Ад быдлаын (< роч); ад гуран скр., шс.; вакрамеш
жүктеу/скачать 1.79 Mb.
|
- Бұл бет үшін навигация:
- Н. Конаков
Н. КонаковШУРЫД МОРТ быдлаын – небыд, бур сьöлöма морт. Видзöд чорыд морт. ШЫПИЧА; Пам-Шипича (? < роч шипица ‘лежнöг’; шыпица ‘вундысь эжöр’ < шип) – коми фольклорса герой, вына тун. Шыпича овлöма Сыктыв вомын, кытчö бöрыннас панiсны Усть-Сысольск кар (öнiя Сыктывкар). Öти версия серти, олöм чöжыс Шыпича вермасьöма новгородса рöзбойникъяскöд, кодъяс усьласьöмаöсь сэтчöс олысьяс вылö. Мöд версия серти, сiйö вöлöма роч, том дырйиыс шöйтöма ёртъясыскöд Русь кузя да лыкöдлöма озыръясöс. Пöрысьладорыс Шыпича став озырлуннас дзебсьöма Комиö. Артмö, мый сiйö дорйöма вöвлöм ёртъяссьыс сöмын асьсö да ассьыс озырлунсö. Мукöд вына тунъяс моз жö Шыпича веськöдлöма стихияясöн. Сылысь кывзысьöма тöв. Ва увтi Шыпича ветлöма уна сё верст сайö. Сунлöма öшмöсö да петлöма ю бужöдысь. Гортас сылöн пыр вöлöма ва тыра пельса. Кор сы вылö уськöдчылöмаöсь, сiйö пырлöма ваас да пышйылöма. Пыжа рöзбойникъяс матыстчигöн Шыпича сувтлöма пельсаас и мый выйöдз сiйö пырлöма ваас, сы выйöдз и вöйлöма рöзбойникъясыслöн пыжыс. Шыпича вермöма бергöдны юяс. Сылысь кывзысьöмаöсь и вöрса ловъяс. Найö йöртлöмаöсь сылöн лэчьясö пöтка-пемöсöс. Шыпича йылысь легендаяслöн сюжет подулын – сылöн кулöмыс. Сюжетыслöн эм некымын вариант. Шыпичалöн керка вылö уськöдчöны роч рöзбойникъяс. Сiйö чепöсйö ва пельсалань, а пельсаыс тыртöм, сы вöсна мый кеслачьясыс ёна вежöгтöмаöсь, мый Шыпича сэтшöм вына, да абу тыртöмаöсь пельсасö. Шыпичаöс кутöны да дыр мучитöны, но сiйö оз кув. Бöрыннас сэсся Шыпича мудзö да тшöктö вундыны вöньсö. Шыпича воö мусук ордсьыс гортас. Отсасьысь ловъясыс юöртöны, мый асывнас уськöдчасны новгородсаяс. Шыпича тшöктö кеслачьясыслы тыртны пельсасö ваöн, медым асывнас бергöдны мусукасигас воштöм вынсö да вöйтны вöрöглысь пыжсö. Но асывнас сiйö аддзö, мый пельсаыс тыртöм. Новгородсаяс кутöны сiйöс да кык лун чöж кöсйöны вины нывъясыслöн син водзын. Бöрыннас нывъясыс жалитöны айсö да тшöктöны вундыны вöньсö. Вöвлöм ёртъясыс уськöдчöны Шыпича вылö. Сiйö чепöсйö ва пельсалань, но нывъясыс тыртöмаöсь пельсасö сöмын джынвыйö, и Шыпича оз вермы пышйыны. Сiйö пышйö Сыктывлань, но джöмдö корöсьö да усьö, и сiйöс виöны. Куим лун Шыпича олiс мусук ордас. Сiйö кисьтiс чашкаö ва, медым вынсö бергöдöм могысь вайны сöстöммöдан вись. Но сы вылö уськöдчисны новгородсаяс. Шыпича шуис нимкывъяс, и чашкасьыс ылькнитiс ва. Ваыс тыртiс вöрöгъяссö пидзöсöдзыс, сэсся морöсöдзыс, сэсся сьылiöдзыс, но