Ад быдлаын (< роч); ад гуран скр., шс.; вакрамеш

Н. Конаков

Преданиеын висьтавсьö, мый коркö Чов ю катыдын (Сыктывкарсянь неылын) йирö вöйöмаöсь кутшöмкö нывъяс. Та бöрын ыджыд пожöмъяслöн увъяс вылысь аддзывлöмаöсь еджыд паськöма кузь юрсиа печкысь нылöс. Тöлысьсö кö сайöдлöмаöсь кымöръяс, сiйö лэчыда шутёвтлöма да горöдлöма: “Югзьöд, еджыд!”. Та бöрын кымöръясыс пыр жö разавлöмаöсь. Тайö ныв пондаыс Чов ю катыдын оз позь вöлöм вöр пöрöдны.

Чорыд йöзöн шулiсны найöс, кодъяс лёка имитлiсны мукöд вылас. Чорыд морт вöлi вежöгтысьöн, лёк кутысьöн, топыдöн, сёрнитлiс этша да эз веськыда. Чайтлiсны, мый чорыд мортлöн и чужöм-баныс торъялö. Тадз, зыряна чайтлiсны, мый чорыд морт пемыд синма, а перым-комияс – мый мугöм сьöд рöма синма. Орччöн кö вöлi чорыд морт, некутшöм удж эз артмыв: стеклööн уджалысьлöн стеклöыс жугавлiс, дорсьысь эз вермы пузьöдны кöртсö да с.в. Чорыд мортлысь эз позь ньöбны пода – сылöн подаыс эз пиянасьлы да регыдöн кувлiс. Сылысь ньöбöм кöйдыс эз волы. Ачыс кö сiйö ньöблiс кодлыськö подаöс либö кöйдыс, то вузалысьыслöн кольöм подаыс эз нин пиянасьлы. Инмöдчылiс кö сiйö кутшöмкö пемöс дiнö, пемöсыс дугдылiс сöвмыны. Чорыд морт вермис не сöмын вомдзавны, но и синмавны. Вöлi кö сiйö кутшöмкö артельын, то позис водзвыв шуны, мый налöн уджыс оз ладмы: шуам, чери кыйысьяслы эз шед чери.

Чорыд мортлы паныдаöн вöлi шурыд морт. Öтл. удмурт шырыт ‘видзтысь, топыд’. Шурыд морткöд артмылiс быд удж. Шуам, ньöблiс кö сiйö дöра заводиттöм на гöрддзымысь, то вузасьысьыс пыр жö вузавлiс коляс дöрасö. Шурыд йöз вöлiны югыд юрсиаöсь. Имитлiсны кö чорыд морт да шурыд морт öтлаын, то вермылiс вынаджыкыс.

Литература: Сидоров 1928.

Н. Конаков

Чудь йылысь мифъяс паськалöмаöсь ёнджыкасö перым-комияс пöвстын. Чудь – тайö пемöс нисьö йöз (порсь кокаöсь, гöнаöсь), сьöдöсь. Чудьлöн муюгыдыс зэв ляпкыд: енэжöдзыс кинад судзан. Ляпкыд пондаыс и асьныс найö ичöтикöсь (чудьлы туруныс вöр кодь, чудь дзебсьö агас пинь улö). Няньяслöн “кустöн” быдмöм, муöдз шепъяс (нöшта: найö оз вöдитны нянь, сiйö ачыс быдмö) индöны чудьлöн тыр-бур олöм вылö. Челядьыс ветлöны да сёрнитöны чужöмсяньыс нин. Тайö пасйöд чукöрыс – Зарни нэмлöн концепция. Чудь мифъяслöн шöр пафосыс сыын, мый идеала чудь муюгыдсö вежö öнiя тырмытöмлунъяса муюгыд. Таын мыжа сöмын чудь. Та вöсна текстъясас тöдчöдöма чудьлысь ковтöм вöчöмторъяссö, мый вöсна и вежсис ставыс. Тадз, гöран муясын найö кодйöны гуяс, öжынöн турун ытшкöны, чер пыдди налöн тяпкан, няньсö вундöны шылаöн, сюсö видзöны чöрöс-гöленьын да с.в. Налöн муюгыдыс киссьö. Бöръя тшупöдсö пасйö “мыжö пöрöм” мотив: чудь нывбаба чышкö кагаыслысь сiтансö блинöн да öшйöдö блинсö енэжö. Тадзи сiйö пежалö енэжсö, Енмöс да Енöн сетöм сёян. Öтл. версияяс: чудь нывбаба крукалö енэжсö карнанöн, енэжыс качö вылö; чудь морт мудзö шылаöн вундöмсьыс да нетшкö кустсö кинас. Ен ёрö сiйöс, а енэжыс качö вылö.

