. И сэк Ен вöчис Шондi. Перым-комияслöн Шондi да Тöлысь вöчöм йылысь мифъяс абу кольöмаöсь.

Коми мифологияын Шондi ясыд нывбаба символикаа, а Тöлысь – мужичöй символикаа. Найö либö чоя-вока, либö мусукъяс (космосса корасьöм тема кузя вариация). Öдзыс Шондi да Тöлысь вöлiны енэжас орччöнöсь. Найö торъялiсны асьныс либö найöс торйöдiс лёк тун.

Öти аслыспöлöс перым-коми миф гöгöрвоöдö Шондiлысь во гöгöр бергöдчöмсö да волöн кадъяслысь вежсьöмсö. Мифас висьтавсьö, мый водзтi тöлыс абу вöлöма, а Шондiыс пыр вöлöма Пармаын. Сэнi вöлöма уна пемöс-пöтка, но йöзыс абу на вöлöмаöсь. Сэсся Пармаыс чужтöма зонмöс, нимтöмаöсь Пераöн (медводдза мортöс чужтö ачыс вöр-ваыс). Пера вöчöма ньöввудж да ньöвъяс и пондöма ыджыдавны му вылын. Öтчыд сiйö лэччöма ю дорö да аддзöма юысь öшкамöшкаöс. Васö юöмсьыс Пера корöма качöдны сiйöс кымöръяс сайö. Енэжсьыс Пера аддзöма “енлысь мусö” да уна битор, а шöрсьыс медыджыд бисö – Шондi. Пера кöсйöма босьтыштны бисö да лэччыны муö, но кор сiйö матыстчöма Шондiланьыс, гымöн да чардбиöн сiйöс шыбитöма бокö. Та бöрын Пера веськалöма кымöр вылö эзысь вöла зарни доддьö, а орччöн вöлöма мича ныв – Шондiлöн Зарань нылыс. Асывнас нылыс чеччылöма Шондiысь водз, а рытнас водлöма сыысь сёрöнджык да пыр видзöдöма, медым Шондiыс некодöс оз сот. Пера да Зарань пондöмаöсь радейтны öта-мöдсö и лэччöмаöсь овны Муö. Шондi скöрмöма да мунöма ылö-ылö. Му вылын кöдздöдöма да пемдöма, юяс-тыяс кынмöмаöсь, ставсö тыртöма лымйöн. Пераöс да Зараньöс дзебöма Парма-Мамныс. Шондi абу мыччысьлöма сизим во чöж. Тайö каднас Пералöн да Зараньлöн чужöма сизим пи да сизим ныв. Бöрыннас сэсся Шондi бöр воöма. Бара лоöма шоныд, ставыс вежöдöма, бара пондöма югъявны öшкамöшка. Шондi корöма Зараньöс бöр, а то пö сота ставсö. Пондöма косьтыны, косьмöмаöсь юяс, потласьöма му. Челядь пондаыс Зарань кайöма кымöр сайö, но Шондi пыр на сотöма. Сэк Пера кайöма пияныскöд джуджыд кыр йылö, найö зэлöдöмаöсь ньöввуджъяснысö и лыйöмаöсь Шондiö. Шондiысь торъялöма öти ыджыд тор, усьöма да разалöма Парма пасьтала. Шондi и öнi на пышйö сэтысь, сы вöсна и овлö тöлыс быд во. Но пыр кежлö сiйö мунны оз вермы, сы вöсна мый сылöн ыджыд тор шонтö мусö.

Тайö фольклор текстас эм некымын мифа версия: антропогенез – медводдза морт да йöз артмöм, этногенез – Пералöн челядьсянь артмисны комияс (зыряна да перым-комияс), би судзöдöм – танi Пера петкöдчö культурнöй геройöн, солярнöй – Шондi бергалöм артмöдöм. Вермас лоны, мый тайö текстас йитöма некымын торъя миф. Солярнöй мифыс коми мифологияын аслыспöлöс, но сылöн эмöсь аналогъяс мукöд войтыръяслöн мифологияын. Сибирса да Войвыв войтыръяслöн торйöн ёна вöлi паськалöма геройлöн да Шондi нывлöн гöтрасьöм тема. Архаичнöй шондi мифъясын вöлi и Шондiкöд вермасьöм мотив. Тадз, Амур кывтыдса да Сахалинса войтыръяслöн мифъясын культурнöй геройыс, ньöввуджйöн лыйсьысь, мездö мусö Шондi сотöмысь. Тайö вариантыс перым-коми мифлы медматын.

Перым-комияслöн эм миф, кöнi Шондi символнас петкöдчö кырныш. Финн-йöгра мифологиялы татшöм Шондi символыс оз ладмы. Но колö пасйыны, мый уна войтырлöн мöвпсямын кырныш йитчö муюгыд тэчаслöн уна юкöнкöд, тшöтш и енэжкöд да шондiкöд. Важ Китайын кырныш вöлöма Шондi символöн.

Перым-коми фольклорын эмöсь ясыд индöдъяс шондi енсикаслöн вöвлöм вылö, а тшöтш и Шондi антропоморфизация. Öти текстын Кудым-Ош йылысь висьтавсьö тувсов гаж йылысь Шондi Ен бур вылö. Чукöртчылöмаöсь пö важ пермяна быд карвылысь. Но мыйсяма гаж тайö вöлöма, оз висьтавсьы. Шондiлöн антропоморфносьтыс тöдчö Пера да Зарань йылысь сюжетын. Выль оланiн бöрйигöн Кудым-Ош сувтö пидзöс вылас, нюжöдö кисö Шондiлань да корö индыны рöдыслы выль оланiн. Та вылö Шондi яра öзйöма да индöма Мича Чой вылö. Öнi тайö Кудымкар юкöн, водзтi сэнi збыль вöвлöма карвыв.

Зыряналöн тшöтш жö кольöмаöсь Шондiсö енмö пуктöм вылö да антропоморфизация вылö индысь пасъяс. Тадз, Илля лунöдз йи колiс новлыны вевттьöмöн, а то пö Шондi аддзас да пöрöдас кöдзасö шерöн. “Руч да Сёкыр” мойдын руч корö Шондiлысь отсöг. Шондi дiнö шыöдчöмъяс кольöмаöсь челядь чуксасянкывъясын: “Югыд Шондi, шоныдсö регыдджык вай, регыдджык вай!” либö “Шондi, Шондi, лок татчö, сера кымöр, мун сэтчö”. Йöввыв дырйи сьывлiсны “Гöгыль пö, гöгыль”. Тайö сьыланкывсö сьылiгас челядь кайлiсны кутшöмкö кыр йылö да гöгльöдлiсны сэсянь курöг колькъяс либö мöд гöгрöсторъяс. “Шондiбанöй гажа валяйöй” сьыланкыв силiсны тулыс вочаалöмлы. Сыктывса-Эжваса комияс валяйтны кывнас пасйылiсны йöввыв дырйи вöлöн кытшöн ветлöм йöзаджыкинъяс гöгöр.