сэсся Шыпичалöн выныс быри. Новгородсаяс дыр кералiсны сiйöс шыпуртъясöн, но вермисны вины сöмын сэк, кор Шыпича ачыс тшöктiс вундыны вöньсö. Вöрöгъяслöн уськöдчигöн Шыпича вунöдiс нимкывъявны корöсьсö да бекъяссö. Вöрöгъясыс тöдмалiсны та йылысь да корöсьнас öзтiсны сылысь керкасö. Сэсся писькöдiсны сылысь сiтансö. Шыпича олiс дыр. Кувтöдзыс тшöктiс кодйыны гу, котырыскöд пырис гуас да керыштiс вевтсö кутысь сюръясö (асьсö гуалысь чудь йылысь легендалöн сюжеткöд öтувтчöм). Легендаясын висьтавсьö, мый Сыктыв бердын Шыпичалöн гу весьтö бöрыннас лэптiсны Трöича вичко. Ю кырöмсьыс пö вичкоыс коркö киссяс. Сэк Шыпича сувтас гортсьыс, а став коми войтырлöн олöмыс лоö шуда. Литература: Налимов 1903, Налимов 1925, Попов 1938, Рочев 1984, Сидоров 1928, Uotila 1989. Н. КонаковШЫР быдлаын. Шыр – коми фольклорын ёна паськалöм персонаж. Медваж мойдъясын сiйö трикстер, кодi ылöдö да пытшкöссяньыс йирö гырысьджык пемöсъясöс: урöс, сьöдбöжöс, вурдöс, кöчöс, ручöс, кöинöс, кöрöс, ошöс. Кутшöмсюрö сюжетын шыр виö Аральö пöльöс (Аральöс, Арöйöс, Арöй-дрöйöс < арзыны). Аральöлöн образыс матын ошлöн хтоническöй образлы – вöр (вöр керка) месай. Мойда фольклорын шыр, кыдзи ичöт вын (наянлун) образ, сувтöдсьö паныд ошлы – ыджыд (чорыд) вынлы. Быличкаясын шыр медтшöкыда петкöдчö мöдар югыдса юöрникöн, кулöм либö висьöм йылысь юöртысьöн, лолöн, ортöн, урöсöн. Шырлöн образыс топыда йитчöма улыскöд: Перымса Степан йылысь легендаясын шырыс пежгагъяскöд, кыйяскöд да гут-гагкöд пышйö пöрöдöм “ышмысь кыдзлöн” вужъяс улысь; кутшöмсюрö сюжетын сiйö овмöдчö льöм пу вужъяс костö, косьтö пусö да оз сет сöвмыны, кыдзи и лягуша косьтö юкмöс. Чайтöны, мый шырыс йитчöма пежкöд. Вöралан пон кö сёяс зын шырöс – тшыкас. Веськалас кö шырыс кринчаö, рачö да с.в., дозмуксö шыбитöны, сы вöсна мый сiйö пежасьö. Пеж йитчöма медводз чужтöмкöд да секскöд. “Ма пельсаын шыр”, “юкмöсын шыр” – эня-ая узьöм образ, “кос пельсаö шыр усис” – рушкуасьöмлöн эвфемизм. Коми чайтöм-гöгöрвоöмъясын шырлöн оласногыс (му, поз) да вöраслуныс водзвыв урчитiсны шырöс хтоническöй да эротическöй образöн гöгöрвоöмсö. Татшöм ногöн, шырыс не сöмын ловлöн ипостась, но и фаллическöй образ. Хтоничносьтыс, чужтöмкöд да вöр-валöн сексуальнöй вынкöд йитчöмыс урчитöны шырлысь магия вынсö коми йöзкостса медицинаын. Шыр вирöн бурдöдлiсны пузчужöмаяслысь гöг килаяс, шыр поз тшынöн тшынöдлiсны чужтысь аньясöс, шыр лы пызьöн бурдöдлiсны трахома, сiтнас – виж висьöм да пагалöм. Йöзкостса приметаясын шыр вермис висьтавны поводдя, няньпиян, ытва