“Паськыда” быдмысь куста сюсö вежö öти шепта “вывлань” быдмысь сю, заводитöны быдмыны джуджыд еджыд кыдзьяс. Мутлак чудьсö вежöны джуджыд йöз. Выль йöзыс сувтöдсьöны чудьлы паныд кыдз джуджыдъяс ляпкыдъяслы, еджыдъяс – сьöдъяслы. Йöзыс оз нин кужны чужöмсяньыс сёрнитны да ветлыны, да и мöвпавны найö заводитöны мöд ног. Чудь оз велав вежсьöмъясас да гуалö асьсö. Чудьлöн асьсö виöм понда олöмын чужö кулöм, а ачыс чудьыс демонизируйтчö. Татшöм ногöн, мифа чудь кадсö вежö “джуджыд” йöзлöн профаннöй (эмпирическöй) кад.

Мутлак чудьлöн кулöмыс кыкпöвставсьö разнöй версияясын. Медъёна паськалöма чарла аддзöм мотив. Чарласö аддзöмыс пасйö вежсьöмъяс. Чарлаöн туйтöг вöдитчöмыс вайöдö кулöмöдз: 1) чарлаыс путкыльтö пыжсö, чудь йöз вöйöны; 2) чарлаыс вундö чудьлысь юрсö, пытшсьыс петöны гадъяс, гагъяс, ловъяс да морт; 3) чарласö аддзöм мысьт чудь йöз пöрöны пежгагъясö. Демонизируйтчöм чудьсö шуöны чудъясöн, но найö эмпирическöй кадся мифа ловъяс да торъялöны Зарни кадся чудьысь. Перым-комияс чайтлiсны, мый чудъяс – лёк ловъяс, олöны пемыдiнын, овтöм керкаясын, пывсянъясын, рынышъясын, гöбöчьясын, вöрын, ваын да с.в. Найö мутлак чудь кодьöсь жö, но тыдавтöмöсь, вермöны петкöдчыны мортöн либö пемöсöн. Чудъяслöн оласногыс йöзлöн кодь жö: найö гöтрасьöны да петöны верöс сайö, чужтöны челядьöс, сёйöны, юöны, видзöны пода да с.в. Чудъяс “вежлалöны” челядьöс (видзöд вежöм), найö ловъяс пыдди куття дырйи (видзöд куття-войса).

Мифопоэтическöй традицияын чудь улын гöгöрвосьöны: 1) коми багатыръяс да язычникъяс; 2) мöд, абу коми войтыр; 3) рöзбойникъяс; 4) раскольникъяс. Перым-коми чайтöм-гöгöрвоöмъясын чудь – багатыръяс, легендаса геройяс, панöны уна сикт да карвыв джуджыд кыркöтшъясö (Курöгкар, Ошмыс, Быльдогмыс, Карла да с.в.). Чудь карвывъяссö вöлi йитöма му ув туйясöн. Чудь багатыръяс вöлiны джуджыдöсь да зэв ёнöсь. Та вылö индöны сэтшöм фольклор мотивъяс, кыдз, шуам, карысь карö нöшъяс, черъяс, изъяс шыблалöм, джуджыд кыркöтшсянь керъяс гöгльöдлöм. Багатыр чудь вермасьö вöрöгкöд, Перымса Степанкöд, хтоническöй вынъяскöд (видзöд Пера), вайö культура (видзöд Кудым-Ош). Кор воöны выль йöз (öнiя йöзлöн пöль-пöчыс), паськалö Кристос эскöм, заводитчö выль кад, чудь багатыръяс гуалöны асьнысö. Мöд версия серти, найö пöрöны изйö. Кулöм бöрас видзöны ассьыныс панöм сиктъяссö.