йылысь, кос али зэра лоö гожöмыс, вештыны чардби. Литература: Доронин 1938, Доронин 1948, Микушев 1980, Рочев 1984, Рочев 1988, Плюснин, Уляшев 1990, ИИ ЧМ. О. Уляшев ЫДЖЫД ВИДЗ быдлаын. Медводдза луннас, сiдз шусяна Сöстöм выльлунö, быть пывсьылiсны, идрасьлiсны керкаын. Водз асывнас нывъяс исласьлiсны карнанъясöн да шуалiсны: “Быдмы, шабдiöй, карнанöй кодь вöсни да кузь”. Тайö исласьöмыс вöлi йöввыв öбрад цикллöн бöръя юкöнöн. Ыджыд видз дырйи комияс некутшöм öбрад эз нуöдлыны, эз ворслыны ни рытпуклыны. Уджалiсны горт гöгöрын, дасьтiсны гöра-кöдза кöлуй. Öбрадасьны заводитлiсны сöмын берба лунö, Ыджыд лунöдз медбöръя вöскресеннянас. Берба лунö быд вичкоын вежöдöны берба да кевмысьöмöн бласлöвитöны сiйöс. Вежöдöм бербаыс вöлi торъя магия вына. Сiйöс дыр видзлiсны öбразъяс дорын. Бербаöн тайö луннас швачöдлiсны йöзöс да подаöс, медым найö вöлiны дзоньвидзаöсь. Бербасö пуктылiсны жытникъясö, медым сiйö видзис жытник вевтсö тöлысь. Швачöдлiсны челядьöс да лыддьылiсны нимкывъяс, медым найö эз висьны. Чайтлiсны, мый та бöрын челядь лоöны дзоньвидзаöсь, кутасны бура быдмыны да оз мöдны висьны. Ыджыд лунöдз вежöдöм бербаöн швачöдöмсö тöдлiсны и мукöд Кристосö эскысь войтыр. Берба лун бöрын заводитчö Ыджыд вежон, Ыджыд видзса медбöръя вежон. Тайö вежоннас быд лун шуöны Ыджыдöн. Рочьяслöн моз жö торъя тöдчанаöн вöлi Ыджыд Четверг. Ыджыд Четверг вылö войыс вöлi торъя öпаснöй, сы вöсна мый сэки лёк ловъяс лолiсны торъя активнöйöсь. Бöрыннас найö кувлiсны-вошлiсны Вежа Кристос Кыпöдчан лунö. Йöзкостса эскöмъяс серти, тайö войнас лёк ловъясыс лэбалöны ыджыд чукöръясöн, чукöртчöны öтилаö да висьтасьöны чöртлы лёк вöчöмъяс йывсьыныс. Лёк ловъясысь да тунъясысь видзчысьöм могысь öдзöс весьтö пуктылiсны сир пиньяс, игнавлiсны карта-жытник, öдзöс да öшинь куричьясас серпасавлiсны сирöн крестъяс. Висьталöны, мый Ыджыд Четверг вылö войнас чöртъяс скöрысь йирöны кöлöкöльнича жыннянъяс. Ыджыд Четвергö тöдмавлiсны локтан поводдя да овмöс йылысь. Чайтлiсны, мый Ыджыд Четверг вылö кö войыс кöдзыд, гожöмыс лоö омöль няньпияна. Вой кежлас ывлаö кольлiсны кöтöдöм дöра тор, а асывнас видзöдiсны: кынмöма кö – шабдi да кöнтусь (шоныд радейтысь быдмöгъяс) таво кöдзны оз ков. Четверг асывнас кö пужъялас, пужъялас нöшта нелямын лун. Водз асывнас (“кор ракаяс узьöны на”) месаньяс восьтылiсны пач öдзöсъяс да горöдлiсны мöсъясныслысь нимъяссö. Таысь пö гожöмнас мöсъясыс пондасны локны гортаныс асьныс. Мöсъясöс да вöвъясöс лэдзлiсны ывлаö, а месаньясыс öшинь пырыс артавлiсны найöс. Колiс артавны збыльсьыс унджыкöс, медым подаыс эз кув да бура вайсис. Сыктывса комияс куимысь кытшовтöдлiсны мöсъяссö керка гöгöрыс да юавлiсны: “Мöскыд локтiс?”. Чайтлiсны, мый таысь найö гожöмнас оз мöдны вошласьны. Перым-коми аньяс видзöдiсны, куйлiс кö подаыс войвывлань юрнас, сiдзкö, уна пода кулас, асыввылö кö – подаыс содас. Шондi петтöдз на петкöдлiсны пыркöдны вольпасьяс. Таысь бырлiс лудiк-пытш. Артавлiсны сьöм, медым сьöмыс вöлi во чöж. Мыссьылiсны ыргöн сьöма ваöн, медым вöлi тыр-бур олöм, а том йöз – медым чужöмас ворсiс вир. Месай пуктылiс пожйö сьöм, пыркöдлiс сьöмсö да шуалiс: “Мед сьöмыс лоö пож розь мындаыс жö”. Перым-коми аньяс кодкöдкö петлiсны кыйсьысь лэбачьяслысь “син кöртавны”. Месаньыс рузумöн кöртавлiс тув, а мöдыс юалiс: “Мый вöчан, мый кöрталан?”. Месаньыс вочавидзлiс: “Курöг сёйысьяслы син кöртала, кутшлы, ракалы, катшалы да мукöдлы”. Печораса кыйсьысьяс Ыджыд Четвергö югдытöдзыс вайлiсны гортаныс тусяпу росъяс да ньыв чурка. Некымын рос пуктылiсны матич улас, а коляссö сотлiсны джодж шöрас да чеччавлiсны би вомöныс. Ньыв чуркасö видзлiсны во чöж. Чайтлiсны, мый та бöрын кыйсьöмыс лоö шуда. Емва вылын тусяпу росъясла ветлiсны аньяс. Росъяссö тшукöдлiсны керка-карта куричьяс весьтö, тшынöдлiсны подаöс да йöв кринчаяс, медым вöлi унджык нöк. Перым-комияслöн Ыджыд Четверг асылö тусяпуысла ветлiсны тшöтш и аньяс. Ыджыд Четвергö зiлисны бергöдны став овмöс уджсö, медым ставыс лючки-бура артмис во чöжыс. Вöралысьяс шондi петтöдз на мунлiсны вöрö, медым кодöскö лыйны, кöть нин ракаöс либö катшаöс. Чери кыйысьяс лэччылiсны ю дорö, кыскылiсны пыжъяссö лым вылö, тэчлiсны пыжас кыйсян кöлуйсö, пуксьылiсны да быттьöкö сынлiсны. Аньяс вурсисны либö печкисны, зiлисны унджык вöчны шондi петтöдзыс. Мужичöйяс видзöдалiсны жытникъяс да мукöд нянь видзанiнъяс. Эскылiсны, мый кöмасян кö тайö луннас мельнича джаджйын, во чöж лоан шуда, а кöмасьны кö пöжасян пельöсын, тулыснас вöралысьлы сюрас тар койт. Подалысь нетшыштлiсны гöн тор да мöд подалöн гöнкöд гуавлiсны гидын, медым гожöмнас найö йирсисны öтчукöрын. Тайö луннас быдлаын сотлiсны сов. Сотöм совсö чайтлiсны бурдöданаöн. Ыджыд Четверг рытö быть колiс пывсьыны да пасьтавны сöстöм паськöм. Пекничанас аньяс идрасисны, мыськисны джоджъяс, енпöвъяс, ыргöн дозмукъяс да с.в. Субöтанас пусисны-пöжасисны да серöдлiсны колькъяс. Литература: Гагарин, Дукарт 1968, Дукарт 1975, Заварин 1870/1, Кокшаров 1859, Конаков 1993, Микушев, Чисталев, Рочев 1971, Сидоров 1928, Янович 1903. жүктеу/скачать 1.79 Mb. Достарыңызбен бөлісу:
|