Зыряналöн да перым-комияслöн чудьлöн важйöз-язычникъяс образыс öткодь. Пырттöм чудь йылысь медуна висьталöны преданиеяс, кодъяслöн сюрöсыс тэчсьö урчитöм сиктса олысьясöс пыртöм бöрын чудьлöн вошöм мотив гöгöр. Пыртчöмаяс лоöны комиясöн, а пырттöмаяс кольöны чудьöн. Найö: 1) гуалöны асьнысö; 2) мунöны сэтысь; 3) сувтöны Перымса Степанлы паныд.

Чудьлöн асьсö гуалöм йылысь преданиеяс паськалöмаöсь медъёна. Чудь карвывъяс вöлöмаöсь рöчьяс йылын. Öнi найöс нимтöны чудь рöчьясöн. Эмöсь и чудь тыяс. Сэтысь сюрöм гырысь лыяссö чайтöны чудь багатыр лыясöн. Чудьяс олöмаöсь горсъясын, тшöкыдджыка мукуаясын либö гуранъясын, кодъяслысь вевтсö пыклöма нёль сюръя. Преданиеясса геройяс öтдортчöны выль эскöмысь, пырöны мукуаясас, кералöны сюръяяссö да гуалöны асьнысö. Татшöм гуяссö нимтöны чудь гуясöн. Сэнi вермö петкöдчыны чудь, каститчö. Та вöсна чудь гуяссö чайтöны пежöн. Но XX нэмся 20-30-öд воясö на чудь гуяс дiнас нуöдлiсны кодрасян öбрадъяс, перым-комияс – важэсö касьтылöм (видзöд важ йöз). Чудь гуяскöд йитчöмаöсь чайтöм-гöгöрвоöмъяс чудь кладъяс йылысь. Кладъясыс пö вермöны петкöдчыны пемöсъясöн.

Асьсö гуалöм кындзи эмöсь преданиеяс чудь пышйöм йылысь. Чудь пыксьö пыртöмыслы, но векжö мунö. Чайтöны, мый чудь мунöма войвылö да вошöма ненечьяс да обса йöгра пиын. Чудьлысь мунан туйсö пасйöны иннимъяс. Пезмöгысь найö мунöмаöсь Важ йöз туйöд. Мындакö чудьыс кулöма Эжва катыдын Чудин ты да Чудин лыа вылын. Висер вылын кутшöмсюрö иннимъяс йитöны нимтöм чудь нывбаба пышйöмкöд да кулöмкöд. Сылöн воштöм кöлуй серти нимтöма шоръяс, тыяс, юяс. Сапöга шорын сылöн вöйöма сапöгыс, Сiсь пася тыö сiйö шыбитöма пасьсö да с.в. Ньывсер юö сiйö вöйö ачыс, та вöсна йöз костын ю нимсö артмöдöны ныв сьöра тэчасысь.

Удораын паськалöмаöсь преданиеяс Удораса öксань йылысь. Сiйö вöйтчö, кор Перымса Степан из пур вылын вуджö юсö. Чудь оз вермы пышйöдны став зарнисö и дзебö сiйöс нимкывъя местаясын да ты пыдöсъясын.

Чудь дiнö отношениеыс кык нога. Чайтöны, мый насянь мунöны комияс, но важ енъяслы эскöмсö лыддьöны культура боксянь бöрö кольöмöн, тырмытöмлунöн: öтл. Сыктывкар бердса да Эжва катыдса чудь кодь, чудъявны, шöр сыктывса чуйдалны, Эжва кывтыдса чуйтьчины ‘лоны’öтдортчысьöн, полысьöн. Чудь йитчöма “пежкöд”. Та понда чайтöны, мый чудь мунö “сöтанасянь”. Перым-комияс лыддьылiсны чудьсö асланыс важ пöль-пöчьясöн, но векжö шулiсны, мый чудь – важ енъяслы эскысьяс, а найö – веськыд эскысьяс. Чудьлöн мукуаяслы да гуяслы паныд сувтöдсьöны веськыд эскысь перым-комияслöн керкаяс. Пыртчытöм чудьöс эз сибöдлыны керкаö, найö узьлiсны пывсянын, гидын, рынышын да с.в. Тайö чудьсьыс и артмöмаöсь пеж ловъяс: пывсян чудь, рыныш чудь, гидня чудь да с.в. Войнас чудь шöйтöма да кыйöдчöма öшиньясö. Та вöсна перым-комияс пондöмаöсь сиптавны öшиньяссö.

Тышкасьысь чудь ассоциируйтчö öтдор войтыркöд либö рöзбойникъяскöд. Чудь рöзбойникъяслöн юрнуöдысьыс тун, вины сiйöс позьö сöмын нянь пуляöн либö ыргöн кизьöн лыйöмöн. Гуöм зарнисö найö видзöны вöрын нимкывъяинъясын, юкмöсъясын. Кор рöзбойникъяссö босьтöны кытшö да топöдöны, найö зарниыскöд тшöтш гуалöны асьнысö. Перым-комияс öткодявлiсны чудьсö тшöтш и вöрса скитъясын олысь важ крестлы юрбитысьяскöд.

Чудь йылысь коми преданиеяс пырöны татшöм жö роч да мукöд войтыръяслöн преданиеяс ареалö, кодi нюжалöма Европа войвылын Скандинавиясянь Уралöдз. Лунвылын сiйö паськалö Ладога бердса муясöдз, Вöлöгда обласьтлöн войвылöдз да асыввылöдз, Перым-Коми Автоном кытшмуöдз. Сибирö преданиеяссö нуисны Европа войвылысь вуджысьяс.

Комияс чайтлiсны, мый шевалöн месайяснас вöлiны тунъяс. Шеваыс сетсьылiс налы тунасян кужöмыскöд тшöтш. Либö найö вöчлiсны сiйöс гылалöм пач лыс емъясысь, ляз вöчигöн шыбитöм льöм тусь изъясысь, пöимысь, ёгысь либö косьтöм да бусöдз зыртöм пежгаг юкöнъясысь. Шевасö видзлiсны гöбöчын либö гидын шева чуманын. Шева чуманын вöлi тунлöн олöмыс: шыбитны кö чумансö биö, туныс регыд кулас. Войнас шева месайлы колiс вердны сiйöс аслас вир-яйнас либö йöлöн да дугдывтöг уджöдны. Та вöсна туныс зiлис гусьöн сетны шевасö мукöдлы. Чайтлiсны, мый шевасö кокниджык сетны аскутöм нормаяс торкалысьяслы (кодi ёрччö, оз кевмысь, сёйтöдзыс оз пернапасась, асывнас оз мыссьы да с.в.). Тунъяс пуктылiсны шевасö сёян-юанö да надейтчисны, мый мортыс вунöдас пернапассö чöвтны. Шевасö кольлiсны тагöс вылö, гид пос вылö, туйвежö, потшöс тувъясö, тёпканъясö да с.в., сэтшöминö, кöнi позис джöмдыны, тангысьны, пöрöдны додь да ёрччыны. Чайтлiсны, мый шева вуджö öти мортсянь мöдлы öти дозмукысь сёйигöн, öтлаын пывсигöн, окасигöн да кувтöдз колльöдчигöн. Удорасаяс чайтлiсны, мый шева пежгагöн пырö му вылын тöдлытöг унмовсьöм морт пытшкö. Чайтлiсны, мый шева овмöдчöджык нывбаба пытшкö (торйöн нин том нывъясö, рушкуа да чужтысь нывбабаясö, пöрысь нывъясö). XX нэм заводитчигöн кöнсюрö (шуам, печорасаяс) чайтлiсны, мый пöшти став нывбабаыс шеваа, сы вöсна мый сiйö пырö на пытшкö верöс сайö петiгас, а мужичöйяс шевасьыс кулöны.

Йöзкостса чайтöмъяс серти, шева пырöмысь видзчысьны кокниджык, чем сыысь мынтöдчыны. Эскылiсны, мый шева оз вермы пырны морт пытшкö, пасйисны кö шуöмöн, мый шеваыс орччöн. Та вöсна тасьтiысь юрси сi ли ёгтор аддзигöн, кыв йылысь либö вом дорысь ёгсö кылiгöн колiс сьöлыштны да шуны: “Тьпу, шева пырö”. Ывлаын нянь вылысь колiс пöлявны буссö да сiяссö, йöзын сёйигöн сёянсö эз сöмын пернапасавлыны, но и пöльыштлiсны сы вылö. Видзчысисны шеваа морткöд öти тасьтiысь сёйöмысь, öтлаын пывсьöмысь, кувтöдзыс сылы вомас пуктылiсны ладан тор.

Чайтлiсны, мый шева овмöдчö морт пытшкö, ветлö öтилаысь мöдлаö, “йирö” чöскыдджыкинъяссö, торйöн нин син еджыдсö, да вочасöн гöнöссьö. Чайтлiсны, мый шева понда висьö сьöлöм, кынöм, юр, шеваöс чайтлiсны пöдöм висьöм помкаöн. Но медводз шева вылö индöны кадысь кадö овлысь этш воштöмъяс, сёрнияс да вöчöмторъяс, кодъясöс водзсö сiйö мортыслысь эз казявлыны, тшöкыда – вежöр вожалöм. Кодъяс аддзылöмаöсь татшöм садь воштöмъяссö, висьталöны, мый дзик дзоньвидза нывбаба друг пондö элясьны юр висьöм вылö, воштö вытьсö, а сэсся сiйöс виччысьтöг нинöмабусьыс топöдö шыблалан висьöмöн висьысьöс моз, сiйö воö экстасöдз да оръясьысь чилзан гöлöсöн пондö шева нимöн висьтасьны водзö йывсьыс. Видзöдысьяс вермисны тöдмавны шева месайлысь нимсö, юавны асланыс водзö олöм йывсьыс, матыса йöз йылысь, вошöм кöлуй да пода йылысь. Чайтлiсны, мый сёрнитiс пежгаг юрысь вöчöм шева, эз кö, дерт, туныс кöртав сылысь кывсö вöв сiöн. Шеваöс чукöстны позис лёк дукöн, шома либö курыд сёянöн, нидзулöн, налимöн, мыйöнкö сiсьöн либö мöдарö – мелi сёрниясöн да ошкöмöн, кöсйысьöмöн могмöдны колана сёянöн. Шеваа йöзлöн водзö йылысь висьтасьöмъяснас сиктъясын пöльзуйтчисны ожманöдз на: нарошнö вöчлiсны сiдз, медым нывбабасö пондiс шыблавны, да “сы пытшкын пукалысь ловсянь” тöдмавлiсны тышкасьысь салдатъяс йылысь, кодъяссянь дыр нин эз волы некутшöм юöр.

Позис пасйыны и травестизм: асьнысö ай нимöн шуысь шеваяс вылö ыстысьöмöн нывбабаяс пасьтавлiсны мужичöй паськöм, куритчисны, юисны, ёрччисны, öтдортчисны нывбаба уджъясысь. Вöлi и сэтшöмтор, кор мортыс кылiс шевасö ракаöн, петукöн да шыблалiгас имитируйтiс лэбачсö (чеччалiс, кравзiс да кикуруллюасис).

Шева олiс морт пытшкас сылöн кувтöдзыс, а кулöм бöрас вуджлiс мöд морт пытшкö. Йöзкостса медицина шевасö бырöдны эз вермы, а сöмын кокньöдiс висьысьлысь аскылöмсö шыблалiгас. Медым эз пöд, шеваа йöз кöртавлiсны сьылiсö вöв сiöн либö ермöг сунисöн. Мед шева эз ветлы вир-яйöд, тöдысь шомöн пасйылiс стенысь ув гöгöр, а висянин гöгöрыс кытш да шулiс: “Ув мозыс жö мед и шеваыс öтилаын сiсьмас”. Шыблалiгас висьысьсö вевттьылiсны ермöг чышъянöн либö пуксьöдлiсны сы вылö кагаöс, кодöс сяммис лöньöдны пеж вынсö. Но векжö чайтлiсны, мый зэв вына тöдысьяс торъя öбрадъяс да колана турунъяс отсöгöн вермисны перйыны да вины шевасö: пурт сылы эз мöрччы, сiйöс вурлiсны кучик кöшельö да шыбитлiсны биö, шеваыс ёна трачкöмöн сотчылiс. Кöнсюрö чайтлiсны, мый шевасö позьö вöтлыны вичкоын. Шеваа нывбабаяслы колiс пасьтавны кулöмалы моз ассянь емöн да гöрöдъястöг вурöм еджыд дöра сарапан да чувки да сулавны служба чöжыс. Юрсисö найö разьлiсны да кык орчча пельöсöдыс кöртавлiсны юрас дорöсавтöм сьöд чутъяса еджыд ситеч чышъян.